كلمات ليست كالكلمات

أنا شفت قطة بتعيط جنب الرصيف.. وماشى جنبها كلب نحيف.. اتقابلوا فى السر.. وكان حلمهم بواقى الرغيف.. وآدى كلب قاعد من سنين.. على عتبة جزار حزين.. ما حلتوش إلا خروف يتيم.. محتار يدبحه ولا يدبح كلبه الحزين.. يوماتى يمسك السكين ويسمى بالله الرحيم..
يفتكر عشرة سنين قضاها مع خروفه اليتيم.. شيطانة يقوله ادبح الكلب الحزين.. واهو لحم الكلاب ما يفرق كتير.. عن لحم الحمير.. وادى كلب راجع م المطار.. يا خسارة حلمه طار.. لقى نفسه فى قايمة الممنوعين.. وآدى عصفور سجين من غير جناح.. كان حلمه إنه فى يوم يطير.. لكن نصيبه إنه اتولد يعزف نشيد المستحيل.
مصطفى السرتى
اسم حبيبتى سمراء.. على وجه حبيبتى ضياء.. وعلى راسها سماء.. وبين عيونها عناء.. معروفة حبيبتى بالريادة مشهورة بالنقاء.. يبدأ اسم حبيبتى كما يبدأ اسم الماء.. وينتهى آخر حروفها الراء.. ووسطها بداية الصفاء.. لكن حبيبتى مقهورة مكبلة بكل حروف الهجاء.. مهمومة هى رغم ترديدها فى الكتاب وقاموس الأنبياء.. لا تقلقى محبوبتى فالأمن فيك رغم البلاء.. رغم العناء.. ستظلين أنت الصدر الحنون وتظلين يا مصر الرجاء!
محمد سالم
أنا موش ح أكتب قصايد ولا حتى ح أكتب مديح.. دا كله كلام جرايد.. وبعد لحظة يسيح.. أنا موش ح أرسم لوحات.. بألوان الربيع.. دا حزنى رقات رقات.. وفرحى عمال يضيع.. أنا موش ح أكون مسالم.. وأسكت عن حقى خالص.. أنا كنت وديع وحالم.. ومن الشجاعة مالص..
أنا موش ح أقول كلام.. ده الفعل له ألف رد.. وإياك بقى والملام.. رايح فين يا صاحب.. أنا موش ح أكون منافق.. ونفاقى بالفلوس.. وللأندال مرافق.. ولضعاف النفوس.. أنا موش ح أكون مكابر.. ومالينى الغرور.. لكن دايما صابر.. ودا جواز المرور!
منصور عبدالعال عبدالله
الإسكندرية
مجرد سؤال يا عم يا مأذون جاوبنى، وأنا ليك ممنون.. جواز المال بالسلطة ميمون.. ولا بسم العسل مدهون.. له منافع وفوايد ولا بدون خيره على مين عايد فى حيرة وظنون.. أرجوك خليك محايد وردك موزون!..
 سؤالى بنية سليمة حب القانون الجوازة دا نعمة وغنيمة واستثمار مضمون.. فى مغارة على بابها ستارة تطلع وتنزل بشارة.. بفن ومهارة حسب المصالح يا سمارة.. سؤالى بوجه عام محدش مقصود بالكلام.. علشان أرتاح وأعرف أنام.. الجواز ده حلال ولا حرام افتينا يا مأذون الغرام مستنى ردك والسلام ختام.
أيمن مصطفى حسن
أنا قلبى م المغرب بينام.. متهنى أو مش متهني.. بيغنى بكل سلام.. بيزغرد ف الفجرية.. وساعة طلوع الشمس.. بيلملم حواليه الأيام.. ضحك ف إمبارح ويواعد بكرة.. وأهو كده بيعيش الأيام.. أنا قلبى طاير مع سرب حمام.. بيوصل كل رسايل العشاق.. وبيتمنى ف حضن حمامة ينام.. أنا قلبى مش هارب م الأيام.. ولا هارب من حكم الإعدام.. أنا قلبى خانوه الحكام.. أدوله بطاقة شخصية.. مكتوب فيها ممنوع إنه يفكر.. ممنوع إنه يدبر.. ممنوع م الأحلام.. أنا قلبى كان نفسه ينام.. ف فلسطين.. جنب القدس بكل سلام!
منتصر سلطان محمد
أسوان