عاوزين حلاوة سلامتك

شعر : أمين الديب

طالعه من قلبي
وأنا مش حاخبّي عليك..
كل اللي باسمع بيه
الناس في كل البلد..
بتقول يارب اشفيه
وتمتعه بصحته
ويعيش ما بين أسرته
وتريحه م الهموم
وبقدرتك تحميه
من كل شيطان يوسوس
للرئيس بكلام
ويخوِّفه مننا
وكإننا أعاديه
üüü
اوعاك ياريس تصدق
إننا ناسيين
دورك في يوم العبور
وف حرب الاستنزاف
وما فيش خلاف يا بطل
إنك بطل مقدام
وف حرب رمضان
جيوش الدنيا شهدت لك
أعظم عظيم في التاريخ
ü ü ü
قائد سلاح طيران
دكِّيت حصون العدو
ورعبت جولدا مائير
صرخت تقول: إلحقونا
إسرائيل ضاعت
وشيء بيحصل خطير جدًا
مالوش تفسير
في مصر طيران مسيطر
سيطره كامله
وإن كان ماجاش ردكم
تفرق معانا كتير..
ü ü ü
من يومها واحنا ياريس
كلنا حواليك
خايفين عليك م العدو
وبدمِّنا نفديك
إوعاك تصدق ياريس
إنهم نسيوا
إنك سبب ذُلِّهم..
طول عمرهم خاينين
شافوك في أعلي المناصب
فرحوا لما شافوك
لأن كان نفسهم
يوم العبور يطولوك
وبعدما تأكدوا.. الحرب مش كارهم
حاربوك بكل السُّبل
ويخلَّصوا تارهم
زرعوا الوطن بالفتن
ويشعللوا نارهم
بينك وبيناَّ بحاشيه بعضهم خاينين
شغل النِّفاق عندهم بيجيب لهم ملايين
صدقني من غير يمين
فيه سر في وجودهم
ما أعرفش مين زقهِّم
ومحددين دورهم
لولاش وجودهم جوارك
كنا نرفضهم..
لأنهم معروفين
عملاء ومنتفعين
üüü
واحد ياريس حدانا
كان زمان فقران
لكن منافق نفاقه وصَّله لمكان
منصب ما يحلمش بيه
طمعان في أعلي كمان
دخل السباق زيهم راح يجري عالجرنان
يحجز له صفحه
وفيها قد كام إعلان
ويقول سلامتك ياريس
من فلان وفلان
صاحب لشركة كذا
وف مجلس الأعيان
وعضو مجلس كذا
ورئيس لست لجان
طبع المنافق كده الجري عالجرانين
والكل كسبان..
ورزق الهِبْل عالمجانين
ومفكرين بالدعايه
يكسبوا ودَّك
ويسوقوا في الشيطنه
ويكسَّروا القوانين
خربوا البلد والصحاري
كلها اتباعت
ولا فيه زراعه ولا صحه
ولا تعليم
والفلاحين تعبانين
في كل أحوالهم
وكإنهم مش بشر
ولا حتي بني آدمين
ü ü ü
أرجوك ياريس..
ما تزعل مني لصراحتي
واقبل نصيحتي أنا راجل كبير فلاح
مشغول ب «هَمّ» الوطن
وبانادي بالإصلاح
فقير صحيح بس ماشيه
وأشيا عال العال
والأشيا معدن ....
وأكلي وشربي كله حلال
وماليش مطالب..
ولا عاوز لا جاه ولا مال
كل اللي بيهمني...
مستقبل الأجيال
ورزق بكره لبكره
ورزقي عالفتاح
ماشغِلش نفسي بشهره
وطول حياتي كفاح
شاعر باقول كلمتي
وعشان أموت مرتاح...
بادعي في سرِّي
بظهر الغيب في صلاتي
يجعل كلامي أمل
لأولادي واخواتي
ولا حد يفهم غلط
قصدي ونياتي
وأن كان مصدق كلامي
اسمع الآتي:
أديت رسالتك في يوم عشره
في شهر الصوم
ومن ساعتها ماشفتش راحه حتي اليوم
لا مؤاخذه عاوزك تريح
وارضي بالمقسوم
واعمل حساب صحتك
وبلاش تعيش في هموم
ويكون في علمك وطبعا
كل شيء معلوم
الدنيا حالها كده....
ولا فيها شيء بيدوم
ü ü ü
عاوزين حلاوة سلامتك
غير الدستور
دستور جديد يحترم
حريه الجمهور
وفيه نظام انتخاب
ويكون ديمقراطي
فيه المواطن شريف
مش عبد للمأمور
عاوزين حلاوة سلامتك
تلغي كل قانون
فيه اشتباه أو طوارئ
حتي مهما يكون
وتكون كرامة المواطن
في الحفاظ والصون
مهما تكون تهمته
أو حتي كان مسجون
ü ü ü
وبلاش من المعتقل..
وبلاش من التعذيب
اللي جرا في السجون
زي اللي فابو غريب
فيه ناس تموت في السجون
من غير علاج وطبيب!!
وكإنهم مش بشر..
يتعذِّبوا بأساليب..
وحشيه ممكن تقول
بالقسوه والترهيب
وسمعنا حكايات بتتسرب من الأسوار
حكايات تخلي الرضيع الطفل شعره يشيب
ü ü ü
أقول لك إيه وللا إيه
خليه ليوم تاني
أصل الكلام فيه ساعات
بيتوه علي لساني
ما عرفش إن كان زهايمر
واللا أنا خايف
أنا اللي مجني عليه
أصبح أنا الجاني
ü ü ü
لكن حنصبر عليهم
لما ييجي اليوم
عاوزين حلاوة سلامتك
منحه بس تدوم
ما تكونش زي اللي فات
للأكل أو لهدوم
عاوزين تقرر ياريس تنصف المظلوم
وتفك سجنه خصوصًا..
لو في معتقلات..
من غير محاكمه ومنهم فوق عشر سنوات
عاوزك ياريس بنفسك تطلب الكشوفات
وتشوف من الشعب
كام واحد في معتقلات
علشان ولاد الأبالسه الأمريكان بالذات
تعرف بإن العرب بتنفذ القوانين
قوانين نصوصها من السنه وم القرآن
وكمان عشان يعرفوا
العدل في الإسلام
صالح لكل الأمم
وف كل آن ومكان
ومن تمام العقيده لكل إسلامي
وهدي سيدنا النبي
تكريم بني الإنسان
مهما تكون ملته
أو لونه وديانته
ومن زمان كلنا
عايشين في خير وأمان
ومصر بالذات
ما ينفعش الفتن فيها
والمسلمين والنصاري
كلهم إخوان
ولا يوم نعيش زي كل الغرب لهوانا
ونعيش علي العولمه
من غير ولا ديانه
ونسيب كلام ربنا
من بعد ما هدانا
بعت لنا المصطفي فسَّرها ويانا
رسم طريقنا وعلِّمنا وربانا
نحمي حقوق الجيران
وحقوق بني الإنسان
وجعلنا خير الأمم.
نعمل لأخرتنا
ونأدِّي أحسن عمل
من أجل دنيانا
وهوَّ نفسه اللي قال
المسلمين إخوان
لو أخ قال آه في صنعاء
واللا في البلقان
أو كان في بغداد وغزه
أو جنوب لبنان
مفروض نثور كلنا
ونقاوم العدوان
شوف يعمل إيه الجسد..
لو جزء فيه عيان
كل الجسد ينتفض
لخليه فيه بتموت
ولا يرضي حالة السكوت
مهما يكون تعبان
üüü
وأختم كلامي وأقولك
ربنا يهديك
وينصرك عالدوام..
علي كل من يعاديك
تبقي انت ناصر لنا وتنفذ الإصلاح
وكل واحد في موقع.. غيره ترتاح
ويبقي فيه انتخاب خالي من التزوير
ولا يبقي فيه رأس مالي
يخدع الجماهير
مش عيب لو ابن الفقير
ينجح ويبقي وزير
أهم شيء الكفاءه وسُنِّة التغيير
شرط النجاح الصلاح والفطنه والتدبير
üüü
ملحوظه
من قبل ما انسي ياريس يبقي فيه لجنه
من غير رجال الحكومه قبل الانتخابات
وتكون محايده وتتشكل من الكفاءات
وتكون محل اعتبار وتصلَّح الكشوفات
تعمل كشوف انتخاب وتصحح الأسماء
علشان رجاء تنتخب...
ما يقولش لأ... دي رخاء
ومرسي يبقي أسمه موسي
وإسماعيل أسماء
وفلان في مصر الجديده....
لجنته في بولاق
والناس تروح تنتخب
ببطاقه رقميه
وساعتها يبقي انتخاب
من غير تعب وعناء
ü ü ü
والا نتخاب اللي جاي
من أوله مفضوح
والشرطه لها دور حيادي
طبَّقه بوضوح
من وجه قبلي
تجيب شرطه تروح مطروح
ضباط تروح من رشيد...
تحمي النظام في سوهاج
تحمي لجان الانتخاب
وتوصل الصناديق...
من غير تحيز..
وتتصرف بدون أهواء
ü ü ü
وكلمه واحده حاقولها...
واعتبرني صديق
أهم شيء الانتخاب
ونظافة الصناديق
كفايه طول عمرنا.. عايشين في هم وضيق
من بلطجيه بتحميهم قوي الطغيان
والشعب غلبان.. ومش عارف لنفسه طريق
ü ü ü
أرجوك ياريس سامحني في اللي قلت عليه
وما كانش وقته أقولك وانت في سريرك
ما لقتش غيرك أقول له
همِّنا واحكيه
وياريت ياريس تشاور..
آجي أحكي لك
عن كل باقي الهموم واذكر لك الأسماء
واعرف ياريس لإن الناس بتدعي لك
تعيش بريء الجسد من كل علهِّ وداء
أديت رسالتك
وجه دورك عشان ترتاح
وتعيش حياتك رئيس سابق
وكيف تشاء
üüü
أما السبب اني باطلب
آجي واحكيلك
أنا أصلي راجل كبير
وأنا برضه من جيلك
شايف رموز الفساد
علي طول محاوطينك
الفرق بيني وبينك
أن أنا فلاح
شايف جدور الفساد
وحاجات سداح ومداح
وانت رئيس الوطن
وف ايدك الإصلاح
الناس خلاص زمزقت
فاض بيها م القوانين
ومن ولاد اسمه ايه
ترزية القوانين
وكله واقف لكله
مجهِّز السكاكين ولحد دلوقتي
لسه الفتنه موجوده
وشعللوها اللي ركبونا في سنين سوده
عاوزك تشيلهم ياريس
واحنا من حواليك...
وحط ايدك في إيدنا...
إيدنا ممدوده
ü ü ü
عاوزين حلاوة سلامتك
نفِّذ الإصلاح
وشيل رموز الفساد
خلِّي الهموم تنزاح
إختم تاريخك وسلم
شعبك المفتاح
كفياك عليك كل دا
عاوزك تعيش مرتاح
والشعب عارف حبايبه
من عدوِّينه ومين منافق...
ومين هوّ اللي باع دينه
الشعب قادر يجيبه
يلقي تأديبه
واحد ورا التاني
ينتف ريشه ويسيبه
صدقني من غير يمين
الشله دي فاسده
لو أي حاكم نبي
الشله دي تعيبه
eldeeb100100@yahoo.com