جوزك على ماتعوديه

الرجل الغامض
هو حضرتك لما قررت تتجوز كنت أكيد فاهم أن الزواج ده حياة اجتماعية مشتركة ما بين طرفين.. قائمة على الشفافية والمشاركة والكلام الجميل ده.
يعنى حضرتك لازم تكون واضح أمام زوجتك من حيث دخلك الشهرى من الشغل أو من أى جهة أخرى، ده المفروض ولكن طبعا فى عدد كبير جدا من الأزواج مش بيحبوا يقولوا لزوجاتهم على مرتباتهم ظنا منهم أنها ستعمل جاهدة على صرف كل المرتب فى احتياجات البيت. اللى هو عايش فيه. أو على احتياجاتها الشخصية اللى أصلا مش موجودة نظرا لمتطلبات الأسرة التى لا تنتهى.
ولكن الزوجة هنا بيكون عندها قرون استشعار قوية جدا وبتعرف أن فيه جزء من المرتب مش باين ومختفى كده. وطبعا بيكون فيه حالة من عدم الثقة موجودة فى العلاقة. وهذه الحالة كفيلة جدا بقيام بعض المناوشات التى قد تؤدى إلى قيام الحرب الأهلية فى المنزل.
عزيزى الزوج تأكد حضرتك أن زوجتك الأصيلة التى طلت معاك بالأبيض على صوت الفنانة ماجدة الرومى مش طماعة ولا تزوجتك علشان المرتب المغرى. ولكن تزوجتك علشان تبتدى معاك حياة جميلة متناغمة هادئة خالية من المشاكل، فا مينفعش حضرتك تخبى عليها دخلك الشهرى بحجة أنى مش بحب حد يعرف أنا باخد كام.. الكلام ده تقوله فى مصلحة الضرايب مش فى البيت.
ثم المفروض إن زوجتك دى مش حد، وانتوا شركاء فى أسرة واحدة، وبعدين هى لو عملت نفس الشىء حتبقى مشكلة كبيرة بالنسبة لك سيدى الزوج.
نصيحة بسيطة لك: الزوجة المصرية الأصيلة تمتلك بعض مواصفات الجاسوسية، يعنى ممكن تلاقيها سايبة العيال يضربوا بعض فى البيت أو حتى يولعوا فى بعض ومتنكرة وماشية وراك علشان تعرف أنت رايح فين لمجرد أنها مش مطمنة لكلامك.
ممكن تسجل لك مكالمات وتتهمك بالتخابر مع دولة أجنبية، ممكن تبلغ أنك عندك قنابل فى البيت واحتمال تكون بتصنعها كمان، كل ده عادى جدا بالنسبة لها طالما إنك اللى بدأت.
فأنا رأيى بلاش غموض مع شريكتك حبيبتك أم عيالك ولم الدور علشان تنام فى بيتكوا النهارده.