مين اللى قال ان المصريين فقراء ؟

المصريين عايشين أحلى عيشة ودلوقتي أحسن من زمان بكتييير واحنا نمردة مبيطمرش فينا حاجة.. طبعا ده كلام الأخوة الأفاضل بتوع الحكومة.
بصراحة كنت زيكوا كلكوا طبعا لا ألقي بالا لهذه التصريحات اللوزعية من جانب هؤلاء الأفاضل .. حتى تم اصطيادى في شارع رمسيس الساعة 3 العصر .. دخلت شارع رمسيس الساعة 3 خرجت منه الساعة 6 ..
الطريق مكنش واقف ده كان لعنة وطبعا وسط الزحام وانت لوحدك محلا السرحان..
لقيت الشيطان ابن الإيه..
جاللى وقاللى..
دلوقتى انت مكنتش مصدق كلام الأخوة المحترمين إياهم وهم عماليين يقولوا ان المصريين دول أغنية بس مخبيين ولاد الذين .. والدليل .. كم العربيات غير المنطقي الذى امتلأت به شوارع القاهرة .. الدنيا زحمة على طول وكل سنة مبيعات السيارات فى مصر تحقق أرقام قياسية عن السنة الفائتة ..
طيب أما احنا غلابة ومش لاقيين رغيف العيش وانبوبة البوتاجاز ومش لاقيين شغل .. أمال بنجيب فلوس نشترى العربيات دي منين؟
قعدت أفكر وفجأة.. مسكت نفسى وأنا ابتديت اقتنع بالكلام ده احنا أغنية بس مخبيين .. شوف ازاى .. علشان الحسد طبعا .. زعلت من نفسى وقعدت أقول لأ ده مش حقيقي مش ممكن .. ده كلام مش مظبوط
هو يعنى حد عارف كل واحد من الناس المزنوقين فى الشارع ده زيى جايب عربيته ازاى ؟
ما فى ناس عليها اقساط.. وفى ناس سالفة قد كدة ..
وبعدين يعني هو حرام الواحد يجيب عربية علشان يحمى أهل بيته من الشياطين اللى مالية الشوارع والتحرش والكبت وقلة أدب كتير من الناس اللى مبقاش يردعهم لا دين ولا ضمير .. وبعدين جاى تقولهم انتوا أغنية علشان بتجييبوا عربيات ..
ابتدى ضميرى يأنبني..
طيب .. بس ده ما يمنعش انهم لقوا فلوس يجيبوا بيها العربيات دى صح ولا لأ..
ابتديت افوق وانا بالاقى الطريق بيتحرك بس فضل السؤال محيرنى لغاية ماروحت
احنا أغنياء وبننكر وبنتبطر وبنخاف من الحسد.. ولا احنا غلابة وقرع ونزهية؟؟؟

أحمد عصمت