50 إصابة بالشرقية واحتجاز 80مواطن بمديرية الأمن بينهم70سيدة

تم إطلاق سراح جميع المحتجزين بمديرية أمن الشرقية بعد اعتداء قوات الشرطة وبلطجية عليهم خلال مسيرة مؤيدة للرئيس مرسي واحجتازهم في مديرية الأمن لأكثر من ساعتين وكان عدد المحتجزين كان 80 شخص ..منهم 70 سيدة
بدأ الأمرعصر أمس (الخميس) حينما خرجت مسيرة حاشدة من مؤيدي الشرعية والرئيس االمنتخب محمد مرسي ورافضي الانقلاب العسكري حيث تم اعتداء عدد كبير من البلطجية على المسيرة وأصيب 50 شخصا من مؤيدي الشرعية ، بعد قيام بلطجية بمهاجمة المسيرة والتي كان بها عد كبير من النساء والأطفال بالخرطوش والحجارة ، بميدان مسجد الفتح في الزقازيق بمحافظة الشرقية.
وفي تطور للأحداث حوصر عدد كبير من المؤيدين داخل مسجد بالشرقية وبمساعدة الشرطة، حاصر البلطجية النساء والأطفال المشاركين فى المسيرة المؤيدة لشرعية الرئيس محمد مرسي وأطلقوا نداءات استغاثة عبر هواتفهم للقوات المسلحة والشرطة لنجدتهم
وعلى صعيد آخر أكد شهود عيان لشبكة "رصد" الإخبارية كثرة عدد الإصابات بين المتظاهرات المشاركات في مسيرة تأييد الرئيس مرسي والتي تم الاعتداء عليها من قبل رجال الشرطة والبلطجية بالزقازيق منذ قليل وهناك إصابات عديدة بين المتظاهرات في الرأس وبالخرطوشأصيب مساء اليوم (الخميس) 50 شخصا من مؤيدي الشرعية ، بعد قيام بلطجية بمهاجمة مسيرة حاشدة بها عد كبير من النساء والأطفال لمؤيدي الرئيس محمد مرسي ورفضا للانقلاب العسكري عليه بالخرطوش والحجارة ، بميدان مسجد الفتح في الزقازيق بمحافظة الشرقية.
وإليكم شهادة شهود العيان
شاهد 1
شاهد عيان يروي ما حدث من اعتداء علي مسيرة مؤيدي الرئيس مرسي بالزقازيق:
في الأول أنا كنت متصوّر إن الموضوع كله خناقة عادية، لكن الوضع دلوقتي في الزقازيق بيتحول إلى حالة انفلات أمني كامل، بلطجية في الشوارع بسلاح أبيض، وخرطوش وسلاح ناري، وفي وجود ضعيف جداً للداخلية..
في نقطة مهم توضيحها لإني بسمع كلام غريب عن إن الإخوان بيكسّروا المحلات، وبيضربوا الناس، وبيقتحموا الكنائس وخلافه، أنا معرفش الحقيقة الكلام دا بييجي منين ! اللي بيحصل دلوقتي هو إن الإخوان بيتفشخوا في الشوارع بالمعنى الحرفي للكلمة. اللي بيحصل دلوقتي مجزرة..
-الموضوع بدأ بخناقة عند المحافظة، مسيرة للإخوان، والموضوع تطوّر لإشتباك عادي بالطوب، لحد دلوقتي الدنيا مفيهاش أي مشكلة، ودا بيحصل تقريباً في كل مظاهرة اليومين دول
-الإخوان مكانش باين عليهم أي نية للإشتباك أصلاً، شوية ناس، اغلبهم من سن كبير أصلاً، وستات مخمّرة، وعيال في إعدادي.. الإخوان دماغهم متربسه ، لكني فعلاً مشفتش، ولا غيري شاف إن حد منهم معاه سلاح غير شوية طوب..
-الاشتباكات استمرت لحد ما وصلت 3 مدرعات أم مركزي، حجزت بين الطرفين، وضربت قنابل أمن مركزي، ورصاصتين حي في الهوا، وعملت كردون حوالين الإخوان، والاشتباكات وقفت لفترة.
-الفكرة بس في إن الناس حوالين المدرّعة كانت شايله مولوتوف، وسلاح أبيض، وفي ناس طلعت فوق المدرّعة وتبادلوا أحاديثاً وديّة مع الضباط..
-مع الوقت، في حاجة كدا زي خبرة الاشتباكات بتيجي من كتر ما الواحد بيشوف الأنماط اللي في الشارع، يعني أنا قادر كويّس أميز بين المتظاهر اللي من منطقة شعبية، حتى لو كان شايل سلاح، وبين البلطجي بشكل واضح وصريح، حتى لو التاني دا مش شايل سلاح
-مشّوا الستات من الكردون.. وبعدها بدأت المعجنة..
-اللي حصل إن الكردون دا تم اختراقه، وبدأ ضرب الاخوان بشكل غير طبيعي.. مبحبش أستخدم مصطلحات كبيرة، لكن دي مذبحة بكل المعاني
-الضرب كان بيحصل بالخرطوش، وبالسلاح الأبيض، مطاوي وسنج وسيوف وخلافه، وبالمولوتوف..
في واحد من الإخوان اتمسك، واتضرب بالمولوتوف، يعني اترمت عليه العبوّات، مباشرة..
-في إخوان رموا نفسهم في البحر، عشان يهربوا من اللي بيحصل، واحد منهم عام في الميّة، لحد ما وصل منور بيت واحد صاحبي. ومن هناك شافه وهو بيتمسك من منور البيت، والناس ملمومة عليه وبيحطّوه في عربية كارّو، وسمع بودانه واحد بيقول: "محدش يموته، هنعذّبه الأول"..
-الإخوان دلوقتي محاصرين في مسجد النصر اللي على البحر، جنب (تي إي داتا).. واقف على الباب شوية ضباط، والناس حواليهم بتهتف لهم
- أعتقد إن المحطّة هي منطقة تجمّع البلطجية دلوقتي.. ومن هناك بيتحركوا على موتوسيكلات إلى أماكن الضرب..
-قناة الحياة دلوقتي بتتكلم عن إن الإخوان ماشيين بيكسّروا في العربيات في المحطّة، ودا كذب صريح..
شاهد 2
شهادة شاهد عيان عن الاعتداء علي مسيرة مؤيدي الرئيس #مرسي بالزقازيق:
أختي وزوجها محاصرون بأحدى العمارات بالزقازيق والبلطجية محاصرين العمارة ، عدد من الضباط موجودين معاهم بالعمارة (المفروض عشان يأمنوهم )بيقترحوا حلا للخروج من الازمة وهي ان الاخوات يخلعوا الخمارات -الحجاب الشرعي- واحنا نطلعهم !!!!
* تحتفظ رصد بإسم "شاهد العيان" .. حفاظا علي سلامته
شاهد 3
شاهد عيان علي أحداث الزقازيق
رأينا الموت بأعيننا انهرده في الزقازيق !!!!!!
إصابات وقتلى بالجمله !!!
الخرطوش والطبنجات والسنج والمطاوي والطوب والملوتوف والجنازير شايفهم بعنيا والله وبكميات غزيره وهاجموا بيهم المتظاهرين العزّل !!!!!
اقسم بالله عمري ما شوفت زي اللي شوفته انهرده !!!!!
المتظاهرين اتحاصروا على البحر وفيه واحد او اتنين رموا نفسهم في البحر خلاصا وسمعت انهم غرقوا دي مشوفتهاش بعيني
عدد مهول من المؤيدين معرفش ينجو فدخلوا احد المساجد على البحر واتحبسوا فيها "رجال ونساء" والبلطجيه منتظرينهم خارجه متوعدين بذبحهم !!!!! والناس واقفه تتفرج وفرحانين !
وحتى اللحظه محتجزين ومحدش عارف ينقذهم
وبيهيجوا الشعب عليهم والناس كلها بتردد ان الاخوان كانوا ماشيين يقتلوا في الناس ويكسروا المحلات !!!!!!!!!!!!!!!!!!!!! اقسم بالله شعب مُغيب
بالله عليكم ادعولهم وضعهم يفطر القلب
رب إننا مغلوبون فانتصر !!
اللهم انتقم اللهم انتقم
حسبنا الله ونعم الوكيل !!!!
دا المسجد المُحاصر الآن بس والله خشيت اصور الأسلحه واحتك معاهم
يارب سلم سلم
واللي واقفين بره المسجد تسألهم تقتلوهم ليه
اللي يقولك دول قتلوا خمسييين وهما ماشيين !!
واللي يقولك قتلوا 8 منهم طفل صغير !!!
واللي يقولك دا ستاتهم معاهم اسلحه كمان ومسلحين
اقسم بالله قله ادب وتغييب فوق مستوى العقول
والله فعلا عمري ما هستغرب ان ناس تعبد المسيخ الدجال وبين عينيه كافر !!!!!
* تحتفظ رصد بإسم "شاهد العيان" حفاظا علي سلامته
شاهد 4
شاهد عيان علي أحداث الزقازيق
ما حدث لنا فى الزقازيق مذبحة بمعنى الكلمة ..
تم تسليمنا من الشرطة الى البلطجية تسليم مباشر حتى يتم ذبحنا وقد كان .. كان معى اخوة فى مستشفى جامعة الزقازيق على وشك الموت واظنهم قد انتقلوا الى رحاب الرحمن .. ما كنا نملكه هو نطق الشهادة والاستغفار الدائم والتوبة الى الله عز وجل .. حتى كانت المسافة بيننا وبينهم اقل من 2 متر وهنا بدات المذبحة التى سيعلن عن اعداد وفياتها ومصابيها بعد سويعات .. ما كنا نملك سلاحا سوى التضرع وكنت القن نفسى واخوانى واخواتى الشهادة حتى غبت عن الوعى اثر خبطة جاءت من الخلف .. تم نقلى بعدها الى المستشفى الجامعى بالزقازيق .. وما زال الذبح والحصار مستمر
وحسبنا الله ونعم الوكيل
* تحتفظ رصد بإسم "شاهد العيان" حفاظا علي سلامته
شاهد 5
شاهدة عيان تؤكد لشبكة رصد الاخبارية ان 70 من المتظاهرات المؤيدات للرئيس وعشرة رجال اخرجتهم قوات الجيش في مدرعات الامن من العمارة المحتجزين فيها بعد اعتداء البلطجية وقوات الشرطة علي المسيرة المؤيدة للشرعية واصطحابهم الي مديرية الأمن
يذكر انهم محتجزون في مديرية الامن الان وانباء عن استمرار احتجازهم لصباح الغد
* تحتفظ رصد بإسم "شاهدة العيان" حفاظا علي سلامتها