يحدث في مصر

رشا مجدى : حلقة الليلة مشاهدينا عن هيئة هذه الهيئة تتبع وزارة الثقافة أنشئت عام 1989
خالد عاشور : مساء الخير مشاهدينا الأعزاء حديث الليلة عن هيئة هى إحدى الهيئات المسئولة عن بناء العقل المصرى وتثقيف المصريين ونشر الوعى هذه الهيئة لديها ميزة خطيرة جدا وهى أن باستطاعتها الوصول إلى آخر مواطن فى ريف أو فى صعيد مصر من خلال 540 موقع تابع للهيئة العامة لقصور الثقافة سواء كان قصر ثقافة أو بيت ثقافة أو مكتبة
رشا مجدى : مشاهدينا الكرام معلومات كثيرة هنتعرف عليها النهاردة عن هيئة قصور الثقافة من خلال ال540 موقع سواء بيوت ثقافة قصور ثقافة مكتبات ثقافية منتشرة فى أنحاء الجمهورية
خالد عاشور : نرحب بضيفنا فى الاستديو الأستاذ أحمد مجاهد رئيس الهيئة العامة لقصور الثقافة أهلا بحضرتك يا دكتور أحمد أهلا بحضرتك يا دكتور أحمد
د/ أحمد مجاهد : أهلا وسهلا
رشا مجدى : دكتور إسمح لنا نشوف هذا التقرير ونرجع الاستديو عشان نسألك أسئلة كثيرة جدا؟
د/ أحمد مجاهد : يشرفنى إتفضلى
فاصل تقريرى
مذيع التقرير:قديما عرفت باسم الثقافة الجماهيرية وحاليا تعرف باسم الهيئة العامة لقصور الثقافة بأقسامها المتشعبة بطول الجمهورية وعرضها تؤدى دورا يهدف إلى رفع المستوى الثقافى للمواطنين عبر الكتاب والمسرح والسينيما والفنون الشعبية والتشكيلية
أ/عصام السيد:الحقيقة دورها رفع المستوى الثقافى ونشر الوعى القومى فى المجالات الفنية والثقافية بشكل عام فى السينيما فى المسرح فى الموسيقى فى الفنون الشعبية فى الفن التشكيلى فى المكتبات فى كافة الأنشطة الفنية والثقافية
أ/أحمد إبراهيم : الهيئة بتتعامل مع جميع أنواع النشاط الثفافى والفنى فى كافة الجمهورية فى مصر وبالذات فيما يخص مواد الأدب والنشاط الثقافى عاملة الحقيقة مشروعات كثيرة قوى
مذيع التقرير: إلا أننا نشهد حالة من الترهل العام فى أدائها وعزوف المواطنين عن أنشطتها الثقافية وإصداراتها وهو الذى يعطل دورالهيئة بكل ما فيها وموظفيها وإدارييها عن أداء مهامها
رشا مجدى : دكتور أحمد الثقافة الجماهيرية إلى هيئة قصور الثقافة تغيير الإسم وما هو الواقع الآن هل هيئة قصور الثقافة هى يمكن أن نقول صوت ثقافة الجماهير العادية
د/أحمد مجاهد : شوفى حضرتك هو إسم الثقافة الجماهيرية الاسم المحبب إلى نفسى ولكن مسألة أولا نشأة الثقافة الجماهيرية نشأة قديمة جدا ولكن تاريخ 1989 ده تاريخ تنظيمى يرجع إلى ارتباطها بالهيئة العامة لقصور الثقافة اللى مر عليها دلوقتى 21 عام احنا الثقافة الجماهيرية
رشا مجدى : اللى بيعملوا فيها احساسهم إنها الثقافة الجماهيرية؟
د/ أحمد مجاهد : هم احساسهم إنها الثقافة الجماهيرية وده دورهم الحقيقى إنما تسمية الهيئة هى تسمية إدارية
خالد عاشور : دكتور أحمد يعنى بعد حادثة بنى سويف المؤلمة يجب إعادة النظر فى أشياء كثيرة يعنى خلينا نتكلم عن التأمين وطبعا ده رد فعل طبيعى جدا لكن خلينى أتكلم عن زيادة فروع الهيئة فى محافظات مصر الأخرى زيادة ميزانيات إعادة هيكلة يعنى رؤية أخرى لنشر الثقافة؟
د/ أحمد مجاهد: هو حريق بنى سويف فتح أكثر من حاجة ، أول حاجة تهتم بها مش فى الهيئة بس فى جمهورية مصر العربية كلها الالتفاف إلى الصيانة وإلى وسائل التأمين مصر كلها التفتت بعد هذا الموضوع بما فيها الهيئة العامة لقصور الثقافة بقرار من الوزير واضح جدا وصريح إن الموقع غير مؤمن ما احنا ما احتجناش كثير لسبب بسيط لإن احنا دورنا على بديل استراتيجى احنا ممكن تبقى مواقعنا مغلقة بأمانة شديدة وبنجددها وفقا للميزانيات اللى بتأتى من وزارة المالية كل عام ولكن احنا بنعمل نشاط فى الشارع وفى المدرسة والجامعة والحديقة ومراكز الشباب ببروتوكول مع الدكتور صفى يعنى نحاسب على النشاط ولم نحاسب على المواقع
رشا مجدى : فيه كام موقع لقصور الثقافة ؟
د/ أحمد مجاهد : فيه 505
رشا مجدى : اللى شغال أد إيه؟
د/ أحمد مجاهد : اللى شغال تقريبا ومؤمن نصهم وبالتالى هو اللى شغال فى المناطق الثانية تعمل ولكن لا تعمل داخل قصورالثقافة
خالد عاشور : تعمل خارج قصور الثقافة؟
د/ أحمد مجاهد: آه إلى أن يتم تأمينها آه ما هو عشان كده أنا بقول نحن نحاسب على الأنشطة ولا نحاسب على المواقع طبعا اتخصص للهيئة 250 مليون جنيه للأبنية لإعادة الصيانة على 5 سنوات السنة دى هى السنة الخامسة كل سنة بناخد 50 مليون
رشا مجدى : طب دكتور حضرتك قلت 250 مليون جنيه يمكن الميزانيات التى توضع لهيئة قصور الثقافة ضعيفة بالكاد بتكفى المرتبات طب الحمد لله إن حضرتك متفق معايا وفيه بعض المرتبات بسيطة ليه؟
د/ أحمد مجاهد : هقول لحضرتك حاجة الميزانيات بتاعت المرتبات لاتستطيع أن تدخل على نشاطها والعكس المسألة واضحة احنا عندنا كنت لسة بتكلم فى الموضوع ده فى مجلس الشعب الميزانية قليلة بقول ما ينفعش يبقى عندنا مؤسسة أجور العاملين فيها 135 مليون ويخصص فيها للأنشطة بعد رفعها 25 مليون
رشا مجدى : فقط؟
د/ أحمد مجاهد : ده مفيش بالانس مفيش توازن ما بين حجم الفلوس اللى بتاخدها الموظفين وحجم النشاط وهم وافقوا على ده وخدنا توصية من
رشا مجدى : ال 25 مليون دى لل540 قصر ثقافة؟
د/ أحمد مجاهد : لل540 موقع ثقافى
خالد عاشور: حضرتك بتقول 540 موقع ثقافى .
د/ أحمد مجاهد : أنا بقول موقع ثقافى لإن احنا لازم نتابع ما نقدمه ما بين قصور الثقافة قصور الثقافة حوالى 46 قصر ، القصر ده لازم تكون مساحته ضخمة جدا يتجاوز الخمسة آلاف متر وفيه مسرح مكشوف ومكيف وما إلى ذلك وبيت الثقافة بيبقى أقل شوية 5200 كرسى فقط والمكتبات ما بيبقاش فيها ماتيريال فعلشان كده ليست كل هذه الأعداد قصور ثقافة
رشا مجدى : لكن 25 مليون ده رقم يحزن إسمح لى إن أنا أقولها يعنى ؟
د/ أحمد مجاهد : أول ما جيت كان 23 وبعدين إترفعوا وبقوا 25 خلينى أعترف بأمانة شديدة جدا أن هذا الرقم يضاعف من خلال تعاون السادة المحافظين مع الهيئة العامة لقصور الثقافة لإن لما بنعمل أنشطة فى المحافظات دائما ما يتفضل السادة المحافظون بإن الإقامة تبقى على المحافظة وكمان بيساهموا بدعم النشاط وده بيزود لنا الميزانية
خالدعاشور: طب دكتورأحمد لواتكلمناعلى الهيئة العامة لقصورالثقافة كإحدى جهات النشر الحكومية المهمة تقريبا يمكن أكبر ناشر فى مصر بعد هيئة الكتاب لكن جهد النشر فى الهيئة غير ملقى عليه الضوء بشكل كافى نظرا لإنكم لا تمتلكوا منافذ توزيع أعتقد بتوزعوا فى الجرايد؟
د/ أحمد مجاهد : احنا عندنا بالأرقام 21 إصدار كل شهر ما بين إصدار أسبوعى زى جريدة مسرحنا مثلا أو إصدار شهرى زى جريدة الثقافة الجديدة ومجموعة السلسلات اللى معظمها شهرية أو إصدار مصرى فعندنا 21 إصدار فى الشهر رقم كبير جدا احنا عندنا ميزة وعيب الميزة إن كل شهر إصدارات الهيئة العامة لقصور الثقافة بيوازى سعر الكتب اللى بتنزل فى مكتبات أخرى الكتاب بيتراوح من جنيه ل 5جنيه اللى ب 5 جنيه ده طباعة فاخرة 700 صفحة ده بيبقى 5 جنيه دى حاجة الحاجة الثانية إن احنا توزيعنا مع مؤسسات صحفية كبرى
رشا مجدى : يعنى عندكم مشكلة توزيع يا دكتور؟
د/أحمد مجاهد : آه
رشا مجدى : بس كانت الكتب اللى بترجع لكم بتترمى فى المخازن يا دكتور؟
د/أحمد مجاهد : دى بقى الجزئية اللى عاوز أقولها بعد كده هذا الكلام كان موجود قبل كده
رشا مجدى : قبل كده من أد إيه يعنى؟
د/ أحمد مجاهد : من أكثرمن 3 سنوات الآن ما بيرجع لناش كتاب لأن احنا بننزل فرشة جرايد مع وجود الصحف القومية اللى بتوزع لنا ومتوسط طباعتنا للكتاب 3000 نسخة فما بيبقاش عندنا منه مرتجع بالعكس بيبقى عندنا المطالبة بطبعات جديدة
رشا مجدى : هذا فى المحافظات الكبرى ماذا عن النجوع والقرى بيوصل لها الكتب دى؟
د/ أحمد مجاهد : آه بيوصل لها لإن اللى بيوزع لنا الصحف القومية اللى بتودى الجرائد لهذه الأماكن ولكن يبقى سؤال مهم وهو إن توزيع الكتاب يختلف عن توزيع الجريدة ولذلك احنا بنعمل ده دلوقتى لأن دورنا الخدمة الثقافية يعنى أنا أفرح لما الكتاب يوصل لمستحقه ما افرحش به لما ينزل ويتباع كله فى يوم وياخده تاجر يبيعه مرة ثانية
رشا مجدى : ليه ما يكونش مثلا زى الهيئة العامة لكتاب ليه ما يكونش فيه أفرع موجودة تتبعكم مباشرة ؟
د/أحمد مجاهد : هى موجودة بس مش كثيرة حوالى 3 احنا دلوقتى ابتدينا نعمل استندات لتوزيع الكتب فى كل قصور الثقافة الرئيسية وابتدينا نعمل اتفاقية مع الجامعات المصرية كلها إن احنا بنعمل كشك للإصدارات للهيئة فى كل الجامعات
خالد عاشور : طيب الناشر للهيئة يا دكتور أحمد ما هى المعايير التى تتخصص فيه خاصة إن النشر فى الهيئة كان عليه جدل كثير خاصة مع صدور بعض الكتب التى أثارت جدلا خاصا بمسألة الرقابة هل فيه.......؟
رشا مجدى : تقصد ألف ليلة وليلة ؟
خالد عاشور : قبل ألف ليلة وليلة لو رجعنا بالذاكرة .
د / أحمد مجاهد : أنا هقول لحضرتك حاجة يعنى احنا عندنا خيرة رؤساء التحرير فى مصر الحقيقة من كبار الكتاب والأدباء والمثقفين وهى متروكة لهم ألف ليلة وليلة دى السلسلة بتاعت البشائر للكاتب الكبير جمال الغيطانى عملنا إصدار ألف ليلة وليلة فوجئنا ببلاغ مقدم للنائب العام ضد هيئة قصور الثقافة برفعها أو لإعادة طبع ألف ليلة وليلة
خالد عاشور : البلاغ ده كان من مين يا دكتور؟
د/ أحمد مجاهد : مجموعة محامين موجود موقع على الإنترنت للتضامن معاهم أنا عاوز أقول أن التراث يجب أن نحافظ عليه ولا يمكن أن ترجع مصرللوراء النسخة الطبعة اللى احنا عملناها دى تحقيق الشيخ العدوى شيخ أزهرى هو الذى حقق هذه الطبعة ثم إن الطبعة دية تم إعادة طباعتها مرة ثانية فى دارنشرحكومية تحديدا سنة 98 واترفع عليها قضية واتعملت نفس الزوبعة دى كلها وحكم القضاء بعدم مصادرتها الحقيقة احنا مصرين على طباعة التراث وإلا زى ما قال فاروق حسنى فى الموضوع ده النهاردة قال لو كده يبقى هنهد التماثيل ونحطم الآثار ونلغى كل ده التراث يجب أن يظل كما هو من حقنا أن ننشرهذا التراث ومن حقنا أن ننشر دراسات تعلق عليه ولكن ليس من حقنا أن نحذف التراث أو نشوهه ,الآن لدينا فرق موسيقى عربية للأطفال وفرق فنون شعبية للأطفال فى كل المحافظات بالإضافة لقصر الطفل اللى هو بيمثل قطاع متخصص لأنشطة الطفل كلها سواء فى الفن التشكيلى أوفى الإبداع أو فى الفن بشكل عام
رشا مجدى : متهيأ لى هو ده المكان الوحيد اللى ممكن يراعى المواهب منذ بداياتها ؟
د/ أحمد مجاهد : دى شغلتنا دى مش بس فى قصرالطفل اللى فى جاردن سيتى احنا عندنا إدارتين مهتمين بده لسة كان معانا الدكتورة رتيبة الحفنى وكان معانا اكتشاف طفلة من كفر الزيات 9 سنوات اسمها سهيلة ننتظر لها أن تكون أم كلثوم مصر الجديدة
خالد عاشور : تم اكتشافها من خلال .........
د/ أحمد مجاهد : مهرجان الموسيقى العربية اللى بنعمله فى محافظات مصر
خالد عاشور : طب دكتور أحمد ما زالت الأسئلة يعنى هنطلع فاصل وبعدها نكمل معك إن شاء الله.
فاصل
خالد عاشور : عدنا لكم مشاهدينا الكرام وإلى ضيفنا فى الاستديو الدكتور أحمد مجاهد رئيس الهيئة العامة لقصورالثقافة الحديث متواصل عن الهيئة وأنشطتها يا دكتورأحمد حضرتك أشارت إلى إن الهيئة بإمكانها اكتشاف المواهب من خلال مواقعها المنتشرة على مستوى الجمهورية المواهب ليست فى القاهرة فقط؟
د / أحمد مجاهد : ما احنا لسة مديين مثل فى كفر الزيات
خالد عاشور : دور الهيئة فى اكتشاف المواهب فى أقصى نقطة فى مصر فى الصعيد وفى الريف المسرح الجماهيرى على سبيل المثال كان بيجوب المناطق كلها وكان بيوصل للأماكن اللى فيها صعوبة إلى أن الوصول إليها سهل الهيئة أين هى من هذه النقطة هل ده هدف الهيئة الآن ؟
د / أحمد مجاهد : ما ده احنا بنعمله يعنى احنا لسة راجعين كنا بنعمل مع الدكتور عصام السيد مخرج لسة بنعمل ورش مسرحية فى محافظات الصعيد على وجه التحديد لسة بنخليهم هم يجمعوا التراث ويألفوا العرض ويمثلوه فى الورشة دى كان فى المنيا والفيوم وسوهاج وفوجئنا بعروض رائعة ومستواها الفنى متقدم جدا وبيتكلموا فيها عن الوحدة الوطنية يعنى محدش قال لهم ناقشوا
خالد عاشور : محدش فرض عليهم؟
د/ أحمد مجاهد : محدش فرض عليهم موضوع احنا بس قلنا لهم اشتغلوا بالتراث بنكرر ده دلوقتى فى مصر وعندنا مشروع ضخم جدا لكافة المناطق الحدودية إن احنا نبعت لهم فقط مدربين فى المسرح ومكتشفين المواهب وأنا مبسوط جدا الحقيقة دلوقتى وراضى عن حال المسرح فى قصور الثقافة الحقيقة احنا بعد فاجعة بنى سويف كان فيه أزمة كبيرة جدا فى المسرح يعنى مع الدكتور نوار تم تدارك الأمر فى الفترة اللى كان فيها الدكتور نوار مدير لهيئة قصور الثقافة الآن تمت خطوة جديدة أنا بعتقد المنحنى وصل إلى قمة ارتفاعه فنيا مع حصول عرض من عروض قصور الثقافة وهو عرض التذوق للمخرج جمال ياقوت على أكبر جائزة للمسرح فى مصر فى المهرجان اللى فات المهرجان القومى للمسرح خدنا الجائزة الأولى فأنا راضى عن التصاعد الفنى لمسرح الثقافة الجماهيرية ودوره بقى ما زلنا طبعا كلما أخدنا مزيدا من الدعم المادى نصبح قادرين على إنتاج مسرحية ، احنا مؤسسة ثقافية لا تهدف للربح وحتى لو حصل أولا أنا عندى مشكلة فى إن أنا لوعملت عرض فى القرى والنجوع ب 2جنيه وب3 جنيه وب 5 جنيه ده ممكن يبقى صعب على بعض الناس فى بعض المناطق فاحنا نحن نقدم رغيف الخبزالمدعوم وده دورنا يعنى ، احنا بنعمل كورسات كمبيوترمجانا فى بعض قصور الثقافة وفى اللغة الإنجليزية ، الفنانين بييجوا ، الخامات كلها مجانا لازم نشتغل مجانا
رشا مجدى : دكتورأحمد خلينا نتكلم على إن فيه تكتلات ثقافية وفنية يعنى كلنا شايفين تجربة ساقية الصاوى ليه مفيش تعاون وفرصة تقدم فيها أعمال سواء بقى مسرح غناء موسيقى رسم كل حاجة بتتعمل فيها ليه مفيش تعاون ما بين الهيئة وهذه التكتلات الثقافية
د/أحمد مجاهد : بالعكس يعنى أنا شخصيا أريد العلاقة بيننا وبين مؤسسات المجتمع المدنى التى تعمل فى المجال الثقافى هى علاقة تكامل وليس علاقة ند وتحديدا كان السؤال على ساقية الصاوى وأنا شخصيا من المتعاونين بشكل كامل مع ساقية الصاوى احنا بنروح عندهم وبتعزم هناك وبشوف أظن أن مقارنة الهيئة العامة لقصور الثقافة وساقية الصاوى مش عادلة يعنى ينبغى من باب إن الدور اللى بتؤديه الهيئة العامة لقصور الثقافة فى القرى والنجوع والمحافظات خارج نطاق المنافسة أنا لما آجى أقارن ما تصنعه ساقية الصاوى أقارنها بمؤسسة ثقافية مقيمة معاها أقارنها بحاجة شيك مش أقارنها بحاجة مجانا هنا لازم نعترف إن الجمهور المجانى نوعية معينة لكن بتاع صندوق التنمية الثقافية شئ ثانى إنما فى الآخر نحن نرحب كلما فيه نهضة ثقافية حقيقية فى مصر ما لم تتعاون مؤسسات المجتمع المدنى ورجال الأعمال فى الأنشطة الثقافية بتوسع بالعكس أنا شخصيا برحب بوجود 100 ساقية
خالدعاشور: يا دكتورأحمد حضرتك بتقول يعنى أنكم كهيئة منفتحون على كل الجهات طيب أليست هناك نية على الانفتاح على وزارة التعليم لإعادة المسرح المدرسى مرة أخرى المسرح المدرسى هو اللى خرج لنا عادل إمام وصلاح السعدنى
د/أحمد مجاهد : هقول لحضرتك من 5 أيام على وجه التحديد الفنان فاروق حسنى وزير الثقافة هو والدكتور أحمد زكى بدر وزير التربية والتعليم عاملين بروتوكول تعاون ما بين وزارة الثقافة ووزارة التربية والتعليم علشان ننشئ جميع الأنشطة وأنا دلوقتى بعمل فايل الورقة اللى بتخص قصور الثقافة بشكل عام واللى فيها الأنشطة الثقافية عشان نعرضها على الوزير
رشا مجدى:طيب يعنى احنا بقى لنا سنة بنتكلم الكلام جميل ومبشر لكن دائما ما يقال ده مصدر ثقافى تراجع ليه ؟
د/أحمد مجاهد: عجبنى كلمة حضرتك يقال أولا لا يمكن أن يظل العمل الثقافى حكر على الدولة بالعكس عندما تكثر الأنشطة الثقافية فى الوطن العربى وفى الدول الشقيقة هذا شئ يسعدنى ، إيه الداعى لظهور مثل هذا الكلام الخاطئ لأن العلاقة ليست تنافسية هى تكاملية فيها ظهور بعض الجوائز العربية الكبرى ظهور بعض المهرجانات العربية الكبرى هذا لا يعنى تراجع دور مصر لإن لسبب بسيط من يريد أن يحصل على هذه الجوائز هم مثقفين مصريين يعنى بنبارك النهاردة للدكتور جابر عصفور إن هو بيستلم دلوقتى أول جائزة باسم الرئيس القذافى أكبر جائزة أدبية طالعة فى ليبيا فى الوطن العربى مين اللى بنظم هذه المهرجانات ومين اللى بيحط ورق العمل فيها ومين يعنى هؤلاء المحكمين موظفين مصريين هنلاقى الفنيين فيهم مصريين هنلاقى خط مشاريع هذه الجوائز وهذه المهرجانات مصريين ولهذا لا مكان للحديث عن دورمصرالثقافى هناك الحديث عن الترشيد بدول شقيقة أخرى فى دعم المجال الثقافى فى مصر
خالد عاشور : طيب يا دكتور أحمد مشروع القراءة للجميع مشروع كلنا بنفخر به الهيئة هى مشارك وللا عندها مشاريع أخرى مشابهة وللا إيه دورها؟
د/أحمد مجاهد: لا طبعا احنا مشاركين فى هذا العمل وقصورالثقافة من ضمن المؤسسات التابعة لوزارة الثقافة اللى بتشارك بقوة فى مشروع القراءة للجميع سواء بالمطبوعات والكتب أوبالمخيمات أوباللقاءات أوبالندوات أومجموعة من ورش الأطفال بنعمل ده وبنعمل كمان مجموعة من الافتتاحات بهذه المناسبة فى أكثر من مكان أبرزهم اللى عاوز أتكلم عليه قصر ثقافة الغردقة اللى انتهى بعد عناءات قضائية امتدت إلى أكثر من 20 عام هذا القصر انتهى أخيرا واستلمناه وافتتحناه فى مهرجان القراءة للجميع هذا العام قصر على 70 ألف متر لأول مرة فيه 40 غرفة فندقية لاستضافة الكتاب والأدباء والإعلاميين داخل القصر
رشا مجدى : طيب دائما بيتقال هيئة قصور الثقافة فيه بيروقراطية موجودة هناك أخبارها إيه هتعمل إيه علشان تخرج من هذه البوتقة ؟
د/أحمد مجاهد : أولا لازم نعترف إن أقدم شئ فى مصر هو البيروقراطية احنا بنشتغل على أكثرمن محور وفيه حاجات إتعملت قبل كده وهى القضاء على المركزية وإعطاء الفرصة لرؤساء القصور الثقافية تشتغل يعنى ده موجود وفى الآخر أنا عامل معاهم حل شخصى إن اللى عنده مشكلة بيجى لى ومعنديش أى مشكلة فى ده يعنى هذا الإجراء اللى موجود الحقيقة عمل سقف لأشياء كثيرة جدا بتبقى الناس عارفة إن اللى مش هيؤدى واجبه واللى مش هينتظم مفيش مشكلة أنا مش عامل الخلفية دى أصغر موظف وأصغر متعامل مع الهيئة لو حصلت عنده مشكلة بيجى لى شخصيا فالمسألة دى يعنى بنحاول القضاء على البيروقراطية سواء بالقرارات أو بآليات عدم المركزية وحاجات زى دى إنما فى الآخر يظل الموظف غير المستريح ماديا يفضل الاسترخاء عن العمل
رشا مجدى :احنا عمالين نلف فى دائرة مغلقة بنتكلم ونرجع نلاقى التمويل أو العائد المادى هو العائق الأول أمام نقول إيه تطوير هيئة قصور الثقافة وصول المسرح للنجوع والأقاليم توزيع الكتب دائما بنلاقى إن ......؟
د/أحمد مجاهد:العائق الأول من وصوله بشكل أفضل ولكن ما لا يدرج كله لا يترك جزءا
خالد عاشور: طب قول لى يا دكتور أحمد مفيش نية لإشراك رؤوس الأموال الخاصة فى دعم مشروعات الهيئة؟
د/أحمد مجاهد : الحقيقة فيه أكثر من مشروع احنا ندور على مشاريع تمويل إزاى يعنى كان فيه مشروع عامله المرحوم سعد الدين وهبه إسمه جمعيات قصور الثقافة الجمعيات دى مؤسسات مجتمع مدنى ولكنها فى نفس الوقت تابعة للهيئة فى إطار الجمعية المركزية فى ظل القانون الجديد للجمعيات استطاع أكثر من 70 جمعية توفيق أوضاع هنرجع أنشطتها مرة ثانية بعد ما كانوا متوقفين وعملنا الجمعية المركزية وأنا رشحت نفسى فيها وبقيت رئيس مجلس إدارتها
رشا مجدى : يعنى صحيح الجمعية موجودة ؟
د/أحمد مجاهد : آه بس كانت واقفة من حق هذه الجمعيات أن تقدم نشاطا فنيا وثقافيا ممول تحت مظلة الهيئة ومن حقها أن تعيد هذه الأموال مرة أخرى زى ما تكون صندوق لدعم الهيئة مرة أخرى يعنى الجمعيات دى شايلة عربيات وشايلة مواقع للهيئة ما زالت موجودة حتى الآن ده اللى بنفكر فيه دلوقتى احنا بس مستنيين إن كل جمعية من دول من حقها فى العام إعفائين ضريبيين لإقامة حفلات عامة وعملنا هذه الحفلات فى إطار محترم فى محافظات مصرأتعشم إن احنا هنلاقى مواهب
خالدعاشور: فى الحقيقة فى الفترة الأخيرة ظهر رجال أعمال محترمين رأسمال وطنى محترم بيرعى الأنشطة الأدبية تقولوا لهم تعالوا تحت مظلتنا إعملوا الكلام ده؟
د/ أحمد مجاهد : يعنى يا ريت يعنى تعالى شوف انت لو بتتكلم عن أكبردولة فى العالم بتتكلم عن أمريكا النظام الاجتماعى والعدالة الاجتماعية فى أمريكا من خلال دعم رجال الأعمال للتعليم وللثقافة بالمليارات
رشا مجدى : طيب دكتور أحمد انت بترى هيئة قصور الثقافة مستقبلا شكلها إيه ؟
د/ أحمد مجاهد : أنا أرى أن هيئة قصور الثقافة هى صمام الأمان الوحيد للدفاع عن الهوية الثقافية وللوقوف ضد التطرف ولمحو الأمية وتثقيف المواطن المصرى البسيط وبقدر ما أعطينا هذه المؤسسة بقدر ما سنأخذ منها
خالد عاشور: دكتورأحمد احنا بنشكرك جدا على تشريفك ليحدث فى مصر وإن شاء الله نتواصل دائما من خلال هذا اللقاء ومن خلال لقاءات أخرى والحديث يتواصل عن الهيئة إن شاء الله ؟
د/ أحمد مجاهد : أنا اللى اتشرفت وشكرا جزيلا
رشا مجدى : شكرا جزيلا مشاهدينا الكرام وانتهت حلقتنا النهارده من يحدث فى مصر وحتى نلقاكم فى حلقات أخرى من برنامجكم يحدث فى مصر إلى اللقاء