شاهد.. رسالة زوج لزوجته المتوفاة تبكي رواد فيس بوك

نشر أحد مستخدمي موقع التواصل الاجتماعي "فيس بوك"، رسالة عبر فيها عن حزنه على فراق زوجته المتوفاة، والتي لاقت إعجاب ممزوج بالحزن لأكثر من 66 ألف من رواد فيس بوك، وتفاعلوا مع الرسالة.
وعلق الكثير من المتابعين، برسائل المواساة، والدعاء بالرحمة والمغفرة للزوجة المتوفاة، والصور التي تعبر عن الحزن والبكاء.
وقال الزوج في رسالته الحزينة: "زوجتى الحبيبة.. جه اليوم اللى لما أعوز أقول لكى حاجه لازم اكتبها لكى لأن خلاص مينفعش تسمعيني مينفعش تفهمينى عاوز أقول لك حاجات كتير".
1-اليوم مر 73 يوم على رحيلك و الالم و الحزن ولد كبيرا و ما زال كبيرا
2- رمضان كان وحش أوى منغيرك مش علشان الاكل الحلو اللى كنتى بتعمليه ولا الجلاش اللى ياسين مفتقدة من إيدكى ولا السحور الجميل اللى كنتى بتعمليه لينا لأ افتقدنا أنفاسك افتقدنا تلاوة قرآنك افتقدنا صوت منبهك لتهجدك افتقدنا دعائك لينا.
3-لينا راحت مسجد المدينة المنورة امبارح فى صلاة التراويح مع دكتورة مايسة علشان تحضر ختمام المصحف علشان تعديلك.
3- بكرة العيد ودة اول عيد منغيرك من 22 سنة والله بحاول افرح و افرح الولاد بس مش عارف على العموم انا جبت لياسين لَبْس العيد و حلقت له شعرة و قصرته زى ما بتحبى تمام و جبت للينا لبس العيد ومن نفس المحل اللى بتحبى تشترى لها اللبس منه.
4- ياسين صلى ليلة 27 مع يوسف عمر و يوسف حميدو التهجد و الفجر علشان يدعي لكى
5- الحمد لله الولاد نجحوا فى الامتحانات صحيح بدرجات اقل من كل عام بس معلهش ظروفهم و توقيت مرضك ووفاتك كان صعب جدا عليهم.
6- ياسين عندة بطولة فى المنصورة تالت يوم العيد ادعى له.
7- عارفه ساعات كنت بزهق من مكالماتك و طلباتك وسؤالك انت فين دلوقتي ؟؟ والله لو رجعتى تانى عمرى ما هزهق و لا حتضايق من مكالماتك.
طب ارجعى كده و انتى تشوفى ومجيب لكى الزبادى من خليفة حتى لو تعبان و مش قادر.
8- مش حعرف اصلى العيد بكرة و اطلع مالأكيش فى البيت لأ السنة اللى فاتت انتى صليتى معانا فى مسجد حسين صدقى المهم قولى لى العيديه حديها لمين ؟؟؟ ومين هيدى الولاد العيدية
على العموم انا حصلى العيد و أجيب الولاد و أجيلك استنينا احنا حنيجى بعد الصلاة علطول.
9- انا مستغرب صفاء ابو السعود كل عيد بتقول العيد فرحة وأجمل فرحة !!!!
وأم كلثوم بتقول ياليلة العيد أنستينا
بيتهيأ لى هم قصدهم على العيد زمان.
10- عيدك فى الجنة ان شاء الله احلى بصى هديتك السنة دية أبيات شعر للحلاج أهديها لكى يا رب تعجبك والله ما طلعت شمسٌ ولا غربت إلا و حبّك مقرون بأنفاسي ولا خلوتُ إلى قوم أحدّثهم إلا و أنت حديثي بين جلاسي، ولا ذكرتك محزوناً و لا فَرِحا إلا و أنت بقلبي بين وسواسي، ولا هممت بشرب الماء من عطش إلا رَأَيْتُ خيالاً منك في الكأس، ولو قدرتُ على الإتيان جئتُكم سعياً على الوجه أو مشياً على الرأس، ما لي وللناس كم يلحونني سفها ديني لنفسي ودين الناس للناس
نعم ودين الناس للناس.. نعم ودين الناس للناس مع Rasha Sabeq‎.
شاهد التدوينة..