رسالة إلى سيدي الرئيس

بسم الله الرحمن الرحيم
سيدي الرئيس .....:
ألف ألف ألف كل سنة وسعادتك طيب بمناسبة تقفيل العام الثلاثون وحضرتك منورنا كده على كرسي الرئاسة ...
سيدي وتاج راسي ، أنا فتاة عمري 20 سنة ، طالبة جامعية ، في حالي ، عمري ما طلعت مظاهرة ، ولا عمري احتجيت ، ولا عمري قلت لأ ، ولا عمري قلت نعم ، يقولوا ذاكري ، بذاكر ، هاتي عيش ، بجيب ، روحي الجامعة ، بروح ، اشتغلي ، بشتغل ، احترمي نفسك ، احترم ، ادفعي فلوس ، بدفع ، مفيش حاجة الحكومة قالت اعمليها ومعلمتهاش ، كله بعمله ...
والصراحة يا سيدي الرئيس لا أستطيع أن أقول لك أن فترة رئاستك هي الفترة الأزهى والأفضل لمصر ، لأنني لم أعاصر غيرك في حياتي ، وبابا كمان اللي عمره 50 سنة معصرش حد غيرك ، وعندما توزني نفسي الأمارة بالسوء لقراءة التاريخ بدءا من أيام حكم العثمانيين لمصر حتى يوم ما اغتالوا السادات ، ألاقي الكتب اختفت فجأة من السوق ، وحتى الكتاب اللي بلاقيه ألاقي صفحاته فاضية ، ومش مكتوب فيه حاجة ، والكلام مش واضح ، ولما عرضت الكتاب على هيئة المسئولين عن الحقيقة قالولي إنه مكتوب بحبر سري ، محدش يعرف يقراه إلا سعادتك .
أنا مش ضد حاجة ، ومش ثائرة على حاجة ، لأن الموضوع وما فيه إني ملقتش حاجة تانية حلوة عشان أقارن بينها وبين اللي إحنا فيه ، من أول ما اتولدت والدنيا زي ما هي ، متغيرتش ، لا حضرتك اتغيرت ولا أنا اتغيرت ولا مدرستي ولا كليتي ولا الميكروباص ولا المترو ولا العيش ولا الرز ولا حتى العشة اللي عايشة فيها سيّدة هي وجوزها وعيالها، وبتيجي مرة في الأسبوع تنضف بيتنا وتمشي ...
والغريب يا سيدي الرئيس إني لقيت إن سيّدة بتصرف قد اللي إحنا بنصرفه على الأكل والشرب والمية والكهربا ، وحتى أولادها بيروحوا نفس جامعتي وبيدفعوا نفس مصاريفي وبيشتروا نفس كتبي ، بنفس التمن وبنفس الأسعار ، بس الغريب واللي استغربتوا يا سيدي الرئيس إن امبارح البوكس جه خد سيدة وعيالها وهدموا العشة اللي حليتها عشان مخالفة للقانون ....
مع إن ابن خالة ماما رجل الأعمال الكبير عبد السميع عبد الحق عويصة ، واخد أرض باني فيها في " مدينتي " ومحدش قاله تلت التلاتة كام !!!
يا سيدي الرئيس أنا بقيت أكره أروح الجامعة عشان اللي بتعرض له في المواصلات من سفالة وقلة أدب والقرف والخنقة والزحمة ، ومع إني بنت ناس إلا إني قررت أخد كورسات في الشرشحة عشان كل واحد يحترم نفسه ، والغريبة يا ريّس إني بقيت أشرشح كمان في الجامعة ، وشرشحت أكتر لما الأمن دخل الحرم الجامعي عشان المظاهرة اللي عملها العيال الإخوان ضد الحصار الإسرائيلي لغزة ، ولولا العيال الإخوان الوحشين حاشوا عني الأمن كنت رجعت من غير هدومي .. !!!!
يا ريّس أنا عمي مات على الحدود ، قتلوه الإسرائيلين وهو بيؤدي الخدمة في العريش من كام يوم ، ومحدش اتكلم ، وابن خالي هجموا عليه اتنين مخبرين وهو قاعد في السيبر اللي عالناصية ، بيشيت عالنت مع حبيبته وقعدوا يضربوا فيه لحد ما قتلوه ، ولما في يوم كتبت في مجلة الكلية ، سقطوني !!
أخويا بقاله 5 سنين عاطل عن العمل ، ومش عارف يتجوز البت ليلى اللي بيحبها من أيام الجامعة ، وآخر ما غلب مات وهو رايح ايطاليا ، والمفتي قال انه منتحر وانه وحش وهيدخل النار .... بذمتك يا ريّس ده حلال ده يا ريّس ...
يا ريّس إنت من كام يوم اجتمعت بالفنانين ، بمنة شلبي ومنى زكي واخواتهما ، طب ما اجتمعتش بينا إحنا ليه يا ريّس ؟؟؟ إحنا الشعب التعبان الكحيان اللي بتطلع عين اللي خلفوه عشان ياكل رغيف عيش عدل بخمسين قرش !!
مش إحنا أولى يا ريّس ؟؟!!
امبارح يا ريّس مينا زميلي في الجامعة مرضيش يرد عليا ، وقالي انه مش هيكلمني تاني ، مع إنه عيد ميلادي ، وجاسيكا مجبتليش الهدية اللي كل سنة تجبهالي هي هي ، أصلها أنتيمتي وبتحب تنكوشني ... ولما قلت لجدو عيط ، واتصل بعم جورج وقعدوا هما اللي اتنين يعيطوا ، لأننا عمرنا ما شفنا كده إلا في ظل حكمك العظيم !!
الصراحة يا ريس أنا مش فاهمة حاجة ، ومش عارفة أقولك إيه يا ريّس ....
غير إني اتخنقت ، ومع إنكوا عاوزني أدور على وطن تاني ، إلا إني قاعدة ، وهكافح فيه ، وكلنا هنكافح فيه ، لحد ما يجي اليوم اللي .... نفتكرك فيه بالخير، زي ما بنقف النهاردة على قبر جمال عبد الناصر وبنفتكره بالخير، لأننا شكلنا كده مش هنخلص في أم ليلتنا ديه ...
والسلام عليكم ورحمة الله وبركاته يا ريّس
آه صحيح يا ريّس هو حضرتك ممكن تشرحلي يعني ايه " سلام ، رحمة " ؟؟؟
التوقيع :
مواطنة لسه مبتدئة
العصماء محمد هاني
http://free-al3ssmaa.blogspot.com/2010/10/blog-post.html