وأنا كمان مش خرونج !

مش بس أبو الليف اللي بيرفض إن حبيبته يكون عندها أصحاب على الفيس بوك
ده فيه شباب كتير فعلا واخدين الموضوع بجدية، وبيرفضوا إنهم يرتبطوا بأي بنت يكون عندها أصحاب أولاد على الفيس بوك، ويا إما تمسح الأولاد اللي عندها، يا إما تروح لحالها، ودلوقتى حدد رأيك .. يا إما كنج كونج أو تعيش علي طول خرونج.
يا أنا يا أصحابها اللي على الفيس بوك .. ده كان رأي محمد عبد الوهاب -20 سنه كلية حقوق- واللي بيقول: غلط طبعا انى أتجوز ولا حتى أرتبط بواحدة عندها أصحاب على الفيس بوك، وده فعلا اللي حصل معايا، فأنا كنت مرتبطاً ببنت وكنت هخطبها بس عرفت إنها عندها ولاد على الفيس بوك، وطلبت منها تمسحهم، بس هي أخدت الموضوع على كرامتها فسيبتها طبعا.
وبيتفق معاه فى الرأى باهر سيد -21 سنة كلية آداب- فهو يرفض الزواج من بنت عندها أولاد على الفيس بوك إلا إذا مسحت كل اللي عندها.
لكن سامح الفقي - 20 سنة كلية إعلام - عنده شرط واحد في الموضوع ده، وهو إنه يكون عارف أصحابها اللي مسجلاهم عندها، يعني يكونوا أخواتها أو أقربائها ، لكن لو واحد مش عارفه طبعا هايطلب منها تمسحه، أو يشوف غيرها.
وده نفس رأي خالد محمود -20 سنه كلية تجارة- واللي شايف إنه مفيش مشكلة يتجوز واحدة عندها أصحاب على الفيس بوك بس تمسح اللي مش عارفهم.
أنا فعلا مش خرونج علشان أتجوز ولا حتى أفكر في واحدة عندها أصحاب رجالة على الفيس بوك، ده رأي محمود عبد المنعم-22 سنة كلية إعلام- واللي بيقول: أنا حتى لو عرفت إن اللي هرتبط بيها كانت تعرف ناس على الفيس بوك قبل ما أعرفها مش هارتبط بيها، لأنه أصلا ماينفعش، فحكاية إنه يكون عندها أصحاب أولاد على الفيس بوك دي بالنسبة لي زيها زي ما يكون عندها " بوي فريند " .
ويتفق معه محمد حسن -21 سنة كلية هندسة- واللي قال: قبل ما اتقدم لها لازم الأول أعرف هي علاقتها بيهم ايه، ولازم تمسحهم كلهم، لإنه ماينفعش اتجوز واحدة عندها أصحاب ولا تعرف أصلهم ولا فصلهم، وكمان محمد رجب -20 سنة كلية تجارة- هيطلب منها تمسح كل الأولاد اللي عندها، لإنه مش هيتجوز واحدة عندها أصحاب ولا الكلام ده على حد قوله، ونفس الكلام بالنسبة لمحمد عطية-21 سنة كلية تجارة- واللي بيشترط يكون عندها بنات بس على الفيس بوك.
بس فيه ناس شايفة إن الموضوع بسيط زي ما بيقول عمرو شوقي -20 سنة كلية إعلام- إنه لو يعرف كل أصحابها اللي على الفيس بوك فليست هناك مشكلة، لان في النهاية دول ناس على الفيس بوك بس، ومش بيتقابلوا.