حكاية البنت "اللي ماشية معايا"

بيقولك إيه؟ اللي ما يعرفش يقول عدس, و"الهدوم " بتداري كتير يا خال.
وأنا بصراحة كاتم في نفسي بقالى كتير، والنهارده بس قررت اتكلم واكشف المستور واللي يحصل بعد كده يحصل بقى.
شوف يا خال!
تقريبا كل يوم قبل مابروح شغلي، بعمل توصيلة تاكسي صغيرة، وفيه زبونة وحيدة مقررعليّ كل يوم توصيلها.
هي بيني وبينك من حقها تركب معايا لوحدها، علشان أمورة أوي، وبالمرة اعاكس فيها براحتي.
ولما بتيجي نازلة بتسوق الدلال عليّ، وطبعا أنا بتحرج أخد منها أجرة.
وفي الطريق، وإحنا ماشيين، بنقعد ندردش، و طبعا بعاكس فيها وأنا معذور بصراحة.
وبنجيب في سيرة الناس والحكومة بالخير مش حاجة يعني.
والنهاردة، الكلام جاب بعضيه، وبسئلها إيه الأخبار؟ علشان أعرف رأيها في الاوضاع والمستجدات وبالمرة أقعد معاها أطول وقت ممكن.
و اشتغلت عليها شوية على أساس أني كنت مسافر خارج مصر، ولسه جاي من كام يوم.
وجرجرتها في الكلام لحد ماعترفت .. بإيه؟
إنها مش متفائلة وخايفة من بكرة.. طيب ليه ؟
قالت لي أنا محتارة ومش عارفة أعمل إيه في المستقبل، علشان الأمور مش واضحة، ومحدش عارف بكرة مخبي إيه؟
وفيه كلام كتير بيتقال،إن مفيش فرص عمل، وإن الحكومة خلاص مش هتشغل حد تاني، وخد عندك حملة الماجستير والدكتواه مش لاقيين شغلانة.
وعلشان كده التعليم مش هيبقى له لازمة" ده على حد قولها " وإن أعلى الدرجات العلمية في مصر مش بتلاقي اهتمام، وإن "اللي" بيتعلم أحسن له يبطل ويشوف له شغلانه أفضل لأن بكره ما يلاقيش.
طبعا أنا استغربت،واستنكرت، وشجبت، وحاولت اعمل فيها مسئول تنمية بشرية، ومصلح اجتماعي على قد ما قدرت.
شوفي يا عزيزتي، مش معنى إن حملة الماجستير، والدكتوراه مش لاقيين حد يشغلهم، يعني خلاص الدنيا إسودت وقفلت، وأن"اللى" بره بره و"اللي" جوه جوه، لا.
وعلشان لسه فيه أمل وعمر، وكل حاجة حلوه في مصر ممكن نتأخر شوية، نتعب حبتين ما يجراش حاجة، وفي الأول والأخر طالما حضرتك عملتي المطلوب منك كما يجب سيبي الباقي على الله.
طبعا الهانم بصت لي وقال إيه؟ الكلام مش جاي على هواها، ولولا أني اعرفها كويس من يجي 14 سنة كنت بلغت عنها، وهي طبعا حبيبتي من زمان ومقدرش اعمل حاجة زي كده.
المهم" أنا تقمصت دور الأب، وبالمناسبة الهانم اللي بتركب معايا ومبتدفعش أجره، وبعاكس فيها يوميا، تبقى بنتي البكرية "أمينه" اللي انا سئلتها انت مستواكي في المدرسة عامل إيه؟ ده على أساس أني مش عارف وكده يعني.
قالت لي يا حج انا دايما من الاوائل وهوعلشان انت طنشت تحضر حفلة تكريمي ضمن الاوائل لمدة ثلاث سنوات على التوالي هتعمل فيها من بنها؟.
وانا طبعا عرفت أخرج بحيلة، لكن ما خالتش عليها.. وما علينا علشان ده مش موضوعنا.
يا عزيزتي ما تخافيش من بكرة علشان هيكون شايل خير، بس شدي حيلك.
واستمري في التفوق وعلى قد تعبك هتلاقي خيراً إن شاء الله.
وعاوز اقولك حكمة بيقولهالي ايويا من زمان، إن" الغزال الشاطر يغزل ولو برجل حمار".
وبعد ما الهانم نزلت بدات أفكر في الكلام اللي قالته والخوف من المستقبل بالنسبة لطفلة ما كملتش 15 سنة لسة.
ولقيتني بسئل اسئلة ومش لاقي اجابات، طيب احنا اذا ما كنش عندنا خطة في التعليم تحدد الاهداف وتوظف مخرجاته، وتستوعب المهارات وتحتوي الخريجين في مختلف المجالات .. إيه الهدف من التعليم؟
هو ممكن القائمين على التعليم في مصر يقعدوا مع بعض، ويشوفوا ويعملوا خطة على مدار 10 سنوات، من خلالها يتم استيعاب كل خريج لأنه بالطبع وفق الخطة الموضوعة هيكون عارف مصيره إيه؟
وطالما الحكومة ما عندهاش تعيين ليهم، ولا وظائف بتسمحوا لهم يتميزوا ليه ويحصلوا على أعلى الدرجات؟
علشان عيب كبير قوي، إن حملة الماجستير والدكتوراه يقطعوا ويحرقوا شهاداتهم في الشارع.
ويا حسرة أهاليهم "اللي صرفوا دم قلبهم" عليهم علشان ياخدوا شهادات تتحرق في الشارع و"ياريتك يا بوزيد ما غزيت".
"مش كده ولا إيه"؟
"ودي كانت حكايتي مع البنت اللى ماشية معايا"