يحدث في مصر

هاله أبو علم :مشاهدينا الكرام أهلا بكم فى حلقة جديدة من برنامج يحدث فى مصر واليوم سنتحدث عن المشروع القومى للإسكان هذا المشروع ولد من رحم أزمة الإسكان فى مصر نتيجة الزيادة السكانية الكبيرة التى نعيشها وتتمثل فى زيادة مليون ومئتى ألف نسمه سنويا
محمد المغربى :المشروع بيعتبر من أهم المشروعات الإسكانية ( المتاحة ) للتغلب على مشكلة توفير المسكن المناسب للشباب ذوى الدخل المنخفض هذا المشروع بيوفر 500 ألف وحدة سكنية للشباب ومحدودى الدخل يعنى نصف مليون شقه جديدة .
هاله أبو علم :وهذا المشروع مشاهدينا الكرام يُعد أحد أضخم مشروعات الإسكان الأجتماعى ومن أهم أعماله حتى الان الإنتهاء من تسليم 240 الف وحده سكنيه وجارى تنفيذ باقى وحدات المشروع .
محمد المغربى :ومن نتائج هذا المشروع أيضا توفير 91 ألف قطعة أرض ضمن محور أبنى بيتك وفى محور تمليك بيت العيله بمدينة 6 أكتوبر كان فيه تنفيذ 3 آلاف وحده سكنية
هاله أبو علم :مشاهدينا الكرام قبل أن نشاهد التقرير التالى يسعدنا أن نرحب بضيفنا فى الإستديو اللواء/ جلال سيد الأهل مدير المشروع القومى للإسكان أهلا بحضرتك معانا وقبل أن نبدأ الحوار مع سيادتك نشاهد هذا التقرير ونعود مرة أخرى .
فاصل " تقرير "
محدودى الدخل شريحة من المجتمع توليها الدولة إهتماما بالغا منذ سنوات طويلة والشقه هى حلم يراوج هذه الفئة حسب قدراتها المالية .. ومن هنا جاء فكر الدولة من خلال وزارة الإسكان فى المشروع القومى للإسكان والذى يُعد من أهم المشاريع للتغلب على مشكلة السكن .
يوفر المشر وع مسكناً ملائما للشباب فى المدن الجديدة وكافة محافظات مصر من خلال 500 ألف وحدة سكنية حتى عام 2011 تقوم الدولة بتوفير الدعم المباشر لها بإجمالى 15 مليار جنيه .
يتكون المشروع من 7 محاور وهى تمليك وإبنى بيتك والأولى بالرعاية والقطاع الخاص وبيت العيله ووحدات إيجار والبيت الريفى وقد روعى فى تخطيطها تحقيق إحتياجات المواطنين على إختلاف رغباتهم فى الإقامة بالمدن التى يرغبون بالإقامة بها .
فاصل
محمد المغربى :سيادة اللواء/ يمكن برضه شوفنا التقرير ولكن يبقى السؤال الأول المشروع القومى للإسكان هو عمره حوالى 4 سنوات فقط وبضعة شهور قول لنا إيه طبيعة إطاره يعنى بيضم إيه فى مشروعات الدولة؟
اللواء/ جلال سيد : المشروع القومى للإسكان بدأ مع بداية برنامج سيادة الرئيس سنة 2005 فى شهر 10 2005 البرنامج كان بيهدف إلى توفير وتنفيذ 500 ألف وحده سكنية خلال 6 سنوات بمعدل 85 ألف وحده سكنيه سنويا وبيحضرنى فى هذا التوقيت إن أنا أقول إن إحنا من سنة 61 حتى 82 كنا بنوفر معدل حوالى 13 ألف وحده سكنية سنوايا , إعتبارا من سنة 82 حتى 2005 كان معدل التنفيذ أو متوسطه فى حدود 35 ألف وحده سكنيه سنيوا النهارده فى هذا البرنامج بيوفر 85 ألف وحده سكنيه يعنى بزيادة 50 ألف وحده سكنيه سنويا دا بيدفع المواطن 5 آلاف جنيه الدوله بتوفر له دعم 25 ألف جنيه وبعد كده بنوفر باقى ثمن الوحده إللى هو حوالى 30 ألف حنيه بنظام التمويل العقارى بيسدد على 20 سنه بقسط سنوا 160 جنيه لمدة 20 سنه بمعدل 7,5 فائده .
هاله أبو علم :الضمانات إللى بيتم قبولها أو طلبها فى مقابل ؟
اللواء/ جلال سيد : ولا فيه أى ضمانات خالص إحنا حطينا شوية شروط صغيره لمحدودى الدخل السن بيكون من 20 سنه حتى 50 سنه بعد كده ما يكونش حصل على وحده سكنيه أو قطعة أرض قبل كده الأسره الواحده تكون عندها فقط لا غير يعنى الأب والأم والأولاد القصر يكون لهم قطعة أرض واحده أو لهم وحده سكنية فقط لا غير .
نظام التمويل العقارى بنوفر من خلال نظام التمويل العقارى إللى هو البنوك إللى هو باقى ثمن الوحدة .. يعنى الشخص – كنا سنة 2005 كنا مقدرين ثمن الوحده 50 ألف جنيه النهارده بتساوى حوالى 80 أو 85 ألف جنيه – كنا بنقول المواطن يدفع 5 والدوله بتوفر له 15 ألف جنيه وباقى الوحده إللى هو 30 ألف يعنى المواطن بيأخذ وحده ثمنها النهارده سوقيا حوالى أكثر من 85 ألف أو 90 ألف جنيه بيأخذها بحوالى 35 ألف جنيه .
هاله أبو علم :هل الطلب أكثر من المعروض ؟
اللواء/ جلال سيد : الحقيقه إحنا عملنا إعلانات خلال الفترة اللى فاتت ديه 5 إعلانات من 2005 حتى 2008 الناس إللى وصلوا لنا أو الأعداد إللى وصلت – الناس إللى هم يرغبوا فى وحدات سكنية داخل المدن الجديدة كان حوالى 73 ألف مواطن الناس إللى قدموا فى خلال المحافظات حوالى 140 ألف مواطن دول بالنسبة للوحدات السكنيه إللى هى نظام التمليك , بالنسبة لإبنى بيتك إحنا أعلنا عنه مرة واحده فقط لا غير لمدة شهر إعتبارا من 15 يناير 2007 حتى 15 فبراير 2007 قدم 105 ألف مواطن وكنا الحقيقه مخططين 20 ألف قطعة أرض فقط لا غير لما فوجئنا ب 105 ألف مواطن وإتعرض الكلام ده على القيادة السياسية سيادة الرئيس أمر إن كل مواطن ينطبق عليه الشروط لازم يتوفر له ويأخذ قطعة أرض لقينا الناس إللى ينطبق عليهم الشروط حوالى 91 أو 92 ألف مواطن وفرنا لهم فعلا قطع أراضى 150 متر وب 70 جنيه المتر .
محمد المغربى :سيادة اللواء/ خلينا نبدأ نقف عند كل محور كده سريعا نفهمه أكثر يعنى أول محور هو محور توفير وحدات سكنية بالتمليك 63 متر ؟
اللواء/ جلال سيد :نعم الحقيقة لما جينا خططنا لهذا المشروع حطينا آلياته فى 4 آليات – إيه هى آليات تنفيذ هذا المشروع أول حاجه نوفر الأرض ثانيا نوفر الدعم الدوله وفرت دعم سنويا مليار جنيه يبقى فى حدود .
محمد المغربى :ممكن نقف عن توفر الأرض وهل فيه مشكلة فى توفير الأرض – الأرض ملك الدوله والدوله عامله مشروع فأى أرض يعنى بتاعتكوا ؟
اللواء/ جلال سيد :المشكلة فى الأرض والأرض صحراوية ما شاء الله ولكن الأرض مرفقه
هاله أبو علم :أيوه بالظبط يعنى وصول كل المرافق فيها .
اللواء/ جلال سيد :الأرض ماشاء الله لكن الأرض مرفقه ودا أهم شيئ بالنسبه لهذه النقطه الترفيق يشمل مياه وصرف وكهرباء تليفونات وطرق يعنى ديه تعتبر بنية أساسية لتوفيرهذه الأرض دا الأساس فى هذا الموضوع توفير أرض مرفقه نمره 2 بنوفر الدعم وهو مليار جنيه سنوايا حوالى 7,5 مليار سنويا والدوله وفرت هذا الكلام نمره 3 وهو توفير التمويل العقارى بالنظام التمويلى وهو 30 ألف جنيه إللى هو باقى ثمن الوحدة وعملنا برتوكول مع البنوك لهذا الموضوع وفرنا سنويا حوالى 2 مليار جنيه من البنك الأهلى وبنك مصر وبنك التعمير والإسكان والشركة بعد كده دا الآلية الثالثه رابع حاجه وهو قدرنا نستقطب القطاع الخاص فى إنه يبنى وحدات سكنيه لمحدودى الدخل .. لما بدأنا نخطط لهذا المشروع حطينا كل الرغبات فيه ناس عايزه وحدات سكنيه للتمليك فيه إللى عايز وحدات سكنيه بالإيجار وهكذا .. بالنسبة للتمليك ويعتبر هو عصب المشروع القومى للإسكان يعنى وفر فى حدود يمكن 300 ألف وحده سكنية بوحدات سكنيه بالتمليك أو بالإيجار دا عباره عن وحده سكنية 63 متر حجرتين وصاله ويعتبر صافى 63 متر يعنى يعتبر غير الصافى بالحوائط بالمنافع بيعتبر حوالى 75 متر أو 77 متر الحقيقه عملنا إعلانات وحطينا الشروط إللى أنا أعلنت عنها فى هذا الموضوع تقدم لنا الناس إللى أنا قلت لحضرتك عليهم .. بدأنا نشوف وندرس كل الأفراد من ناحية إنطباق الشروط بعد ما درسنا هذا الكلام أولا ما بنعملش تحريات كل ما إنطبق عليه الشروط وفرنا له قطعة أرض – الحقيقة فى البداية كان مش عايز أقول لحضرتك فى الإعلان الأول تقدم يمكن أعداد قليلة جدا ما كنوش فى البدايه مصدقين إنه يأخذوا الإعلان الثانى بدأت تزداد الأعداد وهكذا إلى أن وصل آخر إعلان – يمكن آخر إعلان عملناه وصل أكثر من 27 ألف مواطن .
هاله أبو علم :إختارتوا محافظات بعينها لتنفيذ المشروع القومى للإسكان ؟
اللواء/ جلال سيد : كل المحافظات المشروع القومى للإسكان يشمل كل المدن الجديدة وكل المحافظات وبالشروط إللى أنا قلت لحضرتك عليها وما يشترطش إن هو يكون متزوج ما يشترطش إن هو يكون عازب المهم ينطبق عليه هذه الشروط لو هو ولد لو هو بنت لو هو رجل لو هو ست لو أرمله لكل فئات الشعب يكون محدودى الدخل .
محمد المغربى :إيه محور البيت الريفى بيتركز فى إنهى محافظات إيه طبيعة المتقدمين للحصول على الدعم بتاعه إيه مجهود المشروع فى توفير البيت الريفى ؟
اللواء/ جلال سيد : البيت الريفى دا نمط من الأنماط وفرناه فى المحافظات الصحراوية ومدن الصعيد لنوفر أرض 200 متر بيبنى عليها وحده سكنيه 63 متر والباقى يحوش طبقا لطبيعة المجتمع إللى موجود فيه بحيث إن هو ندى له دعم برضه فى حدود 15 ألف جنيه بتوصل لغاية 25 ألف جنيه ودا هنوفر فى حدود 18 ألف وحده سكنيه فى المحافظات الموقف حاليا دلوقت سلمنا فى حدود 5 آلاف بيت ريفى وجارى تنفيذ حاليا 4 آلاف تحت التنفيذ و9 آلاف بيت ريفى تحت الطرح فى المحافظات زى محافظة المنيا زى محافظة شمال سيناء زى محافظة جنوب سيناء زى المنيا زى الصعيد اسيوط زى سوهاج وهكذا .
محمد المغربى :لأن الأرض مش سهله زى ما كنا فاهمين وإنها لازم تكون مرفقة هل فى البيت الريفى فيه مشاكل فيما يتعلق بالمرافق خاصةً فى المياه ؟
اللواء/ جلال سيد :لأ طبعا لعلم حضرتك بالنسبة لجميع الوحدات السكنية أو الأراضى إللى إحنا بننفذها بنديها لهم لازم يكون جميع المرافق متوفرة .
محمد المغربى :يعنى لم تصل إليكم شكاوى فيما يتعلق بالمياه ؟
اللواء/ جلال سيد :لأ يمكن بالنسبة لإبنى بيتك يمكن لازم أقول طبعا .
محمد المغربى :فى الفيوم تحديدا ؟
اللواء/ جلال سيد :الفيوم لأ طبعا ما فيش مشكلة خالص فى الفيوم لكن المشكلة فى إبنى بيتك .
هاله أبو علم :كان فيه شكاوى من إن المياه مش موجوده فى هذا المشروع .
اللواء/ جلال سيد :فى إبنى بيتك ؟ فى إبنى بيتك ما أنا بأقول لحضرتك .
هاله أبو علم :محافظة الفيوم .
محمد المغربى :مد : فى البيت الريفى .
اللواء/ جلال سيد :محافظة الفيوم أنا ما وصلش لى شكوى وأنا مستعد طبعا أدرس أى شكوى ممكن تتوفر فى هذا الموضوع ما أعرفش المعلومة ديه يمكن وصلت لحضراتكم .
محمد المغربى :لأ إحنا صورنا كاميرة البرنامج صورت ومعانا يعنى شكاوى .
اللواء/ جلال سيد :ما فيش مشكله بالنسبة للموقف دا لكن أنا بأقول لحضرتك خلال الأربع سنوات ما حصلش فى وقت من الأوقات إن مثلا كانت مشكله فى هذا الموضوع .
هاله أبو علم :سيادة اللواء/ عايزين نعرف التكلفه الإجمالية لهذا المشروع أكيد مشروع ضخم بدأ منذ عدة سنوات من المفترض إنه يتم الإنتهاء منه فى خلال 6 سنوات أكثر من محور وواضح إن هذه المحاور وضعت على أساس إنها تلبى رغبات أكبر عدد من المواطنين لإن كل مواطن قد يكون له إحتياجاته التى تختلف عن مواطن آخر إذن هناك تكلفة عاليه لهذا المشروع الكبير نحب نعرف الأرقام .
اللواء/ جلال سيد :حجم الإستثمارات فى هذا المشروع تصل إلى 33 مليار جنيه منهم دعم 7,5 مليار جنيه دعم مباشر ودعم الغير مباشر إللى هو 5,5 إللى هو دعم المرافق الرئيسية بإجمالى 15 مليار جنيه لهذا المشروع فيه تمويل ذاتى من الأفراد يعنى أنا بأقول لحضرتك ال 33 بينقسموا إلى دعم تمويل عقارى وبعدين تمويل ذاتى .
هاله أبو علم :والقطاع الخاص ؟
اللواء/ جلال سيد :ما هو دا تمويل ذاتى القطاع الخاص أو إبنى بيتك يعنى إبنى بيتك أنا بأدى له قطعة الأرض وأدى له 15 ألف جنيه وهو إللى بيكمل الوحده السكنيه بتاعته بتكلفه فى حدود 60 ألف جنيه أنا بأدى له دعم 15 ألف جنيه هو من عنده أو ذاتيا بيوفر فى حدود الباقى إللى هو 45 ألف جنيه القطاع الخاص نفس الشيئ زى ما قلت لحضرتك هيوفر فى حدود 50 % من33 مليار جنيه التمويل العقارى فى حدود 25% والدعم حوالى 25 %
محمد المغربى :سيادة اللواء/ بيقولوا إن فيه بعض المحافظات محظوظة أكثر من غيرها فيما يتعلق بتوزيع النشاط للمشروع القومى للإسكان خلينا نقف عند النقطة ديه تحديدا ونعود إليها بالتفصيل بعد فاصل قصير مشاهدينا الكرام أبقوا معنا .
فاصل
هاله أبوعلم :عدنا إليكم مرةً أخرى مشاهدينا الكرام والحوار نستكمله مع السيد اللواء/ جلال سيد الأهل مدير المشروع القومى للإسكان أهلا بحضرتك معانا والمسؤول عن هذا المشروع القومى الكبير .
اللواء/ جلال سيد :أهلا بكم .
هاله أبو علم :كان السؤال من قِبل محمد ونرجوا إن إحنا نسمع إجابه من حضرتك .
اللواء/ جلال سيد :هو طبعا أنا عايز أرض على حضرتك إحنا لاطبعا سنة 2005 كنا فى حدود 75 مليون نسمه إحنا لما جينا وزعنا المشروع القومى حطينا برتوكولات بحيث كل محافظة من المحافظات طبقا لتعداد السكان بمعنى إحنا قلنا 500 ألف وحده سكنيه نسبة كل محافظة إلى النسبة الكلية فهذا وضفناها فى 500 ألف وحدة سكنيه بمعنى يعنى إحنا لو فُرض إن محافظة من المحافظات مثلا 7,5 مليون بإجمالى مثلا 75 يعنى المفروض تأخذ 10% من هذا المشروع يبقى المفروض بتأخذ فى حدود 50 ألف مثلا وحده سكنيه كل المحافظات أخذت بنسبة عدد السكان فى هذا الموضوع ولكن عملنا برتوكولات فى بعض المحافظات ما يكنش عندها متوفر أراضى زى محافظة الغربية أوالقليوبيه أو أو لآخره ما لهاش دليل صحراوى فديه ممكن تقل نسبة الحصه بتاعتها نمره 2 فيه محافظات زى محافظات الزهيل الصحراوى ومحافظات الإسماعيلية لها فممكن تزيد فإحنا عندنا مرونه فى هذا الموضوع إن المحافظات إللى هى ما عندهاش أراضى ممكن نخفض لها قد الوحدات السكنية أو الكوته بتاعتها ونزودها لبعض المحافظات الأخرى لكن إحنا ماشيين بنفس التوزيعة .
هاله أبو علم :إيه الخطط المستقبلية لهذا المشروع يعنى بعد 6 سنوات أو بعد مرور 6 سنوات وتنفيذ المخطط من هدف هذا المشروع إيه المستقبل هل هتستكملوه هل هناك مراحل أخرى ؟
اللواء/ جلال سيد :فيه دراسه حاليا دلوقت بتتعمل داخل وزارة الإسكان لهذا الموضوع ما بعد 2011 وطبعا الدراسة ديه لسه ما إستكملتش وإن شاء الله هنعرضها طبعا على القيادة السياسية والحزب الوطنى بحيث إن إحنا نقدر نقول إحنا مخططين إيه فى البرنامج إللى جاى .
هاله أبو علم :إيه المشاكل إللى واجهتوها فى أثناء تنفيذ هذا المشروع وحضرتك حطيت إيدك عليها بتقول إن إنت لو كان فيه مرحلة أخرى أو فترة ثانية لإستكمال هذا المشروع لابد إن إنتوا تحطوا فى حسبانكم هذه المعوقات أو المشاكل أو التحديات إللى قابلتكوا قبل كدا .
اللواء/ جلال سيد :ألله زى ما قلت لحضرتك هى موضوع توفير الأر ض .
هاله أبو علم :كمرافق ؟
اللواء/ جلال سيد :آه كمرافقه وديه كانت مشكلة رئيسية موضوع إبنى بيتك ما إحنا كنا طرحين 20ألف قطعة أرض وبعد كده طلب مننا نوفر إللى هو حوالى 91 أو 92 الف قطعة أرض برضه ترفيق هذا الموضوع وخاصةً كنا محطوطين تحت ضغط جامد جدا فى إن الناس كلها بدأت تسألنا فى خلال السنه خططنا ونفذنا المرافق فى خلال الفترة اللى فاتت وسلمنا والحمد لله فى 31 /12/2009 كان كل الأراضى بتاعة إبنى بيتك متسلمه لكل الناس ديه من التحديات إللى كانت موجوده فى هذا المشروع .
محمد المغربى :سيادة اللواء ما أعتقدش إن محور إبنى بيتك دا بس هو اللى فيه بعض المشاكل يمكن هيبقى فيه حلقه مخصصة بكاملها للموضوع دا لكن أيضا محور إللى هو توفير أراضى للمستثمرين لشركات التعمير الشركات الخاصة إن إنت بتديها أرض مدعم وتقول لها إنت بيعى للشاب بسعر مدعَّم ولكن نجد إن هذه الشركة الإستثمارية كالعادة بتبحث عن المال وليس عن الدعم وبتحط يعنى مثلا فى الجرائد بنشوف تحت عنوان إبنى بيتك أرض 6 أكتوبر وحاطه السعر التجارى مش السعر المدعَّم للوحدة ؟
اللواء/ جلال سيد :لأ هو إبنى بيتك حاجه ثانيه بنوفر أراضى للشاب من خلال وزارة الإسكان 150 متر بسعر 70 جنيه بإجمالى 10 آلاف لكن القطاع الخاص انا بأوفر له أراضى مرفقة رئيسية وهو اللى بيرفق داخلى الحقيقة وفرنا أراضى حوالى 6 آلاف و500 فدان لحوالى أكثر من 140 شركة من الشركات ديه .
محمد المغربى :هل لسيادتك أى تدخل فى تحديد السعر بتاع الوحده ؟
اللواء/ جلال سيد :لأ
محمد المغربى :عشان كدا يبقى ؟
اللواء/ جلال سيد : أنا عايز أقول لحضرتك إحنا إشترطنا حاجتين إثنين على المستثمر أو المنمى العقارى أو حاجه إن هو يدينى مساحات 63 متر البرنامج الإنتخابى نمره 2 يديها لمحدودى الدخل ومحدودى الدخل عرفناه طبقا لقانون التمويل العقارى إن هو حاليا دلوقت إنه يكون دخله لا يزيد عن 1750 جنيه .
محمد : دا القسط 2000 جنيه يا فندم فى بعض وحدات هذه المشاريع .
اللواء/ جلال سيد : خلينى أكمل وهأقول لحضرتك 1750 جنيه إذا كان الرجل عازب وإذا كان متزوج 2500جنيه يعنى حوالى 30 الف جنيه فى السنه إحنا بنوفر هذه الأراضى لى إللى أنا قلته لحضرتك بنقول له الشرطين إللى أنا قلت لحضرتك عليهم ونيجى بعد كده هو بالنسبه للعرض والطلب .. أنا عايز أقول لحضرتك فيه وحدات سكنيه مطروحه فى مدينة من أحدى المدن لمدينة العاشر من رمضان ب79 ألف جنيه – فيه أرتاضى موجوده أو وحدات سكنيه ضمن المشروع القومى فى القطاع الخاص متوفره فى أحدى الشركات 89 ألف جنيه فيه شركات فى حدود 100 ألف جنيه هى عملية عرض وطلب فيه ناس بتشطب وفيه ناس بتدى نصف تشطيب حسب السعر المشروع اللى موجود ده عباره عن مشروع كومبوند بيوفر فيه وحدات سكنيه يوفر وحدات تجارية بيوفر فيه نادى بيوفر فيه طبى بيوفر فيه كل حاجه كأنه بالظبط متكامل غير الوحدات السكنيه إللى أنا بأوفرها للمواطن واخد بال سعادتك هو أنا عايز أقول لحضرتك حاجه انا النهارده بأقول لحضرتك الوحدة كانت بتكلفنى فى سنة 200550 ألف جنيه وقلت لحضرتك فى البداية إن هى حاليا دلوقت تكلفنى فى حدود 85 ألف جنيه فيه 3 عوامل بتتحكم فى ثمن الوحدة الإنشاء نمره 2 المرافق نمره 3 ثمن الأرض .
هاله أبو علم :ما هو دا أعتقد المسألة بتزيد كل سنه مع غلاء أسعار مواد البناء يعنى ديه برضه حاجه حتتحكموا فيها إزَّاى ؟
اللواء/ جلال سيد :لأ أنا بأقول لحضرتك ال3 عوامل .
هاله أبولم :ما هو البناء حضرتك أشرت كنقطه الإنشاء طيب ما هو هيغلى طبعا .
اللواء/ جلال سيد :أنا بالنسبة لى والقطاع الخاص لو أنا قارنت أنا إللى بأتكلف ثمن الأرض وأنا إللى بأتكلف ثمن المرافق إللى أنا قلت لحضرتك الدوله بتتكلف 7,5 مليار جنيه ثمن هذا الكلام بالنسبة للقطاع الخاص لأ أنا بأدى له الكلام ده وهو بيعمل المرافق الرئيسية طيب المرافق الرئيسية إحنا حسبناها للقطاع الخاص الوحده السكنية .
هاله أبو علم :أنا إللى عايزه أفهمه من حضرتك القطاع الخاص لما بدخل معاكوا فى المشروع بتحطوا له هامش ربح مُعيَّن بحيث إن هو ما يزيدش عن هذا لأنه المقصود من هذا المشروع هو محدودى الدخل سواء كان شاب أو عيله فإيه الضوابط اللى محطوطه للقطاع الخاص لما هو يأخذ أراضى يتملكها ويبنيها ويبيعها للشباب أو يبيعها لمحدودى الدخل إيه المعيار بتاع الضابط إن هو ما يعاليش فى أسعار هذه الوحدات .
اللواء/ جلال سيد :شوفى أنا هأقول لحضرتك أنا لسه بأقول دلوقت أنا مش بدافع عن القطاع الخاص ولكن أنا بأقول لحضرتك التكلفة الحقيقية للوحدة السكنية إللى بيقوم بها القطاع الخاص انا قلت لحضرتك الإنشاء أنا لما بأنشئ واحد بيقدم لى عشان وحده سكنيه والدولة بتوفره أنا بأوفر له أنا بأدفع له ثمن الأرض أنا بأوفرها له بالإضافة إلى ثمن المرافق لو بصينا للحاجتين دول الأرض والمرافق – المرافق أنا إللى بأتكلفها بتكلف 15 ألف جنيه للوحده انا إللى بأدفعها القطاع الخاص هو إللى بيدفعها نمره 2 ثمن الأرض أنا الأرض عندى ببلاش يعنى أنا وفرت وقلت له أنا عندى وحدات إدفع 5 آلاف جنيه أنا ما بأقولش له ثمن الأرض وما بأحاسبهوش ثمن الأرض الأرض القطاع الخاص بيدفع ثمنها إللى هو 70 جنيه الوحده بتكلفه 5 آلاف جنيه فلما نيجى نبص الفرق بين الإثنين الأرض بتتكلف 5 آلاف جنيه على الوحده وبتكلف 15 ألف جنيه المرافق بتاعتها يبقى الراجل القطاع الخاص بيتكلف 20 ألف جنيه عن الدوله - الدوله النهارده بتوفر زى ما بأقول لحضرتك ثمن الوحده فى حدود النهارده إللى هو سنة 2009 .
هاله أبو علم :ممكن حتى التشطيب بتاع الشقق يكون مختلف مثلا ؟
اللواء/ جلال سيد :لأ المرافق والأصل .
هاله أبو علم :لأ أنا بأتكلم على تشطيب الشقق يعنى غير المرافق ؟
اللواء/ جلال سيد :أنا بأدى له الأرض مش كومبوند يعنى هو فيه تنسيق موقع هو بيكلفه مرافق هو إللى بيكلفها ثمن الأرض هو إللى بيكلفها إللى هو المرافق زى المول التجارى الوحده الطبيه .
محمد المغربى :ما هو هيبيعها فى الآخر .
اللواء/ جلال سيد :لأ يبيعها إزاى هو إللى بينشئها .
محمد المغربى :كويس وبيبيعه محال .. إسمح لى يا فندم بسؤالين عشان نفهم الحته ديه لإن فيها لبس .. ألا تعتقد القطاع الخاص يتربح من هذه النقطة تحديدا لإن هو بيأخذ الأرض ويبيعها تحت ستار إنها مدعومه بسعر السوق قول آه أو لأ ؟
اللواء/ جلال سيد :لأ فيه كلمة يتربح وفيه فرق إن هو يربح القطاع الخاص ما بيخشش فى أى مشروع إلا لازم يربح هو لو ما دخلش فى أى مشروع ما ربحش ما بيخشش فيه .
محمد المغربى :د : ما يقولش لى بقه إن دا مشروع محدودى الدخل .
اللواء/ جلال سيد : ولذلك حضرتك التفاوت فى الأسعار إن فيه ناس بتبيع ب 79 و89 فى مدن وفى نفس المدينه وفيه ناس بتبيع ب 100 ألف جنيه و110 .
محمد المغربى :سؤال ثانى سريعا هل بعد 2011ناويين إن شاء الله فى الخطة القادمة أيضا تعتمدوا فى محاوركم على محور قطاع إستثمارى أو قطاع خاص ؟
اللواء/ جلال سيد :ما أنا بأقول لحضرتك أصل ده من ضمن المحاور الرئيسية لو حضرتك النهارده نوفر وحدات سكينه بواسطة الإنشاء والدوله هى إللى بتوفرها النهارده لازم إنشاءها مش أقل من 100 ألف جنيه.
هاله أبو علم :سياحة اللواء/ طالما إن هناك نية للتعاون من قِبل القطاع الخاص ودا والحقيقة مطلوب يعنى مش ممكن إن إحنا نعتمد فى كل شيئ على طالما إن هناك رجال أعمال ومستثمرين قادرين على الربح لازم يساهموا فى المشروعات القومية لهذا البلد .. طيب ليه ما نطلبش منهم ممكن يساهموا فى بناء وحدات سكنية – يساهموا مثلا فى مد خطوط مواصلات لإن ديه مشلكة أساسية يعنى إحنا ممكن نبنى مدن كثيرة ووحدات سكنية كتير لكن تكون خالية يعنى فى بعض الأحيان نقول هذه المدن تشكنها الشباح ليه لإن ما فيش وسيلة مواصلات طيب هل ممكن إن إحنا نكون عندنا فكر بإن إحنا القطاع الخاص يساوهم فى مشاريع أخرى ولكن هى مشاريع مغذية لنفس فكرة المشروع القومى للإسكان ولكن بطريقة مختلفة ؟
اللواء/ جلال سيد :لأ هو إحنا المفروض كهيئة المجتمعات العمرانية الجديدة إحنا المسؤولين عن توفير المرافق إللى هى المراكز الطبية والمستشفيات والمدارس والمخابز والمواصلات من ضمن الحاجات الرئيسية.
هاله أبو علم :المواصلات دا نقطة مهمة جدا الحقيقه .
اللواء/ جلال سيد :طبعا المواصلات وإحنا بتكون من ضمن الحاجات الرئيسية وركز عليها سيادة الوزير أحمد بيه مغربى فى تنمية المدن إحنا أهم شيئ تنمية المدينة إحنا زى ما حضرتك بتقولى بنوفر مدينه سكنية ما تكنش مدينة أشباح دا المفروض الأساس ودا يعتبر من ضمن الحاجات الرئيسية إللى هو تم التركيز عليها فى وزارة الإسكان وهيئة المجتمعات العمرانية إللى هى توفير المواصلات سواء الداخلية أو الخارجية دا من ضمن .
محمد المغربى :سيادة اللواء/ إلى أى مدى إستطعتم خلال الأربع سنوات أن تقضوا على ممكن ما نسميه بالمحسوبيات أن بيسميه البعض الآ خر بالوساطات فى الحصول على وحدة مدعومة إلى أى مدى نجحتم فى كده ؟
اللواء/ جلال سيد :أنا من خلال برنامج حضرتك أنا بأقول أنا كجهاز تنفيذى للمشروع القومى التخصيص بيتم بواسطة الكمبيوتر من خلال لجنه أنا رئيسها بالإضافة للبنك ولا يتدخل فيها أى مواطن خالص ولا محسوبية وعايز أقول لحضرتك ما فيش تبديل إذا كانت الوحده السكنيه من خلا ل الكبيوتر ما فيش تبديل ولا تعديل وأنا بأقول لحضرتك أنا أتحدى من خلال هذا البرنامج إن حد يدينى حالة من الحالات فى هذا الموضوع ولكن أنا بأقول لك فى بعض الحالات الإنسانية بمعنى إن الوحده السكنية ممكن توصل لبعض الناس فى الدور الخامس والدور السادس ويكون عنده مثلا لا قدر الله إحنا بنغيرها له للدور الأرضى أو العكس أو أذا كان مثلا عنده الدور الأرضى ومش عايز الدور الأرضى عشان التراب وعشان الحساسيه ممكن يأخذ الدور الخامس لكن إذا كان فى الدور الخامس وعايز متكرر لأ لكن المسموح به من الدور الأخير للدور الأرض ومن الدور الأرضى للدور الأخير فقط لا غير.
هاله أبو علم :سيادة اللواء ختاما يعنى من غير إعلان هل لا يتم الحصول على أى وحده من وحدات المشروع القومى للإسكان يعنى لابد من الإعلان والا ممكن الناس تتقدم إليكم بطلبات ؟
اللواء/ جلال سيد :لأ من خلال الإعلانات .
هاله أبو علم :لازم إعلان ؟
اللواء/ جلال سيد : ما هو علشان الشفافيه ما هو أنا بأقول لحضرت ما فيش حد دلوقت أنا لا أقبل إعلانات لا أقبل أى حد يتقدم لى دلوقت فى هذا المشروع أنا قلت لحضرتك من خلال الإعلانات اللى أنا عملتها فى خلال الفترة من 2005 حتى 2008 الناس ديه درست وإنطبقت عليهم الشروط بأبنى لهم وكل من إنطبق عليه الشروط بأبنى له وحده سكنيه ويستحق فى هذا الموضوع .
محمد المغربى :سيادة اللواء جلال سيد الأهل رئيس الجهاز التنفيذى للمشروع القومى للإسكان كنت ضيفا ليحدث فى مصر فى حلقة اليوم .
اللواء/ جلال سيد : أشكرك يافندم .
هاله أبو علم :ونشكركم مشاهدينا الكرام على حسن المتابعه ونلتقى معكم فى حلقة أخرى ومشروعات قومية جديدة