آخر كلام !!

* عندى فكرة بمليون جنيه للحكومة لإنهاء أزمة الغلاء اللى طايحة فى البلد اليومين دول؛ سبق أن طرحتها، من قبل..
لأن الحكومة ماتقدرش تقول لأى تاجر أو منتج تلت التلاتة كام.. وماتقدرش تحاكم حد لأن قانون الاحتكار أعرج.. لامؤاخذة.. فإننى أقترح عليها أن تستدعى المنتجين والتجار نفر.. نفر إلى مقر مجلس الوزراء الموقر.. وتدى كل واحد رغيف عيش من أبو شلن ويحلف بالنعمة على عينيه إنه مش هايرفع الأسعار أكثر من كده.. واللى يخون الحلفان يدوسه ترومواى سواقه أعمى.. أو تطسه طيارة.. قائدها أحول..!
وبكده تتحل أزمة ارتفاع الأسعار..!
المشكلة الوحيدة هى فى رغيف العيش أبوشلن.. فده لامؤاخذة لا ينفع يتاكل.. ولا حتى للحلفان عليه..!!
* المصيبة السودا أن الأسعار فى كل الدنيا بترتفع ثم تنخفض وفقاً لعملية «دوران» معروفة اقتصادياً وحسب آليات «السوق».. لكن عندنا فى مصر المحروسة.. الأسعار بترتفع ولا تنخفض أبداً وفقاً ل «دوران.. شبرا».. وحسب آليات.. «السوء»!!
* بصراحة «البدرى» لازم يمشى بدرى.. بدرى..!
فإصرار الأهلى على الإبقاء على حسام البدرى بعد المستوى الهزيل للأهلى فى مباريات بطولة أفريقيا وفى الدورى العام.. فكّرنى بالنكتة الشهيرة بتاعة الدكتور اللى ضحى بالأم وبالجنين علشان البدرى.. قصدى الدكتور يعيش..!!
* إلى الممثلة «انتصار»: برنامج المقالب فبريكانو.. قائم على فكرة ساذجة وعبيطة وهى أنه ممكن تركيب الصور بالكمبيوتر..!
يا ست الستات.. العيال اللى فى كى. جى. ون عارفين إزاى يفبركوا الصور بالكمبيوتر.. يعنى اللى عملتيه ده مش «انتصار».. دا «انهزام».. لامؤاخذة..!!
* بالمناسبة برنامج المقالب «حيلهم بينهم من الآخر» هو تكرار «لحيلهم بينهم كمان وكمان» بتاع السنة اللى فاتت، ول «حيلهم بينهم» بتاع السنة اللى قبل اللى فاتت..!
يا جماعة فضوها سيرة بقى فالحكاية «مصخت خالص» على رأى أخواننا الصعايدة.. فما زاد عن حده.. انقلب لضده..!
* كلمة ورد غطاها:
* شفت وزير الكهرباء قال إيه..؟!
قال إن الكهرباء انقطعت فى بيته هو شخصياً..!!
** مادام المسألة بقت كده.. فاحنا لازم نبوس أيدينا وش وضهر، لأننا عشنا وشفنا اليوم اللى بقت الكهرباء بتنقطع فيه فى مصر بدون أى تفرقة بين بيت الوزير.. وبيت الغفير.. أحمدك يا رب..!!