الاختيار

محتار؟!!
وأنا وزيك كمان محتار!!
كان نفسى تلقى إجابة عندى تطمنك
وتمكّنك م الاختيار
لكن يا صاحبى للأسف..
أنا وإنت فى نفس المتاهة الموحشة
تايهين ف نفس الدوّامات
نفس التجارب والعقارب
والوحوش متحوّشة ف الذكريات
دايرين ندوّر ف الوشوش والبوسترات
على أى وش نصدقه
نستأمنه على حلمنا ويحققه
لا يأممه.. ولا يكتمه.. ولا يسرقه
ولا بالعمالة يضيّعه..
ولا ف الجهالة يغرّقه..
وكل ما نقول هوّا دا..
نلقى التاريخ يخرج لنا من مخبأه
ويشد للخطوة اللجام..
ويقول حذارى تصدّقوا الكدب النوبادى
وأنا اللى زيى عمره ف الحلم انفرط
وصبح ورايا مش قصادى
مابخافشى إلا م القلق ف عيون ولادى
خلانى أشوف الاختيار ضيّق قوى
مهما اتّسع..
واللى اتلسع م الشربة يوم
من حقه ينفخ ف الزبادى!!!