نورهان عبدالله تكتب: كنا النص الحلو ثم أصبحنا..!

البنات النص الحلو من الدنيا، والحقيقة أنهم دلوقتى أكثر من النص بشوية كمان، لأنهم بيفرضوا على الدنيا والناس البهجة والضحكة الحلوة، ورغم كدا فيه بنات فى المجتمع لا ينطبق عليهم الكلام دا خالص.

تلاقى البنت من دول شافت ولد حلو ماشى فى الشارع، تبدأ تعاكسه وتلفت نظره بأى طريقة وكأن لما هى هتعمل كدة هيقوم لابس جناح سوبر مان وطاير وراها لحد البيت وطالب ايدها من الحاج والدها، فى الحقيقة أنها متعرفش ان هو بيقول لصاحبه اللى قاعد جنبه "اتفضل يا سيدى أدى البنات أهي و بيشتكوا من المعاكسة و التحرش"، لاء ثانية واحدة حضرتك، دى فى عداد البنات متسواش سلاكة سنان يافندم، مش هى دى البنات!

وياسلام بقا لو الولد اللى شافته دا جمعها بيه مكان شغل أو أصحاب مشتركين وطلع مرتبط أصلاً، تبدأ تتراهن بينها وبين نفسها انه هيسيب صاحبته ولا خطيبته ويرتبط بيها هى، و ممكن يجيلها اكتئاب لو الموضوع طول شوية و تبدأ تحس انه هان أنوثتها، و لو القدر لعب لعبته و الولد فعلاً ارتبط بيها بتحس ساعتها انها النسخة المصرية من "انجيلينا جولى" وتبدأ "تتفشخر" أوى بين صحباتها انه ساب صاحبته عشانها، متقلقيش يا حبيبتى بكرة تيجى اللى تتفشخر عليكى و تطلع القديم والجديد.

تيجى بقا تعكس الوضع، تشوف البنت اللى تبقى مخطوبة ولا متجوزة ويا حرام فى مشاكل و خناقات بينها و بين شريك حياتها، تبدأ فى رحلة البحث عن راجل تانى تشكيله همومها و يطبطب عليها ويقولها "ازاى جوزك يزعل القمر دى، دا انا لو معايا واحدة زيك كنت خليتها أسعد إنسانة فى الدنيا" و تبدأ تندم انها مقابلتش التانى قبل الأولانى، و الحقيقة ان التانى دا بيكون شايفة فخدة ضانى متقدماله على طبق من دهب، ليه مياكلش ويشبع؟!

غير أنواع تانية من البنات تلاقيها بتتحلى ببعض الصفات اللى تخلى الراجل يكره البنات والجواز والحب واحتمال يكره نفسه كمان، زى مثلاً النكد! .. النكد أصله عند البنات ليه سببين، الأول "انت مش مهتم بيا"، والثانى "انت بتعرف بنات عليا"، وبيكون عندهم حق طبعاً لو الحالتين دول قائمين بالفعل انهم ينكدوا على الراجل و يكرهوه فى عيشته، بس مينفعش حضرتك تحكمى انه مش مهتم بيكى عشان قفل عليكى بتاع 59 مرة وهو فى الشغل! ما انتى اللى زنانة و انا لو منه أغير رقمى و مديهولكيش اساساً، الراجل فى الشغل مش لازم تكلميه كل نص ساعة تأمنى عليه على فكرة، و مش معنى برضو انك شوفتيه بيوصل زميلته اللى "جوزها" معرفش ييجى ياخدها و مش هتقدر على البهدلة فى المواصلات عشان "حامل"، انه بيعرف بنات عليكى! ولا برضوا معنى انك شوفتيه ضايف بنت حلوة على الفيسبوك يبقى فى بينهم علاقة، والله فى حاجة فى الحياة اسمها صداقة.

أما بقا البنت اللى تلاقى جوزها يقولها "حبيبتى يالا نسافر كام يوم نغير جو" تلاقيها تقوم ردة عليه "ماشى يا حبيبى هسأل ماما" تسألى ماما فى ايه هو انتى طالعة مع صاحبك رحلة لشرم! دا جوزك يا حبيبتى، و ياسلام بقا لو جت قالتله "تعالى نأجلها أصل ماما قالتلى الجو مش حلو واحتمال ناخد برد"، المشكلة انها بترجع تزعل لما يعرف حد عليها، ماهو مش متجوزك انتى دا متجوز الست الوالدة لازم يطفش بصراحة!

احترموا أنوثتكم وبلاش تهينوها بتصرفات غريبة، خليكوا النص الحلو زى ما خلقكم ربنا!