أنا آسف يا ريس حسني ! / أحمد سمير

أنا آسف يا ريس !!


* احمد سمير

ظهرت بيدجات وايفنتات وجروبات كلها بتتأسف للرئيس السابق مبارك مش عارف ايه اللى ممكن يصيبك لو لقيت دعوة جيالك بالصيغة دى "انا آسف يا ريس"؟

اعتقد انه بمنتهى البساطة ممكن يجيلك ارتفاع فى ضغط الدم مصاحب برغبة فى القئ مع اصدار مجموعة اصوات غير معلومة المصدر مع حالة هياج عصبى شديدة مصاحبة بكم هائل من السباب والشتائم المقززة ونتيجة لانى مش بتعصب بسرعة فالحمد لله متصابتش بالحالة دى .

انا بس اصبت بحالة هستيرية من الضحك مش اكتر نتيجة لعبارة "انا أسف يا ريس" طيب الاسف يجب ان يكون ناتج عن ذنب او جرم مش كدة ولا انا بهيس؟

طيب بغض النظر عننا كشباب اخطأ فى حق الرئيس السابق عشان طالب بالتغيير يا له من فعل مشيبييين ازاى سمحت لنفسى اطالب بطلب منافى للآداب زى ده ؟؟؟؟

طيب هما بقى غلطوا فى ايه عشان يتأسفوا؟

حاولت ادورلهم على غلطة ملقيتش فدورت تانى لحد ما لقيت خطأ شديد الفظاعة..

ببساطة كدة "انا أسف يا ريس" لأنى خذلتك ومخلصتش على كل العيال اللى في التحرير .

آسف يا ريس عشان مكررتش موقعة الجمل وكملتها بهجوم الافاعى ودعم الافيال وثورة الاسود وغزوة الزرافات ومعركة القرود وسطو الذئاب احنا جوعنا الحيوانات فالجنينة يا ريس بس اتلخبطنا ونسينا نطلعهم كلهم.

آسفين يا ريس مكانش معانا حجارة كفاية تخلص على العيال الثوار دول وهولاكو طلع عيل اجندة ورفض يسلفنا المجانيق لنضرب به الثوار .. الظاهر كده انه حليف الايرانيين يا ريس .

طيب نتكلم بجد بقى شوية

انا مش أسف يا ريس لانى ببساطة كده مغلطش فيك اصلا .

اذا كنت الاب كما يدعى وينافق البعض فأنت كنت اب عاق لولادك .

اتسمت بالانانية والجفاء .

مسمعتش احلام ولادك ولا افكارهم .

سلطت حراسك يلموهم من الشوارع ويساووهم بالخارجين عن القانون وعذبت وقتلت منهم من قتلت في سراديب امن الدولة هل تذكر "خالد سعيد" و"سيد بلال " وغيرهم المئات ؟.

طبقت مبدأ المساواة بمنتهى الحرفية بانك ساويت بيننا فى الظلم وقلت هو ده العدل .

وقعت الجبل فوق راسنا وغرقتنا فى العبارة وهربت الجانى يتنعم في بلاد الله الواسعة .

ولادك عيانيين وتعبانيين وبيموتوا وكنت بتعالج المليونيرات على نفقة الدولة بطرس غالى عالج عينيه وحاتم الجبلى بيض سنانه وطباخ الريس اتعالج على حسابنا وبالملايين من الجنيهات واحنا بنشحت في المستشفيات .

طيب ايه كمان هببتوا فى عصرك؟

انا ااقولك فاكر يا ريس اوووووبا آسف قصدى ياللى كنت ريس فرح ابنك جمال؟

يا سلام فرح شيك واخر سلطنة فى الوقت اللى ولادك يا حرام بيجمعوا عشان يعملوا فرح جماعى .

طيب فاكر حديد عز بكام وكيف استولي علي شركة الدخيلة بتاعة الدولة وضمها ببلاش لمصانعه ؟

ولا الخضار والفاكهة واللحمة وصلت لكام؟

طيب فاكر كنت بتعلم انا بكام؟

واطلع منه زى ما دخلته معرفش 2*2 بكام

طيب فاكر انك قتلت كام شاب ..الف ياريس ومعاهم ستة آلاف اصيبوا بعاهات مستديمة بسبب الرصاص الحي والخرطوش .

طيب فاكر يا من كنت ريس "الغاز" الذي صدرته لاسرائيل بسعر شبه مجاني لمدة عشرين عاما قادمة وقري ومدن مصر تشكو عدم وصول الغاز اليها وثبت انك تحب اليهود قتلة جنودنا اكثر من شعب مصر ..

طيب فاكر لما زورت كل الانتخابات البرلمانية والطلابية في مصر علي مدي ثلاثة عقود متواصلة وتركت اجهزة امن الدولة تتصنت علي بيوت الناس وغرف نومهم .

وتركت "امن الدولة " تحكم سيطرتها علي كل مرافق البلد وتقوم بتفكيك الاحزاب وزرع العملاء في كل ركن في مصر وتتبني ملف توريث جيمي ابنك علي عزبتك التي ورثتها من المرحوم ابيك والتي هي مصر المحروسة ؟؟

طيب فاكر لما حاصرت غزة خدمة لاسرائيل لاسقاط حماس ونسيت ان في غزة مليون ونصف المليون انسان اكثر من نصفهم اطفال ونساء حرمتهم من العلاج والغذاء والوقود ؟

مش آسف وحقى ااقول مش اسف انا مغلطتش اما طلبت عدل وحرية وكرامة انسانية

مغلطتش لاني طلبت التغيير اللى مبشوفهوش غير فى الظاهرات الكونية مد وجزر شروق وغروب شمس وقمر حر وبرد .

مغلطتش لاني اردت ان نزيل العصابة الحاكمة التي جعلت ثلثي المصريين تحت خط الفقر .

يعنى خلاصة الكلام "انا مش اسف يا ريس" يييييييييييييييه قصدى ياللى كنت ريس

* كاتب من مصر