تفكير عنصرى

كتبت : أمانى يسرى ... فى حاجة أنا ملاحظاها من فترة، وهى إن كل ما الصيف ييجى ألاقى الإسكندرانية عاملين صفحات على الفيس بوك بتطلب من الفلاحين إنهم يرحموهم ويسيبوا الإسكندرية، لأنهم خلاص مش عارفين يتفسحوا ولا يخرجوا ولا يروحو اشغلهم بسبب الفلاحين، مش عارفة ... نقدر نسمى ده إيه ؟؟؟ عنصرية ولا طبقية ولا إيه بالظبط ؟؟ أنا مش عارفة هما الإسكندرانية ليه بيعملوا كده، انا واحدة من الناس اللى عايشة فى الإسكندرية من سنة 2003، و أول ما جيت هنا وأنا واخدة بالى إنهم بيعاملوا أى حد مش إسكندرانى بطريقة مختلفة وكأنهم كائنات فضائية غريبة عن كوكب «الإسكندرية» ده حتى العربيات الملاكى لو واحد ماشى مش مظبوط و عرفوا إنه مش إسكندرانى نزلوا فيه شتيمة، و دى حاجة حصلتلى لما كنت مع بابا و ماما ، وبصراحة الواحد ماكنش حاطط الموضوع ده فى دماغه أوى، بس حسيت إنه من السنة اللى فاتت وهو زاد أوى عن حده، و نلاقى صفحة باسم (حملة طرد الفلاحين من الإسكندرية ) وصفحة تانية تحت اسم تانى بس بيحمل نفس المعنى تقريبا، ده غير الصفحات التانية اللى أكيد انا مش عارفة أساميها .. بجد أول مرة فى حياتى أحس إنى متضايقة و ندمانة إنى جيت و عشت فى الإسكندرية، وأحس إنى حابة ارجع تانى المكان اللى جيت منه ، واتضايقت أكتر من الإسكندرانية كلهم علشان أغلبهم بيفكروا بنفس الطريقة الرجعية دى، و لما اتناقش مع حد يقولى إحنا بنتضايق من تصرفاتهم وسلوكهم مع إنى متأكدة إنهم بيتضايقوا منهم علشان لبسهم و منظرهم إنه « مش قد كده» و إنه مش زى مستوى الإسكندرانية، ولما فى مرة كتبت تعليق فى صفحة، وقولتلهم إنكم عنصريين عشان بتقولوا كده، الحمد لله صاحب الصفحة كان سبب رئيسى إنى اكره الإسكندرية و كل الناس اللى زيه، و أحب اقوله شكرا.. أنا واحدة من الناس اللى خلاص أخدت قرار مع نفسى وهو أنى مش هكمل عيشة فى الإسكندرية بسبب الناس دى، علشان يستريحوا من الفلاحين اللى زيى.. كلمة اخيرة بس ليهم، الفلاحين دول بيجيبولكم رزق، و بيفتحوا بيوت ناس كتير منكم فى شهور الصيف اللي بيقعدوها فى الإسكندرية ... فياريت ماحدش يتريق عليهم علشان دول مهما كانو زيكم « مصريين».