يحدث في مصر

رشا مجدى :مساء الخير أعزاءنا المشاهدين وأهلا بكم فى حلقة جديدة من برنامج يحدث فى مصر اليوم بنستكمل مع اللواء جلال سيد الأهل مدير الإسكان لنناقش معا ما تم تنفيذه على أرض الواقع من المشروع
احمد بصيلة:أهلا بكم مشاهدينا الكرام ليلة سعيدة إن شاء الله مع يحدث فى مصر سنتحدث فى هذه الحلقة و فى هذه الليلة عن بعض المحاور المهمة فى هذا المشروع الحيوى ولكن سيادة اللواء قبل أن نتابع مع سيادتك هذه المناقشة اسمح لنا نشوف هذا التقرير من أرض الواقع ثم نعود لسيادتك مرة أخرى
ل / جلال سيد الأهل:إن شاء الله
فاصل
المذيع :ابنى بيتك ، بيت العيلة البيت الأول ، البيت الريفى وغيرها من المشروعات التى يفخر بها المصرى ، ففى المرة الأولى يتم تنظيم المجتمعات العمرانية المتكاملة للشباب بتوفير قطع الأراضى لهم فى مختلف أنحاء الجمهورية
أحد المسئولين:مشروع ابنى بيتك 42 ألف قطعة تمثل تقريبا 97 % من عدد الأراضى المخصصة على مستوى الجمهورية المشروع ببساطة هو قطعة أرض بيستلمها المستفيد اللى هو الشاب محدود الدخل مساحتها 150 متر بيبنى على 50 % من مساحتها 75 متر مربع بيحصل على دعم 15 ألف جنيه للمبانى بتبقى جاهزة على الترخيص
المذيع:حجم الإنجازات فى هذه المشروعات مسألة لا يختلف عليها أحد خاصة بعد أن وصلت أعمال البناء فيها إلى 99 % بعد توفير كل متطلباتهم من جانب وزارة الإسكان
المسئول:مشروع بيت العيلة الوحدات زى ما قلت لسيادتك 163 متر كلها منفذة للشباب المقبل على الزواج كل ما يلزم من خدمات موجودة فيه عندنا 12 محل حاليا شغالين وفيه 9 فى كل مرحلة احنا جارى التنفيذ فيهم إن شاء الله فى نهاية الشهر اللى احنا فيه دوة فيه مول تجارى عندنا ، فيه مدرسة تعليم أساسى إن شاء الله تنتهى وفيه المسجد الكبير اللى هيخدم المنطقة
المذيع:المشروعات ستسهم بشكل كبير فى تحقيق سياسة الدولة فى تخفيف الكثافة السكانية بالمدن القديمة وستعمل أيضا تلك المشروعات على خلق مجتمعات عمرانية متكاملة بالمدن الجديدة شاملة كافة الخدمات التى تقوم بتنفيذها وزارة الإسكان داخل المواقع بالمدن المختلفة
احمد بصيلة:عدنا إليكم مرة أخرى مشاهدينا الأعزاء وإلى ضيفنا فى الاستديو اللواء جلال سيد الأهل سيادة اللواء سمعنا فى التقرير أكثر من مشروع ابنى بيتك ، بيت العيلة ، البيت الريفى يعنى خلينا نتحدث بشكل تفصيلى أكثر عن بيت العيلة وابنى بيتك ما الفرق بين المشروعين يا فندم
ل / جلال سيد الأهل:بالنسبة لإبنى بيتك ده عبارة عن أرض بنوفرها للمواطن 150 متر بسعر 70 جنيه إجمالى ثمن الأرض 10500 جنيه ( عشرة آلاف وخمسمائة جنيه ) المواطن بيدفع 10 % اللى هى 1150 بندى له هذه الأرض يبنى عليها وحدة سكنية 63 متر حوالى يعنى يبنى على 75 ( 50 % ) بندى له دعم 15 ألف جنيه على 3 مراحل لو بنى الأساسات والأعمدة بندى له 5000 جنيه لو بنى السقف بندى له 5000 جنيه لو شطب بندى له 5000 جنيه يعنى 15000 جنيه بنديهم لإبنى بيتك على 3 مراحل ده بالنسبة لإبنى بيتك ، ابنى بيتك كان فيه بعض التسهيلات اللى احنا عملناها لو قلنا المفروض إنه يبنى فى خلال سنة زودناها له إلى 15 شهر قلنا له لو انت بنيت 3 أدوار هنعفيك من ثمن الأرض كلها لو انت بنيت 3 أدوار ممكن تبنى اللى هو الأرضى والأولانى والثانى ممكن تبيع الدور الأول والثانى فورا والشخص اللى هيشتريها منك هندى له 15000 جنيه كان الدعم لو هو
رشا مجدى:هتدوا الشخص اللى اشترى منه 15000 جنيه ليه
ل / جلال سيد الأهل :نعم يا فندم
رشا مجدى:هتدوا الشخص اللى اشترى منه 15000 جنيه ليه
ل / جلال سيد الأهل:لإنه الشخص ده يعتبر محدود الدخل اشترى من حتة الأرض ومن أى مواطن
رشا مجدى:يعنى هتدى اللى اشترى الأرض 15000 عشان بنى ال3 أدوار وهتدى للى اشترى 15000
ل / جلال سيد الأهل:لا اللى اشترى الأرض لو بنى الدور الأرضى بدى له 15 % بس هو ممكن يبنى 3 أدوار أعفيه من ثمن الأرض الباقى يعنى هو دفع 1000جنيه من ال10000 أعفيه من ال9000 الباقية وثانى ميزة بعد كده أقول له لو انت بنيت ال3 أدوار لو انت عاوز تبيع الدور الأول والثانى لأى مواطن ينطبق عليه الشروط ضمن المشروع القومى المواطن اللى هيشتريها من حضرتك هو ده أبيعها له بسعر معين لكن المواطن اللى هيشترى الأرض دية هدى له 15 % زيه زى أى مالك
احمد بصيلة:طب إيه بقى الشروط اللى انتوا حددتوها اللى تنطبق على المشترى ومن ثمة تنطبق على الراجل الثانى
ل / جلال سيد الأهل:إن هو يكون سنه من 20 سنة لغاية 40 سنة ، ما يكونش حصل على أرض قبل كده ، الأرض ما يكونش لا هو ولا مراته طبعا ، العيلة اللى هو الزوج والزوجة والأولاد القصر حتة أرض فقط لا غير
احمد بصيلة:ما يكونش حصل على أرض من وزارة الإسكان
ل / جلال سيد الأهل:مدعومة وما يكونش حصل على وحدة سكنية مدعومة برضه قبل كده
احمد بصيلة:طب بيت العيلة بقى
ل / جلال سيد الأهل:بيت العيلة هو عبارة عن نمط من الأنماط زى وحدات سكنية تمليك احنا اللى بنبنيها يعنى ابنى بيتك احنا اللى بندى له الأرض وهو اللى بيبنيها لكن بيت العيلة احنا بنبنيها زى الوحدات السكنية 63 متر برضه بشروط محددة زى الشروط نفس بتاعت ابنى بيتك وبنخصصها للمواطن اللى عايز يتجوز 63 متر وبرضه بنديها دعم 15000 جنيه
رشا مجدى:طب بالنسبة لابنى بيتك هو كذا حد اشترى كل حد هيبنى بشكل وللا تعملوها لها ديزاين معين عشان تبقى كلها بشكل هندسى واحد
ل / جلال سيد الأهل:هو ابنى بيتك فى البداية كنا طارحين 20 ألف قطعة فى المدن ال13 بصينا لقينا 105 ألف مواطن تقدموا فى خلال شهر احنا فتحناها من 15/1/2007 إلى 15 / 2 / 2007 105 ألف مواطن تقدموا
رشا مجدى:وانت عندك كام حتة أرض
ل / جلال سيد الأهل:طرحنا 20 ألف قطعة
رشا مجدى:بس
ل / جلال سيد الأهل:بس القيادة السياسية الحقيقة سيادة الريس لما لقى الأعداد دية قال كل من ينطبق عليه الشروط ياخد حتة أرض وكان هذا تحدى لوزارة الإسكان
رشا مجدى:طب عوضتم الفرق منين
ل / جلال سيد الأهل:جبنا الفرق دية وفقنا طبعا 100 ألف قطعة أرض عشان نوفر الأعداد دى كلها خططنا نفذنا
رشا مجدى:100 ألف قطعة أرض
ل / جلال سيد الأهل:أيوة يا فندم
رشا مجدى:100 ألف قطعة أرض بجانب القطع القديمة وللا حطيتوها فى أماكن أخرى
ل / جلال سيد الأهل:لا ال 20 ألف قطعة أرض كنا مخططينها زودنا عليهم 80 ألف
رشا مجدى:فى نفس المكان
ل / جلال سيد الأهل:آه طبعا فى ال13 مدينة
رشا مجدى:آه ، فين المدن دى قل لى بقى
ل / جلال سيد الأهل:هقول لك 13 مدينة
رشا مجدى "هم إيه
ل / جلال سيد الأهل:مدينة 6 أكتوبر ، مدينة بدر ، مدينة العاشر من رمضان ، الصالحية ، المنيا ، أسوان، أسيوط ، سوهاج ، الخديعى ، برج العرب ، أنا وصلت كام
رشا مجدى:طب بالنسبة للأماكن الأماكن دى هتبقى فى المناطق المخصصة فى الصحراء وللا مالهاش دعوة بها
ل / جلال سيد الأهل:لا ده داخل المدن
احمد بصيلة:داخل مدن جديدة مثلا
ل / جلال سيد الأهل:نعم
احمد بصيلة:زى مثلا المنيا الجديدة مثلا
ل / جلال سيد الأهل:بنى سويف ، الفيوم ، الجيزة
رشا مجدى:بس كانوا ال105 وللا تعديت ال105
ل / جلال سيد الأهل:لا ال 105 اللى انطبق عليهم الشروط حوالى 92 ألف مواطن
رشا مجدى :وفرتم ال92 ألف
ل / جلال سيد الأهل:وفرناهم وسلمناهم
رشا مجدى :وما زادش العدد ما حدش اتقدم أكثر
ل / جلال سيد الأهل:لا ما احنا قلنا احنا فتحناها لمدة شهر فقط لا غير قدم عليهم 105 ألف وفرنا 100 ألف قطعة أرض
احمد بصيلة:وصلنا لفين دلوقتى فى المشروع ده يعنى
ل/ جلال سيد الأهل:وصلنا إننا سلمنا كل الأراضى
احمد بصيلة:سلمت
ل / جلال سيد الأهل:يوم 31 / 12 / 2009 كنا مسلمين قطع الأرض التحدى اللى الأستاذة رشا قالت عليه فى هذا الموضوع إن احنا خططنا الأراضى دية وفرنا المرافق والخدمات بتاعتها تجارى
رشا مجدى:لا هنيجى للحتة دى قبل ما نتكلم فى النقطة دى خلينى زى ما حضرتك قلت إنك سلمت والمشروع بيعجب شريحة كبيرة جدا من الشباب وإلى آخره سمعنا عن مشاكل احنا بنقرأ سمعنا عن مشاكل حدثت وصلت إنه يعنى أنا آسفة إنى هقول ده إنه حد الاختلاس وإن فيه تحقيقات أمام النيابة
ل / جلال سيد الأهل:اللى حضرتك بتقولى عليه حاجة ثانية خالص بعيدة عن المشروع
رشا مجدى:أمال فى مشروع إيه بقى
ل / جلال سيد الأهل:هقول لحضرتك الشركة المنفذة للمرافق
رشا مجدى:فى ابنى بيتك
ل / جلال سيد الأهل:فى ابنى بيتك الشركة المنفذة والمهندس اللى كان بيشرف على الشركة المنفذة للمرافق عشان أوصل للأراضى وأرفقها وأسلمها للناس المستفيدين ده اللى حصل فيه
رشا مجدى:اختلس
ل / جلال سيد الأهل:بس اللى هو
رشا مجدى:اختلس منين بقى
ل / جلال سيد الأهل:مش اختلس خد رشوة من الشركة المنفذة اللى هى موجودة حاليا فى النيابة وفى المحكمة الأراضى اللى احنا خططناها دية لازم نوصل لها المرافق بتاعتها طرحنا المرافق رسيت على شركات فيه مهندسين بيشرفوا على هذه الشركات
رشا مجدى:وزارة الإسكان هى اللى اكتشفت
ل / جلال سيد الأهل:آه وهى اللى بلغت
رشا مجدى:طيب معلش بعد ما حصلت الواقعة دى واكتشفتوا الرشوة هل ده أثر على جودة المرافق
ل / جلال سيد الأهل:لا طبعا
رشا مجدى:طالما فيه حصل بقى
ل / جلال سيد الأهل:لا طبعا
احمد بصيلة:هل تم استبدال هذه الشركات بشركات أخرى وللا استمرت
ل / جلال سيد الأهل:استمرت ده هى حاجات إدارية موجودة مع احترامى سورى هو موجود طبعا فى النيابة ما أقدرش أخش فى تفاصيل هذا الموضوع ولكن الشركة هى اللى بتستكمل هذا الموضوع بنفس المواصفات اللى موجودة وطبقا للطرح اللى موجود ولا يؤثر على جودة وكفاءة المرافق
احمد بصيلة:طب سيادة اللواء الاستثمار فى العقارات عندنا احنا فى مصر يعنى استثمار مرغوب فيه جدا هو استثمار آمن ومربح ومريح وساد فى فترة من الفترات شعار سقع وبيع يعنى اشترى حتة أرض اشترى شقة وسيبها تغلى بعد كده لأى سبب من الأسباب وبعد كده بعها تكسب هل ده ضوابط ابنى بيتك أتاحت أو تركت ثغرات لإن ممكن حد يعمل كده
ل / جلال سيد الأهل:لا أولا ابنى بيتك اللى أنا قلته لحضرتك إن أنا بدى له الأرض المفروض طبقا للشروط إنه ينفذها فى خلال 12 شهر زودنا له 3 شهور نظرا للطلب فبدل ما ينفذها فى 12 شهر ينفذها فى 15 شهر الراجل اللى مش هينفذها فى هذا الموضوع تسحب منه آدى واحدة ، نمرة 2 جميع التوكيلات ممنوعة إن أى شخص هو اللى يتعامل مع نفس المدينة منعنا أى توكيلات عشان المطمع لإنه الشخص فى هذا الموضوع ، هل كل الضوابط اللى أنا قلت لحضرتك عليها ممكن لا قدر الله ده بيدينى أسمعه بس مفيش أوراق رسمية تقول إنه باع هذه الأرض ما أقدرش أثبته أوراق رسمية ولكن كل من يثبت إن هو باع هذه الأرض أو وكل حد فى هذا الموضوع بيتلغى الطلب
احمد بصيلة:بس هو بيبقى مسموح له إن هو يبيع
ل / جلال سيد الأهل:لا
احمد بصيلة:بعد ما يبنى الوحدة
ل / جلال سيد الأهل:بعد 5 سنوات يعنى قطعة الأرض دى إدناها له يبنى الدور الأرضى ما سمحناش له إن هو يتصرف فى الدور الأرضى ده إلا بعد 5 سنوات
احمد بصيلة:بس حضرتك قلت لو بنى 3 أدوار ممكن يبتدى يبيع
ل / جلال سيد الأهل:ممكن لإنه بنى ال3 أدوار وفر لى 3 وحدات وبالتالى إن أنا ممكن يستفيد بها مواطن آخر هدعم فيها
احمد بصيلة:وهو نفسه يستفيد إن هو يبيع
ل / جلال سيد الأهل:وهو نفسه يستفيد
رشا مجدى:طب سيادة اللواء برضه أنا هرجع لنقطة مهمة يعنى انتوا كوزارة إسكان فيه ناس بعد ما خدت الأرض حصلت تجاوزات فى طريقة البناء يعنى ما كانوش ملتزمين بالطريقة اللى الوزارة وضعتها لطريقة البناء وكان فيه تجاوزات عملتوا معاهم إيه يعنى بمعنى أصح إتقالت إن فيه كمان عمليات مصارحة من المواطنين نفسهم تصديتوا لهم إزاى يعنى عملتوا إيه وفيه ناس بعد ما اشترت الوحدات دى أو الأراضى دى وصلت لناس غير مستحقيها عملتوا إيه يعنى هل وقعت تحت إيديكوا احنا جاءت لنا بعض المعلومات هل وقعت تحت إيديكم حالات زى دى وعملتم معاها إيه
ل / جلال سيد الأهل:اللى انا عايز أطمئن حضرتك قلت لك إن احنا تقدم لنا 105 والمنطبقة عليهم الشروط وصلوا ل 92 ألف
رشا مجدى:لا أنا بتكلم بعد ده حصل إيه
ل / جلال سيد الأهل:بعد ده سمسرة إن واحد ممكن يكون واخدة بال حضرتك مقاول أو ما يكونش مقاول يقول له أنا هبنى لك قطعة الأرض دية ويعمل بينه وبينه عقد ولا قدر الله يختفى هذا الشخص ده عبارة عن عقد مقاولة بين مستفيد وبين شخص آخر وبيحصل حصلت احنا بنشترط إن يكون فيه مهندس موجود فيه حاجة اسمها مطابقة بعد كده
رشا مجدى:بتدى مخالفة للى ما بيطابقش
ل / جلال سيد الأهل:طبعا وما بدخلوش كهرباء
احمد بصيلة:يعنى لازم يكون الرسومات
ل / جلال سيد الأهل:أولا أنا الرسومات بديها له ببلاش ، مياة وصرف وكهرباء ومدنى كل الكلام ده بديهو له ببلاش يعنى ما كانش بيعمل فيها أى حاجة دى هدية من وزارة الإسكان إلى الشخص ، نمرة 2 لازم يلتزم بهذه الرسومات ، نمرة 3 لو أنا جيت علشان يقدم بعد كده مطابقة زى أى حد عشان أدخل له المرافق والكهرباء لو لقيت فيه هذا الموضوع ما بدخل لوش كهرباء لازم يعدل نفسه ويغير الأوضاع بتاعته
رشا مجدى:سيادة اللواء احنا عندنا مشروع ثانى هنتكلم فيه مشروع مهم جدا يعنى بيهم شريحة كبيرة إسمح لنا نطلع لفاصل ونرجع نتكلم على هذا المشروع
فاصل
احمد بصيلة:رجعنا لكم مرة ثانية مشاهدينا الأعزاء والحديث متواصل عن المشاريع السكنية الكبيرة التى تنتهجها وزارة الإسكان واتكلمنا قبل الفاصل عن مشروع ابنى بيتك الآن بنتحدث مع اللواء جلال سيد الأهل عن مشروع آخر لا يقل أهمية فى الحقيقة وهو المشروع الأولى بالرعاية مشروع وحدات المواطنين الأولى بالرعاية أرجوك وضح لى
ل / جلال سيد الأهل:الحقيقة من أهم المشاريع ومن أهم المحاور فى برنامج المشروع القومى للإسكان هو محور الأولى بالرعاية زى ما قلت لحضرتك فيه 7 محاور من ضمنهم المحور الأولى بالرعاية الشخص اللى هو بيقدم فى محور التمليك وبياخد وحدة سكنية تمليك والشخص اللى بيقدم فى محور 63 متر للإيجار طب شخص لا يقدر يدفع 5000 جنيه ولا يقدر يدفع إيجار وهى الفئة الأولى بالرعاية ؛ الفئة الأولى بالرعاية هى الفئة زى عمال المصانع ، زى الناس اللى هى موجودة فى بعض العشوائيات بحيث إن احنا نوفر له وحدة سكنية فى حدود 42 متر أوضتين وصالة الفئة دية يخصص لها الوحدات السكنية من خلال دراسة قرض التضامن الاجتماعى دراسة الدخل بتاعه بحيث إن هو يتوفر هذا النظام بالإيجار وبيحدد طبقا لدخل الأسرة ونقدر نقول الحالة الاجتماعية بتاعت الشخص
رشا مجدى :إيجاره كام بقى
ل / جلال سيد الأهل:الإيجار ما بيتحددش إلا لما بنشوف الحالة الاجتماعية
رشا مجدى:يعنى بيحصل دراسة عن الحالة الاجتماعية
ل / جلال سيد الأهل:الحالة الاجتماعية نفسها وبيحدد قيمة الإيجار لصالحها
رشا مجدى:نقول الحد الأدنى والحد الأقصى كام
ل / جلال سيد الأهل:لا ما تحددش لغاية دلوقتى
رشا مجدى:لغاية دلوقتى
ل / جلال سيد الأهل:ولكل محافظة تختلف
رشا مجدى:هو المشروع ما ابتداش
ل / جلال سيد الأهل:ابتدى فى 6 أكتوبر وفى جميع المحافظات تم تعميمه دى ما أعلنش عنها إلا بعد الانتهاء من المرافق وبانتهاء السلف
رشا مجدى:يعنى مفيش حاجة اتسلمت لسة
ل / جلال سيد الأهل:لا ما اتسلمتش لسة
رشا مجدى:بس ابتديتوا التنفيذ طيب أنا عايزة أعرف يعنى وزارة التضامن إدت لكم فكرة عن عدد المستفيدين من المشروع ده هيبقوا كام
ل / جلال سيد الأهل:لا احنا مخططين فى حدود 75 ألف وحدة سكنية فى هذا المشروع
احمد بصيلة:بيتم توزيعهم إزاى على مستوى الجمهورية
ل / جلال سيد الأهل:على مستوى الجمهورية كلها يعنى هدى لحضرتك مثال بسيط جدا فى مدينة 6 أكتوبر منفذين لوحديها فى حدود 13500 وحدة
رشا مجدى:عشوائيات القاهرة أكثر من أى مكان آخر
ل / جلال سيد الأهل :احنا إن شاء الله العدد ده 13580 هيتسلم للصندوق الاجتماعى لتطويرالعشوائيات يخصصهم للناس
رشا مجدى:سيادة اللواء يعنى المشروعات اللى احنا بنتكلم عليها اللى أنا شايفاه بيتعرض وشايفاه حضرتك بتتكلمه الحقيقة لها نطق معين فى البناء ولها شكل معين حضرتك كنت هتتكلم على الأسواق التجارية والخدمات اللى بتقدم لساكنى هذه المناطق طبعا احنا مش عايزين بعد شوية تتحول إلى عشوائيات يا ترى هل انتوا بتعملوا برضه هذه الخدمات بتقوموا ببناء أو عاملين مثلا سوق تجارى بطريقة معينة مش هنيجى بعد شوية نلاقى عارف حضرتك المنظر احنا عندنا سمة لما بتكون حاجة حلوة بنقوم مغيرين شكلها
ل / جلال سيد الأهل:لا طبعا زى ما حضرتك قلتى فى البداية محور إبنى بيتك قدم قطع أراضى مش عايز أقول لحضرتك الفدان يصل عشر قطع أراضى فبتوفر فيه الخدمات ، المدارس ، المراكز الطبية ، و مخارج
رشا مجدى:كل 10 وحدات يعنى كل فدان 10 وحدات
ل / جلال سيد الأهل:كل فدان بياخد 10 يعنى بمعدل يعنى عايز أقول لحضرتك ال 90 أو ال92 ألف قطعة أرض دول خدوا فى حدود 9500 فدان
احمد بصيلة:بالخدمات
ل / جلال سيد الأهل:بالخدمات بتاعتهم المدارس والمراكز الطبية والمراكز التجارية والمخابز كل الخدمات اللى توفر معيشة كويسة مركز طبى مدرسة الاحتياجات الرئيسية
رشا مجدى:طب حد بعد ما يبنى يقوم عامل الدور الأرضى قهوة
احمد بصيلة:ده يجرنا يا سيادة اللواء لمسألة الإشراف إشراف الجهاز التنفيذى للمشروع هو فى البداية مشروع ابنى بيتك أو الأولى بالرعاية تابع لمين بعد الانتهاء منه
ل / جلال سيد الأهل:تبع المدينة الجديدة أو المحافظة التابعة له
احمد بصيلة:آه يعنى مش تابع للجهاز التنفيذى الجهاز التنفيذى
ل / جلال سيد الأهل:الجهاز التنفيذى هو بينسق الموضوع وبيشرف على تنفيذ هذا المشروع لكن كل محافظة مسئولة عن الجزء بتاعها وكل مدينة مسئولة عن الجزء بتاعهااحمد بصيلة يعنى مباشرة الخدمات
ل / جلال سيد الأهل:تبع مدينة 6 أكتوبر إن كانت موجودة هناك أو تبع مدينة بنى سويف أو الفيوم وهكذا تبع محافظة كذا وهكذا كل مدينة من المدن مسئولة عن ابنى بيتك فى نطاقها ومسئولة عن الخدمات ومسئولة عن توفير هذه الخدمات
احمد بصيلة:يعنى انتم مش منفصلين عنهم
ل / جلال سيد الأهل"لا بالعكس
رشا مجدىطيب احنا عندنا مشكلة إسكان بالنسبة للشباب بالذات طب تأثير هذه المشروعات القومية على الاقتصاد فى حل مشكلة الإسكان
ل / جلال سيد الأهل:زى ما حضرتك عارفة إن وزارة الإسكان معدل النمو السنوى فيها بيوصل من 1.2 إلى 1.4 وزى ما حضرتك عارفة وزارة الإسكان أو المشكلة السكانية أما بينشئ أى مدينة فيه عندنا مصانع طوب وفيه عندنا مصانع أسمنت و مصانع حديد فيه جميع حوالى أكثر من 90 واخدة بال حضرتك مهنة فى المعمار معدل ده زى ما حضرتك عارفة فى وزارة الإسكان بيوفر فرص عمل خلال الفترة اللى فاتت دية لا شك إن تأثير المشروع القومى وبناء 500 ألف وحدة سكنية وفر فرض عمل خلال الفترة اللى فاتت دية
احمد بصيلة:بالإضافة إنه منح لى وحدة سكنية بفلوس قليلة لكن أنا بتكلم على النمو اللى موجود اللى هو وفر فرص عمل هذا الموضوع وفر بالنسبة للمصانع اللى اشتغلت وفر يعنى كان الملحوظ فى سوق العقارات كان مشروع الأولى بالرعاية
ل / جلال سيد الأهل:المشروعات القومية طبعا لها طبعا المصانع اللى شغالة يعنى موجود مصانع الحديد ، مصانع الأسمنت ، مصانع البويات ، مصانع كل الكلام الأيدى العاملة فى هذا الموضوع العامل البنى الكهربائى كل الكلام ده
احمد بصيلة:طب ده يخلينى أسأل حضرتك برضه فى نفس الوقت يا سيادة اللواء ارتفاع تكلفة سعر البناء ما أثرش على الشباب وهو بيبنى
ل / جلال سيد الأهل:والله هى الدولة خدت على عاتقها هذا الموضوع وزودت الدعم كان الدعم المخصص هو 15000 جنيه لكل وحدة سكنية رفعناه إلى 25000 جنيه للوحدة
احمد بصيلة:ده عشان يواكب ارتفاع الأسعار
هالة أبو علم:تكلفة المشروع أد إيه تقريبا يا فندم
ل / جلال سيد الأهل:حجم استثمارات المشروع القومى كله على بعضه هنقول 33 مليار جنيه يشترك فيه دعم الدولة يعتبر فى حدود 25% ، تمويل عقارى فى حدود 25 % وتمويل ذاتى فى حدود 50 % يعنى تمويل ذاتى الشخص ده اللى أنا إديته الأرض ده بدى له 15000 جنيه الوحدة نفسها بتتكلف فى حدود من 50 ل60 ألف جنيه
احمد بصيلة:تكلفة بناءها
ل / جلال سيد الأهل:آه ابنى بيتك يبقى الراجل اللى أنا إديته 15000 جنيه وفر برضه كام حوالى 45000 جنيه مع الفرد اللى أنا إديته أراضى عشان يوفر فيها وحدات سكنية لمحدودى الدخل برضه وفر من خلال تمويل ذاتى أو تمويل من بنوك نقول برضه فى حدود 15 مليار جنيه أو 16 مليار جنيه
رشا مجدى:طب المشروعات دى هتسلم كلها يعنى إمتى آخر ميعاد للتسليم
ل / جلال سيد الأهل:إن شاء الله فى 30/9سنة 2011 نهاية البرنامج الانتخابى لسيادة الرئيس
رشا مجدى:بعد ال30/9/2011 إيه المخطط
ل / جلال سيد الأهل:المخطط إن احنا ندرس دلوقتى حاليا وحاليا اتخمرت لكن لسة ما عرضناهوش على القيادة السياسية اللى هو البرنامج الجديد للحزب الوطنى بعد 2011
رشا مجدى:يعنى لسة بتدرسوا
ل / جلال سيد الأهل:طبعا لا اتدرس وخلص
رشا مجدى:طب أهم
احمد بصيلة:فيما يتعلق بالمشاريع دى
ل / جلال سيد الأهل:إن شاء الله هيبقى فيها معلن
احمد بصيلة:طب هتطرح يعنى مشاريع مماثلة
ل / جلال سيد الأهل:مماثلة آه
احمد بصيلة:لإن فيه شباب فاتهم إن هم يقدموا
ل / جلال سيد الأهل:آه طبعا أنا عايز أقول لحضرتك لو ابنى بيتك فتحناه مرة ثانية مش عايز أقول لحضرتك هنبقى عاملين إزاى أنجح المشاريع اللى تمت عارف إبنى بيتك حضرتك فى ال13 مدينة 9500 فدان وفروا 92 ألف وحدة
رشا مجدى:لا أنا عايزة أرجع لوحدات الإيجار للمواطنين الأولى بالرعاية هل هناك تفكير بعد التسليم إن هناك تجديد لهذه الوحدات
ل / جلال سيد الأهل:لا
رشا مجدى:هيفضل كده مفيش تجديد
ل / جلال سيد الأهل:لا احنا عملنا محاور أخرى بالتدريج
رشا مجدى:اللى هو بيت العيلة
ل/ جلال سيد الأهل:لا كوحدات سكنية تمليك 63 اللى هو المشروع الرئيسى
رشا مجدى:طيب ما نتكلم على المشروع ده اللى هو وحدات التمليك
ل / جلال سيد الأهل:وحدات التمليك ده بقول لحضرتك أول حاجة بدأنا فيها اللى هو توفير وحدات سكنية 63 متر بنظام التمليك النهاردة هذا المشروع نظام التمليك مطروح فى المدن الجديدة والمحافظات دى الواقع أنا سلمت دلوقتى حتى وقتنا هذا 124 ألف وحدة سكنية فى المحافظات والمدن الجديدة جارى تنفيذ حاليا 130 ألف وحدة سكنية فى هذا الموضوع
رشا مجدى:جارى تنفيذهم
ل / جلال سيد الأهل:جارى تنفيذهم وسلمت 124 ألف وحدة و130 ألف وحاليا بطرح 137 ألف لو احنا عدينا كل الكلام ده هنلاقيهم حوالى 277 ألف وحدة سكنية أو حوالى 300 ألف وحدة سكنية
رشا مجدى:كانت بكام التمليك يا فندم ال 63 متر
ل / جلال سيد الأهل:التمليك سنة 2005 كان ب50 ألف المواطن بيدفع 5000 جنيه والدولة بتوفر له 15000 جنيه بيدفع فى نظام التمويل العقارى 30 ألف جنيه اللى هو نظام الإيجار العقارى 20 سنة بيدفع 160 جنيه سنويا بزيادة 5و7 %
رشا مجدى:طب إيه الشروط اللى كان بيتقدم بها
ل / جلال سيد الأهل:من 20 سنة لغاية 50 سنة ما يكونش حصل على وحدة سكنية قبل كده الأرض الأسرة الواحدة قطعة واحدة وحدة سكنية برضه واحدة
رشا مجدى:ويدفع كام فى الأول
ل / جلال سيد الأهل:يدفع 5000 جنيه
رشا مجدى:وفرنا 300 ألف وحلينا مشاكل ل 300 ألف
ل / جلال سيد الأهل:طبعا وغير القطاع الخاص اللى هم 100 ألف
احمد بصيلة:احنا خدنا وعد من حضرتك فى نهاية الحلقة
رشا مجدى:احنا هناخد الخطة المستقبلية يعنى احنا عايزين \
احمد بصيلة:فيه مشاريع مماثلة
رشا مجدى:آه عاوزين نعرف تفاصيلها
احمد بصيلة:هتطرح إن شاء الله بعد 2011 إن شاء الله
رشا مجدى:يحدث فى مصر سوف يكون معكم لنعرف ما هو الجديد إن شاء الله والمشروع الضخم القادم بإذن الله سيادة اللواء احنا فى نهاية اللقاء احنا بنشكر حضرتك شكرا جزيلا
ل / جلال سيد الأهل:شكرا يا فندم لكم ولأسرة البرنامج كلهم أتمنى إن شاء الله مزيد من التقدم لجمهورية مصر العربية
رشا مجدى:يا رب
احمد بصيلة:شكرا سيادة اللواء جلال سيد الأهل مدير المشروع القومى للإسكان وإن شاء الله على وعد أعزائى المشاهدين على لقاء جديد فى يحدث فى مصر وإن شاء الله اللى بيحدث فى مصر كل خير
هالة أبو علم:إلى اللقاء