الجزء الثانى من: سعدون البواب يطاردنى فى حفل تتويج الناصر محمد بن قلاوون أهديت مولانا السلطان كوتشى من التوحيد والنور فأعطانى ياقوتة حمراء و10 دنانير ذهبية "الحلقة الثالثة"

قدام عربيتى تعمدت أن أرمى صورة جلنار وعيالها وأم أحمد بتمسحها
الست شافت الصورة ورفعتها من على الأرض وشهقت
التفت إليها سعدون مالك يا ولية
العيال اللى فى الصورة دول شبهك يامنيل اوعى تكون اتجوزت عليا
تقدمت منها ومسكت الصورة
ورينى كده
سعدون وقف بجوارى وغمزنى استر عليا
طب وإزازة البرفان الفاضية
اجيبهالك
وفلوس أم أحمد
اللى تشوفه ياباشا
قلت بصوت مرتفع لا يا أم أحمد حرام عليكى لا دسوقى ولا باتعة يشبهوله
دسوقى وباتعة دول على اسم أبوه وأمه يا باشا
بهزر يا أم أحمد مش صورة تخسركوا بعض
وبصيت لسعدون وقلت الكلام ده لو فيه فيديو ابقى اعملى اللى أنت عايزاه
رحت التوحيد والنور اشتريت الكوتشى وبلغت مراتى أنى مسافر شغل لمدة أسبوع وطرت على قهوة حارة برجوان كنت هناك اتناشر إلا خمسة والساعة اتناشر بالضبط عندما تحول الزمن كنت فى بيت ابن إياس
تأخرت يا ابن البدوى ده فات سنتين فى زمننا
يا ابن إياس هو أنا أهبل أروح أحارب معاهم التتار
مهو عشان حظك حلو السلطان أجل خروج الجيش لحين الاستعداد وهيخرج بكرة للغزو
يبقى لازم أرجع يامعلم وأجى وقت تانى
سمعنا طرق على الباب وجلنار ابلغتنا أن الأمير بيبرس الجاشنكير واقف فى الصالة هرول ابن إياس أانا معه
سيدى الأمير أنه فخر كبير أن أتشرف بزيارتكم
انحنى وانحنيت معه وقال بيبرس جئت أطلب منك أن تخرج معنا لتدون أخبار غزوة السلطان التى ينوى فيها دحر التتار
لكننى كبرت على السفر يا سيدى الأمير
نظر إلىَّ بيبرس مليا وقال الست مساعده الذى كان سيصحبنا من عامين
نعم يا سيدى
إذن تجهز سأرسل لك فرسا وملابس الفرسان لتصحبنا فى الغد ثم أشار إلى كيس التوحيد والنور
ما هذا
دى جزمة كورة ب استارزات عشان مولانا السلطان
أخرجها من الكيس ووجد إلى جوارها شىء آخر
وما هذا
ده الشين جارد عشان لو حد دخل عليه ناشف يحمى قصبة رجله
خلع الأمير البلغة بتاعته وقاس جزمة الكورة وهو ينظر إليها وقال
دى خلاص اتصادرت أنا هروح بيها الحرب تنفع ادشمل بيها وش أى مقاتل يقابلنى وحسك عينك تبلغ السلطان إنى ضربت على الجزمة بتاعته
حاضر يا سيدى
غادرنا الأمير والتفت إلى ابن إياس هتعمل إيه فى حذاء للسلطان
أنا مدكن واحد تانى بتاع اللعب ع الترتان هديهوله بكرة وربنا يستر من حكاية الحرب دى
إذن أصعد إلى غرفتك وسأرسل الجارية لتعد لك الحمام
متشكرين يا عم الحاج خلى الحاجة جلنار أم دسوقى مستريحة دى فشولت أوى يا مولانا وبعدين أنا مش ناوى استحمى
براحتك ثم صفق بيديه وجاءت جارية بيضاء اللون سوداء الشعر والعينين رائعة الجمال
سألته مين دى يا ابن إياس يا أخويا
هذه طوبى جارية فارسية وهى التى كانت ستعد لك الحمام
أنت ذوقك على اوى يا ابن إياس يا أخويا أقولك أنا حاسس أن جتتى بتاكلنى وعايز حد يدعكلى ضهرى
ضحك ابن إياس
وسألت طوبي: الغزال يعرف عربى
لقيتها بتقولى أيوه ياعم الشبح ما تيجى ونجيب مليجى
وصلنا إلى مرج الصفر فى دمشق وعسكر جيشنا هناك انتظارا للمغول
أول ما نزلت من على الحصان فردت جسمى على الرمال أنا مش متعود على ركوب الخيل والحمد لله أنى لبست الاسكتشرز بدل الجزمة العجيبة اللى كانوا جايبنهالى
مر الأمير بيبرس الجاشنكير فقمت واقفا
أنا رجليا فأفأت من استرزات الكوتشى الاديداس منك لله
أنا قلت لسموك أنه بتاع نجيله وسموك أصريت عليه
بدأنا نسمع صوت صهيل خيول المغول وابتدا الجيش يأخذ وضع الاستعداد وأنا اخترت ربوة عالية طلعت عليها وبدأت أصور المعركة بالموبايل
بصراحة العيال المغول كانوا جامدين عاملين زى فريق كوتوكو بتاع زمان بس جيشنا العظيم علم عليهم وهزمهم هزيمة منكرة ومن فرحتى طلعت مسدس الصوت بتاع ابنى وحطيت فيه ظرف من اللى بينور فى السماء وأطلقته وجدت المعركة قد توقفت واتجهت الأانظار إلى ورمى المغول سيوفهم
تصاعدت هتافات الله أكبر من جيشنا محدش كان عارف إيه اللى حصل بس الكل أجمع على أنها إشارة من السماء بالنصر تقدم السلطان الشاب وعمره 15 عاما وربت على كتفى وقال أحسنت يا ابن البدوى
بعد الانتصار عدنا إلى القاهرة ودخلنا من باب النصر وعلى اليمين واليسار قارعوا الطبول والشعب يهتف عاش السلطان العظيم خلعت من الموكب ودخلت بيت ابن إياس فى حارة برجوان الذى استقبلنى مرحبا وقال عايزك تحكيلى كل ما حدث فى الحرب لأدونه
طب أغير هدومى وأخد حمام طيب
نادى يا طوبى
دخلت الجارية وعنيها تندب فيها رصاصة وقالت نعم يا سيدى
حضرى الحمام ل ابن البدوى
قلت لها أى والنبى ياطوبى أصل ضهرى قافش من الحرب
هفكللك عضلك كله يا برنس بس اشحن لى كرت بخمسين
التفت إلىَّ ابن إياس وسألته أنت متأكد أن طوبى فارسية ولا أنت شاقطها من جامعة الدول
اختفى سعدون ولم يعد يغسل السيارات بل ترك مهنة البواب وأخبر صاحب العمارة أنه سيرجع إلى بلده الفيوم
أنا الموضوع مدخلش دماغى فضلت أدور عليه فى قهاوى العمال فى التجمع لغاية ما لقيته لابس جلابية صوف إنجليزى مفتخر وعليها بنش حرير وجزمة أجلاسيه لميع كان شبه العمد
لما شافنى اتخض شوية وبعدين استقبلنى بالأحضان وعرفنى على الخاضرين
الباشمهندس إيهاب صحفى كبير وود عمى وبلدياتى
انتحيت به جانبا وسألته عايز أعرف أخبارك
قاللى فاكر الخاتم اللى السلطان محمد بن قلاوون اعطاه لى
ايوة لما جبت له الكوتشى اللى بينور
تمام أهو طلع الماظ حر نادر بعته واشتريت فضلة خيرك حتة أرض فى بيت الوطن وبشد عليها عمارة
يا ابن اامحظوظة طب افتكرنى بحاجة
ياباشا أول شقة ليك وبخصم كبير
قد القول يا ابن الصرمة
تركته وذهبت إلى حارة برجوان انتظر موعد فتح الفجوة الزمنية ودخلت إلى بيت ابن إياس هذه المرة فتحت الباب جارية حبشية قابلنى ابن إياس مرحبا وإن كان عليه آثار الهموم
مالك يا معلم وفين الأخت طوبى
اسكت يا ابن البدوى تخيل أن هذه الجارية كانت من أصحاب الرايات الحمر
إيه بوليس الآداب كبس ع المطرح
إى آداب وإى بوليس يافتى لقد لاحظت أن عددا كبيرا من الشباب يحومون حول منزلى وكنت أظنهم من البصاصين بتوع مولانا السلطان بيبرس الجاشنكير
ايه ده هو بيبرس طير محمد بن قلاوون
لا الناصر محمد بن قلاوون زهق من تدخلات بيبرس والأمير سلاد وترك الحكم وذهب إلى حصن الكرك
اتاريك مهموم بس قولى طوبى فين أنا عايز حد يدعكلى ضهرى
يا فتى لقد عدت فجأة من السوق فوجدت أربعة شبان يفعلون معها الفاحشة
استغفر الله دى أدب الدنيا فيها عنيها فى الأرض ومتطلعش منها العيبة أكيد العيال دى أجبروها
للأسف يا ابن البدوى دى عيال من زمنكم وعندما سلمتهم للشرطة قالوا أن كل واحد شاحن لها كرت فودافون بخمسين وحتى الآن لا نعرف من هو فودافون.
دى شركة اتصالات بعيد عنك المهم الأخت طوبى فين
بعتها فى سوق الجوارى من أسبوع واشتريت حبابة بدلا منها
 حبابة مين
الجارية الحبشية التى فتحت لك الباب سأجعلها تعد لك الحمام
قصدك كابتن فيلكس مهاجم الأهلى السابق لأ ماليش نفس استحمى
قولى يا ابن إياس ما هى أحوال القاهرة حاليا
الناس غاضبة من بيبرس الجاشنكير وثارت عليه وبيبرس أرسل يطلب عودة السلطان محمد بن قلاوون من حصن الكرك ليتسلم حكم مصر مرة أخرى.
دى تبقى كده تالت مرة يا ابن إياس
نعم بالمناسبة السلطان كان قد أنعم عليك بهدية عقب موقعة الشام التى انتصرنا فيها وأعطانى الهدية لأوصلها إليك ثم أدخل يده فى جيب السيالة وأخرج كيس جلدى فتحه وجدت فيه جوهرة وردية اللون
استيقظت فى الصباح الباكر على يد حبابة تقول
سيدى ابن إياس أمرنى أن أوقظك وأعد لك الحمام
نظرت إلى حبابة وتذكرت جلنار وطوبى وقلت لها هو لازم الحمام
جرب يا سيدى ولن تندم
بعد الحمام وأنا ارتدى ملابس تذكرت فيلم الافوكاتو بتاع عادل إمام لما قام من النوم وبيحاول يلعب رياضة وضهره يوجعه فيقول يخرب بيتك يا عطية قاصدا يسرا زوجته
يخرب بيتك يا حبابة
نزلت لاتناول الفطور مع ابن إياس وجدت مائدة عامرة
صباحك فل يا ابن إياس إيه ده كله
ده من فضلة خيرك وحبابة هى من أعدت الفطور أرجو أن تكون قد أعجبتك
طلعت جامدة جدا يا ابن إياس يا خويا أنت بتفرز مزبوط يا معلم
نظرت إلى الطبلية كان عليها فول وبيض وشكشوكة وبيض بالبسطرمة وقشطة وعسل وجرجير وجبنة كاشكافال وسوسيس وحبابة تعطينى رغيف عيش مفقع وتقرب منى الجرجير كل يا سيدى حتى تستطيع أن تصلب طواك
بصيت ليها بطرف عينى وبصيت على ابن إياس ولسان حالى يقولك
مش قدام الراجل يا ولية
قال ابن إياس انهى طعامك سريعا حتى نذهب إلى قلعة الجبل بيبرس الجاشنكير يستعد لتسليم السلطة إلى السلطان محمد بن قلاوون ونحن الآن فى العام 1310 ميلادية
وصلنا القلعة فى الوقت الذى كان موكب بيبرس يحاول الخروج والناس تمنعه فأخرج بيبرس صرة دنانير ذهبية أخذ يلقى منها على المحتشدين الذين انشغلوا بجمع الدنانير ومرق بيبرس من وسطهم متجها إلى موقف المنيب غالبا سيذهب إلى الصعيد
شاهدت السلطان محمد بن قلاوون وقد أصبح عمره 24 عاما يجلس على كرسى السلطنة للمرة الثالثة وإلى جواره شخص يحمل العباءة عرفت أنه الخليفة الجديد واضح أنهم غضبوا على سعدون
ارتدى السلطان العباءة وانحنيا جميعا وبدأ الجمدارية يهتفون عاش مولانا السلطان العظيم
أشار لى السلطان بيده فذهبت إليه فنظر طويلا إلى ثم قال
أريد حذاء ترتان 43
أوامر معاليك يا عظمة السلطان تحب أجيبلك معاه تى شيرت برشلونة
رد السلطان وما معنى برشلونة يا رجل أريد تى شيرت ليفربول رقم 11 بتاع مو صلاح ثم أشار إلى خاصكية وأخذ منه كيس جلدى دفعه إلى كنت أشعر بثقله وعندنا خرجت من عند السلطان وجدت الكيس به 10 قطع ذهبية
نظر لى ابن إياس يبدو أنك أصبحت من الأثرياء يا ابن البدوى ما أول شىء تريد شراءه
جراند شيروكى سودة وجارية مليحة كرباج شبه شيرى عادل أو روبى
كنت أجلس فى بلكونة شقتى أطالع ما كتبه ابن إياس الحنفى عن الناصر محمد بن قلاوون هذا الرجل العظيم الذى تولى حكم مصر وعمره 9 سنوات وتم خلعه عن العرش ثلاثة مرات من قبل مماليك أبيه لكنه عاد ليحكم مصر وعمره 24 عاما ويستمر حتى عمر الستين وبنى دولة قوية هزمت المغول والصليبيين وامتد نفوذه على الحجاز والشام وكان يدعو له المسلمين فى مساجد اليمن وتونس ومصر والشام
كان أحد البنائين العظام وبنى القصور وشق الترع والجسور وبنى المنتزهات وشهدت مصر فى عهده طفرة اقتصادية عظيمة فجأة دخلت زوجتى تسحب فى يدها درة الجارية الشركسية التى أهداها لى ابن إياس
شوفلك حل مع الهانم بقالها نص ساعة بتكوى التيشرت بتاعك
ياستى البنت بتعمل شغلها بضمير
طب وحكاية أنها واقفالك بالهدوم على باب الحمام كل شوية
ياستى سلو بلدهم كده
بقولك إيه أنا مش مستريحة للبت دى
مش كنتى مبسوطة منها أول ما جت وبتتفشخرى بيها قدام صحباتك
ماليش دعوة البت دى بتبصلك بصات غريبة مش مريحانى
طب أنت عارفة جوزك
ولا أعرف حاجة الرجالة كل ما بتكبر بتتهبل
طب والطلوب خدها غيرها وهات واحدة مكانها
حاضر يا ستى آخر الشهر أروح بيها عند ابن إياس المخدماتى أخليه يغيرها
لا تغيرها النهاردة
أخدت درة فى الجراند شيروكى السودة ومعاها شنطة هدومها وسألتها انتى عملتى إيه
أبدًا سيدتى دخلت الحجرة وجدتنى أحضن صورتك
وهى حبكت يا درة
شوفى أنا هخدلك شقة قانون جديد فى الطوابق وفتحت الموبايل وأشرت لها بالصمت وكلمت مراتى
خااص رجعتها ومعندهمش شغالات حاليا بس فيه واحدة شبه كابتن فيلكس بتاع كوتوكو بيقولوا هتيجى الأسبوع الجاى عايزة تعرفى اسمها إيه
اسمها حبابة شكلها إفريقية
بتقولى عز الطلب يبقى على بركة لله
2
3
4