تناتيش

* ياااااه.. مرت 24 ساعة كاملة ولم نسمع أو نقرأ تصريحاً جديداً لوزير العدل المستشار عبد العزيز الجندى..!
خير اللهم اجعله خير..!
* حد ابن حلال يقول لى هو وزير القوى العاملة بيعمل إيه بالضبط؟!..
فهو منذ أن تولى المسئولية.. وهو بيضرب فى الكيان النقابى.. مرة يدعم النقابة المستقلة.. ومرة ثانية يدعم نقابة صحفيين موازية.. ومرات ومرات فضايح وجُرَس فى المؤتمرات الدولية، خاصة فى مؤتمر جنيف الأخير اللى كانت فضيحتنا فيه بجلاجل..!
يا معالى الوزير.. ممكن حضرتك تريح حضراتنا.. وتستأذن فى الرحيل.. فالظرف الراهن لا يحتمل مثل هذا العبث.. ومشرحة زينهم بصراحة مش ناقصة قتلى.. لامؤاخذة..!
* مش عارف أقول إيه عن المخرجة والصحفية اللى اسمهما مكتوب بالرصاص، واللتان تطالبان بحق تبادل القبلات علناً فى الطريق العام..؟!
طبعاً مش هاأقول أى حاجة أحسن يتهمونى بالسب والقذف..
* بصراحة ربنا.. الأهلى لا يستحق بهذا الفريق الهزيل درع الدورى هذا العام.. والزمالك بقيادة العميد حسام حسن لا يستحق أن يُحرم من هذا الدرع..
فالأهلى حظه فى رجليه.. يلعب أسوأ ويفوز.. والزمالك يجتهد ويلعب.. ويهزم أو يتعادل..!
يبدو والله أعلم أن الدورى مسجل باسم الأهلى.. فى الشهر العقارى..!!
* إذا كان المثل الشعبى عندنا بيقول إن جوز الاتنين قادر وجوز التلاتة فاجر.. فإن الأخ «سابا» النيجيرى اللى جمع بين 90 زوجة مرة واحدة هو تسعين قادر وفاجر فى بعض..!!
* كلمة ورد غطاها:
* شفت الأزمة الغريبة اللى فى البرلمان البريطانى دلوقت..؟! قال إيه عضو فى البرلمان بيحتج على منع كلبه من الدخول معه لقاعة البرلمان..؟!
** ماهو ده يا سيدى اللى بينطبق عليه المثل الشعبى: الجنازة حارة والميت، لامؤاخذة.. كلب..!!