أسيب نفسي أحبه!

أنا عندي 20 سنة رايحة سنة رابعة، عمري ما ارتبطت بحد خالص في حياتي ما أنكرش إني كنت باكون معجبة ببعض الأشخاص بس ده مجرد إعجاب فقط، ومش حب خالص.
المهم في نهاية سنة 3 جت لي مكالمة على الموبايل وقال لي أنا أعرفك وزميلك في الكلية وما تعرفيش أنا عملت إيه لحد ما جبت رقم تليفونك، المهم قفلت السكة وما رديتش بس هو حاول يكلمني كتير لحد ما رديت عليه وقال لي أنا معجب بيكي وعايز أرتبط بيكي وأنا قلت له أنا ما أعرفكش عشان أرتبط بيك، بعد كده كلمني ووافقت إني أشوفه في الكلية كزميل بس هو صارحني بحبه لي، وبصراحة أنا اتشديت له ولكلامه وبقالنا فترة بنكلم بعض..
أنا حاسة إنه بيحبني أوي وأنا كمان حاسة إني بدأت أحبه.. مش عارفة أكمل معاه ولا لأ، خايفة أدخل في تجربة مش عارفة هتنتهي على إيه..
o.
صديقتنا العزيزة:
الحب يمكن بيختلف عن كل حاجة في حياتنا محتاجة لتخطيط وترتيب وتفكير قبل ما نعملها, فيمكن الحب قريب من نظام التنسيق, اللي بيدخل طالب له ميول معينة كلية بتختلف مع ميوله تماما بس بتناسب مجموعه, يعني ممكن أوي نحب شخص ما ينفعش نحبه, فالحب شيء مش بإيد حد, فمستحيل نقعد نفكر ونخطط نحب ده وما نحبش ده, بس لو حصل وحبينا شخص ما ينفعش نحبه لاعتبارات كتير, زي إن السن أو الظروف ما تسمحش بالجواز في وقت قريب, وإن علاقة زي دي هتستمر في الخفاء من دون علم الأهل، ومن غير رضا ربنا, ودي كلها أسباب تخليني أفرمل نفسي, يمكن ما أقدرش أوقف قلبي اللي بيدق لواحد معين, بس اللي أقدر أوقفه انجرافي معاه في علاقة أنا عارفة ومتأكدة إنها مش هتنتهي نهاية سعيدة, وإنها هتكون سبب جرحي وألمي لسنين طويلة, فأرجوكِ فكري كويس قبل ما تسيبي نفسك تحبيه, وربنا يهديك للخير.