رمضان كريم‏ للوطن

كل‏ عام‏ وأنتم‏ بخير كل‏ رمضان‏ وانتوا‏ أبرار‏ طيبين طالبين‏ الحق‏ صحبة سهرانين‏ متجمعين
كل رمضان وانتو عيد
للصداقة
والبراءة
ياشباب مصر الجديد
كل رمضان وانتو صحبة منورة
وانتو صحبة ورد طالبة ربيع سعيد
وانتو ثورة ع الرداءة
والبذاءة
وانتو عند النور
وليكو النور بطاقة
وانتو للأمة استضاءة
وانتو للأحلام نشيد
***
رمضان كريم للوطن
وتحية للأمهات
اللي اتقتل مولودها
واللي اتسجن
واللي استطاع يبقي فانوس للولاد
أو يبقي شمعة عيد ميلاد
أو يبقي سجادة صلا
أو يبقي باب
مقفول في وش العدا
مفتوح للأحباب
أو يبقي صفارة ندا
أو يبقي أنشودة فدا
يا ألف بركة يا مصر
كان فين كل دا؟
قال الفتي
كان في جراح الشهيد
***
وعليك سلام الله
يا أيها الولد الوسيم
اللي احنا شفنا صورته خارج
م الجحيم
فكرهنا حتي الورد حتي النسيم
علشان وحوش عمالة تفسد
في الحياة
عمالة تنهش في الأمل
وتلوث النور والمياه
وياما غيرك اتقتل
ما بين مخالب مجرمين
وناس ماتعرفش الضمير والدين
***
خلونا دلوقتي في قمر الدين
ودوقي يا مصر الفرح مرة
دوقي صلاة الفجر
من غير مخبرين
ودوقي فجر العيد
وأهلك فرحانين
ودوقي يوم
اللي بيحلموا فيه
( واللي حلموا بيه )
مش مجانين
***
رمضان يا مصر أتي في عام النصر
أو اللي بكره يكون بإذن الله
مع اقتران الهمة بالعقل الرزين
مع اتحاد فيض الحماس بالصبر
بشبابها ويا كبارها متجمعين
ويارب لما ييجي رمضان اللي جي
نكون بقينا أحلي من دلوقت
وأحن من دلوقت
وأشد علما واقتراب
من ربنا
صحوا وحلما ما في فرق
كل المني يا شعب متحققين
***
حبيت أهنيكو
واكون بينكم ولو حبة
يا شبابنا يا اللي شبابنا فيه استخبي
وفجأة بان
وفجأة طل
وفجأة شق الغيم وهل
رجع شوارع البلد للناس
لما انفجر بركان حماس
وأثبت انه مش مجرد انفجار
مش فرقعة
دا بحر م الاصرار .