راندا البحيري تبكي على شيرين:"مكنتش حابة توصلي للمرحلة دي من الوجع" (فيديو)

ظهرت الفنانة راندا البحيري، وهي تبكي على الفنانة شيرين عبدالوهاب، وتحدثت عنها ومدى حبها لها بمقطع فيديو عبر حسابها على "فيسبوك".
وقالت راندا، بالفيديو: "بتمنى تكوني دلوقتي كويسة، وأنا متعلقة بشيرين أوي، وأول مرة زعلت من شيرين أوي لما عرفت انها هتعتزل الفن قبل كدة، ووقتها كنت حزينة ومخنوقة بشكل كبير، وحسيت إن قرار اعتزالها مش ملكها، وده حق مش حقك، يعني شيرين بتاعت المصريين، يعني احنا هنتمنع نسمع صوت شيرين تاني، وفضلت أقول يا رب الكلام ده ميطلعش صح، ولو اعتزلت هتمنالها كل توفيق".
وتابعت: "قرار اعتزالها قبل كدة ضايقني جدا، وتعبني، وكنت مضايقة اننا مش هنستمتع بشيرين كمطربة تاني".
واستكملت: "بتمنى انك تكوني عارفة غلاوتك ومقدارك عند ناس كتير جدا كبير، والواضح انك مش عارفة كده خالص، لأنك لو عارفة المشكلة هتخلص، والواحد دايما محتاج دافع عشان يعيش عشانه، ومحتاج حاجة يبقى عايش لها، تجدد شغفه عشان يعيش في الدنيا.. حب الناس والشغل حاجة كبيرة جدا، إنها تخلي الواحد يبقى عايش ويتمسك بالدنيا ويقف قدام أي مرض وأي حاجة لو متأكد ان اللي حوليه بيحبوه، وإن فيه ناس كتير أوي ممكن تتأثر بجد وتزعل على زعله وتتبسط لإنبساطه".
وأوضحت: "أنا محبة لشيرين بشكل كبير، وهي صعبانة عليا جدا جدا، ومضايقة عشانها أوي، ومكنتش حابة خالص إنها توصل للمرحلة دي من الوجع، وبدعيلك يا شيرين من قلبي، وبحبك والله أوي".
وأضافت: "هفضل مضايقة عشانك يا شيرين لحد ما تبقي كويسة، وأوعديني وأوعدي جمهورك انك ترجعلنا قوية وكويسة وحلوة، واحنا بنحبك أوي".
وتمر الفنانة شيرين عبد الوهاب، حاليا بأزمة نفسية وصحية، حيث تتواجد حاليا داخل مستشفى علاج الأمراض النفسية والإدمان.
وكان المستشار ياسر قنطوش محامي شيرين عبدالوهاب، قد حرر محضر إثبات حالة رقم 12436 لسنة 2022، إداري النزهة، ضد محمد عبد الوهاب شقيقها، عقب واقعة تعديه على شقيقته بالضرب.
شقيق شيرين عبدالوهاب، من جهته خلال المداخلة الهاتفية مع برنامج "الحكاية"، قال: "أنا مضربتش أختي، ووالدتي استرجتني عشان أنقذ أختي من الإدمان، والأستاذ حسام حبيب رجع لشيرين من حوالي أسبوع، جابولها العربية بتوكيل وهي تنازلت عن القضايا، وهو متنازلش، وضحكوا عليها، ورجعوا لبعض وبيتكلموا على الواتس آب".