بالفيديو.. قناة اليوم السابع المصورة ترصد.. أعمال تخريبية بفندق شبرد.. والطب الشرعى ينتهى من التقرير النهائى لوفاة "الجندى"..و"البرادعى" متهكما على تويتة الرئيس مرسى: "حب يطلع فى المجال بتاعى"

رصدت كاميرا قناة اليوم السابع المصورة، نبض الشارع السياسى المصرى، كما رصدت القناة عددا كبيرا من الفيديوهات والمواقف السياسية والكوميدية، ونعرض عددا منها.
وفى الفيديوالأول.. كاميرا "فيديو7 قناة اليوم السابع المصورة" ترصد قيام مجموعة من أطفال الشوارع بقطع كورنيش النيل، ورشق فندق شبرد بالحجارة، مما أدى إلى تحطيم واجهات الفندق.
وقال هؤلاء الأطفال: "إن أفراد الأمن العاملين بالفندق قاموا بخطف زملائهم وتسليمهم لقوات الأمن، مما أثار حفيظتهم وجعلهم يقومون بالاعتداء على الفندق ظهر اليوم الثلاثاء.
الجدير بالذكر، أن ميدان التحرير شهد حرب شوارع بين مجموعة من أطفال الشوارع وقوات الأمن الموجودة بمحيط السفارة الأمريكية.
وفى الفيديو الثانى..كشفت مصادر رسمية بمصلحة الطب الشرعى، أنه تم الانتهاء من تقرير الطب الشرعى النهائى حول وفاة المجنى عليه محمد الجندى الناشط السياسى وعضو التيار الشعبى وإرساله لنيابة قصر النيل مساء أمس الثلاثاء لمباشرة التحقيقات فى القضية.
وأوضحت المصادر أنه تم عقد اجتماع موسع بين كبير الأطباء الشرعيين الحالى ومسئولى وقيادات المصلحة وعدد من الأطباء من أجل الانتهاء من التقرير الطبى وإرساله للنيابة المختصة لمباشرة التحقيقات فى القضية.
وأضاف الوليد إسماعيل الصحفى خلال مداخلة تليفونية ببرنامج "صباح أون" بفضائية "أون تى فى" أن تقرير الطب الشرعى لوفاة الجندى، يؤكد أن الوفاة كانت بسبب حادث سيارة وليس نتيجة لصعق بالكهرباء أو تعذيب.
وفى الفيديو الثالث..أكد الدكتور محمد البرادعى، رئيس حزب الدستور، والقيادى بجبهة الإنقاذ الوطنى، أن هناك غيابا تاما للقدرة على إدارة الدولة بعد الثورة، نافيًا ارتباط هذا الوضع بالإخوان المسلمين أو أى تيار.
وأضاف البرادعى، خلال حوار للإعلامى شريف عامر، أن المشاكل التى نواجهها كثيرة، منها سوء إدارة كامل وغياب تام للقدرة على قيادة الدولة، خاصة فى ظل ظروف الثورة، لافتًا إلى أن هناك إحساسا لدى قطاع عريض من الناس بالحرية ورغبتهم فى تغيير حقيقى.
وقال البرادعى، إن مصر اليوم ضد نفسها، ووصلنا فى حالة تغيرت فيها صورة العالم تجاه مصر، مضيفًا فقدنا البوصلة، وأصبحنا شعوبًا وقبائل، ولا نريد أن نتعارف، ومؤسسة الحكم تتكلم عن مشاكل وهمية.
وأضاف البرادعى، محكوم علينا أن نعيش سويًا، وإذا لم تكن هناك وسيلة للعيش مع بعضنا سنفجر أنفسنا، وكشف البرادعى أن الوضع الحالى لم يتغير عن أيام الرئيس السابق، فالفقر وانعدام الأمن ما زالا موجودين، بالإضافة إلى غياب الرؤية.
كما تهكم البرادعى على تويتة: الدكتور مرسى بعد أحداث بورسعيد وقال: انتظرنا بعد أحداث بورسعيد أن يتكلم الرئيس ولم يطلع علينا إلا بتويتة، "وحب يطلع فى المجال بتاعى".
وذكر البرادعى جماعة الإخوان المسلمين بأنه قضى سنتين من عمره يدافع عنهم، وقال كنا شركاء فى معارضة نظام مستبد، وبعد الثورة اختفت الاتصالات بينى وبين الإخوان المسلمين، لافتًا إلى أن الإخوان لم يتواصلوا مع الشعب المصرى، وقد حصلوا على الأغلبية فى ظل ظروف استثنائية وهم يعلمون ذلك جيدًا.
وقال إن الخلاف مع الإخوان فى أسلوب الإدارة، ولابد للإخوان أن يعلموا أن الوطن لن ينهض إلا بشراكة وطنية، وكل ما نطلبه أن تكون هناك شراكة حقيقية للنهوض بالوطن.
وأبدى الدكتور البرادعى حزنه العميق من كمية الهجوم الشخصى عليه من قبل جريدة "الحرية والعدالة"، التابعة لجماعة الإخوان المسلمين، وانتقد البرادعى أسلوب الجماعة فى الشراكة قائًلا: ليس هذا أسلوب الشراكة الوطنية، نحن الآن فى مرحلة انتقالية، ولابد للجميع أن يشارك فى النهوض بمسيرة الوطن، ومن حقنا الاختلاف، لكن لابد من وجود وسيلة للعيش مع بعضنا البعض.
كما انتقد الدكتور البرادعى الدعوات التى تتحدث عن المشروع الإسلامى متسائلاً أين هو هذا المشروع الآن؟، وكشف أن هناك عملية خداع للرأى العام، فى مسألة عدم حضورنا الحوار الوطنى قائًلا نحن مستعدون فى أى وقت للحوار ونية صادقة والحوار من أجل الوطن لأنها محنة وطن وليست محنة نظام.
وقال عندما قابلت الرئيس، طالبته بأن يكون رئيسًا لكل المصريين، ولكن بعد يومين أصدر إعلانا دستوريا، ولم يعط أى إشارة بوجود أى مشكلة فى لقائنا، كما رأينا كمية كبيرة من الود والتجاوب مع الرئيس.
وكشف البرادعى أن الإخوان رفضوا ترشيحى لرئاسة مجلس الوزراء فى ظل المجلس العسكرى، وقال أعلنت نيتى الترشح للرئاسة بسبب ضغط شباب الثورة، وأوضح أننا نجنى ثمار الجهل والكذب.
وأعلن البرادعى عن بعض المطالب، التى من شأنها أن تكون "عربون للشفافية" على حد قوله، وذلك بعد التجربة السيئة الأخيرة من رئاسة الجمهورية، أهمها وجود حكومة وطنية قادرة على تحقيق مهام محددة، وذات مصداقية فى الداخل والخارج، ووزير مالية يفهم الرؤية الاقتصادية فى المدى البعيد ووزير داخلية يستطيع هيكلة الوزارة، قائًلا: إذا فعلنا ذلك فى البلد ستمضى قدما إلى الأمام".
وقال لابد أن نكون متفقين على التركيز على الوزارات السيادية، لكى تبعث برسالة ارتياح إلى الشعب المصرى والعالم، وانتقد البرادعى الدستور الحالى قائًلا: هذا الدستور جزء من المشكلة الحالية، والرئيس خالف وعده لنا بخصوص الجمعية التأسيسية للدستور.
وأبدى البرادعى اعتراض على طريقة النائب العام الحالى المستشار طلعت عبد الله، قائًلا: لا نعترض على شخص المستشار طلعت عبد الله، ولكن على طريقة اختياره، كما لا نعترض على شخص النائب العام السابق، المستشار عبد المجيد محمود.
وقال البرادعى عن مطالب الناس لا يهمه أى مطالب من هذه، ولكن الأهم لهم هو المأكل والمشرب، وأوضح عدم وجود العدالة الانتقالية إلى الآن، ورأينا مصالحات مع رموز النظام السابق، وقال لا أعترض على ذلك، لكن لابد أن يكون هناك آلية لضبط هذا الوضع، فكيف يتم عزل رموز النظام السابق فى الدستور، وفى نفس الوقت تسعى للمصالحة معهم، كما لابد أن يتم القصاص لقتلة الثوار والشهداء، ثم تتم المصالحة الوطنية للم شمل الوطن أجمع.واعترض البرادعى على إجراء انتخابات مجلس النواب فى هذا التوقيت قائًلا: "لا يمكن إجراء أى انتخابات برلمانية فى ظل الظروف الحالية وأحداث العنف التى تشهدها البلاد"، وقال، إن البعض يتحدث عن وجود مؤامرات وطرف ثالث بسبب عدم الشفافية.
وتابع البرادعى.. العنف الذى يجرى فى الشارع لا صلة له بالثوار، ولكن من شباب عاطل لا يستطيع أن يعمل أو يتزوج فالعنف أصبح ظاهرة اجتماعية بسبب فقدان الأمل وغياب العدالة الاجتماعية.
والفيديو الرابع يحاور طفل الشوارع جيكا: أنا ثورجى مش بلطجى.. وإحنا اللى هنعمر مصر..وبنضرب الشرطة عشان بتضرب علينا قنابل غاز مسيل للدموع: بنضرب الشرطة عشان بتضرب علينا قنابل غاز..وعايزين اللى معندوش ميه تركبله ميه واللى معندوش كهرباء توصل له كهرباء والعاطل يشتغل
فى الفترة الأخيرة أصبح أطفال الشوارع المشاركون فى أى اشتباكات تحدث خلال المظاهرات الاحتجاجية المتعاقبة محل جدل بين الجميع، فالبعض يراهم مجرمين يجب إلقاؤهم فى السجون، والبعض الأخر يرى أنهم مجرد ضحايا ومن حقهم أن يكون لهم مطالب ويشاركون فى التظاهرات.. "اليوم السابع" التقت بأحد هؤلاء الأطفال لمعرفة الأسباب التى تدفعه وأقرانه من أطفال الشوارع للمشاركة فى التظاهرات المناهضة للنظام، وكان على الشهير ب "جيكا" ابن محافظه أسيوط هو الطفل الذى حاورناه، وفتح لنا العديد من النقاط التى يجب أن تكون محل اهتمام الجميع .
س .. ليه اختار ليك أصحابك اسم "جيكا"؟
ج ... سمونى جيكا عشان كان فى واحد بطل اسمه جيكا والداخلية موتته بطلقتين فى دماغه وقلبه وأنا كنت موجود فأخدت طوبه وضربت الظابط بيها فسمونى على اسمه.
س.. كنت شغال إيه؟
ج .. كنت شغال سواق توك توك وسبت شغلانتى، وزى ما أنت شايف قاعد فى التحرير، ومصمم زى الناس إننا مش هنسيب التحرير لأننا زهقنا والناس بتقول إن ال فى التحرير كلهم وساخة وفى خيام دعارة.. مفيش عندنا الكلام دا.. وفى ناس بتقول عننا بلطجية إحنا مش بلطجية إحنا "أصحاب حق.. إحنا عاوزين حقنا وخلاص .. أى حد يمسك الدولة إحنا ما لناش دعوة بس زى ما بتاخد حقك أدينا حقنا".
س.. إيه حقك اللى أنت عايزه؟
ج .. عايز حقى فى حاجة واحدة.. العيال اللى نايمة فى الشوارع وسايبة بيوتها من الجوع ومش لاقين العيش الحاف اللى يذلنا ل الناس ونقولهم هات جنيه ويرد علينا يشتمنا ومرسى هو المسئول عننا، إحنا بنستأذنه ونقواله ارحل يا مرسى.. لكن هو مش عايز يرحل إمبارح اتمسك مننا عدد كبير حرام دا ولا حلال.
س.. بيقولو عنكم أنكم سايبين بيتكم وقاعدين فى الشوارع.. أنت سايب بيتك؟
ج.. أنا مش سايب بيتى وناس كتير مش سايبين بيتهم ولو عايز أروح بيتنا هروح بس أنا جاى هنا ثورجى.
س.. أهلك فى البيت عارفين أنك فى التحرير؟
ج .. أهلى عارفين أنى فى التحرير وأصحابى عارفين أنى فى التحرير وبيقولولى خلى بالك من نفسك وتعال إحنا ما لناش دعوة بالثورة.
س .. أبوك قالك إيه لما قولتله أنك فى التحرير؟
ج.. أبويا قالى انزل وتعال ومتقعدش فى التحرير فقولتله هقعد، وجه غصب عليا ورجعنى معاه سيبته وهربت وجيت هنا تانى لأننا عايزين مرسى يمشى.
س.. أنتم ليه بتضربوا الشرطة؟
ج.. بنضرب الشرطة عشان بتضرب علينا قنابل غاز مسيل للدموع وفى ناس مننا بيغمى عليها وناس مريضة من الفقر عندها القلب وبتقع تموت.. وعلى إيه ما يخدها من قصيرها ويلم رجالته ويمشى.
س.. الشرطة بتقول إنكم اللى بتبدأوا فبيردوا عليكم بقنابل الغاز عشان تتفرقوا ؟
ج .. إحنا اللى بنبدأ؟!!.. إحنا لو بنبدأ، إحنا نقدر نجيب رصاص حى ونجيب خرطوش ونضرب عليهم بس إحنا بنقول دول أخواتنا وهم مأمورين أنهم يعملوا كده، إنما إحنا محدش له أمر علينا.. إحنا لو فى ظابط هيأمرنا أننا نعمل حاجة هنمسكه نضربه لأن محدش ليه حكم علينا اللى حاكم علينا ربنا ولا الإخوان بتحكم علينا ولا مرسى نفسه بيحكم علينا وإحنا كلنا إيد واحدة وأخوات.
س.. أنت بدايتك مع ميدان التحرير كانت إمتى؟
ج أنا من بعد ما أبويا جه أخدنى راجع بقالى أسبوعين
س.. إيه أكتر حاجة محبباك فى الميدان ومخلياك عايز تقعد فيه؟
ج .. الرجالة اللى فى الميدان العيال بتوع الشوارع اللى بيقولوا عليهم بلطجية ودول مش بلطجية دول لو أنت قعدت معاهم هتحبهم زى ما أنا حبيتهم، لأنهم بيجيبوا الرغيف، ويقسموا مع بعض ويأكلوه.. السيجارة بيشربوها سوى.. لو واحد جاب جنيه بيجى يقول لأخوه أنا جيبت جنيه، ويقسموه مع بعض يعنى كلنا إيد وحده.. ولو مرسى نزل من قصره وقعد معاهم وسمع منهم البلد هتحبه والكل هيحبه.
س .. بيقولوا إن جبهة الإنقاذ هى اللى بتحركم أنت أيه رأيك؟
ج ... لا مفيش حد بيحركنا ولا البرادعى ولا حمدين صباحى ولا أى حد بيحركنا.
س ..طيب الناس دى بالنسبة ليكم إيه؟
ج .. رجالة عشان هما من زمان عارفين الدنيا ماشية إزاى، إنما مرسى كان محبوس
س.. ما الإخوان كمان كانوا بيعارضوا زمان؟
ج الإخوان دلوقتى بترشى ناس وتديهم فلوس عشان ينزلوا يعرفوا لهم أخبار الميدان والمظاهرات.
س.. مين اللى بيتحرش بالبنات لما بيشاركوا فى المظاهرات؟
ج .. الشباب الصايع اللى ملهمش حد يصدهم، اللى كانوا أطفال شوارع وكبروا وعمرهم عدى ال 20 .. دول معاهم سلاح، لكن أنا وأطفال الشوارع اللى بيقولوا عليهم بلطجية لو أى حد فتشنا مش هيلاقى معانا حاجة عشان إحنا نازلين ندافع عن بلدنا مش نازلين نشوه سمعتها.
س .. أنتم هتفضلوا مستمرين فى الاشتباكات مع الشرطة لحد إمتى؟
ج .. لحد ما مرسى يمشى
س.. الناس بتزعل منكم لأنكم بتحرقوا سور القصر وممتلكات الدولة لأنها ملك لينا كلنا؟
ج .. هى فعلا ملك لينا كلنا بس للأسف مرسى مش عايز يملكنا فيه.. مرسى عايز ياخده لوحده مع أنه لو حط إيده فى إيدنا الدنيا كلها هتشتغل والحال هيبقى مية مية.
س.. لو قولتلك وجه رسالة للدكتور محمد مرسى رئيس الجمهورية هتقوله إيه عشان نحل الأزمة؟
ج.. لوعايزين نهدى اللعب هقوله حاجه واحده زى ما وعدت الناس فى التحرير إن اللى ممعهوش بيت هتجيبله وينزل الصعيد.. اللى معندوش ميه تركبله ميه واللى معندوش كهرباء توصل له كهرباء والعاطل تشغله ويبنى فنادق ومصانع يشغل فيها الكل.
س.. أنت مش خايف تموت وأنت فى الاشتباكات؟
ح .. أنا مبخفش غير من اللى خالقنى والشهداء اللى ماتوا مش أحسن منى محمد الجندى وجيكا وعمروسعد ومينا كل دول مش أحسن منى.
س.. طيب لما الدكتور محمد مرسى يحب يوصلكم يكلم مين.. مين كبيركم؟
ج يرخص الحاجة ويشغل الناس.. مش عايزين ريس يقولوا الريس راح الريس جه.. عايزينه يصلح البلد.. وأنا بستأذنه لو مش بيصلح البلد يرحل أحسن عشان لو مرحلش البلد هتفضل مقلوبة وإحنا مش عايزينها مقلوبة إحنا عايزينها مستقرة.
س.. من إيه الحرق اللى فى إيدك؟
ج من قنبلة الغاز إمبارح فى الاشتباكات اللى بترميها علينا الداخلية، اللى شيلتها ورميتها بعيد عشان ما تخنقناش.. بيهجموا علينا بالمدرعة بتاعتهم وبنرد عليهم.. واحد مننا جاب المدرعة وحرقناها فى الميدان.. ليه بنعمل كده، عشان هما بياخدوا أخواتنا ومنعرفش عملوا أيه.. مهما عملوا لو مرسى جه وقعد معانا كانت المشاكل دى كلها اتحلت بدل ما بيضربونا بالخرطوش ويسمونا البلطجية وإحنا مش بلطجية إحنا أخواتهم أنا بنفسى نزلت لظابط فى الداخلية كان وراء السور اللى فى القصر العينى قولتله أنا قدامك أهو لوعايزين تاخدونى خدونى حكى معايا وسمع منى وقالى شوف صحابك بيعملوا فينا أيه وعدته أن محدش مننا هيضرب وقلت لأصحابى الراجل دا لو معنا هتعملوا معاه إيه قالوا مش هنضرب عليه طوب.. وعدى نفذ لكن هو سأل رجالته وقال لهم الراجل دا لومعانا هتعملوا فيه إيه؟ رد واحد منهم قال يا مصطفى بيه دى تمثلية بيعملها وبعد ما يطلع هيحدف علينا طوب تانى يعنى موثقوش فيا قولتلهم شكرا ورجعت لمكانى تانى.
س ..فى الآخر عايزك تقول كلمتين لمصر ..
ج .. مصر دى أم الدنيا وإحنا اللى هنعمرها.. إحنا هنبنى مصانع وهنشتغل، مش عايزينك أنت تشغلنا يا مرسى.. إحنا هنشغل نفسينا أصغر عيل فينا دلوقتى بيبع مناديل وفى عيال دلوقتى بتتعلم صنعة أنا متعلم صنعة السواقة لكن سايبها دلوقتى عشان أقول لمرسى ارحل يا مرسى وما تكتمش على نفسنا أكتر من كده.
شاهد بالفيديو :
أعمال تخريبية بفندق شيبرد
الطب الشرعى ينتهى من التقرير النهائى لوفاة “الجندي"
"البرادعى" متهكما على تويتة الرئيس مرسى: “حب يطلع فى المجال بتاعى"
اليوم السابع يحاور أحد أطفال الشوارع المشاركين فى الاشتباكات ضد الداخلية: عايز مرسى يرحل