"ملهاش علاقة باللائحة".. اتحاد الكرة عن مكافأت لاعبي منتخب مصر

علق خالد الدرندلي، نائب رئيس اتحاد الكرة المصري، على حالة الجدل حول مكافأت المنتخب، قائلًا: "موضوع اتقفل والمكافأت دي مش بتاعت الفوز أو اللائحة، لأن اللائحة حاجة تانية خالص"، مضيفًا: "المكافات دي بعيد عن اللائحة واللائحة أرقام تانية خالص دي مكافات إضافية إستثنائية وملهاش ثقة باللائحة".
وأوضح "الدرندلي" في مداخلة هاتفية لبرنامج "كلمة أخيرة" على فضائية "أون إي" اليوم السبت: "أن لاعبي منتخب مصر لهم قيمة وقدر كبير ومش دا المبلغ اللي هتشتت اللاعبين، والأمور كبرت معرفش ليه"، متابعًا: "الرقم اللي اتقال عليه اترفع وكل مره أكتر وكل دا مش اللائحة لأنها أرقام تانية خالص ودي مجرد حاجة للأداء بره اللائحة، والرقم اترفع ل 1500 دولار ولاعبينا تستاهل أكتر بكده مليون مرة".
وتابع: "لاعبيتنا بنقدرهم والدولة تقدرهم وهما ليهم شأنهم ومش هيبصوا للحاجات دي خالص والناس مركزة وفي منتهى الاحترام والتعاون والحب ومتفائلين ولسه بنصلي الجمعة امبارح وبنقول يارب الجمعة الجاية نصليها هنا برده في المباراة النهائية"، موضحًا أن المدير الفني كارلوس كيروش شخصيته قوية ومستواه كان مبهر أمام كوت ديفوار.
وأردف: "لازم ندي كيروش حقه، وده ظهر في الانسجام التفاهم في مباراة كوت ديفوار وإن شاء الله هنوصل للفاينال ونكسب."
وعن الإصابات بين صفوف اللاعبين، قال: "الإصابات الموجودة في المنتخب كلها حاجات بسيطة، والروح حلوة عند اللاعبين".