كتب : احمد شوقى علي رأي الست.. وخللي بالك.. ما فيش في مصر أهم من رأي الست.. سواء كانت الست أم كلثوم أو الست بتاعتي.. اللحظة التاريخية اللي عملناها بأيدينا وغيرنا بها نظام الحكم هي لحظة نستحقها وبجدارة.. نستحقها لأننا دفعنا تمنها دم.. دفعنا تمنها لما انهارت الدولة بانسحاب البوليس وفرجة الجيش.. واحنا اللي شيلناها.. احنا اللي شيلنا عصيان وسكاكين ووقفنا فالشوارع نحمي اعراضنا.. إحنا اللي أصرينا وقولنا مش هنمشي هو يمشي.. إحنا اللي دمنا سال في كل شارع وميدان وحارة.. إحنا مين.. احب أن أشرح لك لو كنت مش فاهم.. إحنا مصر اللي جاية.. قول علينا شوية عيال ما يهمش.. بس الحقيقة ح تفضل موجودة.. انت ح تموت.. واحنا ح نعيش.. وبالطريقة اللي احنا مختارينها مش بالطريقة اللي عاوز حد يفرضها علينا.. احنا شعب مصر ولو مش فاهم يعني ايه مصر جاهين يقولك.. مصر.. التلات أحرف الساكنة اللي شاحنة ضجيج زوم الهوا وطقس موج البحر لما يهيج ولو مش عارف هي فين مصر.. أقولك إنها مركز العالم وملتقي الجهات الأصلية الأربع.. ولو مش عارف هي من امتي.. اقولك هي من اول ما قالوا ياللا بينا نعمل مدنية وحضارة.. هي اول نور فالدنيا شق ضلام الليل. فلو عندنا جيش بيحكم مؤقتا باسم الشعب.. ده لأنه جيش الشعب.. ولاد خالتي الاتنين مجندين.. دفعة يعني.. وابن عمي رائد.. وجوز خالتي عميد.. وابن عمة ابويا لوا معاش.. وانا جندي احتياط. ولو عندنا حكومة مؤقتة بتتصرف في شئون البلد.. ده لأننا شيلنا رئيسها علي اكتافنا في الميدان. فيا ايها اللي انا مش عارفه.. ايا كان ويحكم مصر الآن.. أعلم أني أي الشعب هو اللي بيحكمك وبيتحكم فيك وبيصنع قرارك.. واني مش عاجبني شغل اللوع واللف والدوران اللي انت بتعمله معايا.. احنا اختارنا سكتنا ومشينا في طريق عكس اللي كان ماشي فيه مبارك وشلته.. وانت بتدورنا حوالين الميدان سبع لفات ومتخيل انك ح تقدر ترجعنا من غير ما ناخد بالنا علشان نمشي فشارع مبارك.. احب اقولك.. هأو.. ده بعدك.. انا عارف سكتي كويس.. انا زي القطر طالع للمستقبل وح دوس فسكتي كل ظلم وجهل وفقر وتخلف.. ح تلاقيني في وشك الجمعة الجاية وكل جمعة جاية.. ح اطلعلك من كل شارع وميدان وحارة .. دار دار زنقة زنقة.. ايوه إلي الأمام.. ثورة ثورة.. مش حتقدر تضحك عليا تاني ولا ح ينفع اسلمك دقني تاني ألا هل بلغت.. اللهم فاشهد.
