خط أحمر

مين اللي حط الخط دا بينا؟
أنا وإنت كنا ف الميدان
وما كنشي بينا أي خط
عايشين ف نفس الامتحان
جاهزين بنفس الأجوبة
راكبين ف نفس المركبة بنحلم بشط
كنا البلد دي وكلنا عايشين ف خيرها
وماكنشي شيء بيهمنا ف الدنيا غيرها
والخط كان دايرة بتجمع شملنا
وتلمنا علي نفس أحلامها ومصيرها
وإنت اللي يومها قولت لي إن إحنا واحد
وإنك ومهما يكون هتفضل جزء مني
ولا يوم هتسجن كلمتي ولا يوم تهيني
وحلفت لي مليون يمين
إن إنت إيدك ويا إيدي هنبني ف بلادنا ونعمر
جاي النهاردة تحط بينا خط أحمر!!
وتقولي حاسب شوف بتتكلم لمين
صدقت حبة طبالين؟؟
يترقصوا لك ويطبلوا لك
ويصوروا لك إننا متنمردين
وإن إنت كتر ألف خيرك
وإنك خلاص
ما بقاش في كل الدنيا غيرك
نفس الوشوش ما تغيروش
وما بطلوش رقص وعديد
إوعاك ف يوم تسمع لهم
ويغرك الوش الجديد
وبلاش ف يوم تسمح لهم
يبنوا ما بينا سور حديد
وإن كان ضروري خط أحمر نرسمه
ونقدره ونوقره ونقدمه
ونقدسه ونوثقه ونعلمه لأصغر حفيد
يبقي إحنا لازم نرسمه بدم الشهيد