إسكندرية

إسكندرية ف عز الدنيا ما تشتى
ف وش موج الزمن
واقفة ولا توطى
يا أبوالنوارس يا حارس
مركبى وشطى
على قلبى خطى
ورش النور على كتافى
وتعدى نوة وتيجى بعدها نوة
وإنت ف عيونى أنا
أجمل بنات حوا
سبحانه من أبدعك
سبحانه من سوى
بحر وفلايك سبايك
من دهب صافى
قلبى بغرامك ف عز البرد يدفى
وأركب ترامك والفك كل يوم لفة
وإن كنت راكب مراكب
أعدل الدفة
لعيونك إنت
ويبقى الصبر مجدافى
يا بحر عيب مش كدا
ارمى السلام بشويش
غرقت قلبى وأنا
هيمان على الكورنيش
سرحان ف عمرى اللى كان
ولا ف أكل العيش
ولا ف طيش الزمان
أبو قلب متعافى