"مرعب وياخد جائزة أحسن ممثل".. الجمهور يشيد بأداء باسم سمرة في "منعطف خطر"

نالت الحلقة السابعة من مسلسل "منعطف خطر" والذي يعرض عبر منصة "شاهد vip"، إشادة واسعة من مشاهدي المسلسل عبر مواقع التواصل الاجتماعي.
وحظى الفنان باسم سمرة بالإشادة الأكبر بسبب أدائه في مشهد دفن ابنته "سلمى" والتي تؤدي دورها الفنانة سلمى أبو ضيف.
ومن بين التعليقات حول الحلقة السابعة من مسلسل "منعطف خطر" عبر موقع "فيسبوك": "مسلسل منعطف خطر فيه سم قاتل حقيقي والله.. باسم سمرة مرعب فعلا.. كمية وجع قلب غير طبيعية ومتقدرش متكملش عشان تعرف حيحصل إيه.. فيه خطوط كتير أوي بتلمس مع قضايا مهمة.. اللي كاتب السيناريو عبقري.. الإضاءة والملامح والنظرات ولغة الجسد عمومًا بتتكلم أكتر بكتير من الكلام المكتوب.. الظهور المتميز لأحمد ماهر وهو بيقوله لما راح قال يعزيه (الله لا يحرمك من الزعل!) إيه يا عم الجبروت ده.. الحلقة 7.. أما نشوف آخرتها".
وكتب آخر: "باسم عمل مشهد من بداية تخيله بنته هي طفلة لحد دفنها.. من غير أفورة ولا صريخ وصوت عالي.. الحلقة 7 من ( منعطف خطر) باسم من غير كلام كده ياخد جايزة أحسن وأروع وأصدق ممثل بجد.. هو بيعمل عظمة من أول المسلسل بس في عظمة أعظم من العظمة.. أداء 10/10.. إخراج رائع".
وكتب ثالث: "المشهد ده اتعمل مليون مرة وتقريباً كل سنة بقى لازم بنشوف عندنا شكل من أشكاله في مسلسل مختلف.. ولكن الاختلاف هنا اللي بيميزه بالنسبالي إن الراجل ده ربنا مميزه بملامح حادة وغليظة فمش من السهل إنك تتعاطف وتتأثر معاه بسرعة.. ولكن بالعكس أنا تقريباً ده أكتر مشهد من النوعية ديه يهزني وأتأثر بيه كده .. باسم سمرة وهو فكامل لياقته مش طبيعي ممثل من طراز نادر.. منعطف خطر 2022".
وكتبت رابعة: "أنا من زمان وأنا بحب باسم سمرة وشايفاه ممثل موهوب جدا، رغم أن في البداية كان دايما المخرجين بيحطوه في أدوار الواد الشعبي ابن البلد، لكن هو ممثل متنوع جدا، ومع مرور الوقت قدر يورينا دا،
وفي مسلسل (منعطف خطر) أبهرنا كلنا بأدائه وعرف يوصلنا ويعيشنا حالة الأب اللي فقد بنته.. بصراحة أنا مبسوطة بيه جدا".
مسلسل "منعطف خطر" بطولة باسل خياط، محمد علاء، سمر مرسي، باسم سمرة، ريهام عبد الغفور، آدم الشرقاوي، وسلمى أبو ضيف، وأحمد صيام وغيرهم.