حكمتك يارب ..! عبد العزيز محمود

لم يتخيل عنتر السعران يوما ولا في احلامه ان يحتل هذا الموقع الخطير فأصيب بجنون العظمة...
-فينك يا امه تشوفي الاملة اللي انا فيها؟! الله يرحمك ويبشبش الطوبة اللي تحت راسك كنتي فاكراني ح اطلع حرامي غسيل زي المرحوم أبويا!! أديني بقيت حدوتة وبأتحكم في خلق الله وأذلهم وأطلع عينيهم!! شوف الزمن!!
وفجأة أخذ السعران يضحك بشكل هستيري كالمجنون وضغط على زر الديكتافون ...
-ايه يازيزي أخبار الجماعة المهابيل اللي جايين يهنوني ويبوسوا ايديا ورجليا وجزمتي!!!
- يوووه يا عنتر بيه!!! اهم واقفين قدامي في طابور بيتخانقوا مع بعض وكل واحد شايل في ايده لفة!!
-طيب اركنيهم شوية لغاية ما يحمضوا جاتهم داهية تاخدهم!! وابعتي لي الواد حوكشة الساعي!! انا بأطلع في الروح من الجوع ومصاريني بتمزع فيا!!
وفور دخول الساعي...
-انا عفاريت الدنيا بتتنطط قدام عينيا ياحوكشة وعايز افطر!! خد بالك أنا لما باجوع بأضرب في المليان وما أعرفش أبويا!!
-تحت امرك يابرنس! تحب جنابك تفطر ساليزون والا باتون ساليه مع فنجان الكاباتشينو المعتبر؟!
-ساليزون مين ؟؟ وباتون مين يااااااااااد ؟!! أنا باقولك عايز أفطر مش عايز الدوا بتاعي!!
-جنابك اؤمرني بس وانا اجيبلك الفطار الملوكي اللي بتحبه!!!
-انا عايز طبقين فول بالزيت الحار وخمسين قرص طعمية وقرطاسين برنجان مقلي ومشنة عيش مفقع وبصل اخضر وطرشي وفلفل حراق وفول حراتي!! عشان أمزمز فيهم قبل ما أجوع تاني!!
وبعد تناول كوبايتين شاي في الخمسينة استقبل السعران طابور الموالسين ..
-بالراحة يا اخوانا مش كده!!! يخرب بيوتكم ح تكسروا الاباجورات والتحف اللي في الاوضة!! يا جماعة ما ينفعش كده هوه ايه الموضوع !!! يا خبر اسود ... يا رجالة بالراحة ع السجادة دي من ايام شاه ايران!!!
-الف مليون تريليون مبروك يا عنتر بيه!! يارب يعلي مراتبك كمان وكمان ويقصف عمر اللي عايز يكسروا وراك قلة!!
-متشكر أوي يا رجالة!! بس ياريت كل واحد يسيب اللفة بتاعته جنب الحيط ويتكل علي الله !!! حقيقي ما كانش فيه داعي تتعبوا روحكم !!! بس لازم تفهموا من هنا ورايح اني ما ليش في الهدايا الهفأ دي!!!
وبعد خروج الموالسين ضغط السعران على زر الديكتافون..
-ابعتي لي يا زيزي عشر رجالة ياخدوا البلاوي دي ع البيت في عربية نص نقل!!! واندهي لي حسنين ومحمدين وعوضين!!
وفور وصول الثلاثة بربطة المعلم ..
-شوفوا يا رجالة انا عايز خطة ما تخرش المية!! عايز اذل كل اللي اعرفهم واللي ما اعرفهمش!!! عايز الناس كلها تمشي مطاطية في الارض ومش قادرة ترفع راسها!!
-غالي يا عنتر بيه والطلب رخيص!! بس احنا فعلا بنعمل كده من زمان!!! وجنابك شايف الناس كلها متجننة ازاي وماشية تكلم روحها!!
-مش كفاية!! انا عايز اذلهم واجوعهم واضربهم بالصرمة القديمة واسففهم التراب!! الحنية بتاعتكم دي ما عادتش نافعة!! دي عالم تخاف ما تختشيش!!!
-ايوه سعادتك بس احنا لو ضغطنا عليهم اكتر من كده ح ينفجروا فينا ومش ح نعرف نلمهم!!
-واضح انكم مش فاهمين الدنيا ماشية ازاي!! عشان كده لازم تركنوا على جنب وتسيبوني العب معاهم لعبة القط والفار!!!
وهكذا تفرغ السعران لبهدلة خلق الله ...
-ما حدش فيكم ح يقدر يفلت من ايديا!!! انا مهمتي أربيكم واذلكم وافرج عليكم الدنيا كلها !! ده انا تربية حواري وارصفة وعربيات كارو وح أوريكم انا ح اعمل فيكم ايه؟!!
وبالفعل وفي زمن قياسي تحول عنتر السعران الى اسطورة. لم يعد هناك شخص واحد يعرفه او لايعرفه قادرا على الاحتفاظ بعقله. تحول الناس الى أشباح وهام كثيرون على وجوههم في الشوارع. لم يفقد الناس عقولهم فقط وانما فقدوا كرامتهم وانسانيتهم ....
-وهوه انتو لسه شفتوا حاجة؟!! دا انا ح البسكم كلكم طُرح!! واقلب النسوان رجالة والرجالة نسوان!!! ده انا بيني وبينكم تار بايت من ايام الجوع والمرمطة والفقر الدكر اللي كواني انا واللي خلفوني !!!
وجاء عيد الاضحي فاشترى السعران خروفين واستدعي الجزار..
-ايه الهبابة اللي انت ماسكها في ايدك دي يا راجل يا متخلف؟؟! دي قصافة ضوافر والا موس حلاقة ؟!!
-يا باشا دي السكينة اللي ح ادبح بيها الخروفين!! بس ياريت ولامؤاخذة الخروف التاني يتاخد بعيد عشان ما يشوفش اخوه وهوه بيندبح!!!
-ازاي الكلام ده وانا جايبه مخصوص عشان يشوف اخوه وهوه بيندبح قدام عينيه!! عليا الطلاق بالتلاتة ما حد ح يدبح الخروفين غيري!!
وهنا امسك السعران بالخروف الاول وعكمه تحت رجليه فأخذ الخروف يصرخ باعلى صوته...
-شايف يا حيوان السكينة المشرشرة دي؟؟!! ايوه دي !! أهي دي السكينة اللي ح اعذبك بيها!! بعد ما أذلك وأسففك التراب واشربك الويل وظلام الليل!!
-ماااااااااء ماااااااااااااااء ماااااااااااااااااااااااااااااااااااااااااااااااء !!
-والله لو قعدت تمأمأ للسنة الجاية!! برضه ح اشرب من دمك وانت صاحي وبعدين اقطع لك ايديك ورجليك وودانك ومناخيرك واسلخك وأطلع مصارينك بره قبل ما ادبحك بالمنشار الكهربائي ده!!
وحين صرخ الخروف الثاني مرعوبا من هول المنظر ..
-ح تروح مني فين انت راخر؟! ده انا جايبك مخصوص عشان تتفرج على اخوك وانا بأذله وأدبحه وبعدين أعذبك وأبهدلك وامزعك وأطلع روحك بالبطيء!!! ده انا عنتر السعران والاجر على الله !!!