كلام‏ (4)‏

الأسماء‏ الواردة‏ في‏ النص‏ تشير‏ الي‏ شخصيات‏ خيالية‏ وأي‏ تشابه‏ بينها‏ وبين‏ أسماء‏ أشخاص‏ في‏ الواقع‏ هو‏ مجرد‏ صدفة‏.‏
سبوبة بنص رغيف
وقصيدة بنص ريال
وطبنجة بتمر علي الشارع بجلال
فتوح بيمر
فتوح رمز الوطنية
فتوح الأعمي المتمكن من نفسه
اللي بيشوف في الضلمة
أنا أونكل فتوح يا حبيبي , عايز إيه؟ عايز مطوة
حاضر من عيني اجيبهالك في العيد
ظاهرة النص جنيه
انتشرت في شارعنا
الكلمة الواحدة بنص جنيه
العطسة الواحدة بنص جنيه
وأنا واقف في الشارع
باتفرج علي فتوح بيموت طفل
بالمطوة اللي اشتراها له في العيد .
*
أنا مثلي الأعلي فتوح , لأ
أنا مثلي الأعلي المطوة
(16)
غمض عينيك يا حبيبي
اللقطة الجاية مخيفة
الفيلم ده كله مشاهد رعب
وأنت مصمم تشوفه
وأنا شفته قبل كده
لكن مش دايما
ح الحق اقول لك غمض
وانت بتخاف يا حبيبي
بتخاف وبتحلم بالليل كوابيس
مش كنت استنيت حبة لحد ما تكبر مش قادر أطفي التليفزيون
فيه شيء رابطنا احنا الاتنين
في الكرسي
*
ايدك بتدور علي ايدي
ايدي بتدور علي ايدك
نفس الرعب في قلبي وقلبك
ولواني .. شفته قبل كده
(17)
أوتوبيس اتناشر وصلني امبابة
ازاي ما اعرفش
كان ممكن اروح شبرا
أو باب الخلق
أوتوبيس اتناشر بقي كل الأرقام
امبارح رحت السينما بدبابة
صبحت علي الجار بقزازة ف راسه
وغسلت ايديا ف حمض الكبريتيك
أوتوبيس اتناشر في النيل
الطرابيزة بتدور حوالين نفسيها
البلية ف جفن الراجل بدل العين
أوتوبيس اتناشر
كان بيوديني السيدة زينب
السيدة زينب في الموسكي
السد العالي ف راس التين
ابني عنده اتناشر عيل أكبر منه
أمي بتلحس كل حيطان البيت
(18)
الأتفه منك عايشين
خانقين رقبتهم بالكرافتة
مبتسمين في الصورة
حاطين ملاليم في البنك
الأتفه منك عرفوا مقام الدنيا
واشتغلوا في السعودية
واتيتموا مع أولادهم
إيه معني صراخك في السموات؟
ما حزنتش أكتر منهم
لما الأهلي اتعادل
لما الشرابات طلعت كلها فردة وفردة
وصباعك وصباعهم باظظ منها
إيه معني صراخك بتقول انا تافه
كله بيلقط فتافيت العيش
من أسفلت الشارع
وينام مبسوط
(19)
ولا أي كلام يقدر يعفيك من حزني
يامحفلط قوي يا لئيم
عشرين بلكونة نطيت منها
وأنت بتلقفني
عايز إيه من شنبي؟ !
ليه لازم تبرمه علي كيفك؟ !
ضفرت لي دقني !
حطيت في وداني أستك ولسعت
منك لله
ولا أقدر اقول لك بم
قفلت عينيا ببلاستر
خدتني من إيدي لحتة ما اعرفهاش
وهناك وشوشتني بكلام مجنون
وفتحت عينيا لقيتني ف مستشفي
ولا أي كلام
يقدر يعفيك
من حزني .
(20)
البيت اللي مافيهوش أطفال
دايما نوره معتم
والناس فيه قاعدين ساكتين .
البيت اللي مافيهوش طفل
كله ف سن الشيخوخة :
الطبق اللي بناكل فيه
الفوطة اللي بنمسح فيها الوش
تحت عينينا هالات غامقة
والكرسي عجوز
زي الضهر اللي بيرتاح
زي الإيد اللي بتشد الخيط بالإبرة
زي الصمت
زي حيطان البيت
والنور اللي بيدخل م الشيش المتشنكل
شاحب
وكأنه ف آخر عمره
ولوحده ف بيت مافيهوش غير حزنه
طفل يهدهد فيه .