يا خلق ((هووو)) شوفوا مبارك ((زوو))

آخر ما كنت أتوقعه أن يمتلك الرئيس المخلوع مبارك حديقة حيوان اسبيشيل «قرودها» غير باقى القرود و «زرافها» رقبته أطول.. وحصانه الوحشى له قلب طيب ويقول حاضر ونعم.. وكلابه كلها تحمل لقب الباشوية على ديلها ريشة.. وثعابينه لدغتها وأمن الدولة.
وقد قال الطبيب البيطرى المسئول عن مبارك «زوو» (ZOO) إن الحديقة كانت تضم 10 غزلان وقردين وفهدا و10 طواويس و120 عصفورة وببغاءين وحصانين وعلى حد قول الدكتور للزميلة دينا إمام فى مجلة «الإذاعة والتليفزيون» الريس لم يكن يمتلك حميرا من أى نوع.. وكان القرد «زيزو» هو الأقرب إلى قلب مبارك..
ولهذا أتمنى من كل قلبى أن أجرى حوارًامع الباشمهندس القرد الخصوصى فى الوقت الحالى.. وأخشى ما أخشاه أن يقول لى القرد فى حوارنا إنه كان ينوى الثورة على حديقة مبارك وطلب اللجوء الحيوانى إلى حديقة الجيزة.. وإنه نزل إلى ميدان التحرير فى موقعة «الجمل»!!
ويليام وعروسه كيت
فى «الدويقة»
فى مبادرة خاصة من المعلم «سرنجة» أحد رموز منطقة «الدويقة».. أعلن عن رغبته فى توجيه الدعوة للأمير «ويليامز» وعروسه «كيت» لإعادة الاحتفال بزفافهما الميمون على نفقة المعلم الخاصة بعيدا عن فلوس العائلة المالكة.. وفى سؤال عن مبرراته لهذه الدعوة قال سرنجة:
- بصراحة أنا شفت الفرح فى التليفزيون لاحظت أنه بارد ولمؤاخذه.. لا فيه موتوسيكلات بتجرى شمال ويمين و بيسوقها وهو واقف ولا شفت عربية العرسان بتمشى بضهرها.. وتقطع السكه بالعرض.. ولاسمعت سارينه تخرم الودن.. ولا لقيت شلة الباشمهندس ويليام بتضرب نار فى الهوا وتعمل الشويتين وبعدين فرح إيه ده ولمؤاخذه اللى بيتعمل بالنهار زى الأكل بتاع المستشفيات.. هو الفرح يبقى فرح إلا إذا كان بالليل والكهارب بتلعلطط.. وقدام القصر بتاع الحاجه اليزابيث جدة الواد ويليام يتعمل شادر كبير وتنزل البيرة المشبرة.. والحبايب يعملوا نافوخ ملكى بصنف الغبارة الجديد «الشعب يريد تعمير الدماغ» ومجاملة منى للفاميلية الابهة هانزل شارع محمد على واستقضى من هناك 3 كنبات من اللى قلبك يحبها.. يهزوا طول الليل اشى خلفى.. واشى أمامى.. وفوق ده كله.. معلمين المنطقة كلهم هينزلوا بالنقطة للصبح.. وبكده نطول رقبة حكومتنا مع بريطانيا العظمى.. والشغل معاها يبقى ميه ميه نصدر لها ولمؤاخذه وعد الأخ «بلفور» بتاعها.. ونستورد منها الهربانين عندها وعلى رأسهم الغالى سى بطرس!
شوره.. شوره.. شوره..
كلنا مش عايزين «شورى»!
تتكلف الدولة مايزيد على 400 مليون جنيه سنويا من أجل دعم مكلمة كبرى.. أو قل دار المسنين والرعاية الاجتماعية المسماه سياسيا باسم «مجلس الشورى»».. وقد كان المجلس عبارة عن حضانة.. للبرستيج والمنجهه للمحاسيب والحبايب والذين يسمعون الكلام ويشربون اللبن من بقرة الحزب الوطنى المأسوف على شبابه وعواجيزه والعجيب أن نظام الحكم الذى كان يصرف على الشورى.. ويستشهد بالنص القرآنى الكريم چ ں ں ?چ.. هو نفسه كان يحكم بتوجيهات الرئيس وتعليمات الرئيس باعتباره العالم العلامة والفاهم الفهامة فهو مع الدكاترة «ابقراط».. ومع الفلاسفة «أرسطو».. ومع أهل السياسة «جان جاك روسو».. ومع رجال الدين صاحب الفضيلة وإمامهم الأكبر.. ومع أهل الصحافة.. «مصطفى وعلى أمين معا».. ومع بتوع الكورة هو بوشكاش.. ومع الفلاحين.. «عواد» الذى باع أرضه يا اولاد.. ومع العمال.. هو «مفتاح18».
وقد أوصى الخبراء والعقلاء بغلق دكان الشورى أو منتجع المتقاعدين.. وأنا شخصيا عندما كان يداهمنى القلق قبل النوم «اشاهد بعض جلسات مجلس الشورى فإذا بالنعاس يغشانى وأنام على الفور بدون فواصل اعلانية».
ولا اعتراض على الشورى، لكن هذا المجلس الذى لا يهش ولا ينش.. وليس معروفا تخصصه على وجه الدقة وفى أوربا والدول المتقدمة يعتبرونه مجلس الحكماء.. وليس مجلس للكلام وتوزيع الألقاب والهبات.. ووجود المجالس القومية المتخصصة يكفى.. وعلى هذا نأسف عن رفع الدعم للناس الحلوة المرضى عنهم وفراودة الصحافة القومية من أرباب الطبل والمزمار.. والعشرة بلدى وأفرنجى.. وأنا وأنت!
مداخلة
* وعندنا اتصال تليفونى ونقول: ألو.. مين معانا؟
* أنا فرخه بيضه سيادتك!
* أيوه يا أنسة فرخه.. بس البرنامج ده.. مخصص لمشاكل البنى آدمين.
* وماله.. أنا بياكلنى البنى آدم.. ولو لاقدر الله أنا مشى بطال أو سمعتى مش ولابد.. أو صحتى تعبانه كل ده بيأثر على المواطن مش كده ولا أيه؟
* واضح أن حضرتك فرخه بنت مدارس؟
* لا يا محترم.. أنا فرخه بنت مزارع.
* على العموم أهلا وسهلا معانا.. ياترى أيه شكوتك يامودموزيل دجاجة؟
* أولا وقبل كل شئ أحب اقولكم أنى فرخة من فراخ ميدان التحرير.. وياما كنت بكاكى فى المظاهرات.
* معقول؟!
* ومش معقول ليه.. كنت حاسه بالظلم والاستبداد والقهر..
* ياساتر يارب منعوا عنك الأكل والشرب؟
* أكل أيه وشرب ايه.. أنا باتكلم عن الحرية!
* حد لا سمح الله كان حابسك فى عشه؟
* أكثر من كده ومكسوفه أقول بصراحه!
* أنا أسف.. قصدك اغتصاب!
* لا مش للدرجة يا أستاذ
* أمال أيه بس؟
* إهى إهى إهى (تبكى بدموع من مرقه)..
* امسحى دموعك عشان أعرف اسمعك.
* بصراحه أحنا كانوا بيضحكو علينا فى مزارع الفراخ عشان ناخد حبوب منع الحمل وزننا يزيد ويستفيدوا مننا على حساب سمعتنا..!
* للدرجة دى!
* ايوه.. أنا أنسة.. والديك افندى لما عرف فسخ الخطوبة وأخد الشبكة واتهمنى بالانحراف!