التليفزيون عملناه مجلة.. ابن البدوى وابن إياس "الحلقة 1"

كنت هتجوز قطر الندى بنت خمارويه عرفى

عندما أنهيت حجر السلوم فى القهوة اللى فى شارع مراسينا وجاءت الساعة الثانية عشرة انتقل الزمن لكن هذه المرة لم أكن فى حارة برجوان، حيث يسكن ابن إياس وأعرف الطريق إلى داره جيدا.
أنا إمام مسجد ابن طولون لكن المكان متغير تماما، عدد كبير من الدور والقصور تحيط مليئة بالأشجار لكنها مظلمة تماما وأسمع صوت صهيل خيول قادمة من ناحية شارع الصليبة.
جريت، اختفى وراء شجرة جزورين كبيرة أمام المسجد ومر أمامى اثنان من الجند ووراءهما بغلة يركبها ابن إياس.
طرت من الفرحة وناديت: يا ابن إياس لقيت جندى مملوكى رافع سيفه وجاى ناحيتى وهو بيصرخ قاطع طريق سأقطع رقبتك.
لكن ابن إياس الله يستره عارف صوتى كويس وقال لهم: سيبوه ده المساعد بتاعى.
بصوا للجلابية الصوف والعباية اللى أنا لابسهم ورجع الجندى السيف فى غمده وركبت البغلة وراء ابن إياس.
ابن إياس: إنت عمال تتنطط فى الزمن بمزاجك يا جدع إنت إيه اللى جابك عصر خمارويه ابن أحمد بن طولون؟
رديت عليه: ياعم الحاج مش بمزاجى كنت بتعشى عند الجحش واتأخرت قلت علبال ما أوصل حارة برجوان تعدى الساعة اتناشر قلت أقعد على القهوة اللى جنب الحوض المرصود وأهى كلها قهاوى ربنا.
ابن إياس: والنبى بلاش فلسفة لو غيرت مكان القهوة هتغير الزمن واحمد ربنا إنك بتلف فى منطقة واحدة الله أعلم لو خرجت بره المنطقة دى الزمن هيوديك فين.
قلت فى عقل بالى: الحمد لله أنا كنت هنزل فى القهوة اللى ورا الحديقة الدولية فى مدينة نصر كان زمانى فى عصر الفراعنة.
انتبهت على صوت حراس القصر ينادون حرس سلاح بصوت عالى ويطلب كلمة سر الليل.
ورد الجنود اللى معايا بصوت أعلى: الفلة فى المنفلة والإزازة فى البزازة.
أتارى فؤاد المهندس كان واخدها فى فيلم مستر إكس من التاريخ الطولونى.
اتفتح باب القصر ودخلنا .
لقيت نفسى بقول لابن إياس: إيه العز ده يا معلم
ابن إياس زغدنى فى كتفى.
طول الطريق من البوابة بتاع القصر إلى الباب الداخلى شجر معمول له قواعد من النحاس والمشاعل منوره القصر وكأنك الضهر .
ولما دخلنا من الباب الداخلى شوية رخام حكاية على سجاجيد على رسوم لستات على الجدران تحل من على حبل المشنقة.
وفى الصدارة وعلى قبة راجل شبه الفنان حسين فهمى قاعد على دكة من الذهب وبيشرب معسل وباين عليه التفكير وجنبه أسد مش مربوط ولا حاجة.
ابن إياس قال: حى الله مولانا الأمير أبو الجيوش خمارويه.
السلطان: أهلا يا هندسة شدلك شلتة وتعالى جنبى.
وبص ناحيتى وقال: مين الشبح؟
ابن إياس قال له: ده ابن البدوى يا مولانا مساعدى فى التدوين.
قال لى: شد لك شلتة أنت كمان وتعالى.
أنا ترعبت الصراحة لأن ابن اياس باعنى وخد الشلتة وقعد بعيد عن الأسد وأنا اضطريت أروح الناحية اللى فيها الأسد تقريبا كنت حاسس بنفسه فى قفايا قعدت مقرفص ومرعوب.
الفنان حسين فهمى بص وقاللى: ما تخافش ده أسد.
يا عم الفنان ما هو ده اللى مخوفنى أنا أساسا بترعب من الكلاب.
لقيته قال: زنجر على بيتك.
فوجئت بالأسد يقوم ويدخل مكان خلف قبة السلطان فتنهدت.
ونادى السلطان: هاتو أرجيلتين هنا للرجالة.
قلت له: بس أنا بشرب سلوم يا مولانا.
قال لى كنت فاكرك عيل سيس من بتوع التفاح الفاخر والعنب هاتولوه سلوم وحجر قص وصاية لابن إياس.
ابن إياس: خير يا مولانا مهموم ليه.
خمارويه: أبدًا ياسيدى مولانا الخليفة فى بغداد بعت يطلب ايد البت قطر الندى وأنت عارف دى البت الحيلة اللى عندى ومش عايزها تتغرب بيعيد عنى أنا كبرت يا ابن اياس وعايزها جنبى تراعينى وبعدين دى عايزة تتجهز ده برضه الخليفة يعنى أمضى على نفسى شيكات لبتوع رنين عشان أجهز البت.
رد ابن إياس: ربنا يخليك الأمير جيش فيه البركة.
قال خمارويه بأسى: جيش مين يا عم الحاج ده بيقوم من النوم الصبح بيكسل يقول لأبوه صباح الخير صللى ع النبى فى قلبك ده عيل مقضيها لعب فى الشارع طول النهار.
قال ابن اياس: والأمير ناوى على إيه.
سمعت سحبة اسكندرانى مسمعتهاش يجيى من عشرين سنة وقال خمارويه: أومال أنا باعتلك ليه.. غاوى أشوف سحنتك فى نصاص اللياللى عايز رأيك طبعا.
الشيش دخلت فى اللحظة دى.. لقيت جوز جوارى حاجة تشرح القلب واحدة حطت الشيشة قدام ابن اياس والتانية جابت الشيشة جنبى وبدأت تولعلى الحجر ولما طقطق لقيتها بتمسح وبتدينى مبسم رميت المبسم وقلتلها ده طعم الشيشة من حنكك يبقى الذ من الكنافة بالجبنة يا عسل.. الجميل اسمه إيه؟ لقيت ابن اياس بيصرخ عليا: الله يخرب بيتك احتشم احنا ف حضرة مولانا الأمير.
الأمير بصلى بصة ذات معنى وقال: استنى يا عصماء متمشيش ونادى: يا عنتر.
دخل عبد حبشى اسمر شبه كوارشى اللى كان بيلعب فى الزمالك.
والأمير خماروية ابتسم وقال لى: هنلعب لعبة هتعجبك جدا تقترح عليا حل للأزمة اللى أنا فيها ولو عجبنى هتاخد عصماء هدية ولو الحل معجبنيش هديك هدية لعنتر.
أنا بصيت لعنتر وهو بيضحك وكنت هعملها على روحى من الرعب.
ابن إياس كان بيبصلى وبيضحك، الأمير خمارويه قال له: بتضحك على ايه ماهو لو أنت مقدمتش حل هخلى عنتر يحجبك ويقعدك فى البيت.
أنا سمعت كركبة بطن ابن اياس وانا فى مكانى.
أنا قلت له: شوف يامولانا ابعت هات عشا من حبايب السيدة وكيلو بسبوسة بالقشطة وإن شاء الله محلولة.
خماروية بعت يجيب العشا وسابنا وخرج.
ابن إياس قاللى وديتنا فى داهية الله يخرب بيتك هنعمل ايه؟
قلت له: متقلقش يا معلم وحياة دقنك دى هحلها ورحت رافع صوتى: غير الحجر هنا يا ابنى.
شوية والأكل وصل قعدت اضرب سمين ولحمة راس وابن إياس بيبصلى مستغرب ودخل علينا خمارويه.
إيه يا أفندية: وصلتوا لحاجة ولا أجيب عنتر؟
قلت له: صلى على اللى هيشفع فيك يا بركة
قاللى: اللهم صلى عليه قول
قلت: مش الآنسة هيدفع ليها مهر برضه
قال لى: آنسة مين يا غبى!
قلت له: هى مدام؟
قاللى: اسمها قطر الندى لا آنسة ولا مدام
قلت له: ما علينا إنت تطلب من الخليفة مهر وشبكة وده برضه خليفة.. دى البت بنت البواب عندها 12 سنة متجوزة بمهر 150 ألف جنيه و100 جرام دهب و28 بطانية وتلتلاف ملاية سرير وسبعتاشر غسالة أطفال.
قاللى: تفتكر الخليفة هيدفع مهر كويس وحتى لو دفع الجهاز غال»؟
قلت له: دى بقى متقلقش عليها سيب أخوك يتصرف هنشور البت قطر من عند التوحيد والنور من الفرع الرئيسى اللى فى عين شمس.
خمارويه: بس هتبقى حاجة كويسة ولا شغل سوقى؟
قلت له: عيب عليك ياعم الحاج هتبق حاجة فاخرة أنتريه بسبعتلاف وأوضة نوم بخماشر وأوضة أطفال باتناشر.
خمارويه: بس كده قليل يا ابن البدوى ده برضه خليفة.
قلت له: يبقى نزود ركنة وشاشة 32
قاللى: أهى كده زبطت.
قلت له: عجبتك يا عم الناس
بص لى وضحك ونادى: يا عنتر.
أنا ركبى سابت وابن اياس قعد يعيط.
خمارويه قال لعنتر: خللى البت عصماء تروح مع ابن البدوى وهات جوز فراخ شمرد هدية لابن إياس.
خدت الجارية وطلعت على بيت ابن إياس اللى كان ماسك جوزين الفراخ من رجليهم.
دخلنا البيت وابن اياس رمى الفراخ للجارية بتاعته وقالها ادبحلينا جوزين الفراخ دول واعملى معاهم ملوخية ع الغدا بكرة أنا داخل أنام.
قلت له: هتسيبنى أنا والحتة اللى معايا فى الفسحة كده؟
رد بزهق: طلعيهم الأوضة اللى ع السطوح وبص لى بصة ذات مغزى وقال: مش عايز فضايح الحيطان جيبسون بورد!
تانى يوم ع الساعة اتناشر الضهر لقيت رزع ع الباب خرجت لقيت ابن اياس بيقولى ناموسيتك كحلى قوم مولانا خمارويه عايزك.
بصيت على عصماء وقلت له والمصحف نمنا من التعب.. طب ساعة كده ونروح.
عصماء فتحت عينها ولوت بوزها وقالت روح يا شملول شوف مولانا الأمير ما انتش فالح غير فى الكلام.
قلت لها: لا أنا ما يتقليش كده.. دى يطير فيها رقاب تعالى خشى لى راجل لراجل وأنا أوريكى.
مصمصت شفايفها وقالت لى: عايز راجل.. بين عليك.
قلت لابن: اياس سيبنى يا ابن اياس يا أخويا لما اعرف الولية دى انا راجل ولا لأ.
ابن إياس قاللى: لو مرحناش حالا هيبعت لنا عنتر وانت عارف عنتر ممكن يعمل إيه.
قلت لعصماء: عنتر نجدك منى هروح لمولانا السلطان وهرجع أفرجك.
طسيت وشى يشوية ميه وطلعت مع ابن اياس ووقفنا على عربية فول فى بركة الفيل نشق ريقنا وبعدين دخلنا قصر الأمير.
رفعت صوتى: صباح الورد يا عم الأمراء اللى فى العالم.
رد الأمير: صباح القشطة إيه أم ريحة البصل دى؟
قلت له: ابن إياس ضرب طبق فول وفحلين بصل على العربية اللى فى بركة الفيل.
قاللى: مش كنت جبت شقتين فول زيت حار ل أخوك خمارويه؟
قلت: ارجع أجيبلك يا عم الناس حالا.
خمارويه: لا خلاص مش مهم واكل كرواسون وزبدة وشاى المهم مولانا الخليفة بعت مليون درهم فضة مهر للبت.
أنا فتحت بقى وقلت فى نفسى: يا ترى شكلها إيه قطر الندى اللى اتدفع فيها مليون درهم مهر.
دقيقة ولقيت قمر داخل علينا القاعة بت بيضة أشطة عينيها بنى وشعرها كستنائى وعود زى الكتاب ما بيقول.
لقيت نفسى بقول: إيه الصاروخ ده يا ابن إياس والنعمة دى صاروخ دى تدى إيما ثيرون على نافوخها بلامؤاخذة الشبشب.
البت بصت لى وأبوها زعق وقال لى: جرى إيه ياعم الأمور لم نفسك ولا أجيبلك عنتر يخليك زى أختها؟
قلت له: عنتر لأ يا مولاى.
البت قالت: هاى جايز.. داد أنا عايزة فلوس عشان خارجة هشترى قماش التنجيد من الوكالة
خمارويه قالها: هتعرفى تشترى من هناك؟ ولا هيستكردوكى؟ لازم حد بيفهم يجيى معاكى بص ل ابن اياس وقاله روح معاها اشترى قماش التنجيد. ابن إياس قال له: يا مولاى أنا ركبى وجعانى وأنت عارف اللف بتاع الستات ابعت ابن البدوى وهو عارف الوكالة كويس ولسه بصحته.
خمارويه قاللى: هتروح معاها يا ابن البدوى فرحت جدا لكن الأمير خمارويه كمل وقال وعنتر هيروح معاكم.
قلت: وليه نتعب الأستاذ عنتر خليه مستريح يا مولانا.
خمارويه: ياللا يا ابن البدوى من هنا خليهم يجهزولك ركوبة عشان تطلع مع قطر الندى.
طلعنا خدنا توكتوكين من أول الشارع وأنا قاعد مع قطر الندى فى توكتوك وعنتر راكب التوكتوك اللى ورانا.
بصيت لقطر الندى وقلتلها: عنيكى فيها حزن.. معلش اسألك سؤال غلس شوية هو انتى ليه هتتجوزى الخليفة.. ده تقريبا أد أبوكى؟
بصت لى بعنيها البنى أنا دوخت الصراحة وقالت: يهمك تعرف؟
قلت لها: ده أنا أموت وأعرف
قالت: زى ما أنت شايف أنا محبوسة فى القصر لا خروج ولا دخول وبابا خايف عليا وأنا زهقت الصراحة عايزة أخرج واتفسح وكمان بابا مش عايز حروب وخناقات كل شوية مع الخليفة المعتضد وبعدين مش لاقية حد يحبنى.
قلت لها: ليه لا مؤاخذة هى الرجالة اتعمت دى إنتى قمر والنعمة أحلى من إيما ثيرون؟
قالت لى: مين دى... مراتك؟
قلت لها: يسمع من بقك ربنا بس دى نجمة عالمية.. المهم لو ربنا بعتلك شاب حليوة ملفوف القوام من المنصورة يقدس الحياة الزوجية تقبلى تتجوزيه؟
ضحكت قطر الندى وقالت: ويكون اسمه ابن البدوى طبعا؟
لقيت نفسى بتنحنح وأمسك أيدها وأقول عارفة يا قطر لو طاوعتينى هتقدم للحاج واخدلك شقة إيجار جديد فى المرج وهستتك.
لقيت قطر سابت ايدها فى ايدى وشبكنا صوابعنا زى الأستاذ عبحليم حافظ ونادية لطفى فى فيلم أبى فوق الشجرة ولقيت دماغ عنتر داخلة علينا التوكتوك. وبيقول: الله الله أبعت أجيب اتنين لمون وشجرة إحنا وصلنا بقالنا عشر دقايق؟
قلت له: جرى إيه يا عجل.. مولاتك سخسخت وكنت بقيس ليها النبض.
نزلنا نلف ع المحلات قعدنا يجى خمس ساعات نلف لما رجليا ورمت وعنتر شايل بؤجة فيها المشتريات فوق دماغه.
قطر الندى قالت له: اطلع أنت ع القصر وأنا هرجع مع ابن البدوى بعد ما نشترى الرفايع.
خدتنى ورحنا ع الكورنيش وشبكنا أيدينا وقلت لها: عارفة يا قطر أنا هروح للحاج خمارويه أطلب إيدك منه.
قالتلى بجد يا بوب؟
قلت لها والختمة الشريفة هعملها.
رجعنا القصر الساعة عشرة بالليل وأنا رجعت عند ابن إياس وكنت قاعد مسهم.
عصماء دخلت عليا لابسة حتة تايجر من بتوع ياسمين صبرى وقالت لى: مالك يا بوب مسهم ليه؟
قلت لها: أبدًا يا عصماء مشغول شوية؟
قالتلى وهى تضع يدها على كتفى: طب مش عايز أجهزلك الحمام.. سيدى ابن إياس نايم؟
كنت هقولها ماليش نفس بس بنت الجنية كانت صاروخ فى التايجر.
بصيت ليها وتذكرت قطر الندى ورجعت بصيت ليها.. البت عود البطل الصراحة وقلت: ياللا بينا
الصبح قمت على صوت عصماء بتهمس فى ودانى: قوم يابوب عشان تفطر ده أنت طلعت عفريت.
فتحت عينى وقلت لها ما تيجى تريحى جتتك جنبى؟
قالت لى بدلال: والله نفسى نكمل الحوار بتاع امبارح بس سيدى ابن إياس عايزك تحت.
نزلت لقيت ابن إياس قاعد ع الطبلية: صباح الخير يا ابن اياس يا أخويا.
ابن إياس: ناموسيتك كحلى فضحتنى الجيران خبطوا عليا الصبح قلت لك الأوض جبسون بورد بلاش فضايح.
ضحكت وقلت: أعمل إيه البت عصماء صوتها عالى بنت الإيه الصاروخ.
ابن اياس: طب خلص أكل معادنا مع مولاتى قطر الندى بعد صلاة الضهر
قلت له: قصدك مولانا خمارويه؟
قال لى: لا ياعم الأمور مولاتى قطر الندى
قلت له: ياللا ياعم الحاج نشوفها عايزة إيه.
دخلنا القصر على قطر الندى البت حاجة تلوح العينين البنى والشعر الكستنائى والبياض بحمار حاجة مالهاش مثيل الصراحة.
قطر الندى أمرت الخدم بالانصراف وشاورت لى.
طلعت جنب الكرسى بتاعها وحطيت أيدى على الكرسى لقيتها حطت أيدها على أيدى وقالت وحشتنى يا بوب
قلت لها وأنتى كمان يا قطر أنا منمتش طول الليل
قالتلى: ولا أنا كنت بفكر فيك طول الليل
لقيت ابن اياس بيصرخ: يا نهار أسود أنزل من جنب مولاتنا يا وضيع هتودينا فى داهية
قطر الندى: بقولك ايه ما لكش فيه أنا هتجوز أنا والبوب عرفى وهروح أعيش معاه فى المرج
ابن اياس: يا مولاتى والختمة الشريفة ما ينفع.. أبوكى اتفق مع مولانا الخليفة واشترينا العفش من المناصرة ولو مولانا خمارويه رجع فى كلامه ممكن مولانا الخليفة يعزله
قطر الندى بصت لى وعينيها كلها دموع وقالت: أعمل ايه يا ابن البدوى؟
أنا قلت لها: لازم نضحى يا مولاتى عشان خاطر مولانا السلطان خمارويه وأنا هستحمل كسرة قلبى وأعيش بعيد عنك
قطر قامت وحضنتنى.. أنا سخسخت الصراحة ولقيت ابن اياس داخل وسطينا زى اللى بيحجز أبوس أيدك يا مولاتى لو حد شافكم مولانا هينفخ ابن البدوى وهينفخنى معاه
قلت ل ابن اياس: وتبوس ليه أبوس أنا ورحت رافع أيدها بايسها
جرجرنى ابن اياس بره القصر بالعافية وقاللى: الله يخرب بيتك هنتنفخ كلنا
قلت له: البت قمر يا ابن اياس حاجة لوز
ابن إياس: أنت عينك فارغة بقى يا ضلاللى تبقى فاضحنى وسط الجيران مع عصماء وتقول لها ما نمتش طول الليل
رديت بسرعة: ما نا والله ما نمت طول الليل
قاللى: بس كنت بتفكر فيها يا نصاب؟
خدته انجشيه وقلت له: أنت ايه رأيك نعمل ايه مع الحاج خمارويه؟
قاللى هخلينا نخلص الجوازة الهباب دى عشان ننتهى تعالى نعدى عليه
دخلنا القصر كان خمارويه بيشيش وقاللى اتفضل عطر أنفاسك يابوب
شميت ريحة هبو من بتاع زمان قلت له: الصنف ده عالى على أبوه يا مولانا تسلم انفاسك
قاللى: عايزبن نخلص أم الفرح ده مولانا الخليفة باعت يستعجل وصول العروسة
قلت له: إحنا جبنا كل حاجة من الوكالة إمبارح حتى الرفايع يعنى جاهزين
قاللى لسه يا ابن البدوى البت قطر مش واخدة على الفرهدة بتاع الجمال.. أنا هبنى ليها قصر كل 100 كيلو تبقى تريح فيه لغاية ما توصل بغداد رديت بسرعة: يا مولانا دى تكاليف مهولة
لقيته رد بغضب: وأنت مال أهلك دافع حاجة من جيبك؟
ابن اياس تدخل وقال: ما يقصدش يا مولانا كله من خيرك بس هو خايف القصور دى حد يقعد فيها بعد ما مولاتنا تروح بغداد
رد خمارويه وباين أن الحتة الهبو شغالة جامد: أنا خمارويه أبو الجيوش أنا سلطان مصر أنا راجل غنى ومقتدر ودينى ل اعمل فرح الناس تتحاكى بيه هعمل فرح أربعين ليلة وهجيب الهضبة ومنير واليسا
صقفت ب أيدى وقلت: الله ينور يا واد يا أبوالسلاطين ما تجيب نفس
فتحت عينى لقيت عصماء عمالة تعملى كمدات ميه ساقعة قلت لها: أنا فين؟
قالتللى: نايم فى أوضتك يا روحى أنت بعد ماشربت اتناشر حجر مع مولانا خماروية طلعتوا تجروا فى الشارع راكبين المقشات وبتلعبوا عسكر وحرامية جابوك من أول عباس العقاد وجابوا مولانا خمارويه من ميدان الجيزة
أنا قمت اتسند وقلت ل ابن اياس: أنا هخلع وأرجعلك تانى
قاللى: مش هتستنى تشوف الفرح
قلت له: لازم أمشى العيال عندها امتحانات
رجعت له بعد فترة لقيته نقل الأزبكية سألته: حصل ايه يامولانا
ابن إياس: لسه فاكر جايلى بعد خمس سنين تسأل؟
رديت: معلش الامتحانات والساحل وكده المهم حصل ايه؟
قاللى: ولا حاجة مصر الحمد لله فلست وقطر الندى ماتت وهى عندها عشرين سنة
أنا زعلت الصراحة ولقيت دموعى بتنزل غصب عنى الله يرحمها كانت قمر.
2
3
4
6