جوزك على ما تعودية .. طلى بالأبيض

‏ ‏يا عينى البنت بتبقى فاكرة نفسها ملكة الكوكب وإنها حتعمل اللى محدش عرف يعمله، وفى الآخر بتلاقيها واقفة فى المطبخ بتغسل ‏المواعين والعيال بيجروا ورا بعض وبيضربوا بعض.
الموضوع صعب جدًا ومعقد، العلاقة بتبقى حلوة فى الأول وسهلة، بس بتصعب بعد شوية والمواضيع بتزيد كلكعة.
ويبتدى كل طرف يرمى المسئولية على الطرف التانى وبيبقى هم كل واحد إنه يطلع الضحية.
الحقيقة إنهم الاثنين بيبقوا الضحية، والسبب الحقيقى إنك بتدخل فى سباق ملهوش نهاية وكل ما تحس إنك خلاص قربت من النهاية ‏تلاقيه سراب وتفضل تجرى وفى الآخر صحتك بتروح من كتر الجرى.
بالراحة شوية الموضوع مش مستاهل ومحدش يلعب دور الضحية لأنكم الاثنين ضحية فعلاً للضغوط والمسئوليات اللى بتفرضها ‏الحياة عليكم.
النصيحة اللى ممكن تقولها لكل اثنين متجوزين هى إنكم تطبطبوا على بعض وتتعلموا تستمتعوا بكل التفاصيل، حتى الأزمات لأنها ‏حتعلمكم كتير.
ودايمًا تعرفوا إن الجواز هو بداية الحياة وليس آخرها. ولازم تعرفى إنك تستاهلى تعيشى حياة حلوة وسعيدة مش أى حياة والسلام.‏