نصيحة من د.شريف عرفة: عيش اللحظة !

فى أسئلة كتير بتدور فى دماغ كل واحد فينا، معظمها حاجات نفسية أو خاصة بتعاملاتنا مع الآخرين، يعنى مثلا إزاى نكون متفائلين ونقدر نتعامل مع الصدمات فى حياتنا ؟! وإزاى نأثر فى الآخرين
كل دى حاجات هتلاقوا لها إجابات عند الدكتور شريف عرفة المحاضر فى التنمية البشرية خلال حواره مع أعضاء جروب "الشباب" على الفيس بوك لمدة ساعتين.. تعالوا نعرف سألوه فى إيه .. وإزاى كانت إجاباته .
إعداد: محمد فتحي- محمد المراكبي
تصوير: أميرة عبد المنعم
آية محمد أمين:
عايزة أعرف إزاي وأنا محبطة أقدر أرجع الأمل لنفسى تانى؟
لازم يكون عندنا هدف كبير ونكون متعلقين بيه عشان نواجه الصعوبات اللي بتقابلنا، وعشان كده لازم الإنسان يكون عنده هدف في حياته ، ودي مهارة لم نتعلمها في المدارس للأسف ، فدائماً يكون لنا خط نمشي عليه .. وبجانب هذا يجب أن تكون لدينا فكرة وجود أهداف بديلة.
أنا حرة:
إزاي أنسى الماضي وأقدر أعيش الحاضر؟!
لكي نعيش الحاضر لازم نبقي عايشين ومركزين في اللحظة اللي عايشينها، فممكن نكون عايشين في لحظة جميلة ولكن بنفكر في ذكريات أليمة أو بنفكر في المستقبل المجهول، فالزمن الحقيقي هو الوقت الحاضر، وحتى نكون إيجابيين لازم نعيش اللحظة دي.
##
سها وليد:
إزاي أتعامل مع شخص بيكرهني من غير ما أعمل فيه حاجه بس لمجرد إني أحسن منه؟
أسأل نفسي الأول هو بيكرهني فعلا ولا لأ، هل كل تصرفاته تدل على كراهيته، وهل السبب الحقيقي إني أحسن منه ولا ممكن أكون عملت حاجه ضايقته، ولكن لو فيه شخص بيكرهني علشان أنا أحسن منه يبقي أنا السبب لإني عاملته بشكل يحسسه إني أحسن منه، فحاولي تلاقي أسلوب مختلف في التعامل معاه.
هيثم أبوالحسن:
إزاي أحدد مهارة جوايا وأنميها؟
لازم أجرب حاجات كتير وأعمل مهارات كتير علشان أكتشف نفسي، لازم كل واحد يكون شقي ويجرب كل حاجه علشان يوصل للمهارة اللي جواه.
سارة أحمد
إزاي أركز في كذا حاجه أو أوفق بينهم من غير ما أقصر فى التانية ؟
أهم حاجة أشوف النشاطات دي كلها ماشية في اتجاه واحد ولا لأ، فلو واحد بيشتغل وبيدرس مفيش مشكلة، لإنه ممكن يشتغل علشان يكمل مصاريف الدراسة، لكن لو واحد عايز يبقي أحسن واحد في التنس، وأحسن واحد في اليد، فهنا فيه تعارض، وكمان نشوف هل فيه حاجات ممكن تتلغي ولا لأ، ونشوف الحاجات اللي بتضيع وقت، فمثلا المواصلات بتضيع وقتاً كبيراً، فممكن أستغل الأوقات دي وأعمل فيها أي نشاط حتى ولو تليفونات، ولو عايز أعمل حاجة وفيه حد تاني يقدر يعملها يبقي أفضل، ولو فيه مشاوير مش شرط أروحها وممكن أعملها بالتليفون أو النت فممكن أوفر وقت.
برنسيس أونا:
إزاى أكون مميزة في حاجه أنا مش بحبها بس مطلوبة منى؟
لازم أحب الحاجة دي، ففي مرحلة معينة لازم أعمل حاجه مش بحبها، فكلنا مش بنحب المذاكرة بس لازم أعملها علشان أوصل للحاجة إللي بحبها، فالحب والكره مش حاجه لا إرادية، فممكن نشوف الحاجات الإيجابية الموجودة في الحاجة اللي مش بحبها، حتى ولو الكناس إللي زهقان من شغله فممكن يفكر في أنه بينظف البلد وده التفكير الصحيح، وبعد المرحلة دي ممكن نغير للحاجة إللي بنحبها.
عبد الله صبري:
إزاي التراكمات السلبية اللى تمت جوايا أزيلها وأحولها لإيجابية؟
لازم نعرف إنه مفيش حاجة إسمها تجارب سلبية في الحياة، فأي حاجة سلبية بتحصل في الدنيا هي في الحقيقة حاجة ستفيد منها في المستقبل، فالتجربة السلبية هي تجربة إيجابية، ولازم نفكر بشكل مختلف علشان نوصل لحاجات إيجابية أكثر، فكلنا عندنا خدوش سلبية في حياتنا، ولكن الفكرة كل واحد بيتعامل معاها ازاي.
##
سومة قنديل:
إزاى نتخطى الصدمات اللى بنتعرض لها في حياتنا ؟
أي صدمه حصلت لازم نستفيد منها، فأي مصيبة هي إختبار من عند ربنا هل سنشكره أم لا؟ وهل سنبتعد عن ربنا ولا نقرب منه؟ فلما نواجه مصيبة لازم نفكر بشكل إيجابي في تخطي المشكلة.
صلاح الهواري:
ازاي نقدر نخرج شخص من حالة إحباط ويكون عنده أمل وعزيمة للحياة من جديد؟
لو هو عايز يخرج من الحالة دي هيخرج، لأننا مثلا لو عايزين نخلي شخص يبطل إدمان وهو مش عايز مش هنقدر نخليه يبطل.
سارة موسي:
إزاى نقدر نخرج من مرحلة إكتئاب قوية ونستفيد منها كمان؟
لو اكتئاب مرضي يبقي محتاج طبيب نفسي، أما عن الإحباط فلازم أحاول أخرج من الحالة، ولو فيه مشكله لا أفكر فيها في نفس اللحظة، وأنقي ذهني من التراكمات دي كلها، فلو أنت حاسس باكتئاب لا تتصرف كشخص مكتئب، ولو أنت تعيس حاول تعيش كالسعداء، لأن كله بيأثر على الحالة المزاجية، فلو تصرف الشخص على أنه ناجح أو سعيد، فيجد أن الحالة الشعورية دي انتقلت بداخله، والشخص المكتئب لازم يبعد عن العزلة، ولازم يعرف كمان هو ليه مكتئب، ويفلسف الموضوع بشكل إيجابي مختلف.
خالد محمود:
لو إنسان مر بتجربة حطمته إزاي يرجع له نجاحه وتصميمه تاني؟
ممكن يرجع طالما فيه عقل بيفكر وفي صحة تؤهل، فالأفكار السلبية من المشكلة هي اللي بتحطم، فلازم نفكر بشكل إيجابي في اللي حصلنا، على الأقل سنكون تعلمنا ولو واجهتنا نفس المشكلة في المستقبل سنكون أكثر خبرة في التعامل معها، ولازم نحط أهداف بديلة لو كان فيه هدف لم نستطع الوصول إليه.
أحمد علي:
إزاى أغير حياتي وأبدأ منين ؟
أولا التغيير يبدأ من التفكير، فلو قررت أغير فلازم نتحمس لكده، وأهم حاجه إني أبدأ حالا في اللحظة اللي عايشها، ولا أقول بكره هابدأ، فلو عايز تبطل السجاير أرمي العلبة دلوقتي، ثانيا حاول تتعرف على ناس حصل لهم التغيير ده، فلو عايز أغير دراستي مثلا ابدأ أتعرف على ناس بتفكر بنفس الطريقة، ومهم جدا إنى أكره إللي أنا فيه قبل ما أغير، وأحبب نفسي في الصورة اللي أنا عايز ابقي عليها.
صفاء أبوالعلا:
ازاى الواحد ينسى جرح شخص قريب منه؟
لازم الشخص ده لا يعتبر إن فيه جرح أصلا، ولازم أنظر لها على إنها تجربة إيجابية، فلو واحد جرحني يبقي عرفت إنه مش بيحبني، فلازم أحمد ربنا إني خلصت منه.
##
عادل رجب:
إزاي أكون شخص مؤثر في الآخرين؟
القائد هو شخص عنده هدف ويستطيع أن يأخذ الناس لهذا الهدف، فلو مش عندك الحكاية دي مش هتأثر في الناس، ولو عايز تغير الناس اللي حولك لا تكون مباشر معهم، وحاول تفهم الدوافع الشخصية لكل واحد، وتتعامل مع كل واحد بطريقته.
نورا السيد:
قريت لك مقال بتقول فيه كن مغرورا ..يعني ايه أكون مغرور؟
قلت كنت مغرورا حتى لا يتكلم أي شخص عن نفسه بشكل سلبي، فالمفروض أعطي إنطباع جيد عن نفسي، ولا أتحدث عن نفسي بشكل سئ، أو أقول إن مهاراتي متواضعة، وده لا يتنافي مع التواضع طبعا، ولكن لازم أقول للناس أنى واثق من نفسي، فتصرف كشخص محترف حتى تكون فعلا محترف.
منصور مسعود:
لو دماغك تعبت من أحداث الحياة السريعة والسيئة أحيانا إزاي تعمل لنفسك برمجه عكسية وترجع تشغل دماغك من جديد؟
فيه حاجه إسمها التأمل ممكن نعملها حتى نفصل عن الحياة، وهى أن نتأمل ونعمل تمرينات معينه أو نشغل مزيكا هادئة، ولا نفكر في أي حاجه ولا أتخيل أي حاجه، ولكن أعزل عقلي تماما عن أي شئ، ولازم كل فتره نعمل كده، وفيه ناس ناجحة كتير بيعملوا ممارسات خاصة للحكاية دي حتى ولو كان لعب أو الجلوس أمام البحر.
أشرف جعفر:
إزاي نتعامل في الحياة بشكل عام مع الشخصيات المركبة والمشاغبة؟
كل واحد له أسلوب معين، فلازم تعرف أسلوب الشخص المشاغب علشان تقدر تتعامل معه، فمثلا الشخص اللي بيشتم ويقول أنا بهزر معاك جرب تشتمه وقوله أنا بهزر معاك، فتعامل مع كل واحد بأسلوبه.
وائل قريطم:
كيف أحكم على أهدافي سليمة وصحيحة؟
الحكم على الأهداف من نتائجها، وطالما أن هدفك بعيد عن شئ لا أخلاقي أو ليس معاكساً للدين فهو في المسار الصحيح، ولازم تقنع الناس بنجاحك.
محمد جمال مصطفي:
لو عندي أهداف كتيرة ومش عارف اختار من بينها أعمل ايه؟
لو عندك أكثر من هدف ومحتار ابدأ التنفيذ حالا، وستكتشف إن فيه حاجات تضغى على أخري، فكل واحد عنده أهداف، ولكن أرض الواقع تفرض علينا حاجات أكتر من مجرد التخيل، ولازم أقارن بين الأهداف كلها، ويكون عندي معلومات أكثر عن كل هدف منهم.
فى النهاية وجه شريف عرفة رسالة لقراء الشباب وهى: خليكم فاكرين دايما إننا بنعيش في الدنيا مرة واحدة بس, فتعالوا نخليها أروع حياة ممكنة..
##