ازاي تبقى ..gentleman ؟!

كل واحد فينا عايز يظهر بشكل كويس قدام الناس.. يعني عايز يقال عليه " أنت جنتلمان " .. بس " الجنتلة " ليها أصول وتظهر في التصرفات والمواقف وتختلف من شخص للثاني .
فيه دراسة أمريكية عن الرجل " الجنتلمان " .. ووضعت له صفات معينة.. وهي:
- إنه يتعامل باحترام وتقدير مع كل شخص ويكون مبتسم في وشه.
- يتحمل المسئولية ومش بيهرب منها.
- تكون روحه مرحه وفي المواقف اللي ممكن يكون متنرفز فيها لازم يكون عقلانياً .
- لازم يساعد زوجته في أي حاجة بتعملها في البيت.
- يكون مجاملاً للمرأة بشكل عام.
##
- ينتقي الهدايا الشيك وبالتحديد الورد، وخصوصا لو كان هيقدمها لسيدة .
- لازم يمشي بمبدأ (Ladies First) .
- وكمان يكون كريم سواء في عطائه أو كلامه.
وبالنسبة لمصر بقي.. فتعالوا نعرف ازاي أي شاب يبقي جنتل مان...
الجنتل أدب مش شورت وكاب!..ده معني الجنتلة عند محمد عامر- 22 سنة كلية آداب- واللي بيقول: الراجل الجنتل لازم يكون مؤدباً في تعامله مع الناس، مش بس يكون لابس شيك أو لابس شورت وكاب ويقول هاي وبابي ومامي، لكن هي في النهاية أدب، فأسلوبي في التعامل مع الناس هو اللي يخليهم يقولوا عليا جنتل مان.
وبيقول حسن سالم- 21 سنة كلية تجارة-: الجنتلة تظهر في المواقف التى تحتاج لرجل بجد، فمثلا لو كنت قاعد في المترو وفيه بنت أو رجل كبير في السن واقف لازم أقوم وأقعده مكاني، ولما ألاقي مثلا واحد يعاكس بنتاً أتصدر وأمنعه من كده، ولو حد محتاج مساعدة لازم أساعده، بكده أكون جنتل مان.
##
الجنتلة دلوقتي يعني فلوس.. ده رأي وليد عبد العزيز- 22 سنة كلية تجارة- وبيقول: علشان الناس تقول عليا إني جنتل يبقي لازم أوريهم فلوسي، وأكون( فيّيس) بمعني أصح، فلازم أعزم الكل، وأصرف عليهم، ولو فيه بنت أدفع لها ثمن أي حاجة سواء أكل ولا شرب ولا مواصلات، وعلى الأساس ده أنا مش عايز أكون جنتلمان، كفاية أني (مان).
وبيقول محمد أشرف- 21 سنة كلية آداب-: مش عارف ليه الجنتلة مرتبطة بالبنات، يعني أكون جنتل مان قدام بنت، وأبوس ايديها وأنا بسلم عليها، والحاجات الأمريكاني دي، بس أنا شايف غير كده، فأنا شايف إن الاحترام هو قمة الجنتلة، فلازم أحترم نفسي واحترم اللي قدامي، وكمان مظهري يكون كويس قدام أي حد، لإنها بتفرق.
ابن بلد وبيفهم في الأصول.. ده مفهوم الجنتلة عند عمرو إبراهيم- 23 سنة كلية آداب- وبيقول: الجنتلة دي كلمة مستوردة، لكن في مصر هو الراجل ابن البلد الجدع اللي بيفهم في الأصول، واحنا في مصر كده فعلا، وعلشان أكون كده يبقي لازم أكون رجلاً بجد .