«فضايح السبوبة»

"ببقولك التجارة شطارة" وربنا أمر بالستر، وأحلى من الشرف مفيش، وكل تاجر شاطر في طريقة تسويق بضاعته، والطرق من تاجر للتاني بتختلف، ولكن بتتقابل في نقطة واحدة، وكله متاح، و"سيبك " من إنها مشروعة، ولا غيره، المهم انك تقدر تعرض وتبيع!.
وده ليه علشان إحنا في سوق مفتوح، والعرض والطلب هو إشارة المرور، وطبعا كل تاجر يبتكر طريقة محدش قبله وصلها، علشان يكون على إقبال، والطلب علية يزيد.
أنا عاوز قبل ما حد يتوه مني في أي حتة ويزهق، ويقول إيه الكلام "اللي "هيصدعنا" بيه ده، وبعدين يحلف ما هو قاري لي كلمة تاني.
أقولك يا "معلم" معلش إحنا في سوق، وكل "كلمنجي"، وله اسطوانة ممكن تكون مشروخة، نعم، ما يجراش أي حاجة، و"ما علينا".
أقولك يا خال البيه فيه مثل "بيقولك إيه ؟" اللي بيتكسف من بنت عمه مبيخلفش منها عيال".
علشان كده، أنا صعبان عليّ قوي الناس الطيبين اللي هيموتوا من الزعل من برنامج مذيعاته محترمات، وكتر خيرهم على العموم، لأنهم، خلصوا المشاكل بتاع المصريين كلها، من فقر، وبطالة، ومرض، وهم، و"بلا" أزرق، ومش فاضل غير، إن "إحنا" نتعلم إزاي نجيب عيال، ولو معرفناش، هن مشكورات قدموا الحلول والطرق، ده على أساس أن اللي بيشوفوهم "مبيعرفوش".
ومكانش ناقص من المحترمة، غير إنها تقول لنا على القنوات اللي بتعرض الأفلام الثقافية، ودي النوعية منهن اللي بتجيب فلوس وتعرف تبيع بشطارة اليومين دول، "إعلام السبوبة".
شوف يا خال البيه.. أنا عن نفسي شايف إن "الهانم" مغلطتش، ولا حاجة لأنه فيه سوق، وله قواعد تتفق تختلف ده أمر واقع.
تقول تحت بند، التجديد، والتطوير، والعك، ما يجراش أي حاجة، ودي سبوبة وصاحبها درس السوق كويس قوي، وعرف إن البضاعة دي تبيع وتزود الغلة مرتين، تلاتة للأسف.
وفي الأول والأخر دي "سبوبة" تجيبها كده، تعدلها كده "سبوبة"، وأكل عيش بيتا كل أزاي؟ مش دي المشكلة، طالما بيجيب إعلانات، ويرفع نسبة المشاهدة بتاع القناة خلاص.
وبمناسبة الصراحة وعدم "الإختشا"، كل تجار الإعلام الشطار، أيوه متستغربش هي تجارة وشطارة بيلعبوا على الحتة دي.
يعني بلد زي بلدنا فيها، نسب طلاق، وحالات عنوسة وبطالة، وفيها كمان ناس عاوزة تتصبر شوية من غير «لا مؤاخذة».
وبلغة السبوبة اللي بيحضر العفريت يصرفه، وبرنامج زى ده علشان يشتهر، ويلعلع، ويجيب إعلانات ويعمل سبوبة حلوة "طرية".
لازم نجمة إعلام السبوبة تطلع تضرب كام كورس في الكلوب علشان ده يكتب وده يعلق، وده يشجب، أو يندد، ومحدش فاهم حاجة ولا عارف إن دي سبوبة ودي القواعد بتاعتها.
ده غير إن حاملي لواء الشريعة، يطلعوا يتاجروا شوية... ما هو سوق وكل واحد لازم يسترزق وكله بيتعشى في النهاية.
بس أنا لي عتاب رفيع بس على النجمة الساطعة في سماء إعلام السبوبة، "النصيحة على الملأ فضيحة " وفي الحالة دي ممكن نتحول من إعلام السبوبة، لفضايح السبوبة، وكتر خيرك على كل حال بتحاولي تساهمي في حل أي حاجة، ولو بتضيع الوقت وأهو نبقى كسبنا حاجة من التلفزيون على الأقل.
ويا ريت تراعي، إن مشاهدينك ممكن ميكونوش من ا"للي" بيعرفوا، يتصبروا أو يشوفوا "السبوبة" بتاعتك، قصدي برنامجك، وخلاص وممكن يطبقوا عملي على أي حد، ودول مبيفرقوش يا "ست" الكل، ويعني المشرحة مش ناقصة قتلة، ولا فضايح وربنا أمر بالستر.
كلام في دنيا الكلام وتجارة في عالم السبوبة وعلى عينك يا تاجر واللي ما يشتري يتفرج، وسبوبة الفضايح أو فضايح السبوبة مفيش فرق.
" أهي سبوبة والسلام."