أخر كلام

× بدون أن أدرى وجدت نفسى أقارن بين خطاب الرئيس السيسي على هامش القمة المصرية الأوروبية ببروكسل؛ وهو يتحدث عن الفرص الاستثمارية المشتركة بين مصر وأوروبا وتوطين الصناعات بلغة الأرقام والمصالح المشتركة؛ بعيدًا عن الكلام الإنشائى.. وبين خطابات الحكومات السابقة التى كانت تتجاهل لغة الأرقام والمصالح وتتحدث عن مناخ مصر المعتدل الحار جاف صيفًا والدافئ ممطر شتاء وموقعها الجغرافى اللى ماحصلش..!
وأذكر أننى بعد حضور أحد مؤتمرات الترويج للاستثمار، أيام حكومة الدكتور أحمد نظيف، انتقدت الخطابات الإنشائية الساذجة التى ألقاها الوزراء بالمؤتمر، آنذاك، فى مقال نارى بمجلة "أكتوبر" عنوانه:" الترويج للاستثمار على طريقة فلفل وشرشر"..!!
وفلفل وشرشر، لمن لا يعرف، هما كلب وأرنب فى كتاب المطالعة الرشيدة زمااااان.. كنا نضرب بهما المثل فى السذاجة والعبط..!!
اللهم اكفنا شر العبيطون والعبيطات الأحياء منهم والأموات..!!
من غير أى حلفان أنا مصدق رئيس الحكومة وهو بيؤكد أنه مابينامش الليل هو ووزراء الحكومة من أجل تحسين معيشة المواطنين..!
فكلنا شايفين وحاسين وعارفين.. بأمارة رفع أسعار البنزين..!
× ولأن الحكومة ووزراء الحكومة مابيعرفوش يكدبوا.. فأنا شخصيًا مصدق وزير التموين وهو بيؤكد، بعد رفع أسعار الوقود، إن وزارته لم ترصد أى ارتفاع فى الأسعار بتاتا..!
صحيح.. فالدنيا آخر انبساط وزبادى فى الخلاط..!
منك لله ياللى فى بالى..!
× دا تهريج.. إزاى بعثة البنج بونج اللى بتمثل مصر تروح بطولة دولية زليطى مليطى مافيهاش لا طبيب ولا مدرب أحمال ولا يحزنون..!
وإزاى يختاروا لعيبة البعثة بالكوسة مش بالكفاءة.. دا ابن فلان ودا ابن علان.. ياجماعة دا مالوش غير اسم واحد بس هو: "ف.. س.. ا.. د"..!
سامعنى يا وزير الرياضة..!
× إيه حكاية "أمك" دى اللى طالع فيها المتحدثون الرسميون بتوع أمريكا..؟!
فالمتحدثة الرسمية باسم البيت الأبيض قالت لصحفى إن اللى اختار مكان القمة الروسية الأمريكية "الست أمك"..!!
والمتحدث باسم وزارة الحرب الأمريكية قال لنفس الصحفى "أمك هى اللى اختارت كرافتة وزير الحرب"..!
يبدو إن المتحدثين دول اتربوا فى حوارى أمريكا ورا مصنع الكراسى..!!
× وصلات الردح والشتايم والاتهامات المتبادلة فى القنوات الرياضية بتفكرنى بزمن الردح الجميل بتاع الست أم تيتى وأم ترتر وأم لطفى اللى بتنور وتطفى..!!
ربنا يحرقهم كلهم ببنزين 95 أبو واحد وعشرين جنيه..!!