مساء الخير.. المسيحيون والقاعدة..!!

مساء الخير.. المسيحيون والقاعدة..!!
الدنيا مولعة وحكاية الاحتقان الطائفي بين المصريين بسم الله ما شاء الله مجلجلة وزي الفل وماشية بين الفضائيات وبين الجماهير المدروشة زي السكينة في الجاتوه!!
والادهي والامر ان تنظيم القاعدة بسلامته خلص علي كل اعداء الامة العربية وجاي النهارده يدور علي النسوان الاسيرات اللي عند الاقباط في مصر...ياسلام عليكم يا بتوع القاعدة يامونونين..!!
وفي وسط هذه الزحمة والدروشة جاي واحد من حبايبنا الكبار اوي وبراءة الاطفال في عينيه ويقول لي: من فضلك اشرب معايا فنجان شاي وفهمني بشويش وبدون انفعال إيه اللي بيحصل في البلد دي..؟مين عاوزيضرب مين..؟! ومين ضد مين..؟! ومين بيفتري علي مين..؟! وليه بقي الدولة محتارة في النص لامؤاخذة؟!
ردت عليه بعصبية شديدة :نعم يا روح أمك؟!
ده أنا علشان أفهمك إيه اللي بيحصل في البلد دي ومشكلة الاديان والعاطفة الشديدة الجارفة عند المصريين سواء مسلمين أو مسيحيين..مش محتاج فنجان شاي.. ده أنا محتاج كونتينر شاي يظبط دماغي...!!
انا مش عارف ليه كل هذه الزيطة والزمبليطة والهجوم الشرس بين المسيحيين والمسلمين علشان إيه...!!
عيب قوي في الظروف اللي احنا فيها ومش لاقيين ناكل وعمالين نطحن في بعض وكل صاحب ديانة عاوز يكفر الآخر ويقول نحن جنود الله في الارض..جنود إيه يا ولاد المهشتكة..؟!!
ما بلاش اللون ده معانا..هاتتعبوا أوي ويانا! يعني الغلط غلطهم والمصريين الغلابة هما اللي بيدفعوا الثمن..! ماشفناش حد اعترض أو انتقد العيال اياهم بتوع عبادة الشيطان اللي قاعدين علي النت اليومين دول وعاوزين يولعوا الدنيا ويقولوا ان فيه احتقان طائفي...!!
ياسلام علي البجاحة وقلة الأدب طول النهار قاعدين علي النت يفتحوا علي الصور والافلام الاباحية.. ولما تكون الغزالة رايقة يشتموا الاديان ويشتموا بعض ويسبوا سلسفيل أم اللي جابت الاديان ويعملوا فيها وعاظ واصحاب فكر وانهم هما المسئولين عن الاديان في الارض!! وطبعا حبايبنا المصريين دول دراويش سواءعند المسلمين أوالمسيحيين يسمعوا الكلام ده وتهيج الدنيا وتيجي علي رأس الغلابة بردو! ياجماعة دي كلها حاجات فارغة ما تستاهلش اللي بيحصل ده..!
الكلام ده كتبته من قبل وأكرر تاني ما نراه من مظاهرات دينية ولافتات استفزازية سواء أمام كنيسة اومسجد ضلال وتضليل وسفالة ضد شعب مصر الغلبان قوي..!!
وما نسمعه من كلام شوية الحنجورية بتوع التلات ورقات النصابين المناضلين من وراء الكمبيوتر والكتابة علي النت يؤكد انهم يحاولون ان يزجوا بمصر الي مستنقع قذر لايعلم غير الله مدي ظلمته وقسوته علي شعب مصر..!! يا إخوانا عيب...!
تنظيم القاعدة خلص علي المسلمين في العراق من الشيعة والسنة ودخل كمان علي إخوانا المسيحيين بتفجير كنيسة سيدة النجاة الكاثوليكية ومش كده وبس..!!
ده كمان بيهدد عبر شبكة الانترنت العنكبوتية المصرية المسيحيين ويتهمهم بأن لديهم أسري مسلمات وكأننا نعيش في دولة عصابات..!!
وهذا التهديد المباشر للمصريين سواء مسيحيين أو مسلمين لايفلح معه أي رد دبلوماسي أو سياسي بل يجب التعامل مع هذا التهديد بالتكاتف والتضامن بين المسلمين والمسيحيين...!!
ولابد من التعامل معه بكل جدية وتلاحم من جانب الشعب والحكومة...!!! فالتهديد لا يخص الكنائس المصرية داخل مصر...بل يمكن للقاعدة اللي قاعدة كويس في العراق أن تهاجم الكنائس المصرية في الدول الخارجية والعربية..!!!
أنا مش عارف إيه سر هذا الحقد والغل من حبايبنا بتوع القاعدة تجاه مصر والمصريين اليومين دول...!!
فكل القاعدويين بلا استثناء اصبحت ايديهم ملطخة بدماء المسلمين علي مستوي كل الطوائف الاسلامية.. الواحد هايتجنن يا إخوانا.!
دول مسلمين ولا دول تبع المخابرات الامريكية ولا الموساد الاسرائيلي...!!
طب لوكنتم مسلمين وعرب بحق..؟!
إزاي تقتلوا اطفالكم واخواتكم وآباءكم وامهاتكم ولا ترسلوا تهديداً واحداً للإسرائيليين شياطين الانس علي الارض صحيح اللي اختشوا ماتوا...!!!
أنا شخصيا أتمني من الله ان تفيق القاعدة من غيبوبتها ومما هي فيه من ضلال وتضليل وان تعود كتنظيم ثوري مناصر للقضايا العربية والإسلامية ولا يتدخل في التفاهات وان يبتعد عن زرع الفتن..!! اليوم الساحة مفتوحة أمامهم ليكونوا ابطالاً كسابق عهدهم عندما حاربوا السوفيت واخرجوهم من افغانستان..!!
فإسرائيل تعربد في الاراضي الفلسطينية وتبتلع القدس الشريف ثالث الحرمين وأولي القبلتين وللأسف لم نسمع عن اي تهديد للقاعدة في إسرائيل وكأن هناك تنسيقاً وتناغماً بين القاعدة والموساد..!!
لذلك اقول الي بعض الصبية المتهورين المضللين داخل القاعدة الذين يلعبون بالنار مستغلين صبر وسعة صدر مصر.. خدوا بالكم للصبرحدود فأمن المصريين بمسلميه ومسيحييه خط احمر ومن يلعب فيه يقرأ الفاتحة علي روحه أويحضر كفنه وقد اعذر من انذر والله المستعان علي ما يقولون..!!