تناتيش

* الأخ الحقيد معمر الطاسة بتاع زنجة زنجة عاتب الشعب المصرى عتاباً مريراً؛ لأنه ثار على مبارك.. فالقذافى يرى أن مبارك عمل كل ما فى وسعه واستلف من طوب الأرض، حتى من القذافى نفسه، علشان يأكِّل الشعب اللى مايملاش عينه إلا التراب..!
أنا بصراحة مش عارف الناس عايزين إيه.. فالرجل كان بيشحت علينا.. فيه أكتر من كده إنجاز..!!
* إلى بنت مصر الذهبية «نور الطيب» التى فازت ببطولة العالم للاسكواش: «نورت» قلوبنا جميعاً يا طيبة يا بنت «الطيب»!
* إلى شباب كرة «اليد» الذين رفعوا اسم مصر عالياً وشرّفونا فى بطولة العالم: تسلم إيديكم!
* كل سنة باسأل نفس السؤال وباطلب نفس الفتوى: هل يجوز صيامى إن لم أتفرج على كل الزيطة والزمبليطة بتاعة مسلسلات ومقالب رمضان.. أم أن صيامى مجروح وعلىَّ قضاء ما فاتنى من المسلسلات!..
أفيدونى.. أفادكم الله..!
* كلمة ورد غطاها:
* شفت فى الصين عملوا إيه..؟! عملوا إنسان آلى بيطبخ ألف صنف من الأكل..؟!
** الإنسان ده لو جه مصر هاتبقى ليلة سودا..!! هايهنج ويتحرق وهايبقى كومة صفيح لو طلبوا منه يعمل مسقعة.. أو دقّية محشى كرنب.. أو طبق فول بالزيت الحار..!!