مساء الخير.. كرهوني وباين في عنيهم

المذيعة الجميلة أم دقة حسن وشامة علي جبينها.. قال ايه ما احناش عجبينه..؟! وكلنا بنكره بعض ومحدش طايق لحد كلمة والكل بيضحك علي كله وعاملين زي السمك بناكل في بعض..!! ولما تسأل عن السبب تلاقي العجب.. ما حدش عارف حاجة وهي الحكاية كده وما تنفعش توديها أي حتة تانية إلا كدة..!! الست المذيعة مني الشرقاوي مذيعة مصر النهاردة ست زي الفل حطت ايديهاعلي الجرح ووصفته توصيف خبط لذق بدون أي مجاملات زي خلتي أم فوزية.. الله يرحمها لما كانت تتكلم يخرج منها الكلام بكل صراحة وتقول للاعور أنت أعور في عينه..!!
والله العظيم يا ست مني الكلام خارج من فومك بكل امانة وصدق واللي عنده اعتراض يجي ويوريني نفسه..!!
انا مش عارف لغاية امتي ها نضحك علي بعض ونجامل بعض.. ولكن كلام المذيعة عبر عن احساس 80 مليون مواطن عمالين كل يوم ينافقوا في بعض ويسوقوا الهبل والشيطنة علي بعض.. ولما تحاول تتكلم في الجد تشعر أن كلامهم كله في الهجايص ومحدش واخد باله من حد والكل مصدر الطرشة والعبيطة ولما تقول أنتم فين يا بشر..؟ تسمع اللي عمرك ماسمعته..! يا عم سيبك.. يا عم كبر.. ياخويا نفض وكأن الواحد شغال خادم في مسجد.. عمال يكبر للآذان ويمسك السجاجيد وينفض..!! هو فيه ايه؟! ايه اللي بيحصل ده؟! ايه اللي أنا شيفه ده..؟! فين المصري بتاع زمان فين الحب والنخوة والجدعنة؟! يرحم زمان وليالي زمان !يا عالم ياهوو ياللي بتقولوا المصرين اهما.. خليتوا الحجر ينطق ويتكلم.. خلتوه يحاور ويشاور ويبكي ويتألم ..!!ولما تتكلم مع حد في العيب والفضيلة.. يكلمك في النسوان وانه نام أول أمبارح عريان..!! ولما تكلمه وتقول له عيب ما يصحش.. يفشخ بقوه وكأنه حمار علي وشك النهيق ويضحك ويقلب الموضوع هبل وعبط ودروشة..!! ولما تضغط عليه وتحاول تعيده الي صوابه.. يجلس امامك وتسمع منه شوية أكاذيب وخرافات كأنه يهودي مخلص يستمع الي مزامير داود ..!! وتشعر بمأساة تحتاج الي "معددة" تلطم علو وشها بشبشب..!!
اه ..ياست مني من المصرين.. دول بتوع التلات ورقات وعلي كل لون تلاقيهم ..كدابين زفة ماشي.. حركات قرعة ومكشوفة ماشي .. زلنطحية وشكحلية ماشي وعلي كل لون يا باتيستا.. وكله بجنيهات موجود علي العربيات.. وابرز الجنية قبل الكارنيه..!! والغريب والعجيب عندما تركز شوية في حقيقة الشعب المصري وتنظر بدقة في تعاملاتهم مع بعض ..تلاحظ أن الفشخرة والتباهي والنأورة والانفصام في الشخصية من أهم العلامات التي تميزهم عن اجدادهم بتوع زمان..!! ولو بصيت علي الواحد منهم مش لاقي ياكل ويسأل الله في حق النشوق ولابس شوية هلاهيل وجزمة وكلاها الرطوبة ..ولما تكلمه يعمل فيها عبد العظيم الاليط ويلوي بوزه ويدخل ايده في جيبه ويطلع تليفون محمول كان في الاصل راديوويتكلم وكأنه بيتكلم مع وزير الداخلية.. ويلتفت اليك ويقولك: أنت متعرفش أنا مين..؟! تشعر وقتها وكأنك امام مخلوق عجيب من مخلوقات الله اللي انقرضت من زمن بعيد..!! بالمناسبة يا ست مني بعد إذنك سلميلي علي الزميل خيري رمضان أبو سحنة جنان.. حماس ايه وشجاعة ايه وحضور جماهيري محصلش.. بسم الله ما شاء الله .. بتفكرني برجالة الستينات الجدعة اللي عندهم نخوة وقلب من حديد ..!! وعشان كده برجع تاني للأخت الصغيرة .مني. اللهلوبة واقولها ان الشعب المصري شعب جميل وبحبوح وابن نكتة ولماح ويفهمها وهي طايرة..!! بس ياعيني عليه من العذاب والضني.. الفقر والغلب مخليهم يكرهوا نفسهم وعلي استعداد يلعبوا مع العفاريت طالما انها ها تخلصهم من اللي هما فيه..!! تتصوروا واحد يقولي والعذاب ها ينط من عنيه انا مش لاقي أكل أنا واولادي وقاعد في البيت زي الولية الخايبة من غير شغل..!! والتاني ضربها صرمة والشر ها ينط من وشه وماشي في الشارع عامل زي الرجل الهربان من حكم نفقة ولما تكلميه يقولك أدي الله وأدي حكمته..!! معقول يا سيادنا آحفاد الفراعنة العظام بناة الاهرمات يحصل فيهم كده ..؟! يا عالم يا هوو ياللي كل يوم خوتنا بالديمقراطية اللي بالمهلبية والديمقراطية باللحمة المشفية انكسفوا علي دمكم وحطوا في عيونكم فص ملح.. وحافظوا علي شعبكم زي ما بتحافظوا علي جثث موتاكم من الفراعنة والحي أبقي من الميت.. حرام عليكم اللي بتعملوه فينا شوفلكم حل قبل ما تصبح فضيحتنا بجلاجل ويحدث في مصر لاقدر الله زي اللي بيحصل في تونس والجزائر ..!! اللهم أني بلغت ... اللهم فاشهد.