عُمر السعيد: حماس كل اللي شارك في 678.. هو سبب نجاحه.!

ممثل لسه في بدايته بس مُختلف، موهوب ودمه خفيف جداً ومحظوظ قوي مع الأرقام، شارك في فيلمين أثاروا جدل كبير، وتميز في دوره في كل فيلم، عشان تعرف أكثر عن عمر السعيد.. اقرأ السطور اللي جايه .
بدايتك في التمثيل كانت مع فيلم "واحد - صفر" جات إزاي ؟
أنا كنت وقتها لسه في الجامعة، وعرفت من مدام ناهد رمزي إن المخرجة "كاملة أبو ذكري" عايزة وجوه جديدة، ورُحت فعلاً لقيت ناس كتير جداً، ولما دخلتلها أخدت منها دورين أقراهم، وكانت متفاهمة وذوق جداً، كان ليا فرصة يومين أتدرب عليهم كويس وأروحلها تاني، ومن هنا أخدت دوري في الفيلم .
حضرت ورش تمثيل قبل كده ؟
أنا كنت بحب طبعاً أقرأ وأتابع أي حاجة عن التمثيل، بس الورشة الوحيدة اللي اتدربت فيها كانت مع مروة جبريل، أنا أصلاً كنت أعرفها من زمان لأننا أصحاب، وهي شجعتني جداً ودربتني علي دوري في فيلم واحد - صفر .
إزاي شاركت في فيلم "678" ؟
محمد دياب شافني في واحد - صفر، ورحت قابلته وقَبَلت الدور.. وكنت مستغرب جداً الناس اللي رفضته قبلي؛ لإني شايف الفيلم حلو قوي، وتلاتة من أصحابي رافضينه ما كنتش فاهم وجهة نظرهم، ومثلته ومقتنع إنه هيعمل حاجة مختلفة .
كان رد فعلك إيه لما عرفت إن قصة الفيلم عن التحرش الجنسي في مصر ؟
أنا أصلاً كنت عامل مشروع في الجامعة عن العنف ضد المرأة، من الضرب والتحرش والاغتصاب، يعني الموضوع أصلاً شاغل دماغي جداً، ولما دخلت في الفيلم بقي عندي حماس تجاه الموضوع، وأنا وكل كاست الفيلم اشتغلنا إنه يطلع بشكل كويس، وكلنا فخورين إننا في فيلم بيناقش حاجة مهمة زي دي .
فيه ناس قالت إن الفيلم مباشر قوي، وإنه بيكثف جرعة كبيرة من الرسائل الأخلاقية بصورة غير ضرورية ؟
بالعكس أنا شايف دياب عمل الفيلم بذكاء، ولو لاحظتي هتلاقي ناس بتقول الفيلم مباشر قوي.. وناس تقولك مش مباشر خالص، دي وجهات نظر، والاختلاف في الأول وفي الآخر ما ضرِّش الفيلم، بس أنا وجهة نظري إن الفيلم مش مباشر ومعمول بذكاء ورؤية مختلفة .
كنت متوقع الجائزتين اللي أخدهم 678 في مهرجان دبي ؟
كنت متوقع جداً، وبشري وماجد كانوا هايلين، وكل اللي اشتغل في الفيلم ده تعب فيه جداً، والجائزتين دول زي ما كانوا لبشري وماجد.. يعتبروا لدياب كمان لأنه مخرج هايل .
ما كنتش خايف من المشاكل اللي اتعرَّض لها الفيلم خصوصاً إنك لسه في بدايتك ؟
خالص بالعكس.. أنا كنت شايف إن الفيلم ده هيعمل حاجة كويسة، والضجة دي هتفيده، وكمان لأن فيلم واحد - صفر اتهاجم كتير، واترفع عليه قضايا وحاجات غريبة؛ فما كانتش أزمة بالنسبة ليا، طالما أنا مقتنع إن الفيلم كويس وبيناقش حاجة مهمة .
إيه رأيك في ردود الفعل علي دورك في 678 ؟
الحمد لله ناس كتير أشادت بالدور، بس فيه ناس بتقارن بينه وبين واحد - صفر مع إن ما فيش وجه مقارنة، بس الحمد لله.. الناس لما تقابلني بتقولي كلام حلو قوي الحمد لله .
إنت اللي صممت لوحات الأرقام اللي استخدمت في الإعلان ؟
آه أنا اللي عملتها، الفكرة جات في دماغي وأنا في الشركة، جبت ورقة ورسمت اللوحة عليها، وكلمت محمد دياب وعجبته الفكرة واختار ترتيب الكلمات وأرقامها، وأهم حاجة - عشان في ناس فهمت غلط - أنا ما عملتش الإعلان ولا الأفيش.. أنا عملت شكل لوحات العربيات، وبجد أحلي حاجة في الفيلم إن كلنا كنا مقتنعين بالفكرة، وكل واحد كان بيحاول يساعد ويعمل أي حاجة مختلفة .
ممكن تشتغل "ستاند أب كوميدي" زي دورك في الفيلم، أو تشتغل في الدعاية خصوصاً إنها تخصصك في الدراسة ؟
لأ طبعاً.. أنا بحب التمثيل، ومش كل ما هعمل دور ويعجب الناس أعمله في الحقيقة، وموضوع الدعاية زي ما قلتلك جات نتيجة حماس للفيلم مش أكتر، بس مش هتبقي حاجة دائمة .
قدمت أي مسلسل في التلفزيون ؟
كان ليا تجربة واحدة مع الفنانة إلهام شاهين.. مسلسل "نعم مازلت آنسة"، اتعرض رمضان اللي فات، هي رشحتني للدور بعد فيلم واحد – صفر، وعملته رغم إنه صغير، بس أكيد أضاف لي .
"الممثل أو المخرج لما يبدأ يناقش مشاكل أو قضايا اجتماعية يبقي تحول لمُصلح اجتماعي"... إيه رأيك في الكلام ده ؟
هقوله آه.. أنا ممثل، ولو مخرج ما عنديش مشكله أبقى مصلح اجتماعي لما يكون الرموز والمثل العليا ما بقتش موجودة، وما فيش كمان حاجة بتناقش المشاكل بصورة صح؛ يبقي السينما كده بتحاول تصلح وتعمل حاجة المفروض نحترمها، وأنا مقتنع إن دي حاجة صح ومحترمة وبتأثر في الناس .
نفسك تمثل مع مين من المخرجين ؟
خالد يوسف.. الراجل ده بجد دماغه هايلة، وعنده فكر مختلف حتي لو اختلف معاه ناس كتير، بس ده منطقه هو وأنا بحترمه، ونفسي أشتغل معاه .