اتجاهات

خالد عاشور: أهلا بكم مشاهدينا الأعزاء وهذه الحلقه الجديده من برنامج إتجاهات نستعد جميعا في مصر الآن لخوض غمار أول إنتخابات برلمانيه بعد ثورة ال25 من يناير وهي الإنتخابات التي من المفترض أن تنقل مصر من مرحلة الثوره الي مرحلة الدوله ووسط الجدل الدائر الآن علي الساحة المصريه حول كثير من المسائل هناك جدل يدور حول نسبة ال50% وعمال وفلاحين البعض يرفض ذلك بدعو أن تحديد النسبة في المجالس النيابيه إهدار لمبدأ المساواه والمواطنة وتكافؤ الفرص وأن هذا النص فقد معناه ومغزاه وأن مسألة العمال والفلاحين أو تقسيم البرلمان والمجالس النيابية الي عمال وفلاحين كانت وليدة فتره زمنيه هي فترة ما بعد ثورة يوليو وأن الزمن تجاوزها الآن بل إن مسألة العمال والفلاحين أصبحت وسيله عند البعض الآن للتسلل الي مجلس الشعب ، البعض الآخر يؤيد إبقاء النصر ويطالب بضرورة تفعيله والإبقاء عليه خاصةً أن العمال والفلاحين الآن في حاجه أكثر من أي وقت مضي الي أصوات حقيقية تعبر عن مشاكلهم وهمومهم وإنهم غير مسؤولين عن ما آل إليه أوضاعهم خاصةً أن صخب الإنفتاح والخصخصه والمشروعات المباعة وأوكازيون توزيع الأراضي في النظام السابق ادي الي إختفاء العامل والفلاح الحقيقي من مجلس الشعب بل من حياتنا بأثرها فالعامل وجد نفسه خارج مصنعه الذي تم بيعه وتحويله الي أراضي بناء وعقارات والفلاح عاد الي موقعه القديم أجيراً في أرضه وحوله ثلاثه أو أربعه من أبنائه تخرجوا من الجامعات بلا عمل بل الفلاح الآن أصبح مهدد بالسجن بعد أن رفض النظام السابق التنازل عن أي ديون وقروض تخص الفلاح لدي بنك التسليف في الوقت الذي أسقطت فيه الحكومه آنذاك آلاف الملايين من مستحقات البنوك لدي رجال الأعمال الهاربيه بفوائدها .. السؤال الآن هل يفرز البرلمان القادم ذلك العامل والفلاح الذي نبحث عنه أم سيشهد عزوفاً وإقصاءاً للعامل والفلاح عن المشاركه في سياسات بلاده ؟ هذا هو سؤال هذه الحلقه التي نبدأها بعد الفاصل
فاصل " تقرير آراء مجموعه من الناس"
رجل : العامل والفلاح لازم يكون له حياه وله دور لازي يشارك في كل حاجه ما يجيش الناس كل واحد يدور علي مصلحته ومش عارف ليه – تدور علي مصلحتك وتسيب الناس – لأ أهم حاجه إنك تشوف مصلحة الناس – فلاح زمان ما هو دا اللي بيأكلنا – والعامل هو اللي بيشتغل عشان ينتتج ويجيب لنا أكل
شاب : أحنا في الأصل خالص عمال وفلاحين إنما الطوائف اللي طلعت ديه جديده والفئات المستقلين والكلام ده والأحزاب طبعا إحنا ما بنقللش من قيمة الأحزاب
فلاح : أحنا بنرشح واحد مجلس الشبع من المفروض المرشح ده يدي الناس حقوقها – بيراعي إزاي فيه طريق عايز يتصلح فيه مستشفي.
رجل : إحنا عايزين العامل والفلاح عشان هو ده اللي حيتكلم بإسم العمال وبإسم الفلاحين أما اللي قاعد لي علي مكتب بقه وعايز يخش بقه بعيد عن الفئات والكلام اللي بقيولوه ده إحنا مش عايزين الكلام ده
رجل : عمال وفلاحي جزء من البلد وهم المفروض يبقي لهم صوت جامد وهم اللي يطالبوا بإن ما فيش شغل للشباب ما فيش مستشفيات مدارس
شاب : بعض المرشحين كنا نلاقيهم فئات في دوره وبعض الدورات نلاقيهم الدوره اللي بعدها نازلين عمال فمافيهاش تقنين لازم تبقي مقننه معروف مين فئات ومين عمال والعمال يبقي له الصفه بتاعته والمستندات الفلاحين نفس القصه لازم يبقي عنده الحيازه الأرضيه بتاعته عشان خاطر ده بيمثل الفلاحين فعلياً مش أي شخص يبقي موظف يبقي رجل أعمال ينزل فلاحين ما ينفعش
رجل : عمال وفلاحين بيعمل إيه ما بيعملش حاجه موافق علي كذا موافق حسب الأغلبيه في المجلس – حسب الأغلبيه اللي موجوده فإحنا عايزين حاجات جديده كل واحد يطلع في المجلس يتكلم يقول اللي عنده يعطي مقترحاته
رجل : أطلب يرخصوا لنا العيش خليه بشلن زي ما هو ويرخص السلع وكل حاجه تبقي متوفره واللحمه تبقي رخيصه كيلوا اللحمه ب60 جنيه مش قادرين نأكله ونروح نطل عند الجزار نشوفه ونروح
فلاح : كل الناس بس تشتغل بس مش عايزين أكثر من كدا
فاصل
خالد عاشور: أهلاً بكم مره أخري مشاهدينا الأعزاء ونعود الي حلقة هذا المساء من برنامج إتجاهات وإستمعنا في التقرير السابق الي مجموعه من هموم الفلاحين التي نرجو إن شاء الله أن تصل الي الرلمان القادم بعماله وفلاحيه وفئاته إسمحوا لنا أن نرحب بضيفينا في الإستديو الحاج محمد برغش كما نلقبه في وسائل الإعلام بالفلاح الفصيح .. أهلا بك حاج محمد
الحاج محمد برغش: شكرا .. أهلا بحضرتك
خالد عاشور: والحاج محمد صبح الدبش زعيم الفلاحين
الحاج محمد صبح الدبش :أهلا بك .. أهلا بك
خالد عاشور: الأول هل كان لحد فيكوا تجربه برلمانيه سابقه سواء في الترشيح أو العضويه
الحاج محمد برغش:ما تمنيتها ولا رغبتها ولو جابوها عندي سروها في منديل وقالوا خدها ما أرضي بها
خالد عاشور: طيب ليه ؟
الحاج محمد برغش:لأسباب كثيره جداً كنت مع أخوك معتز الدمرداش في شهر 10 السنه اللي فاتت قبل إنتخابات 2010 وقلت قوله مشهوره " من يذهب يترشح في مجلس الشعب فمطلوب منه الآتي أن يكون حامل حقيبه ونائب خدمات لن يرضي عنك أحد لن ترضي عن نفسك ليسبقه إسمك عندما تعطي ظهرك باللعنه علي الإسم وعلي الأب وعلي الجد فلم ترضي أحد "
ثانيا : لو خلي الإنسان بنفسه لإحتقر نفسه لأنه لن يستطيع أن يؤدي ما بالك في ثلاثين سنه ماضيه قل القرآن الكريم في حال الفلاح والعامل " أعوذ بالله من الشيطان ارجيم بسم الله الرحمن الرحيم وإذا المؤدة سؤلت بأي ذنب قتلت صدق الله العظيم " .. 30 سنه فاتت نبدرها برسيم ونزرعها رز تطلع لواءات ورجال أعمال ويقولك لك عمال وفلاحين
خالد عاشور: إحنا حنييجي لنقطة التسلل الي مجلس الشعب بتحت ستار العمال والفلاحين
الحاج محمد برغش:فنار دينها لأمور كثيره
خالد عاشور: ولا الحاج محمد دبس برضه؟
الحاج محمد صبح الدبش :لأ أنا رشحت نفسي سنة 87 علي المقعد الفردي ضد أخي وصديقي الدكتور أحمد عمر هاشم ربنا يدي له الصحه وأنا اللي طعنت أنا والمرحوم كمال خالد علي مجلس الشعب وحليناه لعدم دستورية القانون الخلط بين القائمه والفردي
خالد عاشور: وإترشحت قدام الدكتور عمر هاشم كان صفته إيه الإنتخابيه ؟ صفته إيه عمال وفلاحين ؟
الحاج محمد صبح الدبش :كان المقعد الفردي مالوش عمال وفلاحين
الحاج محمد برغش:ما كنش فيه تسميه
الحاج محمد صبح الدبش :ما كنش فيه تسميه
خالد عاشور: سؤالي لك الحاج محمدد برغش فيما يتعلق بعضوية مجلس الشعب من خلال خبرتك كناخب أو كفلاح أو كمتابع للأوضاع البرلمانيه فيما يتعلق بقضايا العمال والفلاحين إن شايف إن اللي عبر عنها كان بصدق كان فلاح أم ليس شرطاً أن يعبر عنها فلاح من الممكن ان يعبر عنها أي مهتم بشؤن الوطن
الحاج محمد برغش:والله يا دكتور خالد أنا عندي باقات ورد عايزه أهديها الأول قبل با أبدأ كلامي باقة الورد الكبري لشهداء مصر من أول أن قامت مصر الي اليوم فلولاهم ما كنا في هذا العرس وفي هذا المكان .. ثاني باقة مرد لشعب مصر صانع ثورة 25 يناير وجيش مصر العظيم ومجلسه الأعلي للقوات المسلحه الذين أعطوا نموذجا متفرداً في كل شيئ .. ثالث باقة ورد أعطيها لجيراني الي المستشار مصطفي عبد الجليل اليوم وعرسهم اليوم وأقول لهم كل قبلات الشعب المصري لكم وقال كلمات دكتور خالد لابد أن تطبع علي جبين كل عربي قال الشكر لله بالسجود علي نعمة النصر وتبعها بكلمه أبكتني والله يا دكتور خالد قال والآن العفو والصلح والمغفره لكل اللي ييجي علي أرض ليبيا فشكراً سيادة المستشار مصطفي عبد الجليل وأعانك الله علي حملك .
نيجب بقي لعضوية مجلس الشعب ومجلس الشوري والنيابيه
خالد عاشور: مين عبر بصدق عنكم
الحاج محمد برغش:كفلاح .. الله يرحم المرحوم فكري الجزار - الله يرحم عبد المولي عطيه – الله يرحم أحمد يونس وغيره كثرٌ ولكن من 10-15 سنه لم يكن هناك نبت طيب ليعبر عن الفرح والعامل
خالد عاشور: طيب النماذج اللي حضرتك ذكرتها ديه كانت صفتها الإنتخابات
الحاج محمد برغش:فلاحين من نبت الأرض ومن الجحور والشقوق هؤلاء كانوا في فترات سابقه أما لما إستجد الأمر وجاءت الأمور بما لا تشتهي السفن أصبح كل شيئ دليفري يعلبوه ويحطوه في كرتونه ويكتبوا المسمي عامل فلاح تلاقي واحد لامؤاخذه كان لواء يدوا له عامل – تلاقي واحد كان مش عارف إيه رجل أعمال يدوا له فلاح وهالوما جره عندما سلبوا مننا الصفه ضاعت الهويه وضاع التمثيل وأصبح العامل والفلاح في جرمٍ مورس عليهم وقهر أسوأ ما خرجت من قوانين جارت علي العمال فيمن سرقوا صفة العامل وأقذر ما حقَّر شأننا كفلاحين من قوانين وأمور علينا كفلاحين يوم إنتهي الفلاح ولم يصل الي مجلس الشعب من سرقوا صفاته خلعوها علي باب مجلس الشعب وطردوها وفي أقرب صندوق زباله حطوها لأنهم ليسوا منا لا يهمهم شكلنا ولا يهمهم رسمنا وذهبوا الي صفاتهم فكانوا خير ممثلين صفتهم وليسوا لنا
خالد عاشور: أو علي الأقل ليسوا علي درايه بقضايا الفلاح
الحاج محمد برغش:لم يعرفون ولم يتعلمون ول يتثقفون
خالد عاشور: الحاج محمد صبح الدبش رصد خلال الحياه البرلمانيه السابقه في مصر علي الأقل خلال ال 15 سنه اللي فاتوا إهتمام بشؤون الفلاحين
الحاج محمد صبح الدبش :من 15 سنه ما كنش فيه حاجه إسمها فلاح إتمسح حتي من القاموس المصري إتمسح كلمة فلاح اللي بييجي متقمس أو متعلب ومكتوب عليه المهنه بتاعته فلاح وهو لوا ما يعرفش حاجه عن الفلاحه ما يعرفش البرسيم بيدبدر إمتي القمح بنزرع إمتي بيتعزق الذره أمتي وبيتخف إمتي ما يعرفش حاجه بس هو نزل علينا بالبرشوت علي إنه فلاح وما بنشفوش لإن أنا عندي في دائرة التلين اللواء يحي عزمي بقدرة قادر راح لحسين مجاور غير صفته من لواء فئات لفلاح قال إترشح فلاح سيادة اللواء الفلاح أعلنت النتيجه الصناديق إتقفلت الساعه 7 ضرب النار إشتغل إن إعلنت النتيجه بفوز يحي عزمي لإن أخو زكريا عزمي يعرف إيه عن الفلاح والله ما يعرف حاجه
خالد عاشور: طيب نسمع وجهة نظر برلماني نشيط جداً وهو الأستاذ البدري فرغلي
الحاج محمد برغش:طبعا دا عطر
الحاج محمد صبح الدبش :دا عطرنا ده
خالد عاشور: العضو الأسبق بمجلس الشعب عن العمال .. أهلا بك أستاذ بدري .. مساء الخير أهلا بك
أ. البدري فرغلي : أيو مساء الخير
خالد عاشور: أستاذ بدري إحنا بنتكلم عن نسبة العمال والفلاحين ال 50% عمال وفلاحين في مجلس الشعب القادم لإن كان فيه أصوات كثيره بتطالب بإلغائها خاصةً إن تم سرقتها كما تعلم حضرتك ويعلم الجميع تحت إسم عمال وفلاحين دخل المجلس أناس كثيرين ليسوا بعمال ولا فلاحين
أ. البدري فرغلي : الكلام اللي أنا سمعته دلوقت كلام يبكي وحزِّن ويبين إزاي اكبر الطبقات في مصر والأكثر إنتاجيه وعطاءاً في مصر إزَّات تم سرقتها الناس بتسرق فلوس بتسرق بنوك لكن ديه سرقه طربقات الطبقه العامله المصريه وطبقة الفلاحين تم سرقتهم وإغتيالهم سياسياً أصبحنا علي الورق يعني أنا عامل الاقي العامل هو رجل الأعمال والإقطاعي هو الفلاح اللواء هو الفلاح إذاً تم إغتصاب كبر طبقتين في مصر بيشكلوا ما يوازي 70% من المجتمع المصري إحنا إتسرقنا سياسياً إختلسونا سياسيا هل تعلم إن العمال في البرلمان لا يتجاوز 5 أو 10 أعضاء هم والفرحين رغم إن الدستور أعطاهم نصف المقاعد
خالد عاشور: 5 أعضاء فقط ينطبق عليهم وصف فلاح أو عامل فعلا
أ. البدري فرغلي : أنا حضرت 3 برلمانات أنا لم أري في البرلمان 15 سنه متصله – يعني واحد إسمه فلاح أنا اللي كان بيقعد جنبي الله يرحمه فكري الجزار كان الفلاح اللي موجود تدور علي الفلاحين في القاعه – هل تعلم إن الفلاحين الممثلين بإسم فلاحين هم أو من وقفوا ضد الفلاحين بقوانين طرد من الأراضي الزراعيه اللي قاعدين فيها 50 و70 سنه الفلاحين هم اللي طلبوا بطرد الفلاحين من الأرض إذاً لم يكونوا فلاحين كانوا بيلبسوا جلابيه فقط - الجلبان من اجل الزينه من أجل الديكور كانوا بيمثلوا علي الفلاحين أما العمال فكانت مصيبتهم أكبر العمال في البرلمان هم اللي وافقوا علي برنامج الخصخصه – العمال هم اللي شردوا العمال – العمال في البرلمان هم اللي رفعوا إيديهم لإغتيال عمال مصر وهم اللي وافقوا علي القانون 12 قانون العمل وهم اللي حولوا عمال مصر حوافز للإستثمار هل تعلم إن عمال مصر الآن هم حوافز للإستثمار ما هماش بشر إذن الناس اللي بتتكلم عن ضرورة عزل العمال والفلاحين من البرلمان عليهم أن يعلموا إن العمال والفلاحين لم يمثلوا أصلا في البرلمان وإن اللي بيدعوا الآن إن إحنا عبء سياسي علي البرلمان والحياه السياسيه عليهم أن يعلموا إنهم سرقونا وسرقوا الصبغه السياسيه بتاعتنا هل يمكن لعامل يشغل ثلاث تربع مليون جنيه في البرلمان
خالد عاشور: إيه الضوابط اللي بتقترحها لكي تنطبق صفو فلاج أو عامل علي المرشح
أ. البدري فرغلي : أولا لابد من صدور تشريع يحدد الصفه الحقيقيه للعامل والفلاح هل تعلم إن السفه الحاليه اللي موجوده الآن هي صفة السبعينات يقول لك "كل من يحصل علي أجر من عمله فهو عامل" مين قال لك الكلام ده .. طيب ما هو رئيس الجمهوريه عامل طيب ما هو الوزير عامل كله بيأخذوا أجر إذن ما يبقاش بالشكل ده يقول لك " كل من حصل في بداية حياته علي مؤهل متوسط فهو عامل " وبعد كده أصبح رجل أعمال ويملك 10 شركات ويبقي عامل واللي بيشتغلوا عنده فئات إذن لابد من تشريع حقيقي يعني هل تعلم إن المدرس يبقي فئات والمهندس يبقي فئات ودول بيشتغلوا بأجر أقل من أي شيئ آخر وراجل الأعمال يبقي عمال إذن فلابد من تصحيح الأوضاع .. أنا مع إستمرار هذه الصدفه لكن مع تطويرها يعني هذه الصفه معموله علي أساس إن آخرين يسرقونا حيسرقوا الصفه ليه إيه اللي يخلي لوا شرطه أو لوا جيش يبقي فلاح مين قال له إن إنت فلاح إيه اللي يخلي راجل الأعمال يبقي عامل مين قال لك إن إنت عامل وبالتالي مطلوب تشريع حقيقي مطلوب تصنيف فكرة العامل والفلاح
خالد عاشور: أ. بدري إحنا بنشكرك مؤقتاً لكن إسمح لي نتواصل معاك مره ثانيه في هذه الحلقه لإن في الحقيقه حضرتك طرف مهم في هذه القضيه أشكرك شكراً جزيلاً وعوده لك مره أخري بعد قليل إن شاء الله ..الحاج محمد برغش دلوقت إحنا بنتكلم عن الضوابط
الحاج محمد برغش:الضوابط موجوده
خالد عاشور: إزاي تقترح تبقي إيه
الحاج محمد برغش:أولا بالنسبة للعامل لابد أن يكون عضو في وحده نقابيه قاعديه وليس له أجر إلا من العمل وليس له معاش إلا من العمل وأن يكون بدأ حياته النقابيه في وحده قاعديه بتاعة ال25 أو ال 50 أما الفلاح – الفلاح ليس من يملك الأرض لابد أن يكون الفلاح " فلاح يقوم بالعمل ليس له رقم تأميني من أي وظيفه أخري إلا من عمله إذا كان مأمن علي نفسه تأمين شخصي ماشي لكن لا يكون له دخل من غير الفلاحه لا يكون له معاش من غير الفلاحه
خالد عاشور: ما فيش هو فيه معاش للفلاح
الحاج محمد برغش:آه إنت ممكن تأمن علي نفسك
خالد عاشور: بس مش كل الفلاحين مأمنين
الحاج محمد برغش:آه مش كله بس ما يكنش لك أي عائد مادي
خالد عاشور: ما هي ديه مشكله قائمه دلوقت
الحاج محمد برغش:ما يكنش لك عائد مادي لا من وظيفه ولا من معاش لعمل آخر بشرط أن تكون أنت تزرع الأرض ومعيشتك عليها أما الآن هي زي ما بقول المثل اللبناني حرض كل من إيد ولد النهارده تلاقيهم بالملايين – بالآلاف صفوف عند نقابة العمال وإحنا نجوم الجمعيات كأن الواحد مثلاً أبو ورث قيراطين ولا ثلاثه ولا أربعه بقي فلاح الطاسه ضايعه – طيب إحنا السنه ديه ما هو موجود في الإعلان الدستوري هو نفس اللي موجود في القديم إيه هو أن تقوم بتقديم تعهد علي نفسك إنك عامل أو فلاح - طيب إنت قدمت تعهد علي نفسك وما إنتش عامل ولا فلاح حأقعد أقاضيك 5 سنين لحاد ما أثبت صفتك أنت عامل أم فلاح فالتوصيف ضروري لابد أن يكون هناك ضوابط – من يتكلم علي إلغاء 50% من العمال والفلاحين فهو متنظر ومتندر ولا قول له وإحنا كعمال وفلاحين بنعتبره مش موجود لسبب حضرتك دلوقت ولمؤاخذه – يعني شيئ واحد أنا بأعتبره معيب في حقي كفلاح وبأعتبره معيب في حق أخي العامل " الأول قالوا لنا 50% قائمه نسبيه و50% فردي " طيب هل من يمتطون الفضائيات يومياً ويمتطون الصحف يومياً كم عددهم 2مليون – 3 مليون – 4 مليون – 5 مليون شعب مصر 85 مليون عامل وفلاح
خالد عاشور: نسبه ديه دقيقه أو قريبه من الدقه
الحاج محمد برغش:قريبه من الدقه وموجوده وبيني وبينكم لامؤخذه الجهاز المركزي للإحصاء
خالد عاشور: 50 % عمال وفلاحين
الحاج محمد برغش:آه أمال إيه وأكثر من 60 مليون عمال وفلاحين
خالد عاشور: حضرتك بتقول 50 مليون مش 50%
الحاج محمد برغش:أكثر من 50 مليون عمال وفلاحين من يتندرون ويتنذرون ويأتون يومياً في الفضائيات وفي الصحف لا يملكون إلا صوت نفسهم وبأقول لك يا دكتور خالد وأيام قريبه للإنتخابات وبعدها تبدأ النتائج سوف تصفعهم الحقيقه وسوف يأتي من لا يفكرون فيه وسوف يذهب لمجلس الشعب أطياف غير الأطياف والنهارده لامؤاخذه من حنكوا الناس .. أولا شوف لامؤاخذه دا إحنا حصل عندنا أسوأ من الحزب الوطني اللي فات لإن الناس دلوقت بتتصرف بأنانيه أكثر من الحزب الوطني
خالد عاشور: إزَّاي ؟
الحاج محمد برغش:إزاي هناك من يقول إنني سأترشح علي 70% وحآخدها هناك من يقول 30 % وكأن مصر بدل ما تبقي 100% بقة 1000% يعني حتي كفروا بالأرقام وحقيقتها .. النهارده لامؤخذه لما قلت لحضرتك قبل كده
خالد عاشور: ديه دعايات إنتخابيه ممكن لا يصدقها الواقع لكن إحنا بنبحث عن العامل والفلاح
الحاج محمد برغش:لنا مقابله إن شاء الله إذا في العمر بقيه وستصفع من تندروا وتنذروا وشد خيط الحرير علي رقاب الناس سوف تصفعهم النتائج وهذا قولي وأنا مسؤول عنه
خالد عاشور: الحاج محمد صبح الدبش
الحاج محمد صبح الدبش :نعم
خالد عاشور: إنت شايف إيه ممكن يضاف للضوابط ثاني غير اللي قاله الحاج محمد ؟
الحاج محمد صبح الدبش :الضوابط لابد إن كل من يترشح علي صفة العامل زي ما قالها أخويا الحاج محمد برغش لابد أن تكون مهنته الحقيقية أن يكون عامل وعضو في اللجنه النقابية من اللجنه القاعديه أما الفلاح مش كل واحد ورث قيراطين عن أمه ولا عن حماته ولا عن مراته ييجي يبقي سيادة اللوا الفلاح وسيادته صاحب شركة سيراميكا كيلوباترا يبقي عامل لأ دا ديه كده يبقي إحنا علي مذهب سديك علي أبو توكتيكه يعني يبقي إيه
خالد عاشور: إيه علي أبو توكتيكه هههههه
الحاج محمد صبح الدبش :علي أبو توكتيكه ديه يبقي إيه "أ " قتل " ب" نحكم علي ظل " أ " بالإعدام وعلي " ب " يصحي من القتل لأجل "أ" يقتله عشر مرات
خالد عاشور: تمام يعني نوع من أنواع التحايل
الحاج محمد صبح الدبش :تحايل أنا عايز الفلاح يبقي فلاح اللي مهنته الفلاحه لإن ما حك جلدك إلا ضفرك
خالد عاشور: تمام مظبوط لكن نثبت إزَّاي إن هو فلاح ما دام مش كل الفلاحين مأمنين علي نفسهم ولا لهم معاش ومافيش رابطه نقابيه تجمعهم هل الجمعيه الزراعيه كافيه
الحاج محمد برغش:طبعا الجمعيه الزراعيه كافيه
الحاج محمد صبح الدبش :كافيه ونصف دا بيجيب شهاده من الجمعيه الزراعيه ويجيب صورة الحيازه وبيجيب بطاقته مثبوت فيها فلاح
الحاج محمد برغش:وأهم من كده يا حاج محمد لازم يروح التأمينات يجيب شهاده إنه غير مثبت
الحاج محمد صبح الدبش :إنه مش مؤمن عليه كعامل في الجامع ولا فراش في المدرسه ولا لوا ولا صاحب مصنع لأ أنا عايزه يبقي يجيب شهاده من التأمينات – إمتي شهادة التأمينات تمشي لما يقولوا دا بنطبق عليه القانون 112 فقط اللي هو معاش السادات هو ده الفلاح لإن ما تنسوش يا جدعان حرام إتقوا الله في الفلاح – الفلاح ده آهوه اللي إيده السودا اللي الشمس حرقتها ديه هي اللي بتجيب للمشير وعصام شرف وغيره وغيره الرغيب الأبيض اللي بياكلوه إطلقوا تثمين البتلوا الفلاح لما يربي عجل ويثمنه مش حنوديه المتحف لا والله دا إحنا حندبحه المشير والوزير معاهم فلوس حيشتروا الكيلوا اللحم الأحمر وإحنا الفلاحين معناش نشتري كيلوا اللحم الشعت بتاعتهم يعني إحن بنقول لهم إتقوا الله فينا
خالد عاشور: طيب الحاج معمد برغش قيل في سياق الإعتراض علي نسبة ال50% عمال وفلاحين إن عضو مجلس الشعب أو النائب البرلماني ينبغي أن يمتلك حد أدني من الثقافه والمعرفه لإنه مش حيتكلم بس في قضايا العمال والفلاحين حيتكلم في قضايا تشريعيه
الحاج محمد برغش:طبعا وحيراقب وكل شيئ
خالد عاشور: قضايا تهم الوطن كله وتهم الأمن القومي كله ودا لا يتوافر في كثير من الفلاحين مش حنقيس علي حضرتك ولا علي الحاج محمد الدبش
الحاج محمد برغش:أنا أقلهم وخادمهم وخادم ترابهم أهلي الفلاحين
الحاج محمد صبح الدبش :إحنا أقل الناس – أقل الناس في الفلاحين
خالد عاشور: علي فكره مش بنصنف أنا بأتكلم علي حدود المعرفه
الحاج محمد برغش:أنا عندي السوق الذي يقطع الشك النهارده الدكتور خالد
خالد عاشور: هو الفلاح علي فكره مش مطالب إن هو يبقي مثقف والا قارئ
الحاج محمد برغش:لا.. لأ مطالب إن هو يكون في أحسن صوره وأحسن هيئه
الحاج محمد صبح الدبش :آه أمال إيه مطالب
خالد عاشور: مطالب إن يكون في أحسن صوره وأحسن هيئه لكن ليس مطالباً أن يكون علي إلمام بكل القضايا اللي حيثيرها داخل البرلمان
الحاج محمد صبح الدبش :لأ يا بيه لازم يكون
خالد عاشور: الراجل بيزرع ويقلع
الحاج محمد برغش:أستأذن أخويا الحاج محمد فيه نقطه مهمه جداً النهارده لم يتعين في سدة الوظيفه من المصريين من 25 ومن 20 سنه فاتوا طيب ما دول عيالنا وجسدنا وبياكلوا علي طبليتنا ومعانا في الغيط – تمام – طيب ما هو دول أنبل أنواع الفلاحين حاملين والله ماجيستير دكتوراه وبكالوريوس وليسانسات ومن سطوة المجتمع لكنهم بيقين الفتره في زرع الله ومع الله
خالد عاشور: بيشتغلوا في الأرض
الحاج محمد برغش:بيشتغلوا في الأرضض
الحاج محمد صبح الدبش :لإن ما فيش وظائف
خالد عاشور: دا الجيل التالي لكم يا حاج محمد أبناءكوا وأحفادكوا
الحاج محمد صبح الدبش :دا الجيل الثالث
الحاج محمد برغش:إحنا اللي حندخلهم الإنتخابات دول وحندفع بهم وحنشرف بهم وحنخليهم يلطموا أصحاف الياقات وأصحاب من تنظروا علي أهاليهم ومن تندروا علي صفة أهاليهم أخذت بال معاليك تعالي يا دكتور خالد إحنا عشان نزرع لابد أن نتثقف لابد أن نتعلم لابد أن نتصل بأحسن شبكات الإنترنت في العالم لابد لإن الآن الزراعه تصنيع زراعي
خالد عاشور: ما هو دا مأمور لكن دا مش واقع يا حاج محمد
الحاج محمد برغش:موجود واقع
خالد عاشور: لأ ما علهش ال50 مليون اللي هم عمال وفلاحين مش علي نفس المستوي من الثقافه والمعرفه
الحاج محمد برغش:يا دكتور خالد
خالد عاشور: بس رد لي علي النقطه ديه بس
الحاج محمد برغش:أنا بس فيه نقطه مهمه إنت لما بتروح دلوقت لموأخذه تصيد السمك إيه اللي بطلع في سنارتك الليقه للأكل لما بتنزل لموآخذه بحيرة سمك بتصيد السمكه اللي لايقه للأكل يبقي إذن هل 50مليون 60 مليون ما حيفرزوش 300- 400 – 500 ويطلعوهم أحسن مرآه يمثلون الفلاحين والعمال حاشي لله والله عندنا آلاف مؤلفه يكفي إن جسد الفلاحين الطاهر ما تولسش الآن .. سيدي الفاضل العامل والفلاح ينتج أمن قومي لسبب نحن العمال ونحن الفلاحين إذا كنا في رغد تحقق الأمن الإجتماعي وإذا كنا في بحبوحة من العيش تحقق الأمن الإقتصادي وهذا هو منظور الأمن القومي
خالد عاشور: طبعا .. طبعا
الحاج محمد برغش:ما فيش واحد بيتندر ويقعد علي التلفاز بالليل وينط من فضائيه لفضائيه بينتج أمن قومي بينتج كلام بن عم حديت نحن أهل الإنتاج نحن أهل الصناعه نحن ننتج الأمن القومي وندعِّمه ونحن سند مصر وعضضها ولن تكون مصر من غيرنا
خالد عاشور: صحيح .. طيب نرجع ثاني للأستاذ البدري فرغلي
الحاج محمد برغش:إتفضل
خالد عاشور: أستاذ بدري سؤالي لحضرتك تابعت تصريح الدكتور أحمد حسن البرعي وزير القوي العامله اللي طالب فيه بإلغاء نسبة ال 50% عمال وفلاحين وبدعوي إن هذه الفئه لم تعد أقليه لكي تمثَّل فيما يشبه الكوته
أ. البدري فرغلي : أنا حأقول لسيادتك شيئ مهم .. أنا عامل شحن وتفريغ في ميناء بورسعيد .. أنا تقدمت بإستجوابات هي أعلي نسبه إتقدمت في البرلمان في تاريخ حياة البرلمانيه ولم أترك ماده في قانون إلا وكتبت تعديل عليها ولم أترك مجال في المجالات البرلمانيه إلا ما كنت واحد فيه إذاً الثقافه اللي موجوده مش مرتبطه بالمؤهل الدراسي أنا ما معاييش مؤهل دراسي لكن البرلمان كان يصمت وينصت عند سماعي وأنا ما معييش بيان إذن الإعتداء علي الطبقات في مصر يجب أن يكون له أسباب أولا يجب أن تعلم إن نسبة الفلاحين هي مسألة إنسانيه ومبتكره في العالم البرلماني وإن ديه ضروره إجتماعيه – كيف يمكن للأغلبيه العظمي من المجتمع أن تمثَّل برلمانياً وإن العامل والفلاح بيحتاج ثلاث تربع مليون ونصف مليون و2 مليون علشان يدخل البرلمان – هل يوجد فلاح حقيقي أو عامل حقيقي يستطيع أن ينفذ داخل البرلمان وهو لا يمتلك حتي قيمة تقديمه للإنتخابات .. يعني الألف جنيه اللي الواحد حيدفعها علشان يخش الإنتخابات غير متوفره مع الفلاح ولا مع العامل إذن لابد من غطاء سياسي يحمي العمال والفلاحين وهو الحزب – لو إحنا عندنا حزب للعمال أو حزب للفلاحين هذا الحزب يوفر الغطاء الثقافي والغطاء المادي لي إن هو يستطيع أن يقدم للبرلمان عمال وفلاحين
خالد عاشور: ديه نقطه مهمه جدا يا أستاذ بدري
أ. البدري فرغلي :لكن تجردنا .. إحنا ممنوعين بحكم القانون وممنوعين بحكم الدستور
خالد عاشور: إزاي ممنوعين بحكم القانون يا أستاذ بدري
أ. البدري فرغلي :أيوه القانون فتح باب عماليه – يعني خلي بال سعادتك الظلم السياسي وقع علينا ودا واقع من النظام السابق ومستمر حتي الآن إحنا كعمال ممنوعين يبقي لينا حزب – إحنا كفلاحين ممنوعين يبقي لينا حزب لكن هم رجال الأعمال يبقي لهم 20 حزب يبقي إذن إنتوا بتفترسونا سياسياً إنتوا بتحرموا علي العمال حزب ليه ما هو الحزب هو اللي حيقدم مثقفين العمال – الحزب هو اللي حيقدم مثقفين الفلاحين لكن عدم وجود درع سياسي وعدم وجود غطاء سياسي يحمي العمال والفلاحين أصبحنا متشددين سياسياً
خالد عاشور: رائع النقطه ديه يا أستاذ بدري .. طيب النقطه ديه حنثيرها الحقيقه دا جيد جداً اللي حضرتك ذكرتها لكن سؤالي أليس من المفارقه وزير القوي العامله يطالب بإلغاء نسبة ال 50% عمال وفلاحين بدعوي إن هذه الفئه لم تعد أقليه حتي تعطي ما يشبه الكوته ؟
أ. البدري فرغلي :أولاً إحنا مش أقليه لكن خلي بالك فيه نقطه مهمه الثقافه هي اللي بتحدد الأقليه والأغلبيه يعني ثقافة الأغنياء هي السائده ثقافة رجال الأعمال هي السائده أما ثقافة العمال والفلاحين الأغلبيه العظمي من المجتمع فئة أقل وبالتالي هو فكرة الدكتور برعي هو فكره وجيهة جداً لكن هو تنقصه أساساً موضوع الغطاء السياسي إسأل الدكتور البرعي جميع العالم كله في أحزاب العمال – العمال بتحكم خلي بالك ثلاث تربع وربع إنتوا بتحرمونا ليه وبالتالي أنا مستعد أتنازل عن نسبة العمال والفلاحين في مقابل يكون لنا حزب عمال وحزب فلاحين هذا هو المخرج اللي بيخلي رجال الأعمال دلوقت ينقضوا علي الصفة العماليه بتاعتنا وينقضوا علي الفلاحين إنتهي الأمر .. هل تعلم إن الإتحاد العام العمال المصور هل تعلم إن دا أول من رفع إيده في البرلمان وطلب بالخصخصه وتشريد العمال آدي الإتحاد العام العمال .. هل تعلم إن الإتحاد العام العمال كان أغلبه رجال أعمال وقيادات كبيره في مجالس الإدارات .. هل دول عمال بالتالي أنا بأقول لسيادتك لا حل لنا إلا المخرج السياسي إتركوا لنا أحزاب وخذوا نسبة العمال والفلاحين إذا منعتونا من الأحزاب يبقي إذن لابد أن تتم عملية تنقية – خلي بالك من اللفظ – تنقيه لصفة العمال والفلاحين – يتم تنقيه بتشريع يعطي شفافيه لمن هم عمال وفلاحين لكن لا تتركونا بين الذئات وتقولوا لنا إنتوا آخذين نسبة غلط والكوته غلط مين قال غلط دا ديه شيئ قدمنا للإنسانيه شيئ قدمته ثورة يوليو للبشريه إن هي تحافظ علي إنسانية المجتمع وأن تعطي للأغلبيه العظمي حق التمثيل في البرلمان – هو دا مش حرام الثقافات بتختلف أرجوك كل شعب من الشعوب له بصمه إحنا الشعب المصري له بصمتنا هناك في ألمانيا أو في بريطانيا أو في فرنسا له بصمتهم ما حدش ينقل ثقافات خارجيه لثقافة الشعب المصري إحنا قدمنا صفه إنسانيه من أجل حماية أغلبية الشعب سياسيا
الحاج محمد صبح الدبش :أستاذ بدري إحنا بنشكرك شكراً جزيلاً علي المداخلتين اللي حضرتك تفضلت بهما في البرنامج
الحاج محمد برغش:وإحنا بنشكره
الحاج محمد صبح الدبش :إحنا بنشركه والله
خالد عاشور: والحقيقه طرحت أفكار رائعه وبدائل جيده جداً لمسألة الضوابط اللي إحنا إتكلمنا عنها ضوابط الصفه البرلمانيه للعمال والفلاح .. مسألة الحزب أنا بس في الحقيقه ما فهمتش إيه المانع الدستوري والقانوني من تكوين حزب
الحاج محمد برغش:ما أنا حأقول لك يا معالي الباشا المثل الفلاحي عندنا الفلاحين بيقولوا إيه لو حبتك عيني ما ضامك الدهر .. خد يا دكتور خالد هل شوفت فصيل ديني في مصر وهم كثر إلا وله حزب – هل شوفت فصيل سياسي في مصر إلا وله حزب يجوا عند البطه السودا وهم الفلاحين ويقول لك إيه لو حملت حزب فلاحين يبقي حزب فئوي ممنوع تيجي عن ولاد المحترمين العمال يقول لك دا حزب فئوي ممنوع.. يا أخي إنت بتنكر عليَّ ال50% طيب ما تلغي المانع القانوني الذي تسميه بمظلةٍ سوداء فئوي علي العمال وفئوي علي الفلاحين وأترك لي كفلاح إن أنا أعمل حزبي واترك لي كعامل إن أنا أعمل حزبي .. لماذا تركت لكل الفصائل والجماعات الدينيه وهم إخواننا ونحترمهم أن يسموا أحزابهم .. لماذا تركت لكل الحركات السياسيه بمسمياتها وبمعتمادتها
خالد عاشور: دا مانع قانوني نصاً
الحاج محمد برغش:آه مانع قانوني موجود لو الفلاح عمل حزب يقول لك دا حزب فئوي
خالد عاشور: ممنوع الحزب الفئوي
الحاج محمد برغش:أه لو عامل عمل كذا .. طيب لموآخذه أشوف كلامك أصدقك أشوف أمورك أستجنن طيب ما إنت يا إما تديني نسبتي وتبقي عليَّ غصب عنك وإما ترفع المظله وتتركني حالي حال الناس
خالد عاشور: يعني هو لعل المشرع في هذه الماده يقصد إن الحزب دا فصيل سياسي ينبغي أن يجمع كل فئات الشعب
الحاج محمد برغش:يفتحوا لكل الناس نسميه حزب كل المصريين – بس باي ذا نيم بيراعي الفئه ديه – طيب ما نفتحه للعمال التانيين باي ذا نيم نخليه لكذا صح يا حاج محمح
الحاج محمد صبح الدبش :صح
خالد عاشور: ديه نقطه مهمه يا دكتور خالد في الموضوع كله إيه هل إنطوي الدستور المصري علي التمييز أم أن الفلاح إبن التمييز – هل إنطوي الدستور المصري علي التمييز أم أن العامل إبن التمييز لابد أن ينتفي التمييز ونحن في مصر الثوره أنا بأوجه نداء الي سيادة المشير محمد حسين طنطاوي أن يرعي الفلاح والعامل بحزبين ليجعلهما من ضمن صنوف المجتمع وأدواته
خالد عاشور: طيب أنا حأسمح رأي الحاج محمد الدبش بس بعد ما نسمع مع بعض مداخله الفنان الجميل الأستاذ محمد ثروت أهلا بك يا أستاذ محمد
الفنان محمد ثروت :السلام عليكم
خالد عاشور: وعليكم السلام ورحمة الله وبركاته
الفنان محمد ثروت : إزيك يا أستاذ خالد وإزي ضيوفك الأعزاء
خالد عاشور: أهلا بحضرتك إن منورنا النهارده يا أستاذ محمد
الفنان محمد ثروت :ربنا يبارك فيك .. أنا سعيد بالكلام اللي بأسمعه لأن الفلاح هو مصر ومصر النهارده عندها خطين رئيسيين في الرفعه والتقدم الزراعه بكافة فروعها زي الزراعه والثروه الحيوانيه الداجنه والسمكيه والسياحه والإثنين لو تم التكامل بينهم عندنا أدواتهم الفلاح المصري بفترته وسليكته نذ فجر التاريخ وبالتالي أنا عندي مقومات النهضه وفي وقت قصير مش حيطول بس لوإحنا طبقنا وإعتصموا وأعدوا وأعملوا اللي هي واو الجماعه .. الحاجه الأهم يا حاج محمد وإحنا إتكلمنا في الموضوع دا قبل كده وقلنا عايزين نعمل كتائب التعمير مش كده
الحاج محمد برغش:معاك .. معاك والله
الفنان محمد ثروت : كتائب التعمير يا أستاذ خالد مشروع بنتعشم إن" إن شاء الله" يري النور
الحاج محمد برغش:الفنان محمد ثروت صاحب الفكره
الفنان محمد ثروت : يتم زراعة جميع الأراضي الخاليه اللي صرفنا عليها .. جمهورية مصر العربيه صرفت عليها وكتائب التعمير تكون من شبابنا – شباب مصر سواء من الفلاحين أو حتي من المتعلمين اللي عايزين يشاركونا علشان نقدر ننهض بالحاله الغذائيه اللي هي مشكلة كل بيت مصري " أسعار الغذاء " .. الحاله الثانيه يا حاج محمد إحنا قلنا إن إحنا برضه عايزن نعمل تجمع والتجمع دا وليكن مش عايزين نخش في تفاصيل مثلاً إيه المعوقات القانونيه لكن لو إحنا عملنا حاجه حزب زي حزب الناس – الناس ديه تشكيلة كل البشر اللي موجود علي أرض الساحه
خالد عاشور: هو إقترح إسم آهوه الأستاذ
الحاج محمد برغش:دا جميل جداً يا فنانا العظيم
الحاج محمد صبح الدبش :شكرا يا فنان
الفنان محمد ثروت : ما تيلا بقه نتكلم بجد عشان ما نضيعش وقتنا ومش عايزين نسخن إلا في الشغل اللي نقدر نعمله
الحاج محمد برغش:مستنيين الدعوي الكريمه يا فنان
الفنان محمد ثروت : إحنا مستعدين نتكاتف مع بعضنا ونحظ إيدينا في إيدين بعض وبعدين الفرحين مننا وإحنا من الفلاحين والعمال مننا وإحنا من العمال فمحتاجين بقه نترجم الكلام ده بشكل عملي لإن أنا شايف إن إحنا بنتكلم .. بنتكلم .. بنتكلم .. بقالنا 9 أشهر دلوقت لو كنا النهارده بلغة الفلاحين زرعنا كنا زعلنالنا زرعتين مظبوط
الحاج محمد برغش:كلمك محترم والله
الفنان محمد ثروت : بعد كده يا حاج محمد حأستني تليفونك
الحاج محمد برغش:حاضر.. حاضر
خالد عاشور: تمام أشكرك شكرا جزيلاً يا أستاذ محمد ودائماً بإذن الله حتبقي في طليعة هذا الحزب إن شاء الله
الحاج محمد برغش:دا فلاح معانا الأستاذ محمد صبحي
خالد عاشور: الأستاذ محمد ثروت
الحاج محمد برغش:آه معايا في نفس الجمعيه عنده 30 فدان بيزرع الفنان محمد ثروت
خالد عاشور: إذن قدامنا تحديات في البرلمان القادم إن شاء الله بغض النظر عما سيحمله إلينا من عمال وفلاحين ممن بالفعل إنطبق عليهم صفة فلاح وعمال أو ممن تسلل إن شاء الله ما يبقاش فيه متسللين بإذن الله ههههه
الحاج محمد صبح الدبش :لأ إن شاء الله فيه ههههه
الحاج محمد برغش:هههههههههه
خالد عاشور: الحاج محمد الدبش قول لي أهم التحديات اللي حتقابل البرلمان القادم فيما يتعلق بمشاكل الفلاحين .. أول حاجه نلغي الماده اللي تحظر حزب الفلاحين
الحاج محمد برغش:والعمال كذلك
خالد عاشور: آه طبعاً أي الحزب الفئوي
الحاج محمد صبح الدبش :أهم حاجه المولي سبحانه وتعالي قال لنا في صورة الواقعه ثلاث آيات جمال جداً " أفرأيتم ما تحرثون أءنتم تزرعونه أم نحن الزارعون ولو نشاء لجلعناه حطاماً فظلتم فكهون صدق الله العظيم إن عارف الفلاح وهو بيبدر إيه النجار بيروح يشتري متر الخشب عارف حيطلع منه كام باب وكام سرير وكام شباك إنما الفلاح – الزرعه الوحيده – المهنه الوحيده اللي فيها التوكل علي الله لإن بيبقي ماشي ماسك البذره في حجره وبيعمل كده
الحاج محمد برغش:وبيقول بسم الله .. بسم الله
الحاج محمد صبح الدبش :ويقول بسم الله الرحمن الرحيم " أءنتم تزرعونه أم نحن الزارعون " الزرعه ديه النبته – البذره اللي بتترمي في الأرض ديه وبيرميها عشوائي آهوه ما بتنبتش إلا المولي صبحانه وتعالي يرفع دماغها لفوق من أجل النبته تطلع لفوق تيجي النهارده دا إحنا المفروض – دا مصر – ربنا قال في صورة البقره إيه " إهبطوا مصر لكن فيها ما سألتم " ما سألتم – ما سألتم .. كلوا من فومها وعدسها وبصلها وكثائها .. نيجي في صورة يوسف من الآيه 39 ل 49 عرفنا ربنا إزَّا نخزن القمح
خالد عاشور: ههههه تمام .. تمام إحنا عايزين نتكلم بشكل عملي 1-2-3 إيه التحديات التشريعيه اللي المفترض البرلمان القادم حيزيل بها عن كاهل الفلاح كل ما عاناه من ظلم
الحاج محمد صبح الدبش :نرفع القيود عن الفلاح والعامل ديه واحد نمره 2 أدي تعظيم سلام لبنك التسليف وأقول له وأقول له روح بقي كتر خيرك
الحاج محمد برغش:نبوسه ونحطه جنب الحيط
الحاج محمد صبح الدبش :لإن شيكارة الكيماوي 75 جنيه للفلاح اللي بيجيبها بواسطه من الجمعيه إنت عارف سعر المصنع بتاعها بأد إيه ب35 جنيه البنك بياخد 35 علي ال35 والجمعيه بتاخد 5 جنيه البنك ياخد 35 من عرق الفلاح ليه عشان ندي للموظف 3 شهور كل شهر والفلاح مش لاقي ياكل
خالد عاشور: بنك التسليف ماشي طيب هههه
الحاج محمد صبح الدبش :ألغي بنك التسليف ألم رؤوس أموال الجمعيات الزراعيه وأخلي جمعيه في كل محافظه تتعامل مع المصنع مباشرةً وتجيب توزع علي الجمعيات
الحاج محمد برغش:جمعيه مركزيه
الحاج محمد صبح الدبش :جمعيه مركزيه كرم جميع نمره 3 أطبق الدوره الزراعيه بقه نمره 4 أجيب عباس وأنزله نهر النيل يجب لي المفتاح بتاع الخزنه بتاع مركز البحوث الزراعيه أصل كانوا حاطين في مركز البحوث الزراعيه واحد بواب إسمه عباس الدكتور خالد عملت بحث آه طيب خدوا منه يا عباس محمد برغش عملت بحث خده منه يا عباس محمد صبح الدبش عمل بحث خده منه يا عباس وحط في الخزنه يا عباس لميت البحوث يا عباس قال له آه قال له أطلع علي كوبري قصر النيل إرمي المفتاح بتاع الخزنه يا عباس
خالد عاشور: ههههههههههه
الحاج محمد برغش:ههههههههههههه
الحاج محمد صبح الدبش :معينين لي دكاتره في مركز البحوث الزراعيه عاملين بحوث كان زمان من 15 سنه كان فدان القمح بيجيب 6 ارادب و8 أرادب بفضل البحوث الزراعيه والتقدم العلمي النهارده بيجيج من 20 ل 22 ما نستفيد من البحوث الزراعيه ديه ومن الدكاتره الأفاضل اللي شغَّالين دول إنما إحنا عندنا عباس موجود عايزين نشيل مهنة عباس ديه من البحوث الزراعيه
خالد عاشور: تمام الحاج محمد برغش
الحاج محمد برغش:في إيجاز عشان نشتغل بطريقة البرقيات أول شيئ لابد أن يصدر قانون بمرسوم بقانون والآن برد إعتبار للفلاح المصري بإنشاء نقابه مهنيه للفلاحين كما للمهندسين وكما للأطباء وكما لغيرهم لإن الفلاح يملك وينتج وليس بعامل ما يفعل في وزارة العمل والعمال عبث إن كل 200 يعملوا نقابه هذا عبث الفلاح ليس عامل الفلاح المنتج
2 - لابد أن تصدر الدوله وثيقة تأمين شامله لتغطية جميع مخاطر الزراعه المصريه .
3 - لابد أن يعود نبك التسليم زي ما قال الأخ الحاج محمد الي دورته القديه لإن بفلوسنا
4 – كيف تتعامل الدوله مع أمور جديده إستجدت الآن يا دكتور خالد إرتفعت أسعار الغذاء من أول يناير حتي الآن 42% أصبح تعريف الجوع الجديد في العالم أو مسمي تعريف الجوع الجديد في العالم مهما إمتلكت من النقود فإنك لن تستطيع شراء الغذاء لإن من يبيعك الغذاء يقرضك حياته ولم يسجل التاريخ أن يقرض إنسان لإنسان حياته ماذا تفعل الدوله مع سلة الحبوب الرئيسيه ومع سلة الغذاء أمي زمان كانت بتعمل الرغيف من 5 – 6 -7 أنواع من الحبوب الآن " ون سايت جيم " من القمح لابد أن يخلط بالذره لابد أن يخلط بالشعير لابد أن يخلط بمكونات الحبوب الأخري حتي نعظم من الإستفاده من سلة الحبوب ونستغني عن اللي بقطع رقبتنا شمال ويمين ده اللي إسمه القمح وبيذلنا بالدعم .. أنا رحت ألمانيا ورحت لقيت ألف نوع من الخبز – رحت اليونان لقيت 450 نوع من الخبز وكلها من الحب الكامل الذي لا يرمي منه قيد نمله نحن شعب نريد الويت – الويت – الويت اللي هو السم بتاعنا اللي هو دقيق أبيض السكر أبيض الملح أبيض والذي يدمر الصحه سيدي الفاضل عندما جلست مع الدكتور عصام شرف ولم يحدث أي شيئ جلست في أحد الجلسات مع الدكتور حازم الببلاوي بحضور وزير الكهرباء بحضور وزير الري بحضور وزير الزراعه وبحضور مدير بنك التسليف السابق وبحضور مدير الميزانيه ما تمنيت أن أكون في هذا الإجتماع لسبب يا دكتور خالد وجدت أن الزراعة ليس همت أحد .. ثانيا : عندما تكلمت مع وزير الماليه وتكلمت مع رئيس مجلس الإداره لبنك التنميه والتأمين الزراعي قلت له أن الثروه الحيوانيه والثروه والداجنه والمناحل لابد من تخفيض نسبة هامش الربح عليها من 18% الي 5 % قال لي ما نقدرش رد عليَّ مدير الميزانيه في وزارة الماليه وقال إحنا بس كفايه علينا القمح طيب الناس تاكل بعضها قال يوم أن ألغي مشروع التثمين يوم رفع عنه التأمين يوم أن رفع عنه تدبير العلف لاموآخذه المدعوم إنهارت الدوله ويوم سنة 2005 – من سنة 2004 أن تم تخفيض ميزانية وزارة الزراعه من 2 مليار و200 مليون جنيه الي 500 مليون جنيه تحقرت الزراعه تحقر الفلاح تعقر البحث العلمي زي أخونا ما بيقول عباس
خالد عاشور: وعلي فكره مركز البحوث الزراعيه خفضت ميزانيته بمناسبة كلامك يا حاج محمد
الحاج محمد برغش:حاقول لك كلمه يا حاج محمد من 437 مليون جنيه الي 27 مليون جنيه ما تكفيش حتي تجديد العربيات وتجيب حتي لاموآخذه إيه
خالد عاشور: دا ميزانية إيه
الحاج محمد برغش:دا مركز البحوث
الحاج محمد صبح الدبش :مركز البحوث أحنا بنتكلم بأرقام خلي بالك
الحاج محمد برغش:مركز البحوث بقي 27 مليون
خالد عاشور: يعني هي المشكله مش في عباس اللي قافل علي الأبحاث لأ هو ما فيش فلوس عشان الناس تعمل أبحاث تتخزن
الحاج محمد برغش:أيوه سؤال دكتور خالد الي من يهمه أمر بلدي لو لم تكن الزراعه مهمتكم في الأيام القادمه سنأكل بعضنا البعض لسبب لزيادة نسبة تصحر في العالم للتغيرات المناخيه لما هو حادث من جفاف ومصر من أول البوابات المؤهلة لذلك لابد أن نعظم من قدر الزراعه لابد أن نزرع كل المساحات القابله للزراعه لابد أن نبحث عن المياه وفي جوفها وفي باطنها لابد قبل كل شيئ يا د. خالد أن ندخل بمنظومه علميه حضاريه تستثمر مائه وتعظم منه إحنا ما عندناش صناعة بذور في مصر باعوا شركة نوباسيد للبذور الشركه الوحيده التي كانت تنتج بذور في مصر المفروض من باعها لابد أن يُحاسب باعوا شركة أبو زعبل يا د. خالد اللي كانت بتنتج جميع مركبات الأحماض فوسفوريك ونتريك وكذا وأول ما إشتروها وقفوا خط حمض الفسفوريك عشان مشتركين مع شركات صينيه وأردنيه أنا بأخاطب تاج الشرف المشير طنطاوي أرجوك المصنع الجديد الذي إفتتحته في الفيوم وهو فخر للصناعه المصريه لحمض الفسفوريك أرجوك أن تبيع كل إنتاجه لبنك التنميه والتأمين الزراعي أو للجمعيه العامه حتي يأتي للفلاحين بسعر مناسب أرجو من سيادة المشير طنطاوي أن يأمر ب "مصنع الإن بي كي" الذي أضافه وعملته القوات المسلحه أرجوا أن يتم بيع إنتاجه بماشرةً الي الفلاحين - الثالثه أن يعود مصنع البوتاسيوم التابع للقوات المسلحه كوحدة إنتاج عظيمه وبأرقي المعدلات كي يباع إنتاجه للفلاحين مباشرةً كذلك شركة النصر التي تنتج المبيدات لابد أن تبيع مباشرةً حتي تلغي الحلقه الوسطيه التي تأكل حياتي وجسدي
خالد عاشور: بمناسبة مناشدة المسؤولين يا حاج برغش إنتوا لو تفتكروا قعدنا مع بعض علي الهوا
الحاج محمد برغش:عندنا إجتماع قريب جداً
خالد عاشور: لأ إحنا قعدنا ليلة 9/9
الحاج محمد برغش:حصل .. حصل
خالد عاشور: عيد الفلاح ودا كان بمناسبة جلوسكم مع المجلس الأعلي ومع الدكتور عصام شرف
الحاج محمد برغش:حصل وهم عند وعدهم
خالد عاشور: إيه بقي اللي حصل خلال هذا الشهر
الحاج محمد برغش:اللي حصل الآتي طلب منَّا الإسبوع الماضي دعوة 30 فرح من كل محافظه تدعوهم الجمعيه العامه للإئتمان ، الجمعيه العامه للأراضي المستصلحه ، الجمعيه العامه للإصلاح الزراعي وسيأتون الي المجلي الأعلي للقوات المسلحه وسيجلسون مع سيادة المشير وسيادة الفريق سامي عنان والمجلس الأعلي وكل ما يقوله الفلاح سيُجاب وكل مشاكله ستُحل وفي خلال 10 أيام سوف نكون علي منصة سيادة المشير طنطاوي وسيادة الفريق سامي عنان والمجلس الأعلي للقوات المسلحه لحل مشاكلنا وأنا أثق فيهم
خالد عاشور: المطالب ديه قدمت بالفعل
الحاج محمد برغش:56 طلي متقدمين لهم
الحاج محمد صبح الدبش :كل المطالب ديه قدمت خلي بال سعادتك في نقطه إيه هي المهنه الوحيده اللي ليست منفصله هي مهنة الزراعه يتبعها صناعات عديده جداً
الحاج محمد برغش:هي مؤسسة الصناعه
الحاج محمد صبح الدبش :هي مؤسسة الصناعه
الحاج محمد برغش:هي الكلكليتر
الحاج محمد صبح الدبش :لازم ننهض بالفلاح النهارده لازم يكون فيه – عايز المجلس الأعلي للقوات المسلحه مشكور – مشكور وله ألف شكر لإن هو ما حولناش زي سوريا واليمن وليبيا وغيره وغيره لأ
الحاج محمد برغش:خير أجناد الأرض
الحاج محمد صبح الدبش :لأ دول خير أجناد الأرض إحنا بنشكرهم بس عايزين يكملوا لنا الجميل بقه
الحاج محمد برغش:إن شاء الله الإسبوع القادم
الحاج محمد صبح الدبش :عايزين نكمل الجميل بإيه بإن إحنا نلتفت للعامل وللفلاح لإن الفلاح ده هو رأسمال مصر – الفلاح والعامل رأسمال مصر ما نفتكرش وما نقلش بقي تعدادنا 90 مليون لأ دا دول رأسمال
الحاج محمد برغش:لن يأكلوا إلا بينا
الحاج محمد صبح الدبش :لو بصينا للعامل والفلاح والله بكسر الهه إن مصر تُعد من أعظم دول العالم إنما الحزمه السابقه برضه مش عايزين نتكلم كتير عليها كانت بتدوس علي الفلاح زي ما كنت بأقول لحضرتك "أ" قتل "ب" بتاع المصنع ييجي نحكم علي ب لجل يموت لجل بتاع المصنع يدهوسه تاني ما هي ديه مشكله ما هي ديه مصيبه أنا من هنا بأطالب سيادة المشير حسين طنطاوي رجوك .. نرجوك نبوس جزم بتوع بنك التنميه والإئتمان الزراعي ويحلوا عنَّا – يحلوا عن الفلاح
خالد عاشور: ههههه ما هو موضوع البنك ده إحنا قلنا من أهم المطالب آه عايزين بذور منتقاه يا جدعان
الحاج محمد برغش:فيه مصيبه يا دكتور خالد الدكتور محسن البطران لسه ماسك بقالوا أيام بصرخ في الجرائد وبيقول عندي عجز 700 مليون منين العجز 700 مليون آن الآوان أن يُدرس هذا البنك كي يكون بؤرة إنتاج وليس معوقاً وسالباً لعملية الإنتاج
الحاج محمد صبح الدبش :هو معوق للإنتاج يا حاج محمد
الحاج محمد برغش:أستأذنك .. أولا أنا بأعذر الدكتور صلاح يوسف لإن جاي علي وزاره فيها من البلاوي كتير ويلزمه فتره حتي يؤسس بيته من الداخل .. أنا كمان بأطلب من الدكتور هشام وزير الري رحمةً يا دكتور هشام أنت وأخيك وزير الزراعه ووزير الكهرباء بفلاحين مركز يوسف الصديق في الفيوم الذين حالهم يهين كل مصري أن يكون حال هؤلاء الفلاحين .. نقطه مهمه جداً يادكتور خالد لو لم نلتقي ولو لم يدعونا الفريق سامي عنان من إسبوع عشان هذا الموضوع وحنا بنأسس لهذا الإجتماع أنا كمحمد عبد المجيد برغش كنت فقدت ثقتي بنفسي لكن ما وجدته علي منصة الفريق سامي عنان والمجلس الأعلي للقوات المسلحه وجدت إن الفرح محترم معظم مقدر كما قال المرحوم محمد نجيب "الفلاح كريم في أرضه عزيز بين أهله وحكامه " الآن المجلس الأعلي للقوات المسلحه يعيد إعتبار الفلاح وإن شاء الله في خلال 10 أيام وأتمني أن يكون برنامجك حاضر معانا الإجتماع عشان يسجل ويغطي قدمنا مقترح لتطوير الزراعه المصريه بجهد علماء أفاضل مصريين .. قدمنا مقترح لتطوير قانون التعاون المصريه بجهد علماء التعاون الزراعي اللي هو أساس بلاء الزراعه المصريه عشان نطوره قدمنا أكثر من 50 شكوي لفلاحين مصر من شلاتين الي البحر الأبيض المتوسط الي حدود فلسطين الي حدود ليبيا الحبيبه الجديده المحرره حتي نحكي كل تفاصيلهم لم نهمل أهل في سيناء إتكلمنا عنهم لم نهمل أهل عطر مصر في النوبه تكلمنا عنهم لم أهمل أهلي في الواحات وفي الصحراء الغربيه
خالد عاشور: مشاكل الفلاح واحده
الحاج محمد برغش:ما أهملناش حد يا دكتور خالد وقدمناها بإسلوب علمي محترم إستثمرنا فيه المعرفه اللي ربنا إدهلنا حتي نؤسس لمجتمع محترم نذهب بمشاكله الي من يحترمون الفلاح حتي نخرج بقرارات صائبه نجلوا بها الأمر والله يا د. خالد أنا ما بأقول ولا بأهوِّل التعريف القادم والجوع القادم يسحق العظام مهما أمتلكت من نقود والله لن نستطيع أن نشتري الغذاء في الأيام القادمه وأرجو أن ربنا ينقلنا من هذه الأزمه
الحاج محمد صبح الدبش :علي فكره بالمناسبه ديه أنا بأناشد أستاذنا الدكتور صلاح يوسف والدكتور هشام قنديل علي المطلب اللي أنا طلبته منهم يوم 9 /9 فيه قري بتترمي فيها الصرف الصحي وطلبت ضمهم للري ولم يتم فيهم أي حاجه ثم أنا عندي سهل الحسنيه في فقوس أرض ما بتوصلهاش الميه إلا في الشتاء والصيف لأ رغم إن الناس إستصلحتها إحنا عايزين النهوض بالفلاح
خالد عاشور: إحنا عايزين نلخص ما قلناه
الحاج محمد برغش:عندي برقيه صغيره يا د.خالد
خالد عاشور: سريعاً عشان الوقت
الحاج محمد برغش:أولا ما هي الزراعه يا د.خالد بسرعه أرض وماء وإنسان وبحث ومال ما لم تتحقق هذه المنظومه الخماسيه وبكفاءة لن تستقيم الزراعه في مصر
خالد عاشور: رائع جداً يبقي إذن إنتهينا خلال هذه الحلقه الي الإبقاء علي نسبة العمال والفلاحين 50%
الحاج محمد برغش:ما لم يكون لنا أحزاب مثل باقي المجتمع
الحاج محمد صبح الدبش :أو دقيقه واحده أضيف أو بقه إذا كانت حيبقي علي ذلك وحيتم قوائم يبقي العامل والفلاح علي رؤوس القوائم
خالد عاشور: تمام الإلقاء علي نسبة 50% عمال وفلاحين وتعديل التشريع الخاص بمنع
الحاج محمد برغش:تكوين أحزاب للفلاحين والعمال
خالد عاشور: إنشاء أحزاب – لكي يكون هناك حزب للعمال وحزب للفلاحين
الحاج محمد برغش:مثل باقي الناس
خالد عاشور: وتشديد الضوابط علي صفة عامل وفلاح في الإنتخابات البرلمانيه
الحاج محمد برغش:بشرط أن لا يكون للفلاح رقم تأميني أو معاش
خالد عاشور: تمام زي ما حصل وعرض بقية مشاكل الفلاحين اللي حضراتكم تفضلتوا وذكرتوها
الحاج محمد برغش:إن شاء الله علي منصة المشير الإسبوع اللي جاي
الحاج محمد صبح الدبش :إن شاء الله إحنا حنبقي موجودين وندعوك
الحاج محمد برغش:وبندعوك إنك تكون معانا
خالد عاشور: إن شاء الله إحنا معاكم دائما
الحاج محمد صبح الدبش :نشرف بيكم تكونوا معانا لاجل تناقشوا الموضوع دا
الحاج محمد برغش:يادكتور خالد أنا بأشكركم لإن إحنا دلوقت سدة أمامنا جميع المنافذ الإعلاميه لم يبقي لنا إلا التليفزيون المصري تليفزيوننا
الحاج محمد صبح الدبش :ونحن مصريين وتليفزيون مصر لنا زي ما كنت بأقولها بعد إذنك يا حاج محمد يا برغش لما كنت بأقولها للدكتور يحيح الجمل قلت له مجلس الشعب مش بتاعك ولا بتاع المستشار سامي مهران دا بيت الشعب ودا تليفزيون المصريين وإحنا المصريين ولازم يكون للفلاحين جزء من الوضع هنا
خالد عاشور: والتليفزيون كل المصريين بيرحب بكم في أي وقت شكرا لكم جميعا الحاج محمد برغش الفلاح الفصيح
الحاج محمد برغش:اشكرك شاكر وسعيد بك
خالد عاشور:الحاج محمد صبح الدبش زعيم الفلاحين شكرا
الحاج محمد صبح الدبش :أنا سعيد بك يا د. خالد
خالد عاشور: وشكراً لكم مشاهدينا الأعزاء والي اللقاء في حلقه قادمه من برنامج