حسبى الله ونعم الوكيل

بيقولها لمين؟ ده كان السؤال اللى كل الناس سألته بعد ما أبوتريكة سجل الهدف الأول فى رواندا، ورفض الاحتفال به، ورفع يديه للسماء قائلاً حسبى الله ونعم الوكيل، ورددها أكثر من مرة.
يا ترى أبوتريكة كان بيحسبن على مين؟ أكيد مش على حارس رواندا الذى أنقذ أكثر من كرة قبل الهدف؟ وأكيد بردو مش على الدفاع الرواندى اللى تماسك إلى منتصف الشوط الثانى؟ وبالتأكيد طبعًا ماكنش بيحسبن على زملائه فى المنتخب اللى ساعدوه فى تسجيل الهدف؟ طب على مين بس؟
قبل ما نجاوب على السؤال، أو نبدأ حتى فى افتراض مجموعة من الإجابات، لازم نفكر فى الموضوع بصورة أعمق، الحكاية يا جماعة مش مجرد كلمة قالها لاعب وهو منفعل، الحكاية ببساطة تعكس الحالة النفسية اللى بيعيشها أكثر من لاعب فى المنتخب، الموضوع مش خاص بأبو تريكة بس، وعشان تتأكدوا بصوا لحسنى عبدربه لما دخل الجون التانى عمل إيه، ما احتفلش بالجون و ما راحش يجيب الكورة من الجون، تحس أنه كان مخنوق، وده طبيعى ومنطقى فى ظل الجو «المُلوث» اللى بيحيط بالمنتخب.
طيب، نرجع للسؤال تانى، كان بيحسبن على مين أبو تريكة؟ أقوى افتراض أنه كان بيحسبن على اللى طعنوا فى عرض اللاعيبه وروجوا موضوع فتيات الليل اللى تواجدوا مع المنتخب فى جنوب أفريقيا؟ وده احتمال كبير، بس ما أظنش أن دول بس اللى بيحسبن عليهم اللاعب، مش عارف حاسس أن المسألة مش قاصرة على دول، ليه ما تكونش الحسبنة دى موجهة لناس تانية كانوا سببا فى مشاكل كثيرة للمنتخب فى الفترة الأخيرة؟ ليه ما تكونش لناس استمدت شرعيتها من نجاحات المنتخب فى الفترة الأخيرة وانتفعوا من وراه كثير أوى أوى وفى الآخر كانوا سببا فى مشاكل كثيرة تعرض لها؟ ليه متكونش للى فرضوا على المنتخب ضغوطا كثيرة، وهددوا الجهاز أكثر من مرة بالإقالة رغم نجاحاته؟
طيب طيب، هانفترض أن الحسبنة دى مش على الناس اللى انا باتكلم عليهم، تفتكروا مين الأجدر بيها بخلاف اللى روجوا شائعات فتيات الليل؟ مين فى المنظومة الكروية الغريبة يستحق الحسبنة؟.. لو رجعنا لورا شوية هانعرف مين يستاهل الحسبنة؟ أقولكم اللى ودوا المنتخب عمان قبل مباراة الجزائر ما يستاهلوش الحسبنة؟ طيب اللى خلونا نلعب ماتش ودى فى درجة حرارة 50 وبعديها بكام يوم رحنا لعبنا فى البليدة فى درجة حرارة لا تزيد عن 25 ما يستاهلوش الحسبنة؟ وهاقول لكم كمان فيه أكثر من تقرير من اللى اتكلموا على فضيحة المنتخب أشاروا بأصابع الاتهام لناس تربطهم علاقات وثيقة جدًا جدًا ببعض أعضاء اتحاد الكرة المصرى؟ الناس اللى ما نعرفش سافروا ليه ولا عملوا هناك إيه!!
يا ترى كان بيحسبن على مين؟ والله اللى يستحقوها كثير أوى، وباقولها بالفم المليان أكثر ناس تستحقها هما اللى اعتبروا المنتخب «سبوبة» اتكسبوا من وراها، اللى رجعونا لورا كثيييييير أوى وتربصوا بالجهاز واللاعبين فى الخفاء وأعلنوا تأييدهم فى العلن.