تعالوا ندعي علي دولهما ودوكهمه

بعدما صليت الفجر قعدت ادعي لربنا وقلت.. حسبي الله ونعم الوكيل في اللي فقرينا وفي اللي سارقينا وفي اللي ناهبينا.. وفي اللي مشحتينا.. وفي اللي مبهدلينا.. وفي اللي حارقين دمنا.. وفي اللي كرهونا في بعضنا..
وفي اللي خلونا نحقد حتي علي اللي مننا.. وفي اللي خلوا ولادنا بقوا ما عندهومش ولاء لمصرنا.. ومنهم لله اللي كفرونا في عيشتنا.. وربنا ياخد اللي بياخدوا لقمتنا.. وربنا ياخد اللي بياخدوا مننا ويبعتوا إلي اخدوه مننا علي بنوك اللي مش مننا ليستفيدوا بيه بدل مننا.. وربنا يؤذي اللي أذونا في حياتنا.. خدهم يا ربنا وابعدهم بأه عننا وإحنا مسامحين في اللي سرقوه مننا.. أرجوك يا ربنا عشان خاطر حبيبك نبينا تديهم سكة بعيد عننا.. وياريت تكون سكة اللي يروح ما يرجعش. عشان لو رجعوا حيكبسوا علي نفسنا ويخلونا حتي منعرفش ناخد شوية هوا من اللي ادهو لنا ربنا.
المخرفاتي استغرب للدعاء اللي كنت بادعيه لربنا.. وقاللي مالك يا أبو خليل.. إيه اللي خلاك تدعي لربنا بالحرقة دي.. قلتله من حرقة قلبي علي بني وطني.. علي مصر اللي مبقتش شايف حد بيحبها.. سواء دولهم أو دوكهه.. دولهم اللي سايبين السايب في السايب اللي يسرق واللي ينهب واللي يحتكر واللي يحول علي بره ويهرب.. واللي واكلينها وسايبينا جعانين.. واللي بيعملوا بس لمصالحهم همه وولا هاممهم مصالحنا.. أما دوكهمه فدول اللي مش عاجبهم العجب ولا الصيام في رجب.. نازلين معارضة وكتابة فيها تحريض علي مظاهرات وإضرابات واعتصامات.. وخلافات ومعارضات.. لو دولهم قالوا يمين دوكهم يقولوا شمال ولو دولهم قالوا فوق دوكهم يقولوا لأ تحت.. ولا دولهم قالوا طب نخلي الأمور بالجنب.. دوكهم يقولوا لأ نخليها بالورب.. يعني العبارة وما فيها هي خالف تعرف وخالف تقب وتظهر يعني دوكهمه اللي برضه مستفيدين علي حسابنا زي بالضبط ما دولهم مستفيدين من حسابنا.. لأن اللي بيعملوه واللي بيكتبوه دوكهم الغرض منه بس أنهم يشهروا نفسهم وعلي قد ما يكتبوا ويشتموا علي قد ما بتزيد شهرتهم. إنما مصر وصالح مصر وشعب مصر أبدا لا في مخ دولهم ولا في عقل دوكهم.. ويا خسارتك يا مصر.. ويا عيني عليك يا شعب مصر.. اتنسيت في هوجة مصالح دولهم ودوكهم.. محدش بقي بيفكر فيك يا شعب ولا في بلدك.. الكل ما بيفكرش إلا في نفسه.. وكأن ربنا خلقه بس لنفسه.. الشعب يعاني من فقره ودولهم يزودوه فقر علي فقره.. الشعب يا عيني يمرض وميلاقيش ثمن الكشف والدوا ودولهم يبعتوا الأغنيا واللي مش محتاجين عشان يتعالجوا بره علي حساب اللي مش قادر يشتري برشمتين دوا.. ناس الشعب يا عيني مضروبين علي دماغتهم وعملين يجروا من هنا لهناك عشان يا دوب يرجعوا بيوتهم لولادهم بكام رغيف.. ودولهم بيخفضوا الجمارك علي السيمون فيميه والبلوبيف.. وعلي فكرة يا مخرفاتي دوكهمه اللي معارضين لدولهمه برضه مستريحين بصلهم كده وشوفهم حتلاقيهم مستكفيين ومش محتاجين يجروا عشان يجيبوا الرغيف لأن دوكهمه العيش عندهم بزيادة.. فبدال ما دوكهمه يروحوا شغلهم تلاقيهم متجمعين وواقفين علي السلالم وعمالين ينتعوا ويخطبوا ويقولوا كلام كله لصالحهم ولتحقيق أطماعهم.. ما دوكهمه أصلا بيعملوا كل ده عشان عايزين السلطة اللي في ايدين دولهمه.. وعشان كده بأه دولهمه يروحوا نازلين ضرب بعصيان المركزي دفاعا عن سلطتهم.. وعارف يا مخرفاتي الشعب قدام ده كل بيعمل إيه.. بيقف يتفرج.. لا آسف محدش من الشعب حتي بيقف عشان يتفرج.. تلاقي الشعب يا عيني معدي كده وبعد ما يبصلهم يمصمص بشفايفه ويهز دماغه وهو بيقول ناس رايقة وفاضية.. المخرفاتي سكت شوية كده وبعدين بصلي باشفاق وقاللي ياه يا أبو خليل كل ده شايله في قلبك وساكت.. طب والعمل يا أبو خليل.. قلتله مالهاش عمل قاللي أنا أقولك علي العمل.. قلتله إيه هوه.. قاللي تعالي نروح للشيخ العوبان اللي بيروحوله دولهمه ودوكهمه.. ونخليه يعمل لنا عمل يخلصنا من الاتنين