واحة الشعر

يسيل بجوار النيل فى بر مصر نهر آخر من الإبداع ... يشق مجراه عبر السنين والأجيال داخل نفوس المصريين ... فى سلسلة لم تنقطع ... وكأن كل جيل يودع سره بالآخر ... ناشرين السحر الحلال ... والحكمة فى أجمل أثوابها ... فى هذه الصفحة نجمع شذرات من هذا السحر ... للشعر ... سيد فنون القول ... الذى يجرى على ألسنة شابة موهوبة ... شاركت مع فريق «روزاليوسف» فى تحرير هذه الصفحة بمشاركاتها على rosareaders@gmail.com


حبيبة



حِكاية عِشقِنا بَدأت

وأنا لسايا ف اللفَه

وكنت بعيد قوى عنِك

وتِفصِل بيننا 100 ضَفَّه

ونار بُعدك دى حَرَّاقه

ولما ناوينا نِتلاقىَ

حَزمْت ف مركِبى زادى

وزادى مَيَّه م القُلّه

وقَعدِة بحر ف الضِلّه

أمرت القلب لَيْجَدِّف

وروحى تِرفَع الدِّفه

سنين وأنا ماشى باندهلك

وأقول يا حبيبةجاوبينى

ونار الصيف بتحرقنى

صقيع البرد يلسَعنى

بنات الأرض ما تساعنى

وحَاسَّه بحرقتى لكن !

خيالك ما يزور عينى

يا عين محرومه من شُوفِك

وشُوفِك كالهلال غالى

أصوم يروينى مَعروفِك

ومعروفِك دا كلمة عشق

مِستَنّى تنادينى

وطين أرضى بيتقَلّب

وتطرح زرعِتُه تِينى

وقلبى ف نار بيتقَلّب

وقلبك ما يطفّينى

وبأتخيل رموشِك كيف ؟

وكفة أيدك الناعمة

وضحكة ف الرسايل طيف

وكلمة حب تتسلّط

على رقابى حاسسها سيف

بأحبك وأنتى ف اللفه

ونفسى بعشقِك أدّفّا

تعالى ونِّسيى طيرى

وهل يرضيكى تعذيبى

وراضيه تونِّسى غيرى

وذنبى إنى حبّيِتِك

ومكتوبلى أعيشِك طيف

بحبك يا منى روحى

ولا عينى تشوف رسمِك

وجاهل حتى إيه اسمِك ؟

وساكنه ف ضِلّتى ودوحى

وخايف يبقى قلبى خريف

صباحى ربابة بتلالى

حزين وبيدعى بعد الفرض

حبيبة واللُقا غالى

وبأدفَعلُه ميراث الأرض

وأتْحَسَّر على حالى

بترفعنى ف يوم بالعشق

ويوم ترمينى م العالى

تعالى الأرض شَرقانه

نِشِف عودى

غُنا عودى

غريق بيحب غرقانه

وأتارى قلبى دا خايب

ولا عمدة ولا عَرّيف

يضيع من نظرة ف عينيها

وخايب حتى ف التجديف

شعر: محمد شحاتة


من وش مصرية

(1)

وشك يا مصرية

سبحان من رسمه

سبحان من قسّمه

على القلوب كافة

سبحانه مَن علمه

فعل الملاغية

درسين وبتعلمه

أنثى ونجمية معجونة بالخفة

الرفة من جفنها تلعب بنا الرفة

رغم المدارية

كل النساء كافة

وأنتى اللى ف الكفّة

على صوت غناكِ القمح

بجلاله اتسنبل

ف ضوء كانون شفناه

غافى بيتدفّى

على وش مصرية

(2)

وشك يا مصرية

بيضج بالثورات

فوق خدك الوناس

الضحكة تبقى حارات

من درب غمازة

عيلها م الجنة

صخبها ليه رنة

ينفع يكون مدنه بترشرش الإيمان

ومدرسة خارجة

أولادها بتضايق

ف بنات حديثى النهد

عايقة وتتعايق لجل الملاغية

تعشقها تلميذة

تلقاها جنّيه

طفلة رومانسية.. فوق الجمال حافية

ماسكة ف كراسة

متروسة جغرافية حسنك يا مصرية

على كفها تتولد

وف حضنها تتلحد

يا بخت من ينحسد بنظرة عسلية

من وش مصرية

(3)

وشك يا مصرية

فيه الدفا وداد

هَرْس القلوب غِيّته.. فيه الحياء غلاب

حجّار مع الحجرى

مع الحديد.. حداد

صنايعى عشق وهوى


وكله بالمقاسات

فصلت عنده أنا

كلمة تراضينى

بوسة تقوّتنى

همسة تصحينى

لفتة تموتنى

نوتة تفكرنى بناس متعرفنيش

وناس تعرّفنى

سر الحياة نغبيش

ع القلب مرسومة

وقطن فى المحلاج

زاهد بيتقطن

على وش مصرية

(4)

صنيعى عشق وهوى

وكله بالمقاسات

احفظ بقى أبعادى يا أسطى

وفصل لى

(بفيونة) لأعصابى

و(بفتّة) لمشاعرى

كرافتة ف رقبتى

وطاقية فوق شعرى

وجاكتة تحمينى

جلابية تسترنى

أفرول يقوينى


وراية تنصرنى

ولا حد يكسرني.. غير رب ذاك الوش

روحوا فصلوا عنده

الورشة ما تتوهش

عنوانها تفصيلى

(على ضفتين نيلي)

لو رحت بس اسأل

فين وش مصرية؟

شعر : أحمد الرومي

فوق رصيف المرحلة

اركن كيانك

فوق رصيف المرحلة

وأوعاك تزوم

طاطى للريح العفى

علشان وجودك

م الأساس

ملهوش لزوم

ف البس هدوم المنحنى

والمح هنا

عفريت ضميرك

جواك بيرسم مهزلة

والمشكلة

عضلاتها

أكبر من عضام

كل البشر متجمعين

وانت الحزين

وحدك بتدخل معركة

ملهاش قانون

فاعلن خلاصك
للجموع

أنت مش ممكن تكون

علشان مكنتش م الأساس

شعر: مصطفي التمساح



أحاديثُ سيدةُ الرملِ

1- حديث الموجة:

تحدثُ سيدةُ الرملِ..

حين تقلبُ أصدافها

إن ما سيكون كان،

وإن ما كان ..

تغلفهُ الأساطيرُ

فقط..

لإضفاءِ تشويقٍ مفتعل!

لكن الحدث الرئيسيّ ..

إن الفتاة التى ترتدى ثوب البنفسج والقرنفل،

وتفترش القصائد الممددةَ ..

عبر أشعةِ الأكوان

تتحكم فى موجةِ البحرِ

تغزل من الملحِ فساتينً..

تغلف أوردةً تتشابكُ

عبر دروبِ المسافةِ …بلا مصبٍ

تخفضُ الصوتُ جداً

حين تُخَبُّرُ …

أن تلك الفتاة اللعينة ….بلا قلب

2- حديث القاع:

يتطاير الرملُ بين كفى السيدة

يتشكلُ أهداباً وعيون

تقلبُ فى دفترها البنيّ

وتبدى اندهاشاً

دون تمهيدٍ تباغت بالأسئلة:

انت أيها الفتى المرمريّ…

هل انت تملكُ ناصية الوشمِ المرتسم …

على ساعد اللحن المسجى ..

فى غرف الإفاقةِ؟،

تلك العصافير التى تزقزقُ

فى عشها المخبأ بين أوردتك

لم تزل تطارحك لحنها الأبديّ؟

وانتِ أيتها الساكنةُ تفاصيلُ القصائد..

للبحر قيعانٍ تكشف خارطتك

تنقلها عبر انكسار الضوء

فترتسم أقماراً على صفحته!

3- حديث الشاطئ:

تخرجُ أحجارها الملونة

تبعثرها بين الأصداف المتراصة..

تلملمُ أوراقها…

هنا انفراجةٌ مؤقتة…

سحابةٌ ترتعد

على آخر السطرِ فاصلةٌ

وفى أوسطهِ ينفجر التعجبُ

هناك نبضةٌ معلقةٌ…

على رزنامة الوقت

تفتش شريانها

أين تصبُ تلك الدماءُ؟!


شعر: سمية عسقلاني