جوزك على ماتعوديه : الزوج الفرفوش رزق

الرزق مش فلوس وصحة وعيال بس؛ الرزق ممكن يبقى فى حاجات كتير منها الزوج.
أيْوَه الزوج الصالح، والكريم والحنين، كلهم رزق من عند ربنا..
لكن الزوج الفرفوش ده حاجة تانية خالص.
فرفوش فى نفسه كده، مود مختلف تمامًا، بيكون بحاجات بسيطة مزيكا حلوة،أكلة لطيفة،لفة بالعربية مع أغنية جميلة لعمرو دياب ولّا محمد منير، اندماج فى الأغانى مع زوجته وعياله، استعداده للسَّفر فى إجازة سريعة لتغيير المود العام.
الضحك والفرفشة بيطوّلوا العُمر وبيزوّدوا المناعة، الزوج الفرفوش ده ممكن جدّا يغير مُود البيت من الكآبة والنكد للفرفشة والضحك.عنده قدرة جميلة على تحليل الأمور ووضعها فى نصابها الصحيح.ودِه؛ لأنه بيكون بعيد عن نوبات الغضب والكآبة المصاحبين لبعض الأزواج.
مجرد أنه بيحاول ياخد كل الأمور بسلاسة وبساطة ده بيخلّى الزوجة مضطرة هى كمان أن تعطى كل حاجة حجمها.
التساهل والتغاضى عن كثير من الأمور بيخلينا نتجاوز كثير من الخناقات الغير مبررة والغير واضحة الأسباب.
والفرفوش ده مش بيكون مع أصحابه بس ومراته لا، ده بيبقى مع الكل، يعنى مش الضحك والتهريج والكلام على القهوة مع الأصحاب وفى البيت نكد وبرنامج بدون كلام.
تمشية بسيطة مع زوجته وفرحتهم ببعض بتهوّن كتير عليهم من صعوبات الحياة.
كائن غير محب للنكد عنده استعداد كبير للضحك والانبساط.أول لما تلاقيه اوعى تسيبيه لأنه نادر من نوعه.
بجد الزوج الفرفوش رزق كبير أوى من عند ربنا.