مش حانسأل إنتو مين

إنتو مين ؟!
إحنا مش صيدكو السِمين
إللى ينجَّر لكمين
إحنا أجناس طيبين * * وإنتو مين ؟
الأكيد مالكوش ديانة أو هوية
إنتو إيد شيطان بِجِح بعيون قوية
أو عبيد للشر لابسين مجرمين
أو لإبليس خدامين * * إنتو مين ؟
إنتو دوله إسلامية * * والفقيه ليه الولاية ؟
إنتو أشباح مِتدَّارية فى الزوايا ؟
واللا أفكار عنصرية فى النوايا ؟
واللا تكفير عن خطايا ؟ . . أو هواية
فى إصطياد المظلومين ؟ * * إنتو مين ؟
إنتو أعداء السلام * * إللى زى الشوك فى زورنا ؟
هىَّ روح الإنتقام * * لسة بتحِش ف جذورنا ؟
طب قولولى دفعتوا كام * * للجواعا المعدمين ؟
إحلفوا ع المية تجمد * * كدابين
لو ما كانش بنيامين * * يبقى مين ؟
إنتو وَهم ؟ و الأذية مِنَّا فينا ؟
يبقى هَم تقيل ولا هِلب السفينة
و الأهم * * إنتو فيكو عقول سجينة
واللا أمخاخ مغسولين ؟ إنتو أعداء الصليب ؟
إنتو ضد المسلمين ؟ واللا مين ؟
هوَّ تقصير مننا ؟ * * ظٌلم وإترعرع هنا ؟
آه يا نبحة حِسِّنا * * إعدلوا فى المحكومين
لو حاهاتى ميت سنة * * تسمعوا متبسمين
إحنا فيكو مصدومين * * إنتو مين ؟
إنتو عين للأمن مش مفروض تنام ؟
همَّها فى الدنيا تأمين النظام
أو ضيوف الشيخ حصيرة * * أو سفارة العم سام
تحسبوا الأنفاس علينا و الكلام * * هددونا من يومين
يقتلونا و إحنا قاعدين آمنين * * كنتو فين ؟
إنتو فكر و سوس ينَخوَّر * * و ف كلام الله يحوَّر
يوم يكَفَّر يوم يزوَّر * * عالشهادة مصممين ؟
بالإيمان متلصمين ؟ لو تدوَّر عن إله العالمين
إحنا أول من سجد له وقال آمين * * و إنتو مين ؟
كل مرة الهوجة تهدا و الوداد
نرسمه بالعافية على وش العباد
و الإمام يحضن أبونا فى الحداد
ده بيشجب , ده أشاد * * و إحنا قاعدين مكتومين
و إنتو نار تحت الرماد * * بالسواد متلسمين
إنتو مين واللا مين ؟
إنتو مين واللا مين * * واللا يمكن كل دول
مش حاضيع وقتى فيكو * * مش حاقول
غير كلام شرحه يطول
مش حاعزى بالطبول * * إحنا أهل المكلومين
صحصحوا , مِدوا الأيادى , مِدَّها
أى ثغرة للأعادى نسدها
أى أسوار بين ولادى نِهِدَّها
أو عقول نسييت بلادى نرُدها
نبقى طاقة , أى ضربة نصُدها
ليه نكون متقسمين
إوعدونى نحبها , و إحلفولى نودها
إحلفولى ميت يمين
وفروا الوقت الثمين * * لإللى يسأل هُمَّا مين
حسن العربى