عبد الفتاح: لا يمكن إقناع المتظاهرين بالتراجع دون وقف عنف الداخلية

قال الناشط السياسى علاء عبد الفتاح عبر صفحته على"تويتر"، إنه لا أحد يملك إقناع المتظاهرين أمام وزارة الداخلية بالتراجع إلا لو توقف الضرب وإطلاق القنابل المسيلة للدموع من قبل رجالها.
جاء وذلك تعليقا على المطالبات التى وجهت لعلاء بالتدخل لوقف الاشتباكات، وأوضح أنه تدخل أمس لعقد هدنة بين المتظاهرين وقوات الأمن دون جدوى، بل وتعرض للضرب من الطرفين مما تسبب له فى إصابة منعته من النزول للتظاهرات اليوم.
وطالب عبد الفتاح من يريد حل لإنهاء حالة الغضب الموجودة بالشارع أن يطالب مجلس الشعب بإقالة الحكومة وتشكيل حكومة ثورية، وتعديل قانون القضاء وإقالة النائب العام، وإجراء تحقيقات جدية فى الأحداث، مؤكدا أن الحل الوحيد لإنهاء المعركة الموجودة أمام الداخلية هو أن تسحب قواتها والحل الشامل لكل الأزمات هو إسقاط حكم العسكر.
كما نشر عبد الفتاح مدونة عبر صفحته ب" الفيس بوك" تشمل أسئلة وأجوبة حول حقيقة الأحداث وأسباب تداعيات الموقف جاءت على النحو التالى:
س : هى الشباب عند وزارة الداخلية ليه؟
ج: عشان غضبانة من القتل المجانى
س: أيوه يعنى ناويين يعملوا ايه؟
ج: محدش عارف، هما نفسهم مش عارفين، هما عارفين الموت و الغضب بس
س: طيب ليه متقولهمش يروحوا التحرير؟
ج: عشان التحرير فشل يجيب حق اللى مات بدل المرة عشرة
س: طيب متقولوهم..؟
ج: أقولهم إيه بس، حد فيكم عنده حل بجد؟ أروح أضحك عليهم ولا أقولهم كلام شعارات؟
س: أصل مش عايزين دم؟
ج: القاتل مش مستنيك تروحله عند وزارته، بيخطفنا من الشوارع ويقتلنا فى ماتش كورة، تفرق فى إيه بقى!
س: طيب هما عايزين إيه يعنى؟
ج: عايزين عيش وحرية وعدالة اجتماعية وكرامة إنسانية، عايزين حق الشهيد، عايزين يفهموا ليه عواجيز بتخطط لمستقبل وأطفال بتكتب وصيتها
س: أيوه بس عايزين إيه دلوقتى حالا؟
ج: ولا أعرف، دى مش مظاهرة رافعة مطالب، بس هما بيهتفوا ضد المشير تعرف تجيبلهم المشير؟
س: سيبنا التحرير ليه؟ التحرير واسع!
ج: لا التحرير بقى ضيق قوى، كله مشاكل وخناقات ومخترق من التحريات وفيه ناس بتركب على المنصات وتزعق وناس بتعمل حفلات تعذيب وناس بتفرض أرضية على البياعين وناس ثانية بتضرب البياعين وإخوان بتشارك بمطالب عكس مطالب الجماهير وماخوانش نازلة عشان تتخانق مع الإخوان مش مع اللى بيقتلنا، انتم ازاى مش شايفين ده كله؟
س: طيب معلش والنبى مشيهم كفاية دم!
ج: والله العظيم ما أعرف أمشيهم، محدش يعرف يمشيهم.
س: طيب لما أنت مش عارف موجودين ليه، ومش عارف عايزين ايه، وملكش كلمة عليهم واقف معاهم ليه؟
ج: عشان اتعلمت فى الثورة أقف مع دائما مع اللى بيتحدى الرصاص، مع اللى بيرفض السلطة، مع اللى يبدوا ضعيف وهو قوى، اتعلمت أن اللى بيوجع أكثر مش جرح الرصاص لكن جرح الغدر والبيع من على المنصات والفضائيات، اتعلمت أنى لو مش المكان اللى ممكن أتصاب أو اتقتل أو اعتقل فيه وفيه غيره بيتصاب أو بيتقل أو بيعتقل يبقى بعمل حاجة غلط. لو مش فاهم ده مش هعرف أفهمك.
س: طيب أنا أعمل إيه دلوقتى؟
ج: متشتمش اللى قدام الرصاص حتى لو أنت مش فاهمه، بلاش تنظير ما تقولش بلطجية ولا مندسين، متتكلمش كأنهم خراف فى حد بيسوقهم، الشباب دى مش فاضله إلا الإرادة، اتاخد منه العمر والحلم والأخ والصديق والعين والرجل والروح ونادى الكورة والميدان والثورة وكل حاجة وأى حاجة، مش فاضله إلا الإرادة، إنه هو اللى بيقرر يعمل إيه ومحدش متحكم فيه، وقمة الإرادة هى أنك تختار هتموت إزاى وتعيش إزاى.
س: آه بس أنا عايز أعمل حاجة ايجابية؟
ج:انزل اقف معاهم، مش لازم تشارك فى الاشتباك بس انزل شم من نفس الغاز اللى بيشموه و افهم يعنى ايه رش و خرطوش، انزل اتطوع فى مستشفى ميدانى أو وزع عليهم خل أو أكل.
س: مش عاجبنى المواجهة مش عايز أنزل هناك؟
ج: خلاص انزل اتظاهر قدام وزارة الدفاع، أو فى ميدان التحرير، أو شارك فى مسيرات تسليم السلطة، أو انزل قدام ماسبيرو، أو اعمل عرض كاذبون، أو شارك فى حملة حاكموهم، أو اشتغل على المحاكمات العسكرية، أو انزل سلاسل الثورة، أو انضم للجان الشعبية. المهم اعمل حاجة.
س: ولحد إمتى هيفضل الحال ده؟
ج: لحد ما يسقط النظام
موضوعات متعلقة:
"الاشتراكيون الثوريون": العسكر والشرطة تحالفوا على قتل الألتراس
مسيرة مصطفى محمود تحدد 8 خطايا للمشير والمجلس العسكرى
الداخلية: إصابة 16 مجندًا بطلقات نارية والثوار اقتحموا مبنى الضرائب
المستشفى الميدانى ب"التحرير": سقوط ثانى شهيد خلال اشتباكات اليوم
300 متظاهر ينشقون عن مسيرة مسجد النور خشية الاحتكاك مع الجيش
مجهولون يلقون أسطوانات الغاز على الأمن والمتظاهرين بشارع منصور
اشتباكات ب"محمد محمود".. والمتظاهرون يحطمون كاميرات الداخلية
مسيرات ب"محمد محمود" لإقناع المتظاهرين بعدم الاحتكاك بقوات الأمن
وصول المئات إلى "التحرير" وزيادة الاشتباكات بين المتظاهرين والأمن
عضو ب "اتحاد ماسبيرو" يفقد عينه فى أحداث "الداخلية"
حرب شوارع فى محيط "الداخلية".. والأمن يطلق عشرات من قنابل الغاز
استمرار الاشتباكات أمام "الداخلية".. والأمن يسعف أحد المتظاهرين