أنغام: شغلنا متعب ولست موسوسة بدرجة مرضية

وصفت المطربة أنغام عملها بأنه "شغلانة متعبة"، مؤكدة أن من يعمل بها إذ لم يحبها ولم تكن هي شغفه وحياته سيتعب فيها كثيرا وربما يبتعد عنها بعد فترة.
وتابعت أنغام في حوارها مع الإعلامي عمرو أديب، في حلقة ضمن برنامج الحكاية المعروض على قناة MBC مصر: "شغلانة متعبة كلها لو انت مش بتحبها وهي شغفك وحبك وحياتك ممكن تتعب أوي وتبطل، بس لاني بحبها ومعنديش شغف في حاجة تانية اكتر من الموسيقى فهي حياتي، ومتعبة جدا للي زيي الموسوسين والدؤوبين، أنا بدقق في التفاصيل ومش موسوسة بدرجة مرضية، يمكن ده اللي نجحني".
وخلال الحوار تحدثت عن رؤيتها للحفلات في الرياض، قائلة "فيها ميزة الحقيقة مختلفة تماما ممكن تسمع كل أنواع الموسيقى في الرياض، كل الأشكال الموسيقية حتى الفرق الغربية والاندرجراوند كل الناس، تسمع الكلاسيك والشعبي بيعملوا كل حاجة ليها مكانها وجمهورها وتقديرها، والجمهور مستوعب جدا وذواق وجميل وحبوب وبيحب الناس، واضح انه جمهور مستعد".
وعن عدم تقديمها لأعمال على مستوى التمثيل، بعد تجربتها في مسلسل "في غمضة عين"، علقت "مش عارفة ممثلتش تاني ليه يمكن يتعرض عليا في وقت من الاوقات حاجة، ويمكن اكمل بس في الغنا والتمثيل يكون بس في الكليبات".
كذلك تطرقت أنغام في الحوار لعلاقتها بابنيها عمر وعبدالرحمن: "العيال هم اللي بيربوني، أنا ربيت خلاص، ربيتهم بالحنية، وبالصحوبية والصراحة ونفتح اي مواضيع في اي حاجة نتكلم فيها مش بنمثل على بعض".
وأضافت "وصلتهم لمرحلة يصعب عليهم يزعلوني وأنا مش باجي عليهم مش معنى كده إن لازم ينفذوا كل حاجة أنا عايزاها"، وأشارت أن نشاطها في الحياة ينقسم بين عملها بالموسيقى وأولادها والرياضة وأحيانا تقوم بالطبخ، إلى جانب مشاهدة الأفلام ومتابعة مباريات كرة القدم مع أولادها.
عرض برنامج "الحكاية" تقديم الإعلامي عمرو أديب، مساء أمس السبت 18 مارس، لقاء مع المطربة الكبيرة أنغام، على هامش حفلها "ليلة صوت مصر" والذي أحيته في الرياض بالمملكة العربية السعودية، قبل يومين.
وقالت أنغام عن كيف تنظر لرحلتها قبل التكريم "شعور غريب يمكن الواحد بيتسرق وهو ماشي في المشوار، مش حاسس الدنيا وخداك والشغل واخدك، بتفكر وبتدور على المبدعين، طول الوقت في الاستديو، طول الوقت على المسرح، طول الوقت سفر، مش قادرة اقول ان عمري اتسرق بالعكس ده عمري".
وتابعت تعليقا على سؤال عمرو هل تشعر بأنها قدمت كل ما تريد: "مش حسيت اني عملت كل اللي انا عايزاه بس احترمت اللي عملته، العمر ده فيه انجاز كبير، أنا ابتديت عندي 15 سنة، هقول الحقيقة بقى وبقالي حاجة وتلاتين سنة بغني".
وأضافت أنغام عن اختيار توقيت التكريم وهي في مازالت قادرة على العطاء، وهل كان من الأفضل أن يتأخر مثل هذا التكريم: "أنا حاسة ان ده توقيت كويس لان الحمد لله بصحتي وأقدر أغني العدد ده من الأغاني، وأقول معظم تاريخي، لا بالعكس لازم نعمل حاجة والواحد بكامل طاقته عنده الحواس وشغف بتاع وقفة المسرح".
ليلة صوت مصر من تنظيم الهيئة العامة للترفيه برئاسة المستشار تركي آل الشيخ، وتأتي تكريما للمطربة أنغام، في حفل بقيادة المايسترو الكبير هاني فرحات، ومشاركة مجموعة من النجوم: أحلام، تامر عاشور، محمد حماقي، ويجز.