إضرابات واعتصامات مستحيلة الوقوع / عصام سرور

إضرابات واعتصامات مستحيلة الوقوع


* عصام سرور

الحياة زى مااحنا عارفين التزامات وواجبات وحقوق بس احنا ولا نعرف التزامات ولا واجبات منعرفش الا الحقوق ودايما نطالب بيها فريد شوقى اما كان طالع مطرب وبوظ الفرح راح للعريس قالة فين فلوسى العريس قالة بس الفرح باظ قالة انا غنيت ولا لأ ادبنى فلوسى .

كلنا بنعمل كدة مش مهم اننا نعمل ونلتزم ونؤدى عملنا على اكمل وجة لكن المهم اننا نأخذ حقنا تالت ومتلت . ومصر شهدت اضرابات واعتصمات من كل فئات الدولة الجميع يبحث عن الحقوق لكن مفيش ولا واحد سأل نفسة هل انا بأدى عملى على اكمل وجه علشان آخذ حقى .

هنا هتتغير النظرة وهنعرف اننا منستحقش حتى ربع اللى بنحصل علية وفينا ناس هتدفع من جيبها ماهو احنا مبنعملش حاجة تستهال الناس برة بتؤدى عملها على اكمل وجة ولو فيه شكوى او مطلب بيعملوا الاعتصام اثناء فترة الراحة من العمل او يوم الراحة علشان اشغالهم متتعطلش لكن احنا زى العيال ثلاث اشهر نايمين فى الشارع واية مش شغالين الا لما تزودونا وتغور فى داهية البلد والمواطن والدنيا كلها .

نفسى اى واحد فينا يقفل على نفسة الاوضة ويسأل نفسة انا فعلآ بأدى التزاماتى وواجباتى وبأدى عملى بما يرضى اللة ولا بسرق ولا برتشى علشان اطالب بحقوقى .

اكيد كلنا عارفين الاجابة - انا تخيلت اننا فى لحظة صدق مع النفس عرفنا الاجابة الصح وعلية قامت الاضرابات والاعتصامات ولكنها اضرابات من نوع جديد ونادر.

** اجتاحت الاضرابات والاعتصامات شتى محافظات الجمهورية بسبب اعتراض الأطباء على الكثير من السلبيات والافعال المخلة التى يقوم بها الكثير من الأطباء فى مجال عملهم وتحولهم من ملائكة للرحمة الى ملائكة للحمة وهى على سبيل المثال .

- قيام بعض الاطباء فى المتاجرة فى اكسسوارات البنى آدمين عن طريق السرقة او التبرع .

- قيام بعض الاطباء فى المتاجرة فى الاطفال.

- قيام بعض الصيادلة فى المتاجرة فى القاقير المخدرة او بيع ادوية منتهية الصلاحية .

- قيام بعض الاطباء فى المستشفيات بعمل عمليات لأشخاص لاتستدعى حالتهم هذة العمليات من اجل الحصول على اجرة يدهم حتى لو ادى ذلك لبتر عضو سليم .

- ارتفاع رسوم الكشف على المرضى دون اعتبار لحالة المريض المادية واللى ممعهوش ميلزموش .

** اندلعت الاضرابات والاعتصامات التى قام بها الموظفون فى كافة انحاء الجمهورية اعتراضآ على الآتى :

-عدم اداء الموظف لعمله على الوجه الاكمل وكثرة التزويغ من العمل واصبح المكتب المكان المفضل للنوم وقراءة الصحيفة وتقميع البامية وعدم الشعور بالنشاط فى العمل الا بعد الحصول على الرشوة وكثرة الاختلاسات والسرقات

** اندلعت الاضرابات والاعتصامات بين فئات الفلاحين اعتراضآ على الأتى :

- قيام الفلاحين بحرق القش مما يحدث تلوث واصابة خلق الله بالامراض الصدرية

قيام بعض الفلاحين برى اراضيهم بمياه الصرف الصحى وما يترتب على هذا من اضرار بالغة بصحة كل من يتناول هذة المنتجات

قيام بعض الفلاحين بتخزين بعض المحاصيل واستخدام مواد ضارة بصحة الانسان فى ذلك بهدف بيع محاصيلهم عند ارتفاع اسعارها

قيام الفلاحين بتبوير الارض بغرض البناء وتقليص الرقعة الزراعية

-قيام بعض الفلاحين باستخدام المبيدات والكيماويات الضارة بصحة البنى ادمين لسرعة نمو المحاصيل وزيادة الانتاج

*** ولكى لا اطيل على حضراتكم الامثلة فى كل مجال كثيرة وخلاصة القول اننا لا نجتهد فى عملنا حتى نحصل على حقوقنا وقبل ان نطالب باصلاح احوالنا نصلح من انفسنا اولآ وده مش حاجه مستحيلة و القرآن الكريم يؤكد إن الله لا يغير ما بقوم حتى يغيروا ما بأنفسهم .


*كاتب من مصر
essam.sror@gmail.com